Edinọ Ikọ Ntiense ke Itie Mbubehe—Ido Mbon Japan
ANA ewụhọ oro Jesus Christ ọkọnọde ete ẹtat utom unọ ikọ ntiense “tutu osịm utịt ererimbot” esịne mme itie unam mbubehe. (Utom 1:8) Ke Japan, ndinọ mme owo oro ẹnamde utom ke ikpọ itieutom ye ọfis usiakifia ikọ ntiense Obio Ubọn̄ edi ata n̄kpọ-ata. Mme asuanetop Obio Ubọn̄ ke esop kiet ẹma ẹbọ unyịme man ẹda magazine ẹnọ iko ntiense ke ọfis akwa obio oro ke ini udia uwemeyo. Ikụreke ke mme asuanetop oro ndibọn̄ akam ndọhọ Jehovah ọnọ mmimọ uko, edi ẹma ẹnọ ekese ntịn̄enyịn ke usịnen̄kpọ ye ido uwem mmọ, ndien ẹma ẹkam ẹtịm kad idiọn̄ọ oro owụtde enyịn̄ mmọ onyụn̄ anamde ẹdiọn̄ọ mmọ nte Mme Ntiense Jehovah.
Ntiense kiet eyesobo anamutom, ọdọhọde ete: “Mbọk, ẹma ẹnọ mi unyịme ẹte nnyene nneme ye mme owo mi. Nte afo akpama ndikpan̄ utọn̄ nnọ mi ke adan̄aemi osụk adiade udia?” Akana Mme Ntiense ẹwụt eti ibuot ẹnyụn̄ ẹkama ikọ ẹmi “ẹsịnde inụn̄ ke esịt.” (Colossae 4:6) Ke akpa ini oro mmọ ẹkekade, mmọ ẹma ẹnịm magazine 39, edi ama oyom ẹka do utịm ikanan̄ man ẹkụre ofụri ufọk oro enyenede enyọn̄ itiaita ẹmi owo 1,500 ẹnamde utom. Mmọ ẹma ẹnịm se iwakde ikan ofụri ibat magazine ikie ẹma ẹnyụn̄ ẹkeme nditọn̄ọ mme afan̄ magazine nnyụn̄ nnam mme edifiak n̄ka.
Asuanetop kiet ama afiak aka ebịne etubom utom. Ke ini eren emi okokopde nte ẹkotde itien̄wed Abasi kiet ẹto New World Translation, enye ama ọdọhọ ete: “Bible enyeemi otịm an̄wan̄a. Enye oro ami n̄kokotde ke mbemiso ekedi eke mbon Japan eset ndien ama ọsọn̄ etieti ndikot.” Ẹma ẹda idem New World Translation kiet ẹsọk enye ke urua oro eketienede.
Nte afo ẹmekeme ndinam ekese ke efakutom esop mbufo man ọkwọrọ eti mbụk ọnọ “kpukpru owo,” esịnede mbon oro ẹdude ke mme efak unam mbubehe?—Men 1 Timothy 2:4 domo.