Eti Mbụk oro Ẹtan̄ade ke Ofụri Ekondo
OBIO UBỌN̄ Abasi ke akara! Emi edi ata mfọn n̄kan mbụk. Oro edi ntak ke 1989, Mme Ntiense Jehovah ẹwakde ẹbe 3,700,000 ke ofụri ererimbot ye ifiopesịt ẹketan̄ade “eti mbụk” oro Jesus eketịn̄de ke prọfesi ye ‘ukwọrọikọ’ oro angel ọkọtọtde ke n̄kukụt John. (Matthew 24:14; Ediyarade 14:6) Nte apostle Paul ọkọdọhọde ete: “Uyom mmọ ọmọwọrọ ke ofụri isọn̄, ikọ mmọ ẹnyụn̄ ẹsịm utịt ererimbot.” (Rome 10:18) Ndien mme owo ke ekperede ndidi ke kpukpru idụt ye esien ye usem ye obio ke idara ẹma ẹyere ikot mmọ ‘nditen̄e Abasi, nnyụn̄ nnọ enye ubọn̄.’—Ediyarade 14:7.
Ufọn Insurance Idụhe Aba
Kiet ke otu utọ mbon oro ekedi eren kiet ke England oro akadade mbubehe unana-iwụk ke uwem odu uwem. Ken ekedi owo mbubehe insurance, ndien ke ini enye akakade ebịne ubon Ntiense Jehovah kiet, mmọ ẹma ẹbụp enye ẹte: “Nte afo akpama ndidu uwem ke ererimbot emi owo mîdiyomke ufọn insurance?” Nso ke ikọ mmọ ọkọwọrọ? Nte ekemde ye Bible, nte ke idak Obio Ubọn̄ Abasi ediwak n̄kpọ oro anamde uwem enen̄ede anana iwụk idahaemi, esịnede udọn̄ọ ye n̄kpa, ididụhe aba.
Nte utọ n̄kpọ ntre ekeme nditịbe? Ih, Abasi ke idemesie ama ọn̄wọn̄ọ emi. Ke uwụtn̄kpọ, Bible ọdọhọ ete: “Abasi ke Idemesie eyenyụn̄ odu ye mmọ [ubonowo], . . . Enye eyekwọhọde kpukpru mmọn̄eyet ke enyịn̄ mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” (Ediyarade 21:3, 4) Nso idida utọ ukpụhọde ntre idi? Obio Ubọn̄ Abasi. Nte ekemde ye Ikọ Abasi, ibịghike emi “eyenuak onyụn̄ ama kpukpru mme idụt [ukara ukaraidem eyomfịn] ẹmi, ndien enye eyeda ke nsinsi.”—Daniel 2:44.
Mme Ntiense Jehovah ke ini ubịnikọt ukwọrọikọ mmọ eke ofụri ererimbot ẹma ẹdụri ntịn̄enyịn ediwak million owo ẹwụt mme utọ Itien̄wed Abasi ẹmi. Ediwak owo, nte Ken, ẹma ẹdifiọk ẹte ke emi ikam idịghe ekikere ibuot. Uyarade anam ẹsịm ubiere. Mme un̄wọn̄ọ Abasi ẹmi ẹdot se owo ọkpọbuọtde idem ndien ibịghike ẹyesu.
Ukpụhọde ke se Ẹdade ke Akpan N̄kpọ
Mbon oro ẹkpan̄de utọn̄ ẹnọ Mme Ntiense Jehovah nte mmọ ẹbuanade ke idara idara ukwọrọikọ eke angel oro ẹdi ẹdifiọk ẹte ke nditen̄e Abasi nnyụn̄ nnọ enye ubọn̄ ẹsịne se ikponde ikan edinịm mme un̄wọn̄ọ Bible ke akpanikọ kpọt. Enye okpụhọde ofụri usụn̄ ukere n̄kpọ mmọ onyụn̄ anam ediwak edikpu ke uwem efere.
Rafael ye n̄wan esie ẹma ẹkụt nte emi edide akpanikọ. Mmọ ẹdụn̄ ke Argentina, ndien ke ini mmọ ẹkedọde ndọ ke se iwakde ikan isua 40 ẹmi ẹkebede, se mmọ ẹkenamde edi akpan utịtmbuba mmọ ke uwem ekedi ndinam utom ọkpọsọn̄ nnyụn̄ n̄kọ inyene mbon nnọ ini iso oro enyenede ifụre. Nte ededi, isua 21 ke ukperedem, n̄kukụre se mmọ ẹkenyenede ndiwụt ke ọkpọsọn̄ utom mmọ ekedi ekpri ufọkidụn̄ oro okoyomde ẹdiọn̄ ndien ndien. Mmọ ikenyeneke ifụre ikan nte ẹkenyenede ke ini mmọ ke akpa ẹkedọde ndọ.
Ekem mmọ ẹma ẹkop eti mbụk ẹto Mme Ntiense Jehovah ẹnyụn̄ ẹdifiọk ẹbana mfọn n̄kan orụk inyene ye mfọn n̄kan orụk ifụre. Jesus, ke Ukwọrọikọ esie ke Obot, ama etịn̄ aban̄a emi ke ini enye ọkọdọhọde ete: “Ẹkûbon n̄kpọuto ẹnịm ẹnọ idem ke isọn̄, ke ọtọ nte uta-n̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp: edi ẹbon n̄kpọuto ẹnịm ẹnọ idem ke heaven, ke ọtọ nte uta-n̄kpọ ye n̄karafan̄ mîbiatke n̄kpọ, inọ mînyụn̄ ibụn̄ke, idụk, iyịp.”—Matthew 6:19, 20.
Ke adan̄aemi Bible mîkpepke nnyịn ite ikûnam utom ke edide edisịm inyene obụkidem, enye akpak nnyịn ete ikûkọn̄ idotenyịn nnyịn ke mme utọ n̄kpọ ntre. (Ecclesiastes 7:12) Utu ke oro, nnyịn ikpanam n̄kpọ ndikọ inyene eke spirit ke ndikpep Bible, ndifiọk uduak Abasi, ndinyụn̄ nnịm edinam uduak oro nte akpa n̄kpọ ke uwem nnyịn. (Matthew 6:33) Rafael ye n̄wan esie ẹma ẹtọn̄ọ ndikọ inyene eke spirit ẹmi mbon, ndien mmọ idahaemi ẹkụt nte inyenede inyene ke akpanikọ, idịghe ke ntak idaha okụk mmọ, edi ke ntak ebuana mmọ ye Abasi. (Ediyarade 3:17, 18) Etop Obio Ubọn̄ Abasi ekedi ata eti mbụk ọnọ mmọ.
Ndọ oro Ẹkefiakde Ẹdiọn̄
Eti mbụk enyene ata odudu ndinam eti n̄kpọ. Ke uwụtn̄kpọ, John, oro odụn̄de ke England, ikenyeneke udọn̄ ke Bible, edi n̄wan ye nditọ esie ẹma ẹnyene. Ntem mmọ ẹma ẹtọn̄ọ ndidụk mbonoesop Mme Ntiense Jehovah ke adan̄aemi John ekesiwọrọde aka ndin̄wọn̄ mmịn ye mme ufan esie. Nte utịp, enye ama esịn idem ke un̄wọn̄ mmịn ye sika mbe ubọk, ndien, ke akpatre, oburobụt ido. Ke akpatre, enye ama ọkpọn̄ n̄wan esie aka okodụn̄ ye n̄wan efen.
Ikpe usiondọ ama ọtọn̄ọ. Edi John ama odu ke n̄kpaidem ndikụt nte ke n̄wan imọ—oro ekekpepde edu Christian oto enye ndifiọk eti mbụk—okosụk ekekere aban̄a imọ. John ikekemeke ndifiọk ntak. Urua ita mbemiso ẹbierede ikpe usiondọ oro, edu Christian oro n̄wan John okowụtde ama enyene utịp esie. Enye ama atua ata n̄kpọfiọk aban̄a edu esiemọ, ndien ẹma ẹbiat ikpe usiondọ oro ẹfep. John kemi ama odụn̄ọde eti mbụk ke idemesie onyụn̄ ekpep Bible ye Mme Ntiense Jehovah. Idahaemi enye n̄ko edi Christian ndien, ye n̄wan esie, ke etịn̄ ọnọ mbon en̄wen aban̄a eti mbụk Obio Ubọn̄.
Ke eyo ẹmi mme idaha ubon ẹwụrede, ediwak owo ẹyom un̄wam oro eti mbụk ọkọnọde ke Bible enyenede ndinọ. Owo Ntiense Jehovah kiet ke Peru eketie adiana akwa owoekọn̄ kiet ke isan̄ ubomofụm. Mmọ ẹma ẹtọn̄ọ nneme ndien akwa owoekọn̄ oro ama ọtọn̄ọ ndin̄wana mfịna ubon esie nduọk, esịnede akpanikọ oro enye eketịn̄de nte ke n̄wan imọ enyene mbumehe uda n̄kpọsọn̄ ibọk n̄ko ke ọmọn̄ ọkpọn̄ imọ ebịne akparawa efen. Ntiense oro ke usọ ama owụt enye nte ke Bible ọnọ ata eti item ke n̄kpọ ẹban̄ade ubon onyụn̄ ọdọhọ ete ke emi ama an̄wam imọ ke idem imọ ndikan mme mfịna ubon imọ.—Ephesus 5:21-6:4.
Owoekọn̄ oro ama ọkọm Ntiense oro ke ọnọ-ndọn̄esịt ikọ esie onyụn̄ otobo magazine Enyọn̄-Ukpeme ye Awake! man imọ ikpekeme ndikọri ifiọk imọ ke eti mbụk. Ekem, ke ini Ntiense oro ọkọwọrọde ke ubomofụm oro, n̄wan ye ebe ẹdide n̄kparawa owo ẹma ẹwara ẹkesobo ye enye ẹnyụn̄ ẹben̄e enye nneme. Mmọ ẹkedọhọ ẹte: “Nnyịn ikakam itie fi ke iso, ndien nnyịn ima ikop nneme fo ye eren oro. Nnyịn ikpama nditobo magazine ẹmi n̄ko.” Mmọ n̄ko ẹkeyom ndikpep eti mbụk oro ẹkemede ndinam uwem ọfọn akan.
Uwem oro Okpụhọrede
Efen n̄ko, eti mbụk ọkọnọde ke Bible okpụhọde mme owo. Nte apostle Paul ọkọdọhọde ete: “Ikọ Abasi enyene uwem, onyụn̄ ananam n̄kpọ.” (Mme Hebrew 4:12) Emi ekedi ntre ye akparawa kiet ke Macedonia, Greece. Enye ama odu ke n̄kpaidem ndifiọk, nte ekemde ye Bible, nte ke enyịn̄ Abasi edi Jehovah. Ntem enye ama eben̄e ufan kiet ete an̄wam imo isobo ye Mme Ntiense Jehovah usọp usọp nte ekekeme. Ẹma ẹdiomi ikpehe nneme iba ye Mme Ntiense, kiet kiet ebịghide ke n̄kpọ nte hour inan. Akparawa emi ndien ama ọtọn̄ọ ndikpep Bible kpukpru ini, akpa ukpepn̄kpọ ama ebịghi tutu ke n̄kanika iba usenubọk!
Ọtọn̄ọde ke akpa ukpepn̄kpọ oro, akparawa emi ama ọsọsọp anam uwem esie ekekem ye mme edumbet Bible. Enye ama esidụk mme mbono utuakibuot ye Mme Ntiense Jehovah onyụn̄ edi edima Andibot ata etieti. Ndien Jehovah ke usiene ama ọdiọn̄ enye. Ke akpa urua oro enye ekekpepde Bible, enye ama afat anyan idet esie. Ọyọhọ urua iba, enye ama etre ndika itie unyam mmịn ye itie unek n̄koyom idat idat nsan̄a. Ke ọyọhọ urua ita, enye ama otop akpatre sika esie ọduọk. Ke ama ekekpep n̄kpọ ke ọfiọn̄ iba, enye ama ọtọn̄ọ ndidiana ye Mme Ntiense ke nditịn̄ eti mbụk Obio Ubọn̄ nnọ mbon
en̄wen. Ih, enye ama okop idatesịt kemi Mme Ntiense Jehovah ẹkedade eti mbụk ẹdi ke n̄kan ererimbot oro imo idude.
Eti Mbụk ke Ufọk-N̄kpọkọbi
Idem ọkọ ufọk-n̄kpọkọbi idịghe n̄kpọ ubiọn̄ọ inọ eti mbụk. Ke Spain akparawa kiet ekerede José osụk enyenyene uwak isua ndidu ke ufọk-n̄kpọkọbi ke ntak ama-uke ye mme edinam ubiatibet eken. Nte ededi, Mme Ntiense Jehovah ẹma ẹkeme nditịn̄ eti mbụk nnọ enye, ndien etop Bible ama okpụhọde edu esie ofụri ofụri. Jehovah ‘ama ọsọn̄ọ’ enye idem.—Philippi 4:13.
José ọdọhọ ke ekeme ndidi imọ iyebiat nyọhọ-nsụhọ isua uwem imọ ke editịm n̄kpọ emi ke ufọk-n̄kpọkọbi ke ntak akani edu uwem imọ. Edi enye ama ana baptism ndien idahaemi edi Christian. N̄wan esie ye nsọn̄ọnda ọmọnọ enye un̄wam, ndien n̄wan emi ke odomo ndinọ ekpri eyeneren mmọ ukpep Christian. Mi kan̄a, José ke abuana eti mbụk ye ekemmọ mbon-n̄kpọkọbi, kpa mme owo oro ọsọn̄de mbon oro mîdụhe ke okụre ufọk-n̄kpọkọbi ndisịm. Idahaemi owo ubet n̄kpọkọbi esie n̄ko edi Christian oro anade baptism.
Mmọemi ẹdi sụk ibat ibat uwụtn̄kpọ ndiwụt utịp ẹtode ubịnikọt ukwọrọikọ ofụri ererimbot eke Mme Ntiense Jehovah. Ke akpanikọ, eti mbụk eke angel oro enyịn mîkwe atan̄ade edi se Mme Ntiense Jehovah ẹbuanade “ẹte ikwọrọ inọ mmọemi ẹdụn̄de ke isọn̄, ye kpukpru idụt ye esien ye usem ye obio.”
Enye edi mfọn n̄kan mbụk, enye n̄ko edi n̄kukụre idotenyịn ubonowo. Nnyịn imakpak fi ndinịm enye. Nte Ken ye John ke England, nte Rafael ye n̄wan esie ke Argentina, nte José ke Spain, ye nte ata ediwak ibat mbon en̄wen, nnyịn imadiana ye angel oro ke ndikpak kpukpru owo nte yak “ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enyeemi okobotde enyọn̄ ye isọn̄ ye inyan̄ ye idịm mmọn̄.”—Ediyarade 14:7.