Se N̄ke oro Ọwọrọde

Ntak Ekpede Ubọk Oyom Ntịm-inua Asua-a?

OWO ọniọn̄ oro ẹkenọde odudu spirit Abasi eketịn̄ ikọ emi ete: “Mme unan eke ufan ọnọde edi akpanikọ: edi ntịm-inua usua [“edi n̄kpọ oro ẹkpede ubọk ẹyom,” NW].” (Mme N̄ke 27:6) Iko emi akpan̄wan̄a owo didie?

Owo oro amade fi eyenọ fi ndamban̄a unan ke usụn̄ akpanikọ. Enye ekeme ndinọ fi item ye ima ke esịt esie ye idotenyịn ndinam ufọn nnọ fi. Afo unyeneke ndikpekpe ata ufan fo ubọk nyom utọ un̄wam oro m̀mê idem nsuannọ ke ini afo oyomde emi. Ndien afo enyene ọniọn̄ didie ntem edieke afo ke idara ọbọde item oro ẹnọde, nsuannọ oro ẹyomde!

Edieke afo oyomde owo oro asuade fi anam eti n̄kpọ ọnọ fi, nte ededi, ana afo ekpe enye ubọk. Ntak-a? Koro esịt usua esie nte ido edide idiyakke enye otịm fi inua. Utu ke oro, enye eyema edinam n̄kpọ ye afo ke ibak ibak usụn̄. Mfọnido ekededi oro enye edinyenede inọ fi edidi se ọbọde oto enye n̄kukụre ye ọkpọsọn̄ afanikọn̄ ye ọkpọsọn̄ n̄kpeubọk ke n̄kan̄ fo.

Se idide n̄kpọ ndemede udọn̄ ke afan̄ emi edi kiet ke otu n̄ke Jesus Christ. Enye ini kiet ama etịn̄ aban̄a ebeakpa emi ọkọbọde unenikpe ke ubọk ebiereikpe kiet oro mîbakke Abasi mînyụn̄ ikponoke owo. Didie ke n̄wan emi okokụt unen? Ebiereikpe oro ama okụt ete n̄wan oro ọbọ usiene oro enyenede enye n̄kukụre sia n̄wan emi akakade iso ndikpe enye ubọk. Jesus akada n̄ke emi ndisịn mme mbet esie akpanikọ ke esịt nte ke “mme owo ẹkpebọn̄ akam kpukpru ini, ẹkûnyụn̄ ẹkpa mba.”​—Luke 18:1-8.

Didie ke Nti Owo Ẹtọt ke Ini Ẹsobode Mme Idiọkowo?

Mme N̄ke 28:28 ọdọhọ ete: “Ke ini mme idiọkowo ẹforode, owo ẹdịbe: edi adan̄aemi ẹsobode mmọ, nti owo ẹtọt.” Didie ke emi edi akpanikọ?

Mme idiọkowo ẹkeme ‘ndidaha nda’ nda ukara, iso-ọfọn nte mme ọsọn̄ido andikara. Ke utọ ini oro, edinen owo oro ododịp idemesie. Enye ekeme ndinam ntre ke ntak enye efehede ndịk ufụk mmọ. Ndien ntak enye efehede-e? Edi akpanikọ nte ke ‘owo amakara owo ọnọ enye unan.’​—Ecclesiastes 8:9.

Nte ededi, ke ini ẹsobode mme idiọkowo, nti owo ‘ẹsitọt.’ Asan̄a didie edi ntre? Ana in̄wan̄în̄wan̄ nte ke nti owo ndien ẹsiwọn̄ọ ke itie udịbe ẹdiwụt idem ke an̄wa. Mmọ ke ntre ẹforo onyụn̄ etie nte ẹkọkọri ke ibat sia mînaha mmọ ẹdịp idem aba. Edieke nti owo ẹkpekarade ndien, mmọ ẹyenọ mme anamidiọk ufen ẹnyụn̄ ẹmenede eti edu uwem ke enyọn̄. Oro n̄ko akpanam n̄kpọ ndisụhọde ibat mme anamidiọk onyụn̄ anam ibat nti owo ọdọk.​—Men Mme N̄ke 28:12; 29:2 domo.

Mbon oro ẹdide nti owo ibịghike ẹyekụt nte ẹsobode mme idiọkowo ẹfep ke isọn̄ ke “ikan̄ iyatesịt Jehovah” oro asan̄ade ekpere usop usọp mi. Ke ntre, yom edinen ido ye sụn̄sụn̄ ido nte ekemde ye edumbet Abasi, ndien ekeme ndidi ẹyenịm fi uwem ẹbe ẹdụk obufa ererimbot Abasi, emi nti owo ẹditọtde ke akpanikọ.​—Zephaniah 2:2, 3; 2 Peter 3: 11-13.