Nte Afo Emesitiene Item?

IMA ima ete eyeteme nditọ esie man mmọ ẹkpekụt unen ke uwem ẹnyụn̄ ẹkop inemesịt ke ini mmọ ẹkabarede ikpọ owo. Ndien nditọn̄wọn̄ oro ẹmade ẹnyụn̄ ẹkponode mme ete ye eka mmọ ẹyebọ utọ item ntre sia mmọ ẹfiọkde ke emi edi ke ufọn mmimọ. Kpasụk ntre, ima ima Ete nnyịn eke heaven, Jehovah, ọmọnọ mme asan̄autom esie ndausụn̄ oro adade edikụt unen ye idatesịt ọsọk uwem mmọ. Ntre, edi akpan n̄kpọ nte nnyịn itiene item oro Abasi ọnọde nnyịn ebe ke Ikọ esie, kpa Bible, ye esop esie eke isọn̄.

Ke Ubon

Nsio nsio ikpehe ẹdu ẹmi ẹsinọde nnyịn item. Kiet edi ke ubon. Abasi ọkọtọn̄ọ ndọ ye ubon. Bible ọdọhọ ete ke Abasi akadian ndọ akpa eren ye n̄wan onyụn̄ ọdọhọ mmọ ẹnyene nditọ. (Genesis 1:27, 28; 2:22-24) Andibot ọmọnọ kpukpru mme andibuana ke ubon item aban̄a utom mmọ kiet kiet. Ke uwụtn̄kpọ, ebe ye ete edi ibuotufọk, emi ọwọrọ ke enye enyene mbiomo edinọ item, udia, ọfọn̄, itie udakibuot, ukpeme, ye ntụnọ. Enye n̄ko anam mme akpan ubiere ubon. Nte ebendọ, enye ekpenyene ndiwụt edikere mban̄a nnọ n̄wan esie onyụn̄ ọnọ enye ukpono nte owo emi ememde akan. (Ephesus 5:22, 23; 1 Timothy 5:8; 1 Peter 3:7) N̄wan ekpenyene ndidu ke nsụkibuot nnọ ebe esie, owụt enye ntotụn̄ọ ukpono, onyụn̄ edi andin̄wam ye andinam enye ọyọhọ. N̄wed Abasi onyụn̄ osio owụt ete ke akpana nditọ ẹkop uyo ẹnọ mme ete ye eka mmọ.​—Genesis 2:18; Ephesus 6:1-3; 1 Peter 3:1, 2.

Nso isitịbe edieke ẹfụmide item ẹmi? Unana edidu ke n̄kemuyo ye utọk ẹsida itie ke ini mme ebe mîkereke iban̄a ibanndọ mmọ, ibanndọ ẹnyụn̄ ẹwụtde esisịt ukpono ẹnọ itieibuot ebe. Ke akpanikọ, mme utọ n̄kpọ ntre ẹma ẹnam ediwak ndọ ẹbiara. Unana n̄kopitem ye nsọn̄ibuot nditọn̄wọn̄ amada akwa mfụhọ ọsọk ediwak ete ye eka. Ediwak ini, mme ete ye eka ẹsinyene akwa nduduọhọ ke ntak mîkọnọhọ nditọ mmọ nnennen ntụnọ, ntem ẹfiomode-fiomo mmọ.​—Ephesus 6:4.

Okposụkedi mme anamutom n̄kaowo, mme ekpepn̄kpọ mban̄a ekikere, ye mbon en̄wen ẹnọde ata ediwak nsio nsio ekikere ke nte ẹkpesede ẹban̄a mme mfịna ubon, idụhe item ndomokiet oro enyenede ufọn akan item ẹmi Andibot ubon ọnọde ke Bible. Nditiene mmọemi amada ata inemesịt ye uyụhọ edi.​—Psalm 19:7-9.

Ke Esop

Nnyịn ikpenyene nditiene item ẹmi Ibuot esop Christian, Jesus Christ, ọnọde ebe ke “asan̄autom emi anamde akpanikọ, onyụn̄ enyenede ọniọn̄,” kpa n̄kpọutom oro ẹmekde ke esop Abasi mi ke isọn̄. (Matthew 24:45-47; Ephesus 5:23) Man ẹnyene emem ye edidianakiet ke esop, kpukpru mme andibuana ke enye ẹnyene ndinam n̄kpọ ke n̄kemuyo ye ndausụn̄ ẹnọde. Ke uwụtn̄kpọ, mbon oro ẹdade usụn̄ ke ndinọ esop ukpep ye ke ndin̄wam mbon en̄wen ẹnyene ndisọn̄ọ nyịre ke mme ndausụn̄ oro mmọ ẹbọde ẹto esop Jehovah. Emi eyetịp n̄kpọ esịn ke ndinam utom mmọ enyene uforo. Item ẹmi ẹkeme ndidi ke nte ẹkpebuanade ke utom ukwọrọikọ, nte ẹkpesede ẹban̄a mme mfịna ke esop, nte ẹkpenọde item ye nsịnudọn̄, nte ẹkpedọn̄de mbon ukụt esịt, ye mme n̄kpọ ntre. Ndausụn̄ ẹdu n̄ko ke nte ẹkpetịmde mme mbonoesop ẹmi ẹyọhọde ye item ẹnyụn̄ ẹbọpde-bọp ẹnọ kpukpru mbon oro ẹbuanade ye esop Christian.​—Utom 20:20; Rome 12:6-8; Galatia 6:1; 1 Thessalonica 3:1-3.

Mbiowo esop, m̀mê mme esenyịn, akpan akpan ẹkpenyene ndinịm eti uwụtn̄kpọ ke afan̄ emi. Otu Ukara ọmọnọ item ẹmi mbiowo ẹkpetienede ke ntịn̄enyịn ye ke edinam akpanikọ. Mmọ ẹkpenyene ndida nnyụn̄ nnam item ẹmi ẹkekem ye mme idaha n̄kann̄kụk. Ana nnyịn iti ite ke enyeemi ọnọde esop Christian ndausụn̄ edi Jesus Christ. Enye ke mfọnmma usụn̄ ọmọfiọk mme n̄kpọ oro kpukpru esop ke ofụri ererimbot ẹyomde, enye omonyụn̄ ọnọ nsịnudọn̄ ye un̄wam oro ẹyomde. Ke ntre, mbiowo ikpemen̄eke ndida ndausụn̄ ekededi oro mmọ ẹbọde ẹto esop ukara Abasi nsịn ke edinam. Emi eyedi eti uwụtn̄kpọ ọnọ kpukpru owo ke esop kiet kiet onyụn̄ an̄wam mmọ ndidiana kiet ke otu idemmọ ye otu nditọete Christian eken ke ofụri isọn̄​—Utom 15:1-31; Mme Hebrew 13:7; Ediyarade 5:6.

Mme Idara Idara Utịp

Ke ini ọbọpufọk ọbọpde akwa ufọk, enye ye ntịn̄enyịn esitiene ndutịm otịmufọk man se enye ọbọpde ẹkpebịghi. Ke afai afai eyo emi ekebemde Ukwọ iso, ẹma ẹnọ Noah utom ubọp ubom. Ẹma ẹsian enye nte ẹdibọpde ubom oro ye mme owo ye unam ẹmi ẹdidade ẹsịn ke ubom oro man ẹbọhọ Ukwọ oro edide. Didie ke Noah akanam n̄kpọ? Bible ọdọhọ ete: “Noah anam kpukpru se Abasi eketemede enye, ntem ke enye anam.” Noah ikpọn̄îkpọn̄ ye mbon oro ẹkedude ye enye ke ubom ẹkebọhọ Ukwọ oro. (Genesis 6:5, 13-22; 7:23) Mfịn, nnyịn idu uwem ke eyo oro otịmde ebiet eyo Noah, ndien ke ntak emi Abasi eyesobo kpukpru ndiọi owo efep. Bible asian nnyịn mme n̄kpọ oro anade nnyịn inam edieke nnyịn iyomde ndidu ke otu mme andibọhọ.​—Matthew 24:37-39; 2 Peter 3:5-7, 11.

Ke ntre, ẹyak nnyịn ibọ ye esịtekọm inyụn̄ ida item ẹmi Jehovah ọnọde ebe ke Ikọ esie oro ẹwetde-wet ye esop esie eke isọn̄ isịn ke edinam. Ndinam emi eyenam nnyịn ikụt unen ye idatesịt eyenyụn̄ anyan̄a uwem nnyịn n̄ko.