Ntak Réunion Enyenede Ata Ediwak Ufọkmbono Obio Ubọn̄
N̄KPỌ nte itiat 400 ke n̄kan̄ edem usiahautịn Madagascar, ekpri isuo Réunion ọmọwọrọ ada nsọbọ nsọbọ ke akwa Indian Ocean. Okposụkedi edide n̄kpasịp itiat 40 ke uniọn̄ ye itiat 30 ke ubom, ẹtịm ẹdiọn̄ọ isuo emi ke ntak ikpọ obot nsụn̄ikan̄ esie ye ikan̄ oro esitopde ọwọrọ ke ini ke ini. Ata etịn̄e oro, emi adahade ọkpọn̄ ikpammọn̄ ke ikpat 10,069, edi obot nsụn̄ikan̄ Piton des Neiges (Etịn̄e Obot Snow) oro mîwọrọke nsụn̄ikan̄ aba. Ke n̄kan̄ edem usụk isuo oro, ọwọrọ-uye obot nsụn̄ikan̄ odu oro okon̄de ke ikpat 8,612 emi ẹkotde Piton de la Fournaise (Etịn̄e Obot Ikan̄). Nso utịbe utịbe ndise ke esidi ntem ke ini enye otode ọwọrọ ke okoneyo! Ediwak usụn̄ ẹsisan̄a n̄kwan̄a n̄kwan̄a ẹdọk ẹnyụn̄ ẹsụhọde itịghede itịghede ebeden̄ obot emi, anamde ẹkụt ndise n̄kpọ n̄kpaidem oro ẹsikotde uyai Réunion oro enyenede ndịk.
Ntak Ẹnyenede Ata Ediwak Ufọkmbono Obio Ubọn̄-ọ?
Nte ededi, ata uyai Réunion ọkọn̄ọ ke usụn̄ nte ediwak mbio isuo ẹmi ẹnyịmede “gospel Ubọn̄ Abasi” oro Mme Ntiense Jehovah ẹkwọrọde. (Matthew 24:14) Utom ukwọrọikọ mmọ ọkọtọn̄ọ ke 1960, ke ini mme asan̄autom uyọhọ-ini iba ẹketode France ẹdibehe. Idahaemi, isua 30 ke ukperedem, Mme Ntiense 1,665 ke ẹsịn idem ẹsuan etop Obio Ubọn̄ ke otu mme andidụn̄ ẹdide owo 582,000—owo Ntiense 1 enyene ndikwọrọ ikọ nnọ owo 350 ke isuo oro.
Utọ n̄kọri oro ama oyom ẹbọp mme itie ukpepn̄kpọ oro ẹdotde man otodo Mme Ntiense ẹmi ẹkeme ndikaiso ke utuakibuot ye utom unọ ukpep eke spirit mmọ. (Mme Hebrew 10: 24, 25) Idahaemi kan̄a, ke otu esop 19 ẹmi ẹdude ke Réunion, 13 ẹma ẹbọp Ufọkmbono Obio Ubọn̄ mmọ. Ke ntak oyobio esidade itie ndien ndien ke obio emi, mmọemi ẹdi ọsọn̄idem ufọk itiat oro adade ekese ini—ye ubiatokụk—ndibọp. Ntre ẹkekeme didie ndibọp mme utọ ufọkmbono oro, sia ata ekese Mme Ntiense ke isuo emi ẹsidiade uke-uke okụk ọfiọn̄ ẹnyụn̄ ẹnyenede ediwak owo ke ubon ndise enyịn? Ke mme ikọ eke Bible, ibọrọ edi nte ke ‘ubọk Jehovah imụhọke.’—Isaiah 59:1.
Ẹkan Mme N̄kpọ Ubiọn̄ọ
Ke uwụtn̄kpọ, kere nte Jehovah ekedemede esịt mme owo ndin̄wam ke edibọp Ufọkmbono Obio Ubọn̄ ke ekpri obio Saint-Louis, emi odude ke n̄kan̄ edem usụk usoputịn Réunion. Ke ini ẹkebemde iso ẹnyịme n̄wed ubọpufọk oro, akparawa Ntiense kiet ama asian andikpep oro esikpepde mmọ utom ukọk-itiat ete ke ẹmọn̄ ẹda mbonutom unyịmesịt ẹbọp Ufọkmbono Obio Ubọn̄. Ikụreke ke andikpep oro ndinọ idemesie unyịme unyịme ke utom oro edi enye n̄ko ama ada ofụri otu nditọ ufọkn̄wed esie edi itie ubọpufọk oro nditịbi obube itiat idakisọn̄. Ekem, enye ama ọnọ ukwak oro ẹkeyomde man ẹda ẹsịn itiat idakisọn̄ oro.
Ke ini mbonutom unyịmesịt ẹwakde ẹbe ikie ẹkedide ke usen nduọkodudu ndisịn itiat ke itie okponde ebe ikpat 2,000 ke n̄kan̄ mbinan̄, mmọ ẹma ẹdu ke n̄kpaidem ndikụt nte ke obio oro ama ọkọbi mmọn̄. Didie ke mmọ ẹkeme ndibuak itiat ke mmọn̄ mîdụhe? Kiet ke otu mbonutom emi ọkọdiọn̄ọde etubom itieutom unịme-ikan̄ ama ebiere ete imọ iyenam n̄kpọ mmọn̄eyet emi an̄wan̄a owo mfọnido emi. Esisịt ini ke oro ebede, moto unịme-ikan̄ ama edibehe ke itie ubọpufọk oro. Moto oro ama ọdọn̄ọ mmọn̄ ekekemde se ẹdade ẹnam utom oro, ndien itieutom unịme-ikan̄ oro ama ayak moto oro odu do ke ofụri usen oro! Nte an̄wan̄ade, emi ama anam kpukpru mbonutom unyịmesịt oro ẹnam utom oro ke ofụri esịt.
Ẹma ẹkụt un̄wam Jehovah ke usụn̄ nte ẹkekande mme n̄kpọ ubiọn̄ọ eken. Ke uwụtn̄kpọ, ke ikpehe kiet ke utom ubọpufọk oro ẹma ẹtịm dek ọkọm ẹben̄e san̄asan̄a ikan̄ 22 oro ẹma ẹketotobo ọfiọn̄ itiaita ke mbemiso. Edi usiakifia oro ama anam nditọete ẹfiọk ẹte ke mmimọ ibotke aba orụk ikan̄ oro mmọ ẹkeyomde. Nso ke ẹkpenam? Ndi ẹnyene ndikpụhọ ofụri ndudiọn̄ oro ye dek ọkọm? Baba, koro kpa ke ukem ini oro, nditọete ẹma ẹkop ẹte ke akama-utom ubọpufọk obio oro ama enyene mbiet ikan̄ oro ndida mbọp ufọk oro owo mîkọbọpke aba.
Ẹma ẹbụp enye ẹte “Ifan̄ ke afo enyene?”
Enye ama ọbọrọ ete, “N̄kpọ nte 25.”
Ye unana ubiatini, ẹma ẹdep ikan̄ oro ẹdidọn̄.
Nte utom oro akakade iso, owo kiet oro okosụk ọtọn̄ọde ndikpep Bible ye Mme Ntiense Jehovah ama okop inemesịt ata etieti aban̄a ediye ufọk oro.
Enye ama obụp ete, “Nam mi mfiọk, nte n̄kpọ efen odu oro mbufo ẹyomde?”
Eyenete kiet ama ọbọrọ ete, “Ih, nnyịn imoyom ukwak ubreikwọ.”
Ye oro, owo oro enyenede udọn̄ obufa obufa mi ama ọsọsọp osio n̄wed bank esie onyụn̄ ewet okụk oro akayakde esisịt ndidi se ẹdade ẹdep obufa ukwak ubreikwọ. Mme utọ etịbe oro, ọkọrọ ye ebuọt ntatubọk oro otode ibuot itieutom Watch Tower Society ke United States, ama an̄wam esop oro ndibọp ediye Ufọkmbono Obio Ubọn̄ emi n̄kụre.
Man ẹda kpukpru ẹmi ẹkesịm utịt, Esop Saint-Louis ama okop inemesịt ndinam Brọda Carey W. Barber, owo Otu Ukara eke Mme Ntiense Jehovah, edi ediyak Ufọkmbono Obio Ubọn̄ oro ọnọ ke December 1988. Ẹma ẹnam ndutịm ẹnọ Brọda Barber ndito ibuot itieutom N̄ka ke Brooklyn, New York ndi, man ediyak obufa n̄kọk itieutom ke mbọhọ isuo Mauritius ọnọ. Ke ini nditọete ke Saint-Louis ẹkekopde emi, ke n̄kpasịp urua ita, mmọ ẹma ẹtịp okụk oro ekekemde se enye asan̄ade ke ubomofụm ye owo Kọmiti N̄kọk Itieutom Mauritius ẹto Mauritius ẹdi Réunion. Ke ntak n̄kọri ọtọn̄ọde ke ini oro, Esop Saint-Louis ekenyene ndibahade. Idahaemi, esop iba ẹbuana obufa Ufọkmbono Obio Ubọn̄ oro.
Itoro Aka Ebịne Jehovah
Nso kaban̄a mme esop eken ke Réunion? Ke ntak eti uyere ikot utom ukwọrọ Obio Ubọn̄, ibat Mme Ntiense Jehovah oro ẹsidụkde ukpepn̄kpọ ke mme Ufọkmbono Obio Ubọn̄ ẹsitọn̄ọ ke 150 osịm 200 ke isuo oro. Ntre ntak oro ẹyomde ediwak Ufọkmbono Obio Ubọn̄ ke Réunion ana in̄wan̄în̄wan̄. Ke akpanikọ, ẹma ẹbọp ita en̄wen tọn̄ọ nte ẹkebọp enyeoro odude ke Saint-Louis, ndien oro ama ada ofụri ibat okosịm 13 ke otu esop 19 ke isuo oro.
Kaban̄a kpukpru emi, itoro aka ebịne Jehovah, emi ekebemde iso etịn̄ ete: “Ekpri eyekabade edi tọsịn, esisịt eyenyụn̄ akabade edi ọkpọsọn̄ idụt: ami Jehovah nyenam enye awara ke ekemini esie.” (Isaiah 60:22) Nte edide ke mme ikpehe eken ke isọn̄, prọfesi emi omosu ke ediye isuo emi.