Kûtaba Mbono District “Edisana Usem”!

Ọnọ-utịp item Bible eke usen inan̄ ke ana ebet fi. Du ke itie ke ini ndutịm oro ọtọn̄ọde ke n̄kanika 1:00 uwemeyo ke Thursday. Kop inem utịn̄ikọ oro anamde oro ekere n̄kpọ mi, “Ndi Mme Ufan Fo Ẹdi Mme Ufan Jehovah?” ọkọrọ ye utịn̄ikọ ibuotikọ mbono, “Edisana Usem oro Ẹnọde Kpukpru Idụt.” Akpatre utịn̄ikọ uwemeyo oro, “Ndida Iyịp Nnyan̄a Uwem Fo​—Didie?,” eyebọrọ mbụme oro: Nte enen̄ede ẹyom iyịp man ẹnyan̄a uwem?

Edinam usenubọk Friday ọtọn̄ọ ke n̄kanika 9:30. Du do man ọbọ ufọn oto utịn̄ikọ ndụn̄ọde oro “Christ ‘Ama Asua se Ikwan̄ade’​—Nte Afo Amasua?” ye edemede udọn̄ nneme oro “Sịn Mme Ekikere Ererimbot, Bịne Mme Ata Idem N̄kpọ Obio Ubọn̄.” Ke uwemeyo, eyenọ nti ekikere ke mme usụn̄ nte afo okpodude uwem nte ekpat okụk fo edide. Eyewụt mme ete ye eka nte mmọ ẹkemede ndibiom mme mbiomo mmọ ata uforo uforo, ndien drama eyomfịn eyenọ mme uyen mfọn n̄kan ndausụn̄ kaban̄a edibuana ke mme udiana edinam ufọkn̄wed.

Edinam usenubọk Saturday eyesịne nneme aban̄ade uyakidem nnọ ye baptism, ọkọrọ ye edineme mban̄a ufọn n̄waidem man ẹnam ọkpọ ọkpọ ukpepn̄kpọ Bible. “Chariot Jehovah eke Enyọn̄ ke Anam Isan̄” edi utịn̄ikọ ndemede udọn̄ ke ndutịm uwemeyo oro. N̄ko, n̄kpọsọn̄ n̄kpọ editi ẹyedu kaban̄a mbiomo Christian nnyịn ndin̄wam mbon oro nsunsu ido ukpono okịmde enyịn, ndien ẹyenọ eti un̄wam man ẹbiom mbiomo emi.

Afo eyeyom ndidu do ke usenubọk Sunday man okop enyene-odudu etop oro ẹditan̄ade ẹdori Christendom ye mme ọkwọrọ ederi esie ke idem. Drama oro owụtde ọyọhọ ọyọhọ usịnen̄kpọ eset emi ọkọn̄ọde ke mme n̄kpọntịbe enyenede ebuana ye uwem Jehu ye Jonadab edidiana. Ndien, ke uwemeyo, fiọk ete ke eyekop utịn̄ikọ oro, “Ẹkabade Ẹdiana Kiet Oto Edisana Usem.”

Ke November, December, ye January, ẹdiomi se iwakde ibe ndutịm mbono 60 ẹnọ ofụri Nigeria ikpọn̄îkpọn̄, ntre kiet eyedu oro mîdiyomke usụn̄ ikpọn̄ ufọk fo. Dụn̄ọde ye Mme Ntiense Jehovah ke n̄kann̄kụk ban̄a ini ye ebiet oro ẹdinịmde kiet emi ekperede fi akan.