Ti Andibot Fi ke Ini Uyen
“MME Uyen oro Mîkopke Uyụhọ: Akpanikọ Aban̄ade Uwem ke Ediwak Idụt.” Ntre ke akpan ibuotikọ mbụk kiet ọkọdọhọ ke The Star eke Johannesburg, South Africa. Udiana ibuotikọ mbụk oro okot ete: “Ye ediwak ibat mme uyen oro idahaemi ẹsakde iso ẹse mme ifet ẹmi ẹnyenede-nyene adan̄a oro akam otịmde-tịm osụhọde akan ke ntak n̄wụre ke mbubehe ofụri ererimbot, unana edikop uyụhọ eke mme uyen ke ikpọ obio amakabade edi in̄wan̄în̄wan̄ akpanikọ aban̄ade uwem ke ediwak idụt. Ke mme ndutịme ke Miami, ke San Salvador, ke Managua, ke Teheran ye ke Cape Town, ọsọ n̄kpọ kiet ama odu—ke n̄kpọntịbe kiet kiet akpa owo ndiwot owo ye akpa owo emi ẹkewotde ekedi uyen.”
Ẹkewet emi ke n̄kpọ nte isua duop ẹmi ẹkebede, ndien nte n̄kpọ ẹtiede ẹmekabade ẹdiọk ẹkan ọtọn̄ọde ke ini oro. Ntak utọ unana edikop uyụhọ ntem odude ke otu mme uyen ke ofụri ererimbot-e? N̄kọri unana nsọn̄ọnda ke editịm n̄kpọ emi edi akpan ntak kiet. Unana utom emebe adan̄a. N̄ko ye n̄kọri ke mbiara uwem ufọk, nso ifụre idu inọ mme uyen? Eyịghe idụhe ndusụk mmọ ẹduọde ẹdụk usụn̄uwem oro mmọ mîkemeke ndikara. Nte emi idịghe koro mmọ ẹnanade ata idotenyịn oro mmọ ẹkemede ndikọn̄ uwem mmọ?
Owo okpodori enyịn ido ukpono ererimbot ndinọ utọ idotenyịn oro. Edi, uyen kiet ekewet ete: “Ibuot oyon̄ mi etieti. . . . Ami mmenyene ediwak ufan, ẹmi ẹkade ediwak nsio nsio ido ukpono, ndien mmọ inyeneke ukpụhọde ye ami. Ibuot ototịm oyon̄ mi tutu ndiọn̄ọke se n̄kponịmde ke akpanikọ aba. Mbọk, ndi mbufo ẹmekeme ndinọ mi ndusụk item?” Nso item ke afo ọkpọnọ utọ uyen oro?
Mme uyen oro ẹsọn̄ọde ẹda ye Ikọ Abasi ye ata esop Christian ẹbọhọ utọ nyon̄ibuot ye ubiakesịt oro. Ke adan̄aemi ekese uyen mînyeneke ata idotenyịn inọ ini iso, mme uyen ẹdide Christian ẹberi edem ke Jehovah Abasi ye enyene-iwụk Ikọ akpanikọ esie. Ntem, mmọ ẹnyene idotenyịn ẹdibọhọ utịt editịm n̄kpọ emi ye nsinsi uwem ke ekikere. Ke oro ebede, ke isọn̄ oro ẹnamde asana ọbọhọ ukwan̄ikpe ye idiọkido, mmọ ẹyenam ubak itiat idakisọn̄ “obufa isọn̄” emi “edinen ido edidụn̄[de].” (2 Peter 3:13; John 17:3) Man ẹnyene utọ ubọn̄ ubọn̄ idotenyịn oro, ẹteme mme uyen ẹte ‘ẹti Andibot mmọ.’ (Ecclesiastes 12:1) Ndien mfọn n̄kan item oro ẹkemede ndinọ edi nte yak mmọ ẹkabade ẹdi ubak esop Christian ẹnyụn̄ ẹsọn̄ọ ẹdu do. Ntak emi-e?
Ediwak mbufo mme uyen ke esop Christian ẹmenyene mme ete ye eka ẹmi ẹnịmde ke akpanikọ oro ẹmade ẹnyụn̄ ẹkerede ẹban̄a mbufo. Esop kiet kiet ẹmenyene mbiowo esie oro ẹmekde, ẹmi ẹtịmde ẹnyene udọn̄ ke mfọnọn̄kpọ eke spirit mbufo. Owo ikpenyeneke ndise utọ un̄wam ye edikere mban̄a oro ke usụhọde. Akpanikọ otode Ikọ Abasi, ọkọrọ ye ndausụn̄ ukara Abasi, ẹyenọ mbufo ifụre, ubọhọ ke edikpu, ye ata idotenyịn kaban̄a ini iso. Kpukpru ẹmi ẹyen̄wam mbufo ‘ndisọn̄ọ mmụm mbuọtidem ye eti esịt n̄kama’ nnyụn̄ nsọn̄ọ nyịre ke idotenyịn oro etiede nte ukwakubom emi akpande nsụn̄ikan̄ ndisịp ke oyobio inyan̄.—1 Timothy 1:18, 19; men Mme Hebrew 6:19 domo.
Fep Mme N̄kpọ Etabi Ererimbot
Kpa ye uwak edidiọn̄ eke spirit oro mme uyen ẹkemede ndidara ke esop Christian, ntụhọ ndusụk uyen edi nditiene mme usụn̄ ererimbot. Etie mmọ ke idem nte mmimọ imataba eti n̄kpọ oro ẹkemede ndikụt ke ererimbot kpọt emi mîdụhe ke esịt esop Christian. Edi nte ererimbot enen̄ede enyene eti n̄kpọ ekededi ndinọ?
Ke ama akabiat se iwakde ikan isua 40 ke utom ukwọrọikọ uyọhọ-ini, asan̄autom Abasi kiet etịn̄ ntem ete: “N̄kukụre ikpehe ke uwem mi oro ami ntuade n̄kpọfiọk mban̄a edi ikpehe ini oro n̄kodude uwem mbemiso mbọde akpanikọ. Ami n̄kedi ubak ererimbot adan̄aoro. Ami n̄kodu uwem nnọ ererimbot kpọt. Ke ini n̄kosịmde isua 18 ke emana nnyụn̄ n̄wọn̄ọrede nda nse uwem mi, ami mma mfiọk nte ke enye ekedi ukpọk ukpọk. Uwem mi ikenyeneke uduak ye ekikere ndomokiet. Inemesịt ererimbot oro n̄kekerede nte ndarade ke akpanikọ ẹkeda edikpu ye mfụhọ kpọt ẹdi. Ami mma ntọn̄ọ ndiyom akpanikọ. Ami mma n̄kụt enye ndien isua kiet ke ukperedem mma mbuana ke utom uyọhọ-ini. N̄kenyeneke okụk, n̄kukụre se n̄kenyenede ekedi ifiọk isua kiet ke akpanikọ ye mbuọtidem nte ke Jehovah eyeberi mi edem. Idahaemi ke mfiakde nda nse uwem mi, mbahade iba ke itie ita oro ami mbiatde ke utom uyọhọ-ini, ami mmenen̄ede n̄kop inemesịt. Tutu amama ami ndikpụhọke se ami nnyenede nto edinam n̄kpọ Jehovah ye n̄kpọ ekededi oro ererimbot ekemede ndinọ.” Ke akpanikọ, emi owụt ekikere Mme Ntiense Jehovah ke ediwak tọsịn.
Ntre, ntak emi oyomde mme n̄kpọ oro mme Christian en̄wen ẹma ẹkekpọn̄-ọ? Ntak emi anyanarede ebịne mme n̄kpọ ererimbot ẹmi ẹsan̄ade ẹka nsobo? (1 John 2:15-17) Nte uyen, iso-ọfọn, afo ekere ke ndinam n̄kpọ Jehovah etie ukpan ukpan akaha ndien ke eyenam fi ataba inemesịt oro ererimbot ọnọde. Edi nte owụt ifiọk ndise mme ete ye eka fo ye mbiowo nte ẹtiede ukpan ukpan ẹkaha ke ini mmọ ẹyomde ndin̄wam fi man enem Jehovah esịt onyụn̄ enyene nsinsi uwem?
Edieke ekaeyen emi osiode eyen esie ọdọn̄ ete aka ekedep n̄kpọ ke ufọkurua etide enye ete atuak ada onyụn̄ ese usụn̄ n̄kan̄ edem mbiba mbemiso asan̄ade ebe ke efak, ndi afo eyekere ke enye etie ukpan ukpan akaha? Utu ke oro, nte enye ke ima ima usụn̄ idomoke ndikpeme eyen esie? Yak idọhọ ke eyen oro ama ofụmi ntọt oro ndien moto ọtọ enye owot. Nte afo eyesụk ekere ke ekaeyen oro eketie ukpan ukpan akaha? Kamse, afo emekeme ndikere ke n̄wan emi ekpekenyene nditịm n̄wụt ukpeme ke ndikpeme uwem eyen esie! Ukem ntre, ẹnọ mme ikọ editi ẹtode Ikọ Abasi ye esop esie ke ima ima usụn̄, idịghe nte ukpan edi kaban̄a ukpeme nnyịn.
Ndikọri n̄wọrọ owo ke ubon Christian ikemke ndinam fi ekeme ndisọn̄ọ nda mbiọn̄ọ mme mfịghe ererimbot emi. Oyom afo n̄ko ke idemfo onịm akpanikọ eke Ikọ Abasi ke akpanikọ. Utọ ọkpọ ọkpọ edinịm ke akpanikọ oro ye ima oro enyenede ọnọ Andibot edi isọn̄ ọnọ ediyak uwem fo nnọ Abasi. Ọkpọ ọkpọ edinịm ke akpanikọ emi edi n̄ko se ẹyomde man afo ẹkeme ndida nnọ mbuọtidem fo ke iso mbon en̄wen. (1 Peter 3:15) Ikọ Abasi ndida owo usụn̄ edi isọn̄ ọnọ uwem oro okụtde unen. (Joshua 1:8; Psalm 119:9) Edi man okụt unen ke uwem, oyom afo n̄ko ọbọ eti ukpep.
Ndinọ San̄asan̄a Ukpep
Ke akpanikọ, mbufo mme Christian ete ye eka ẹyekop inemesịt ndikụt nditọ mbufo ẹsọn̄ọde ẹda ẹnọ akpanikọ ẹnyụn̄ ẹdianade kiet ye mbufo ke utuakibuot akpanikọ. Edi mbiomo ete akpan akpan ndibọk nditọ “ke ntụnọ ye item [Jehovah, NW].” (Ephesus 6:4) Edi nte afo omokụt mme ikpehe ẹmi oyomde afo anam n̄kọri ke ndinọ mmọ ukpep? Nte afo ke abiat ini oro ekemde ye nditọ fo? Nte mbufo ẹmenam n̄kpọ ọtọkiet nte ubon kiet? N̄ko nte afo emesidiana kiet ye mmọ ke unọ idem inemesịt oro ọbọpde-bọp?
Kûfre ke afo ndinịm nnennen uwụtn̄kpọ enyene ọkpọsọn̄ odudu ke idem nditọ fo. Edieke afo oyomde mmọ ẹda akpanikọ ke akpan n̄kpọ, do emi edi usụn̄ nte afo ekpesede enye. (3 John 2-4) Ndien edieke afo oyomde mmọ ẹkọri ntotụn̄ọ ukpono ẹnọ esop Jehovah ye mbiowo, do afo ekpenyene ndinyene utọ eti edu oro ke idemfo.
Okposụkedi unọ eyen ukpep edide akpan utom mme ete ye eka, mbiowo n̄ko ẹnyene mbiomo ke idem mme uyen ke esop. Ke ndikpeme otuerọn̄ Abasi, oyom mme esenyịn n̄ko ẹbọk mme erọn̄. (1 Peter 5:1-3) Nso eti uwụtn̄kpọ ke Jehovah onịm ntem ke ndikpeme idem n̄kpri owo ke ima ima usụn̄! (Isaiah 40:11) Ke ndikpebe uwụtn̄kpọ esie, mme Christian oro ẹdide udiana ekpemerọn̄ n̄ko ẹyeyom ndiwụt ufiop ufiop, ima ima udọn̄ ke idem mme uyen ẹnyụn̄ ẹnam mmọ ẹkere ke mmimọ idi ubak esop. Ndusụk uyen ẹma ẹwụt udọn̄ ẹte mbiowo ẹsinyene nneme ye mmimọ ndien ndien ẹnyụn̄ ẹn̄wam mmimọ ke utom an̄wautom.
Ndinọ uyen ukpep esịne se ikponde ikan ndinọ enye ifiọk ibuot aban̄ade N̄wed Abasi. Ke esịt esie, ana enye asua se Abasi asuade onyụn̄ ama se Abasi amade. (Amos 5:14, 15) Edieke anade enye eti Andibot esie ke ini uyen, enye oyom ntụnọ N̄wed Abasi ke ndisan̄a ke edinen usụn̄ Jehovah. (Mme N̄ke 22:6; 2 Timothy 3:16) Ikpanaha mme ete ye eka etre ndinọ ntụnọ oro ẹyomde. Ndusụk ete ye eka ẹmi ẹyomde ndimụm itieufan nditọ mmọ n̄kama ke se ededi editakde ẹnyene ntụhọ ufụmi ndiọi edinam, isọn̄ọke itịn̄ nte enye ọdiọkde. Nda-ke-idem ererimbot akabade enyene odudu ke idemmọ. Edi ima ima ete m̀mê eka esinọ n̄kpan̄utọn̄ ke ẹtọtde ẹte ke eyen esie ama anam idiọkido onyụn̄ ọnọ nnennen ntụnọ nte ẹyomde. (Mme N̄ke 13:24) Ke akpanikọ, ewe Christian ete m̀mê eka oyom ndimụm itieufan oro ọkọn̄ọde ke edu nda-ke-idem n̄kama edi atabade eyen esie ke ntak unana eti ntụnọ?—Mme N̄ke 22:15.
Nyene Uduak ke Uwem Jehovah Abasi akanam nnyịn man nnyịn inyene n̄kpon n̄kan idatesịt ye uyụhọ ito edinam n̄kpọ esie. Ekere ẹban̄a ata akamba an̄wautom oro mbufo mme uyen ẹkemede ndinam utom. N̄kpọ nte mbahade iba ke otu ibat mme andidụn̄ ererimbot edi isua 20 ke emana m̀mê osụhọrede akan oro. Mme uyen ẹmi ke ẹmian̄a ke inyan̄ ubonowo. Ke adan̄aemi mmọ mînyeneke idotenyịn, mbufo mme uyen Christian ẹmenyene ata idotenyịn ye eti n̄kpọ ndibuana ye mmọ. Ebede ke eti edu uwem Christian mbufo ye ifịk mbufo ke utom Jehovah, mbufo ẹmekeme ndidụri ediwak mmọ nsịn ke akpanikọ. Mbufo ke ntre ẹmekeme ndin̄wam mmọ ẹdụk usụn̄ oro adade osịm uwem.
Nso eti utịt mbuba efen ke afo ekeme ndinyene n̄kan ediyak uwem fo nsịn ke utom Jehovah Abasi? Ndi afo ama ekere ndinam anyan̄a-uwem utom ukwọrọikọ ke uyọhọ-ini? Iso-ọfọn mbufo ẹmekeme ndibuana ke ndisuan eti mbụk nte asiakusụn̄, mîdịghe afo emekeme ndinam utom ke kiet ke otu ọfis n̄kọk itieutom Watch Tower Society ke ebiet emi ẹmịn̄de mme n̄wed un̄wam ukpep Bible. Idem edieke afo mûkemeke ndinam oro, ndi afo ukpanamke utuakibuot Jehovah edi akpan n̄kpọ ke uwem fo, ke ntre ẹtide Andibot fi? Afo emenyene eti utom ndinam. Ntre, tutu utịt akani editịm n̄kpọ emi, biere ‘ndiyọhọ kpukpru ini ke utom Ọbọn̄.’— 1 Corinth 15:58.
Ntre mbufo mme uyen Christian ẹsịn ifịk ẹkaiso. Ẹti Andibot mbufo idahaemi, ndien enye eyekpeme mbufo ke ini enye adade ererimbot unana uten̄e Abasi emi osịm utịt. Ih, Jehovah eyekpeme mbufo ke ini oro onyụn̄ ọdiọn̄ mbufo ye anana utịt, ubọn̄ ubọn̄ ini iso.