Nte Afo Eyekaiso Ndisan̄a ke Akpanikọ?
“NNYENEKE idatesịt eke okponde akan . . . nte nditọ mi ẹsasan̄a ke akpanikọ.” (3 John 4) Ntre ke apostle John ọkọdọhọ ke ekperede utịt anyan uwem esie. Ediyọ oro ‘nditọ esie,’ kpa mmọemi enye akadade ẹsịn ke “akpanikọ” ẹkeyọde ama ada akwa idatesịt ọsọk enye. Jehovah n̄ko esidara ke ini mme andituak ibuot nnọ enye ẹsọn̄ọde ẹda ke akpanikọ. Enye okop inemesịt didie ntem mfịn ndikụt akwa esop, ẹwakde ke mme itie million, ẹtienede ọniọn̄ ọniọn̄ item oro!—Mme N̄ke 27:11.
Nte ededi, ke adan̄aemi ikọt Abasi ke ofụri ofụri ẹsọn̄ọde ẹyịre ke akpanikọ nte n̄kpọ mîfebekede, ndusụk Christian ẹtek ubọk m̀mê ẹkam ẹkpọn̄ edisana utuakibuot. Emi idịghe n̄kpọntịbe unana idotenyịn, sia ukem n̄kpọ ntre ama otịbe ke akpa isua ikie. (2 Timothy 4:10; Mme Hebrew 2:1) Edi, akpanikọ oro nte ke ndusụk owo ẹtek ubọk ọsọn̄ọ owụt ufọn kpukpru owo nditịn̄ enyịn nse idaha eke spirit mmọ. Paul ama esịn udọn̄ ọnọ kpukpru mme Christian ete: “Ẹtịm ẹdomo idem mbufo ẹfiọk.” (2 Corinth 13:5) Christian kiet kiet ekpenyene ndibụp idemesie mbụme emi: ‘Didie ke n̄keme ndifiọk nte ke ami nyekaiso ndisan̄a ke akpanikọ?’
Ndusụk owo ẹma ẹtek ubọk m̀mê ẹkam ẹtre ndisan̄a ke akpanikọ ke ntak mmọ ẹkekopde mmemidem—iso-ọfọn ke ntak mme mfịna unana nsọn̄idem m̀mê utọk owo ye owo. Mmọ eken ẹma ẹtek ubọk ke ntak ekikere okotịmerede mmọ. Mmọ ẹyom ndikop inem ndusụk mfri editịm n̄kpọ emi ke adan̄aemi enye osụk odude. Didie ke nnyịn ikeme ndifep editek ubọk? Man ibọrọ, ẹyak nnyịn ikere iban̄a uwụtn̄kpọ oro Jesus okonịmde ọnọ nnyịn.
Tiene Uwụtn̄kpọ Jesus
Jesus ama osobo ediwak n̄kpọsọn̄ idaha. Enye ekenyene ndise mban̄a utọk owo ye owo ke otu mme anditiene enye, ye ediyọ usua ye nsahi ẹtode mme asua esie. Enye n̄ko ekenyene ndikan mme idomo ererimbot emi. Ke akpanikọ, ẹma ẹnọ enye inyene ye uwọrọiso ke udomo oro ibat ibat owo ẹfiọkde ẹban̄a. (Matthew 4: 8-11; John 6:14, 15) Edi, Jesus ama ọkọbọ ke ndisan̄a ke akpanikọ. Nso ikan̄wam enye ndinam emi?
Apostle Paul asian nnyịn ke ini enye ekewetde: “Eyak ifehe mbuba eke anade nnyịn ke iso ye ime, iwụk enyịn ise Jesus Anditọn̄ọ mbuọtidem nnyịn ye Andinam enye ọfọn ama; emi okobiomde [eto ndutụhọ] onyụn̄ abatde bụt ke ekpri n̄kpọ, kaban̄a idatesịt eke anade Enye ke iso; okonyụn̄ osụhọrede etetie ke ubọk nnasia ebekpo Abasi.” (Mme Hebrew 12:1, 2) Ke eke Jesus, ndikere mban̄a “idatesịt eke anade Enye ke iso,” kpa akwa utịp oro anade ebet enye, ama an̄wam enye ndikaiso nsan̄a ke akpanikọ. “Idatesịt eke anade Enye ke iso” mi ama otịm okpon akan mme n̄kpọ mmemidem m̀mê editịmede esịt ibio ini oro enye ekenyenede ndisobo.
Ndinyene utịp emi ke ekikere ekeme ndin̄wam nnyịn ndiyọ, kpa nte enye akan̄wamde Jesus ndiyọ. (Ediyarade 22:12) Ke ndinam an̄wan̄a, kere ban̄a akaisan̄ oro asan̄ade ke afan̄usụn̄ obot oro ọsọn̄de ndisan̄a. Enye akpa mba onyụn̄ okop mmemidem. Ikpatisan̄ kiet kiet edi ke odudu, ndien afan̄usụn̄ onyụn̄ etie nte inyeneke utịt. Ekem enye edisịm enyọn̄ obot onyụn̄ ada okụt obio oro enye akade ke nsannsan ebiet. Inikiet inikiet isan̄ etie nte efere esịt. Edikam nda n̄kụt ebiet eke enye akade n̄n̄wan̄a n̄n̄wan̄a an̄wam enye ndifre mban̄a mba esie. Christian ke ukem usụn̄ oro eyekụt nte otịmde emem utom ndikaiso nsan̄a ke akpanikọ edieke enye enyenede ebiet eke enye akade n̄n̄wan̄a n̄n̄wan̄a ke ekikere.
Kpebe Apostle Paul
Owo en̄wen oro ọkọyọde ekese n̄kpọ oro ẹkpekenamde ndinam enye okop mmemidem ekedi apostle Paul. Enye ekenyene ndise mban̄a mme ubahade ye utọk owo ye owo ke otu nditọete, ye ediyọ ọkpọsọn̄ unana nsọn̄idem, ukọbọ, mme nsọn̄ọn̄kpọ, ye mme mfịna ye idem ubiọn̄ọ ke esịt esop. (1 Corinth 1:10; 2 Corinth 10:7-12; 11:21-29; 12:7-10) Ntak emi Paul mîkememke idem ikosịm udomo editre? Enye anam an̄wan̄a ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Enye ikodomoke ndibiom mme mbiomo esie ikpọn̄. Utu ke oro, Paul ekese Jehovah ndimụm enye n̄kama.—Psalm 55:22.
Ukeme otode Abasi oro Paul ekeben̄ede man an̄wam enye ndiyọ osụk ododu mfịn. Bible ọdọhọ ete: “[Jehovah] ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem. Idem n̄kparawa ẹyekpa mba ẹnyụn̄ ẹkpọt, nyara owo ẹyenyụn̄ ẹduọn̄ọ: edi mmọ eke ẹberede ye Jehovah ẹyekop obufa nsọn̄idem; ẹyedọk ke mba nte ntrukpom; ẹyefen̄e, ndien idikpọtke; ẹyesan̄a, ẹdi idikpaha mba.” (Isaiah 40:29-31) Edieke nnyịn iyomde Jehovah ọnọ nnyịn odudu ebe ke ọkpọ ọkpọ ukpepn̄kpọ, edidụk mbonoesop, ifịk ifịk utom Christian, ye—akpan akpan—ke akam, nnyịn iyekeme ndiyọ mme idomo ye n̄kpọ mmemidem ẹmi ẹkemede ndidaha nda ke ini ke ini.—Psalm 1:1-3; Rome 10:10; 1 Thessalonica 5:16, 17; Mme Hebrew 10:23-25.
Ediwak Million Owo Ẹtịm Idem Ndidu Uwem ke Paradise
Satan edi abasi editịm n̄kpọ emi, emi mme Christian ke akpanikọ ẹkam ẹdide isenowo m̀mê odudụn̄. (2 Corinth 4:4) Ntem, idem ikpakpaha nnyịn edieke nnyịn isobode mme n̄kpọ mmemidem m̀mê editịmede esịt ke ndusụk ini. Paul ekewet ke n̄wed Mme Hebrew ete: “Nnyịn inyeneke obio eke edibịghide ke edem emi, edi nnyịn iyom obio eke edidide.” (Mme Hebrew 13:14) Nditi nte ke idotenyịn nnyịn idịghe ke akani ererimbot emi edi edi ke ererimbot emi edidide an̄wam nnyịn n̄ko ikûtek ubọk.
Ke ndusụk usụn̄, mme Christian ẹtie nte mbonisan̄ oro ẹkpọn̄de isọn̄ emana mmọ ke ndiyom ebiet en̄wen oro uwem ọfọnde akan. Ke ofụri ofụri, emi edi ọkpọsọn̄ usio-ukot ndinam. Enye esịne editan̄ mme n̄kpọ m̀mê ndikpọn̄ kpukpru inyene esie nnyụn̄ n̄kpọn̄ ufọkidụn̄ oro enye emehede, ọkọrọ ye mme ufan ye mme iman. Enye n̄ko esịne ediwọrọ n̄ka esenidụt, edidụn̄ ye mme owo oro ekemede ndidi ididarake enye, nnyụn̄ n̄kpep obufa usem ye usụn̄uwem oro enye mîmeheke. Edi, ediwak owo ẹnam utọ uwọrọ idụn̄ ntre n̄kukụre ye idotenyịn ndinam idaha n̄kpọ obụkidem mmọ ke ererimbot emi ọfọn akan.
Mmọ oro ẹwọrọde idụn̄, yak idọhọ, ẹkpọn̄ akani editịm n̄kpọ emi ẹnyụn̄ ẹkabarede ẹdi ubak ikọt Abasi ẹsobo mme ukem n̄kpọ-ata ntre. Mmọ ẹnam mme ukpụhọde ke ido uwem man ẹdu uwem nte ekemde ye ndisana edumbet eke Ikọ Abasi, ndien mmọ ẹkpep “edisana usem” akpanikọ. (Zephaniah 3:9, NW; 1 Corinth 6:9-11) Mmọ ẹnam utom ọkpọsọn̄, n̄ko, ndinam n̄kpọ akwa Edidem Obio Ubọn̄ Abasi, Jesus Christ. Akande oro, ke ediwak idaha mme iman ye n̄kani ufan mmọ ẹsidianade ẹkpọn̄ mmọ, ntre, nte utịp, mmọ ẹnyene ndidọhọ mmọ ẹtie sụn̄.
Edi mme Christian ẹnyene ata ekese n̄kpọ ẹkan mbon oro ẹwọrọde idụn̄ ke mme ntak ndutịm uforo.N̄kpọ kiet edi, mmọ ẹdụk edi otu n̄kaowo oro ẹmade ẹnyụn̄ ẹkerede ẹban̄a mmọ. (Luke 18:29, 30) Ke edide akpan n̄kpọ akan, mmọ ẹdidu ke n̄kpet n̄kpet itie ebuana ye Jehovah, kpa Abasi ekondo. Mmọ ẹnyene emem ke ekikere ye mbuọtidem ẹban̄a ini iso nte mmọ ẹsakde iso ẹse edisu oro mme utịbe utịbe un̄wọn̄ọ Abasi ẹsude. (Philippi 4:8, 9) Mmọ oro ẹnyenede nnennen esịtekọm ẹban̄a akpanikọ emi idiyakke mme editịmede esịt m̀mê n̄kpọ mmemidem ẹnam mmọ ẹtek ubọk taktak. Owo idiwọn̄ọkede mmọ ikpọn̄ mfafaha usụn̄ oro adade osịm uwem.—Matthew 7:13, 14; 1 John 2: 15-17.
Se Ban̄a Nsọn̄idem eke Spirit Fo
Edieke isede iban̄a nsọn̄idem nnyịn eke obụk kpukpru ini, nnyịn imodu ke idaha oro ọfọnde akan ndibiọn̄ọ udọn̄ọ. Ndien edieke nnyịn iduọde udọn̄ọ, nnyịn iyefiak ikop nsọn̄idem usọp usọp. Ukem ntre, edieke nnyịn isede iban̄a nsọn̄idem eke spirit nnyịn, inyenede mme edidiọn̄ oro idarade idahaemi ye oro ẹnade ẹbet nnyịn n̄n̄wan̄a n̄n̄wan̄a ke ekikere, n̄ko edieke nnyịn ikpepde ndiberi edem ke ukeme Jehovah utu ke eke idem nnyịn, nnyịn iyedu ke idaha ọfọnde akan ndise mban̄a mme mfịna oro ẹdahade ẹda. Nnyịn ke ofụri ofụri ikemeke ndifep mme editịmede esịt m̀mê mme idaha oro ẹnamde idem emem owo. Edi edieke nnyịn nte odotde isede iban̄a nsọn̄idem eke spirit nnyịn, mme utọ n̄kpọ ntre idikanke nnyịn ubọk.
Ẹti ẹte ke Jehovah esidara ke ini mme andituak ibuot nnọ enye ẹyọde. Ntem ẹyak nnyịn inam esịt esie adat ke ndikaiso nsan̄a ke akpanikọ.