Ọniọn Ọniọn Usio-Ukot Mbemiso Afanikọn̄
SIA nditọ Mary ẹma ẹkekọri ẹwọrọ owo idahaemi, enye ama enyene ini onyụn̄ ebiere ndinam utom idịbi udia ibio ini. Nte ededi, ke ini enye akasiande Enos, ebe esie, ebe esie ama etịn̄ in̄wan̄în̄wan̄ ete ke ufọn idụhe enye ndinam ntre. Enye ọkọdọhọ ete, “Edieke ami n̄kekemede ndinọ se afo ye nditọ ẹyomde, ami ke akpanikọ mmekeme ndise mban̄a nnyịn mbiba idahaemi.” Utu ke ndidọhọ n̄wan esie anam utom idịbi udia, ebe emi ama ọnọ ekikere ete yak enye ke akam ekere aban̄a edikabade ndi asiakusụn̄, kpa asuanetop Obio Ubọn̄ uyọhọ-ini.
Okposụkedi Mary akadarade edibuana etop Obio Ubọn̄ ye mme mbọhọidụn̄ esie, enye ama esikop bụt onyụn̄ anana mbuọtidem. Edi, enye ama oyom nditiene item ebe esie. Ntre, ye esịt ndịk ye idatesịt enye ama esịn enyịn̄ nte asiakusụn̄ unọ un̄wam ke April 1981.
Mary usọp usọp ama ọkọri ima oro enye enyenede ọnọ utom ukwọrọikọ Obio Ubọn̄ emi enye akanam mînyeneke ifiọk iban̄a. Ibịghike, enye ama onịm ukpepn̄kpọ Bible inan̄ ye mbon oro ẹnyenede udọn̄. Ke ufan̄ isua kiet enye ama akabade edi asiakusụn̄ ofụri-ini, onịmde ukpepn̄kpọ Bible duop. Christine, Ntiense Jehovah kiet emi enyenede nditọ iba ẹmi ẹsụk ẹdude ke ufọkn̄wed, ke idara ama adiana ye Mary nte nsan̄a asiakusụn̄.
Mbufa mbon oro ẹkenyenede udọn̄ ẹma ẹtọn̄ọ ndidụk mme mbonoesop ke Ufọkmbono Obio Ubọn̄ obio oro, ke ebiet emi eti edu usiakusụn̄ ọkọkọride. Ndien Mary ama enyene n̄kpon n̄kan inemesịt ke ini eyen esie eren, Christopher, ekemekde nditiene uwụtn̄kpọ esie onyụn̄ akabade edi asiakusụn̄ n̄ko.
Ekem, ke mbuari, n̄kpọ mmọn̄eyet ama otịbe ke 1985. Mary ama ofụn̄ ọduọ. Mbufụt oro okodude ke ibuot esie ama ada okosụn̄ọ ke uwọrọiyịp ke mfre ọkpọsọn̄ ọkpọsọn̄, ndien ke usen ita Mary emi ekedide isua 45 ke emana ama akpa.
Ke ufan̄ isua inan̄ eke utom usiakusụn̄ oro, nte ededi, Mary ama enyene eti idaha ke obio esie. Se iwakde ikan owo 300 ẹkedụk edinam n̄kpa esie, ẹsịnede ediwak mbọhọidụn̄. Kiet ke otu mbon oro ẹkedude ekedi ufan esie ke ufọkn̄wed emi mbuọtidem Mary okotụkde enye ke idem, okoyomde ndikpep ekese mban̄a enye, onyụn̄ oyomde ẹnịm ukpepn̄kpọ Bible ye imọ. Utom ukwọrọikọ Mary ke okosụk on̄wụm mfri.
Enos ọdọhọ ete, “Ami ke idemmi ndi asiakusụn̄ unọun̄wam idahaemi, edi ubaha n̄kpeketienede Mary ke ini enye akasiakde usụn̄. Enye kpukpru ini ama esitịn̄ aban̄a mme ifiọkutom esie ama onyụn̄ okop inemesịt etieti. Ke akpanikọ, isua ifan̄ oro ekedi isua n̄kpon n̄kan inemesịt ke uwem nnyịn mbiba, edi akam edi idahaemi ke ami ndiọn̄ọ
ntak.”
Owo ndomokiet ikemeke ndibemiso ntịn̄ adan̄aemi “ini ye unọmọ editịbede,” nte eketịbede ọnọ Mary ke ata unana idotenyịn. Nte ededi, mbon oro ẹsọn̄ọde ẹda ke edinam akpanikọ nte mme ọkwọrọ Obio Ubọn̄ ke idemmọ ẹnịm ke akpanikọ nte ke Abasi ye owo ẹdiọn̄ọ mmimọ mfọn mfọn, idem ke ini ẹsobode afanikọn̄.—Ecclesiastes 9:11; 11:1, 2.
[Ndise ke page 31]
Ndibuana ke utom ukwọrọikọ edi ini oro ẹbiatde nte ọfọnde