“Ufọk Emi Edi Okwo”
UFỌK emi edi ọkwọ—nnyịn imadian ufọk ke enye.” Ikọ ẹmi nte odotde ẹwụt ntụk mbọn oro ẹsụk ẹkụrede ọkpọsọn̄ utom isua iba ke n̄kọk itieutom Watch Tower Society eke Australia didie ntem! Ẹketịn̄ ikọ ẹmi ẹnọ Jehovah Abasi, mmọ ẹkenyụn̄ ẹdi ubak ikwọ oro ẹketịmde ẹnọ akpan edinam. Nso edinam? Ediyak mbufa mbọp ndian ufọkidụn̄ ye ufọk umịn̄-n̄wed Bethel nnọ.
Mbọp Ndian Ata Usọp Usọp Ntre?
Ke n̄kpaidem, ke mîka-isịmke isua itiaba ke mbemiso, mbiet ediyak nnọ emi ama ada itie kaban̄a obufa ufọk Bethel oro ẹkebọpde inioro ke Ingleburn, ke nsannsan n̄kan̄ usụk usụk edem usoputịn Sydney, Australia. Ntak ẹkeyomde mbọp ndian efen usọp usọp ntre?
N̄kpọ kiet edi, ibat Mme Ntiense ke Australia ọmọkọri oto se ikekpride ikan 32,000 ke 1981 ọdọk osịm n̄wakn̄kan ibat 51,152 ke October 1989, ndien oro ama oyom n̄kọri ke ibat mbonutom Bethel. Ke adianade do, usọp usọp n̄kọri ama odu ke ibat n̄wed oro Australia ọkọnọde aka mme n̄kọk itieutom en̄wen. Idahaemi, Australia emịn̄ n̄wed ke nsio nsio usem 37 ndiyụhọ udọn̄ mbon Fiji, Indonesia, Papua New Guinea, New Caledonia, New Zealand, Solomon Islands, Tahiti, Vanuatu, Niue, Western Samoa, Tonga, Tuvalu, ye Wallis Islands, ọkọrọ ye Australia. Ntem mbonufọk Bethel ọmọkọri usọp usọp osịm owo 164.
Man ufan̄ ekem mbonufọk ẹmi ọkọride-kọri mi, ke ntọn̄ọ ntọn̄ọ 1987 ẹma ẹkụre obufa mbọp ndian ọfis emi enyenede enyọn̄ ita, ọnọde ufan̄ ọfis efen efen oro ẹtịmde ẹyom. Ekem, Otu Ukara ama onyịme ẹbọp akamba ufọk umịn̄-n̄wed emi enyenede enyọn̄ ita ẹnyụn̄ ẹdian ufọkidụn̄ emi enyenede enyọn̄ ition. Ke January 1988 utom ama ọtọn̄ọ ke obufa mbọp ndian ufọk umịn̄-n̄wed, emi ọnọde ufan̄ ịsọn̄ufọk efen efen emi edide ikpat 38,800 ke n̄kan̄
mbinan̄. Ọfiọn̄ ifan̄ ke oro ebede, utom ama ọtọn̄ọ ke mbọp ndian ufọkidụn̄, emi ọnọde ubet nna 51 efen efen.
Mme Uwa ye Enọ Ntatubọk
Ẹma ẹnọ mme esop ke ofụri idụt oro ikot ẹyom mbonutom unyịmesịt oro ẹkemede ndikabade ndi ubak “mbon ubọpufọk” ke n̄kpọ nte isua iba. Ẹma ẹyere ikot mfọn mfọn, mbonutom unyịmesịt ke kpukpru ubọkutom ẹma ẹnyụn̄ ẹyere ikot inikiet inikiet. Ẹma ẹbọ se iwakde ibe nsio nsio n̄wed eben̄e 700, ndien ke ofụri ini ubọpufọk oro, mbonutom unyịmesịt oro ofụri ibat ẹkedide 270 ẹma ẹdi ẹnyụn̄ ẹnam utom ke itieutom oro ke mme ikpehe ini ọtọn̄ọde ke urua iba osịm n̄kpọ nte isua iba.
Ntiense kiet ama enyene itie mbubehe udọkisọn̄ ke n̄kan̄ edem edere obio Queensland. Enye ama anyam ubak mbubehe esie, ndien enye ye n̄wan esie ẹma ẹkabade ẹdi ubak mbon ubọpufọk toto ke ntọn̄ọ esie. Enye ama edep akamba ukwakutom udọkisọn̄ onyụn̄ anam ekese utom udọkisọn̄ oro ekeyomde ye unana edibọ N̄ka okụk. Ke akwa utom udọkisọn̄ ama okokụre, enye ama anyam ukwakutom oro onyụn̄ odu ndien ndinam utom ke mme ikpehe ubọpufọk eken. Emi akam edi uwụtn̄kpọ kiet ke eti, edu unana ibụk oro kpukpru owo ẹkewụtde ke ofụri ini ubọpufọk oro.
Mme Ntiense ẹma ẹnọ ukwakutom usịn isọn̄ufọk man ẹda ẹsịn isọn̄ufọk itiaita ẹmi ẹkedide cubic yard 4,300 oro ẹkeyomde ke ufọk iba ẹmi. Mbon en̄wen ẹma ẹnọ n̄kpọutom oro ẹkeyomde man ẹda ẹnam aban̄ mmọn̄ ita oro ẹbotde ke itiat, emi kiet kiet odụkde gallon mmọn̄ 5,800, ndien Mme Ntiense ẹmi ẹnamde utom ke ufọk umịn̄-n̄wed ẹma ẹnọ odudu mmọ ndibọp aban̄ mmọn̄ oro.
Nte ededi, idịghe kpukpru mbonutom ẹmi ẹkenyene usọ unamutom. Ke akpanikọ, ediwak n̄kparawa ẹma ẹkpep mbufa ifiọk unamutom do ke itieutom oro. Ediwak owo ẹma ẹkabade ẹdi nti mme ọkọkufọk nte mmọ ẹken̄wamde ke ndikọk brick ẹkedide ubak million kiet ẹmi ẹkeyomde ke itieutom oro. Mbon en̄wen ẹma ẹkpep ndidian tile ke ibibene ye ke isọn̄ufọk, ndien ke urua ifan̄ kpọt, eyenete an̄wan kiet ama akabade edi ata ke ndidian babru ke ibibene.
Usen Ediyak Nnọ
Usen ediyak nnọ, Saturday, November 25, 1989, ama esiere mfọn mfọn onyụn̄ an̄wan̄a eyo—kpa ediye usen ke utịt ini utọ. Ẹma ẹtịm ọyọhọ enyọn̄ iba ke obufa mbọp ndian ufọk umịn̄-n̄wed nte akpan itie edinam ediyak nnọ. Ẹma ẹyịri television ke mme ikpehe enyọn̄ ufọk umịn̄-n̄wed iba eken ye ufọk itieutom unọ n̄wed ọwọrọ, ufọk mbono Bethel ye itieudia Bethel. Emi ama anam se iwakde ikan owo 3,000 ẹtie inem inem ke esịtufọk.
Sia ufan̄ mîkokponke, sụk mbon oro ẹkenade baptism ke n̄kpọ nte isua 40 ke ẹkenọ ikot ndidụk, ọkọrọ ye isenowo mbonufọk Bethel ye eke mbonutom ubọpufọk. Udia ama odu ke usenubọk, ndien ẹma ẹnọ inem inem udia ke uwemeyo. Ke n̄kanika 9 usenubọk, ẹma ẹnịm mbono ofụri isua N̄ka Enyọn̄-Ukpeme eke Australia, ndien ofụri owo 21 ẹmi ẹbuanade ke n̄ka eke Australia emi ẹma ẹdụk. Ke ẹma ẹkeneme mme akpan n̄kpọ eke ibet ke nde ke
ẹma, ẹma ẹkot mbon en̄wen ndidụk mbono oro, ndien kpukpru owo ẹma ẹdara ndikop utịn̄ikọ oro Theodore Jaracz eke Otu Ukara ọkọnọde.
Ke n̄kanika 1:45 uwemeyo, edinam ediyak nnọ oro ama ọtọn̄ọ ye ikwọ Obio Ubọn̄ a-minit 15. Otuowo ẹma ẹdara ndikop mme mbụkutom, inem inem mbụk eyouwem, ifiọk n̄kpọntịbe, ye utịn̄ikọ mbon Otu Ukara ita oro ẹkedude. Ke otu mmọemi, akpa ini ekedi oro Carey Barber ye Daniel Sydlik ndika Australia. Brọda Barber eketịn̄ ikọ ke ibuotikọ oro “Ini Ukpen̄e Edi Utịt Eyo Emi,” ke adan̄aemi Brọda Sydlik ekenemede n̄kpọ ke ibuotikọ oro “Inemesịt Odu Ọnọ Mbon oro Jehovah Edide Abasi Mmọ.” Brọda Jaracz, oro akakade ekese n̄kọk itieutom Australia nte esenyịn n̄kọk itieutom, ọkọnọ utịn̄ikọ ediyak nnọ.
Inem inem ikpehe ke edinam oro ekedi edikwọ ikwọ oro enyenede udịm inan̄ mbemiso utịn̄ikọ ediyak nnọ. Ọkọn̄ọde ke ikọ Isaiah ke Isaiah 60:22, ibuotikọ ikwọ oro ekedi: “Ekpri Akabade Edi Tọsịn.” Ke ikọ ikwọ ẹmi ẹma ẹnọ Jehovah ekọm nte ediwak mbonutom unyịmesịt ẹkenyenede ifet ndidian ufọk ke ‘ufọk esie’ ke n̄kan̄ ikpehe an̄wautom ofụri ererimbot emi.
[Mme ndise ke page 15]
Obufa mbọp ndian itieutom umịn̄-n̄wed Watch Tomer ke Ingleburn, N.S.W., Australia
C Barber
T. Jaracz
D. Sydlik