Ata Ido Ukpono Christ ke Anam Uwem Ọfọn Akan ke Sweden
SWEDEN ọmọnọ mme andidụn̄ enye kiet ke otu n̄kon̄ n̄kan idaha udu uwem ke ererimbot. Ke adianade ye akpakịp udia ye itieidụn̄, moto, ubom uda mbọ ofụm, television, ye ọkpọ ọkpọ computer, mme andidụn̄ Sweden ẹkpere ndinyene ibọkusọbọ mfọn, okụk ẹnọde mbon usọn̄ ye mbon n̄kpọnnam, okụk ẹkpede nditọn̄wọn̄, ye mme n̄kpọ eken oro ukara ọnọde ibetedem.
Afo ke ntre emekeme ndibiere ke owo ndomokiet ikemede ndinam uwem ọfọn akan oro ke utọ idụt ntre. Edi, kpa ye ofụri inyene obụkidem esie, Sweden enyene udeme mfịna esie: usiondọ, ukpa mmịn, uda n̄kpọsọn̄ ibọk
ke idiọk usụn̄, ubiatibet, ye uwot idem. Ido ukpono, emi ẹkpedoride enyịn ndinyene ọkpọsọn̄ odudu ke eti ido uwem, edi sụk n̄kpakpa n̄kpọ ke Sweden. Se iwakde ikan mbahade 90 eke ikie ke otu nditọ idụt oro ẹdi mbon Lutheran State Church, edi n̄kpasịp mbahade 2.1 eke ikie ẹsika ederi kpukpru ini. Oku kiet ọkọdọhọ uko uko ete: “Ufọkederi odu ke nduọkodudu. . . . Enye amataba akpan odudu esie omonyụn̄ adianade idemesie ọkpọn̄ udọn̄ mme owo.”
Ufọkederi ndikpu ndinam uwem ọfọn akan ke Sweden, nte ededi, inamke ata Ido Ukpono Christ okụt edikpu ke baba usụn̄ kiet. N̄kpọ nte Mme Ntiense Jehovah 22,000 ke mme esop 331 ke ẹkụt unen ke ndin̄wam mme owo ndida mme edumbet Bible nsịn ke edinam kaban̄a ufọn mmọ. Utom emi idịbeke enyịn mme owo.
“Ana nnyịn ima Mme Ntiense Jehovah ke ntak nsịnifịk mmọ ke ndiwọrọ n̄kosobo mme owo ye etop mmọ!” ntre ke ekpepn̄kpọ ido ukpono kiet eketịn̄ ke n̄wedmbụk idụt mbon Pentecostal, Dagen (Usen). Ibuotikọ oro adian do ete: “Mme Ntiense Jehovah ẹnam otu oro ẹnyenede n̄wakn̄kan ibat mbufa mme andibuana kpukpru isua ẹnyụn̄ ẹnyene n̄wakn̄kan otu mme uyen . . . Nnyịn ikpenyene ndikpep n̄kpọ nto Mme Ntiense Jehovah.”
Ke akpanikọ, mbon oro ẹnen̄erede ẹyom ndikpep n̄kpọ nto Mme Ntiense Jehovah ẹyekụt n̄kpọ kiet. Nso idi oro? Nte mme akpanikọ Bible ke utịbe utịbe usụn̄ ẹkemede ndinam idaha uwem mmọ ọfọn akan.
Ifiọk Bible An̄wam!
Kere ban̄a leta kiet emi ọfis n̄kọk itieutom Watch Tower Society idụt oro ọkọbọde oto ekaeyen kiet oro edide uyen emi mîdọhọ ndọ. Enye ekewet ete: “Ami nyom ndiwụt esịtekọm oro nnyenede ke ntak eti uwem oro ami ndude tọn̄ọ nte n̄kọtọn̄ọ ndikpep n̄kpọ ye Mme Ntiense Jehovah. Ami mmenyene ufọk oro nsụn̄ikan̄ sika mîdụhe. Ami mmedidiọn̄ọ ufọn ndibiat ekese ini ye eyen mi an̄wan. Idaha okụk mi ke ọfọn akan, okposụkedi mbọde ukem okụk ọfiọn̄. Ami nnyeneke ediwak mfịna ke ndide idap. Mmenyene n̄ko mme ata ufan ndidat esịt mban̄a. Ih, ami ndikpụhọke uwem oro ndude idahaemi ye enye oro n̄kodude mbemiso.”
Uwụtn̄kpọ efen abuana n̄kpọ aban̄ade usiondọ—kpa ọsọ n̄kpọ ke Sweden. Nte ededi, Bible ama an̄wam mme ọdọ-ndọ ẹmi ẹkerede Arne ye Ketie. Mmọ ẹma ẹdọ ndọ ke isua 13 ẹnyụn̄ ẹnyene nditọ iba ke ini mme mfịna oro mmọ ẹkenyenede akanamde mmọ ẹbọ usiondọ. Mmọ ẹma ẹsua kiet eken.
Arne, emi ọkọwọrọde okodụn̄ ke idemesie, ama osobo ye Mme Ntiense Jehovah onyụn̄ ọtọn̄ọ ndikpep Bible. Enye ama okop nduaidem aban̄a se enye ekekpepde tutu eyedi ke usen kiet enye ama efehe ebịne Ketie onyụn̄ odomo ndinyịk enye ye nditọ ndikpep n̄kpọ n̄ko! Ke ini n̄wan emi okosịmde, eren emi ama onụk enye ọtọ ke ibibene onyụn̄ ọdọhọ ete: “Afo kam kpep, mîdịghe ntre nyewot fi!” Ketie ama okot Mme Ntiense Jehovah onyụn̄ ọtọt ọnọ mmọ, ọdọhọde ete: “Nso utọ ọsọn̄ido Abasi ke Jehovah oro edi?”
Ẹma ẹsian Ketie ke ime ẹte ke Jehovah edi ima ima Abasi oro mînyịkke-nyịk ndomo owo kiet. Enye ama enyene udọn̄ onyụn̄ oyom ndikpep n̄kpọ efen efen. Nte Arne enyenede ifiọk efen efen aban̄a mme edumbet Abasi, enye ama osụhọde idem onyụn̄ ọtọn̄ọ ntak esineme nneme ye Ketie. Mmọ ẹma ẹsikụt kiet eken kpukpru ini ke mme mbonoesop ke Ufọkmbono Obio Ubọn̄. Utịp? Ke mmọ mbiba ẹma ẹkekabade ẹdi Mme Ntiense oro ẹnade baptism, mmọ ẹma ẹfiak ẹdọ ndọ! Mmọ ẹmedọ ndọ ke isua itiaita, ndien Arne anam utom nte ebiowo ke esop. Mmọ ẹdọhọ ẹte, “Akananam ndọ nnyịn ifọnke nte oro ọfọnde idahaemi. Nnyịn imenyene ata ekese n̄kpọ ndikọm Jehovah mban̄a.”
Akpanikọ Bible n̄ko an̄wam n̄kparawa owo ndinam uwem mmọ ẹfọn ẹkan. Akparawa kiet emi ekerede David eti ete: “Ete ye eka mi ẹma ẹsion̄o ndọ, ndien eketie nte kpukpru n̄kpọ ke uwem mi akwan̄a. N̄kọdọn̄ke enyịn ke baba n̄kpọ kiet. Ami mma nsitre ndika n̄wed n̄konyụn̄ nnamke utom ufọk ekededi ke ufan̄ isua ita ẹmi ẹkebede. Ke ndusụk ini mma n̄kụt uwem nte se mîkam idotke ndidu. Ami n̄kesisịne n̄waha ọfọn̄ukot jeans ye n̄kani ikpaukot. Idet ibuot mi ama ọniọn̄ osịm ufọt abaedem. Mma ndomo nsio nsio orụk uwem nse, utọ nte eke uyom uyom ikwọ rock. Mma nsin̄wọn̄ sika nnyụn̄ n̄kpa mmịn nnyụn̄ mbuana ke ubiatibet.
“Ke 1986 owo Ntiense Jehovah kiet ama awaha n̄kan̄ mi. ‘Kiet ke otu mbon abian̄a abian̄a ido ukpono,’ ntre ke n̄kekere. ‘Yak mbụp enye mbụme ifan̄ oro enye mîdikemeke ndibọrọ.’ Ke n̄kpaidem mi, enye ama ọbọrọ mmọ. Ami mma nnyịme kiet ke otu ukpepn̄kpọ Bible esie nnyụn̄ n̄kụt nte ke enye enyene nti ibọrọ ọnọ se ikperede ndidi kpukpru n̄kpọ—nte ke ndudue ndomokiet idụhe ke akpanikọ. Ami mma ndụk mbono nnyụn̄ ndu ke n̄kpaidem ndikụt ndiye, ufan ufan mme owo. Mma ntọn̄ọ ndidụk mme mbonoesop Mme Ntiense Jehovah ndien n̄kodu ke n̄kpaidem ke ini ediwak owo ntre ẹkedide ẹdikọm mi ubọk. Nso uto edidianakiet idu ntem ke otu mbon ẹmi!”
Ke isua kiet ye ubak ebede, David ama ana baptism nte owo Ntiense Jehovah. Mme iman esie, n̄kani ufan esie, mme andikpep, ye mbon en̄wen ikekemeke ndinịm ke akpanikọ nte ke akparawa emi esịnede ọfọn̄ ediye ediye onyụn̄ ọdiọn̄de idem ọfọn mi ekedi David oro mmimọ ikọdiọn̄ọde ke mbemiso.
Ntatara Utịp
Ndikwọrọ ikọ to ke enyịnusụn̄ sịm enyịnusụn̄ ke Sweden ekeme ke ndusụk idaha ndinọ owo mmemidem. Owo Sweden esitịm odịp idem esie. Ke ini n̄kanika enyịnusụn̄ amiade, enye ekeme nditop enyịn ke ododu ese an̄wa, ndien owo isiberekede ediwak usụn̄ inọ Mme Ntiense Jehovah. Edi mmọ iduọkke idotenyịn. Mme Ntiense ẹdiọn̄ọ nte ke mme angel ẹkeme ndiyom mbon oro ẹnyenede nti esịt n̄kụt. (Ediyarade 14:6; men Matthew 13:41 domo.) Ndondo oro akpanikọ odụkde uwem mme owo ntre, enye esiwak nditara—nte ekara ke iso mmọn̄—osịm mme iman ye mme ufan.
N̄wan kiet ke Stockholm eti nte enye eketiede ke okpokoro ufọk utemudia atua aban̄a idiọk idaha esie ke uwem. Enye ọkọdọhọ ete, “Ami n̄kodu ke nnanenyịn. Inikiet inikiet, mma ntọn̄ọ ndibọn̄ akam nte: ‘Abasi, ami nyom ndineme nneme ye afo mban̄a uwem. ‘N̄kanika enyịnusụn̄ ama amia. Mma nda n̄kụt eren kiet oro esịnede ọfọn̄ ediye ediye ke odudu uda nse an̄wa, ntre mma mberede usụn̄. Enye ọkọdọhọ ke imọ iyom ndibuana edemede owo udọn̄ ekikere ifan̄ ye ami nto Ikọ Abasi. Enye ekedi owo Ntiense Jehovah. Mma mbụp m̀mê enye ama awaha etiene mbon efen ke enyọn̄ufọk oro ami n̄kodụn̄de. Enye ama ọdọhọ ete, ‘Baba, ami n̄kọnyọn̄ edinịm ukpepn̄kpọ Bible ke ini n̄kebierede ndinam ndusụk ikot. Ami n̄kenyene nditọn̄ọ mi.’ Ami n̄kodu ke n̄kpaidem koro n̄kodụn̄de ke enyọn̄ enyọn̄ ikpehe ufọkenyọn̄. Ami mma mma se enye okowụtde mi.”
Ikebịghike n̄wan emi ama ọtọn̄ọ ndikpep Bible. Ye ọkpọsọn̄ udọn̄, enye ama ọtọn̄ọ ndibuana se enye ekekpepde ye mme iman ye ufan. Enye ama onịm Bible 28 ye ikpọ n̄wed 96. Utịp? Ikebịghike ebe esie, nditọeka esie iban iba, eyen eyeneka esie eren ye n̄wan, eyeneka ebe esie, eka ye ete esie, eyen ebe esie eren, nsan̄autom esie, ye nsan̄autom ebe esie ye n̄wan ẹma ẹtọn̄ọ ndikpep Bible ẹnyụn̄ ẹben̄e idem ẹnọ baptism. Idahaemi, ebede ke ikot kiet oro owo Ntiense Jehovah kiet akanamde ke enyịnusụn̄, owo 13 ẹma ẹnyene ifet ndinam idaha uwem mmọ ọfọn akan. N̄wan emi ọdọhọ ete: “Ndidu uwem ekekem ye uduak Jehovah amanam ekese nti n̄kpọ ke uwem nnyịn anam nnyịn ikpọtọn̄ọ edọn̄ nnyịn ikọm enye kpukpru usen!”
Ndinọ Ikọ Ntiense ke Ufọkn̄wed
Ikpọ mfịna ke edinọ ntụnọ odu ke ediwak ufọkn̄wed ke Sweden. Edi Mme Ntiense ẹdide uyen ẹsịn ọkpọsọn̄ ukeme ke ndibuana akpanikọ Bible ye mme andikpep ye nsan̄a nditọ ufọkn̄wed. Ke uwụtn̄kpọ, Jorgen, emi edide uyen, ama asian mme andikpep ye nditọ ubet ukpepn̄kpọ esie an̄wan̄wa ete ke imọ idi owo Ntiense Jehovah. Ẹma ẹnọ enye ukpono ke ntak in̄wan̄în̄wan̄ ye eti edu uwem esie. Jorgen kpukpru ini ama esibọrọ mme mbụme ẹmi ẹtiede uyat uyat ke ukpono ukpono usụn̄ onyụn̄ etịn̄ mme n̄kpọ otụk Bible. Emi ama otụk nditọ ubet ukpepn̄kpọ esie ke idem ntotụn̄ọ ntotụn̄ọ. Jorgen obụk ete:
“Ke isua kiet ebede nte n̄kokụre ufọkn̄wed, ami mma nsobo Peter, kpa akani eyen ubet ukpepn̄kpọ mi. Ke ima ikenyene ndusụk nneme, mma ntọn̄ọ ndinịm ukpepn̄kpọ Bible ye enye. Sia eka esie ekesịnde ubiọn̄ọ, nnyịn ima isinịm ukpepn̄kpọ ke mbenesụk. Peter ama ana baptism ke March 1988. Eka esie ama edifiọk ete ke eyeneren imọ ama okpụhọde odu eti uwem, ntre enye n̄ko ama ọtọn̄ọ ndikpep n̄kpọ. Ke ndusụk ini ebede, enye ama ana baptism.
“Akani eyen ubet ukpepn̄kpọ efen, Torbjorn, ama ọtọn̄ọ ndikpep Bible. Ntre n̄ko ye eka esie. Mmọ mbiba ẹmena baptism idahaemi.” Ke ofụri ofụri, owo inan̄ ke otu nditọ ubet ukpepn̄kpọ Jorgen ẹma ẹtọn̄ọ ndikpep Bible, ndien ọyọhọ owo ition ama owụt udọn̄. Jorgen eberi ete, “Ami ndori enyịn nte ke ifiọkutom emi eyesịn udọn̄ ọnọ Mme Ntiense ẹdide uyen ke ufọkn̄wed ẹkûkop ifem. Eti edu Christian mmọ ye nsọn̄ọnda mmọ nnọ akpanikọ ekeme nditọ n̄kpasịp oro ekemede ndin̄wụm nti mfri ke ukperedem.”
Ndin̄wana Kaban̄a Ifụre Ido Ukpono
Mme Ntiense Jehovah n̄ko ẹmenyene akpan udeme ke ediwụk akpan ifụre ido ukpono ke Sweden. Emi amanam n̄kpọ ke ufọn ofụri owo.
Ke uwụtn̄kpọ, nte edide ke kpukpru idụt eken, Mme Ntiense Jehovah ke Sweden ẹma ẹbiere nte owo kiet kiet ndisọn̄ọ mmụm edida san̄asan̄a Christian n̄kama. (John 17:16) Nte utịp, ẹma ẹbiere ediwak isua n̄kpọkọbi ẹnọ ediwak mmọ. Edi ke 1966 ifụre ido ukpono ama edisịm ke ini ukara ekebierede ete ke ọkọn̄ọde ke akpan ndụn̄ọde, owo idikotde Mme Ntiense isịn ke utom ekọn̄. (Isaiah 2:2-4) Sweden ndinyịme nnọ ido ukpono amanam n̄kpọ nte uwụtn̄kpọ ọnọ mme ukara eken.
N̄kpọ efen abuana unen oro owo udọn̄ọ enyenede. Mme Ntiense Jehovah ẹda ewụhọ Bible oro ọdọhọde ete ‘ẹbet iyịp’ ke akpan n̄kpọ ndien ke ntre ẹsịn edikịm iyịp nsịn ke idem. (Utom 15:28, 29) Okposụkedi mîdịghe kpukpru dọkta ye mme ọfiọk ibọkusọbọ ẹsiwụt ukpono ẹnọ idaha N̄wed Abasi emi, ibuotikọ kiet ke ata ọwọrọetop n̄wedmbụk ibọkusọbọ ke Sweden ama ọtọt ndondo emi ete: “Ẹnyene Ndikpono Edisịn Edikịm Iyịp Nsịn ke Idem Edieke Owo Udọn̄ọ Ọdiọn̄ọde Aban̄a Mme Utịp Esie.”
Ikọ ẹmi ẹkebemiso ke ntọt aban̄ade mbono oro Esop Kaban̄a Nsọn̄idem ye Mfọnọn̄kpọ ye N̄ka Kaban̄a Eti Ibọkusọbọ Mbon Obio Sweden ẹkenyenede. Ke ẹma ẹkeneme ẹban̄a idaha Mme Ntiense Jehovah, n̄ka ẹmi ẹma ẹbiere ndikpak kpukpru dọkta ndinyịme ke ini owo udọn̄ọ oro odotde ke ibet—ọtọn̄ọde ke isua 15 ke emana dọk—esịnde ndibọ edikịm iyịp nsịn ke idem. Mmọ ẹmefiọk ẹte ke ọkpọsọn̄ ukpan odu idahaemi kaban̄a edikịm iyịp nsịn owo ke idem ke ntak n̄kpọndịk edisuan mme udọn̄ọ. Ke edide akpan n̄kpọ akan, nte ededi, ntatara ubiere mmọ ọsọn̄ọ akpan unen oro owo udọn̄ọ ekededi enyenede ndisịn akpan orụk usọbọidem.
Ke akpanikọ, ediwak mme andidụn̄ Sweden ẹkop inem eti uwem ke n̄kan̄ obụkidem. Edi oyom ẹbọp ediwak mmọ ẹkọri ke n̄kan̄ eke ido uwem ye eke spirit. Nte eyịghe mîdụhe, mme ata Christian ke idụt oro ke ẹn̄wam ndinam uwem kpukpru mbon oro ẹnyịmede ndikpep nnyụn̄ nda Ikọ Abasi nsịn ke edinam ọfọn akan. Utọ mme owo ẹmi ẹyerede ikot mi n̄ko enyene idotenyịn uwem nsinsi ke obufa ererimbot Abasi emi edide.—John 17:3; 2 Peter 3:13; Ediyarade 21:3, 4.
[Ndise obio ke page 22]
(Ama oyom ndikụt nte enye enen̄erede etie, se n̄wed)
NORWAY
SWEDEN
FINLAND
U.S.S.R
DENMARK
WEST GERMANY
EAST GERMANY
POLAND