Nte Ẹkpenịmde Mbono Esop Uwem ye Utom Nnyịn Mme Christian

Se Isịnede

• Ntọn̄ọ-Ikọ 2

• Mme Akpan N̄kpọ ke Ikọ Abasi 3-5

  • Utịn̄ikọ 3

  • Yom N̄kpọ-Uto ke Ikọ Abasi 4

  • Edikot Bible 5

• Kpep Ndikwọrọ Ikọ Ọfọn 6-14

  • Nte Ọkpọtọn̄ọde Nneme 7

  • Sifiak Ka 8

  • Nam Mme Owo Edi Mbet Jesus 9

  • Nam Mme Owo Ẹdiọn̄ọ Se Enịmde ke Akpanikọ 10

  • Utịn̄ikọ 11

  • Nte Ẹdinamde 12

  • Nte Ẹtimde 13

  • Ndida Mme Vidio ye N̄wed Nnyịn Nnam N̄kpọ 14

• Nte Christian Okpodude Uwem 15-16

  • Ukpepn̄kpọ Bible Esop 16

• Utịtikọ 17

• Itoro ye Item 18

• Ini 19

• Urua Emi Esenyịn Circuit Edide 20

• Urua Mbono Circuit M̀mê Akamba Mbono 21

• Urua Editi 22

• Esenyịn Mbono Esop Uwem ye Utom Nnyịn 23

• Etie-Ibuot Okpokoro Mbono Esop Uwem ye Utom Nnyịn 24

• Udiana Ọnọ-Item 25

• Mme Udiana Ubet Ukpepn̄kpọ 26

• Mme Vidio 27

1. Se ẹwetde emi ayan̄wam kpukpru mbon emi enyenede n̄kpọ ndinam ke Mbono Esop Uwem ye Utom Nnyịn Mme Christian. Mmọ ẹkpenyene ndise se ẹnọde mmọ ẹnam emi ẹwetde ke N̄wed Mbono Esop Uwem ye Utom Nnyịn Mme Christian ye se ẹwetde mi mbemiso mmọ ẹtịmde se ẹnọde mmọ. Mbọk ẹdọhọ kpukpru mme asuanetop ẹben̄e idem ndinam se ẹnọde mmọ ẹnam. Ẹkeme n̄ko ndinọ mbon oro mîdịghe kan̄a mme asuanetop se ẹsinọde nditọ ufọkn̄wed ẹnam edieke mmọ ẹnyịmede se Bible ekpepde, ẹdude uwem nte Bible ọdọhọde, ẹsinyụn̄ ẹdụkde mbono esop kpukpru ini. Edieke owo mîdịghe asuanetop edi oyom ndisịn enyịn̄, esenyịn Mbono Esop Uwem ye Utom Nnyịn ekpenyene ndineme mme n̄kpọ oro ẹyomde ye enye onyụn̄ anam enye ọfiọk m̀mê enye odot. Ọkpọfọn ẹnam ntre ke iso owo oro ekpepde enye Bible (mîdịghe ke iso ete m̀mê eka esie emi edide Ntiense Jehovah). Mme n̄kpọ oro ẹyomde mi ẹdi ukem ukem ye se ẹyomde ẹto owo oro oyomde ndikabade ndi asuanetop oro mînaha baptism.—od ib. 8 ikp. 8.

NTỌN̄Ọ-IKỌ

2. Minit 1. Kpukpru urua, ke ẹma ẹkekwọ ikwọ ẹnyụn̄ ẹbọn̄ akam, etie-ibuot okpokoro Mbono Esop Uwem ye Utom Nnyịn eyetịn̄ ikọ ifan̄ emi edinamde ọdọdọn̄ kpukpru owo ndikop se ẹdinamde ke mbono Esop usen oro. Enye ekpetịn̄ mme n̄kpọ emi ẹdinen̄erede inyene ufọn inọ esop.

MME AKPAN N̄KPỌ KE IKỌ ABASI

3. Utịn̄ikọ: Minit 10. Ẹwet ibuotikọ ye akpan n̄kpọ iba m̀mê ita oro ẹdinemede ke N̄wed Mbono Esop Uwem ye Utom Nnyịn. Ebiowo m̀mê asan̄a-utom unamutom oro odotde ke ẹkpenọ utịn̄ikọ emi. Edieke itie Bible oro ẹkedọhọde ẹkot urua oro edide akpa ibuot n̄wed Bible, ẹyebre vidio emi editịn̄de n̄kpọ iban̄a n̄wed Bible oro. Etịn̄ikọ ekeme ndiwụt nte vidio oro enyenede n̄kpọ ndinam ye ibuotikọ oro enye enemede. Edi, akpana enye okụt ete ke imeneme mme akpan n̄kpọ oro ẹsiakde ke N̄wed Mbono Esop Uwem ye Utom Nnyịn. Enye ekpenyene nditịn̄ n̄kpọ mban̄a mme ndise oro ẹdude do man akpan n̄kpọ ọwọrọ ada. Enye ekeme n̄ko ndisio n̄kpọ ke Enyọn̄-Ukpeme m̀mê ke n̄wed oro ẹsiakde ke utịn̄ikọ emi nsịn ke utịn̄ikọ esie, ekpedi oro ayanam mme akpan n̄kpọ oro enye enemede enen̄ede an̄wan̄a otu-owo.

4. Yom N̄kpọ-Uto ke Ikọ Abasi: Minit 10. Enye emi edidi mbụme ye ibọrọ, inyeneke ntọn̄ọ-ikọ ye utịtikọ. Ebiowo m̀mê asan̄a-utom unamutom oro odotde edinam. Enye ekpenyene ndibụp otu-owo mbụme iba oro ẹdude ke ikpehe emi. Enye ekeme ndibiere n̄ko m̀mê ẹkpekokot mme ufan̄ikọ Bible oro ẹsiakde ẹsịn do. Mbon oro ẹbọrọde mbụme ẹkpenyene ndibọrọ ke sekọn 30 m̀mê osụhọrede akan oro.

5. Edikot Bible: Minit 4. Ẹdinọ eyen ufọkn̄wed emi edide erenowo. Enye ekpenyene ndikot itie oro ẹnọde enye, itịn̄ke ntọn̄ọ-ikọ m̀mê utịtikọ. Etie-ibuot okpokoro mbono esop eyenen̄ede an̄wam nditọ ufọkn̄wed ẹkot n̄wed ọfọn, ọdọnọ, onyụn̄ an̄wan̄a owo; ẹmenede ẹnyụn̄ ẹsụhọde uyo ke ebiet oyomde ẹnam ntre, ẹtuak ẹda esisịt ke ebiet ẹkpetuakde ẹda, ẹnyụn̄ ẹkot enye nte mmọ ẹsitịn̄de ikọ. Sia ndusụk itie Bible emi ẹdọhọde ẹkot esiniọn̄de akan ndusụk, akpana esenyịn Mbono Esop Uwem ye Utom Nnyịn ekere aban̄a ukeme eyen ufọkn̄wed kiet kiet mbemiso enye ọnọde mmọ edikot Bible.

KPEP NDIKWỌRỌ IKỌ ỌFỌN

6. Minit 15. Ikpehe mbono esop enye emi ayan̄wam kpukpru owo ẹkpep nte mmọ ẹkpekwọrọde ikọ ọfọn, nte ẹkemede ndineme nneme ye mme owo, ye nte ẹkpekpepde owo n̄kpọ ọfọn. Ẹkeme ndinọ mbiowo se ẹsinọde nditọ ufọkn̄wed ẹnam ini ekededi oro ẹkụtde ke ọfọn ẹnam ntre. Akpana eyen ufọkn̄wed kiet kiet anam se ẹnọde enye nte ẹwetde ke nọmba n̄wed Ukpepn̄kpọ m̀mê ediye ekpri n̄wed Ma Mme Owo emi esịnede ke N̄wed Mbono Esop Uwem ye Utom Nnyịn. Ndusụk ini, ẹyetịn̄ ikpehe enye oro ẹdinamde nte nneme. Ekpedi ntre, ebiowo m̀mê asan̄a-utom unamutom emi odotde edise aban̄a.—Se ikpehe 15 man okụt nte edinamde ikpehe emi edide nneme.

7. Nte Ọkpọtọn̄ọde Nneme: Eyen ufọkn̄wed emi edide erenowo m̀mê n̄wan ekeme ndinam ikpehe emi. Ke ini ẹnọde erenowo, andin̄wam ekpenyene ndidi erenowo n̄ko m̀mê owo ubon esie. Ke ini ẹnọde n̄wan, andin̄wam ekpenyene ndidi n̄wan n̄ko m̀mê owo ubon esie. Mmọ ẹkeme nditetie mîdịghe ẹdada.—Se ikpehe 12 ye 13 man okụt ntọt efen efen aban̄a nte ekpetịmde ye se ẹyomde owo emi ẹnọde ikpehe emi anam.

8. Sifiak Ka: Eyen ufọkn̄wed emi edide erenowo m̀mê n̄wan ekeme ndinam ikpehe emi. Ke ini ẹnọde erenowo, andin̄wam ekpenyene ndidi erenowo n̄ko. Ke ini ẹnọde n̄wan, andin̄wam ekpenyene ndidi n̄wan n̄ko. (km 5/97 p. 2) Mmọ ẹkeme nditetie mîdịghe ẹdada. Eyen ufọkn̄wed ekpenyene ndinam n̄wụt se ẹkpetịn̄de ke ini ẹfiakde ẹka ẹbịne owo oro akakpan̄de utọn̄ akpa ini emi ẹkenyenede nneme ikọ Abasi ye enye.—Se ikpehe 12 ye 13 man okụt ntọt efen efen aban̄a nte ekpetịmde ye se ẹyomde owo emi ẹnọde ikpehe emi anam.

9. Nam Mme Owo Edi Mbet Jesus: Eyen ufọkn̄wed emi edide erenowo m̀mê n̄wan ekeme ndinam ikpehe emi. Ke ini ẹnọde erenowo andin̄wam ekpenyene ndidi erenowo n̄ko. Ke ini ẹnọde n̄wan andin̄wam ekpenyene ndidi n̄wan n̄ko. (km 5/97 p. 2) Mmọ ẹkeme nditetie mîdịghe ẹdada. Ke ini anamde ikpehe emi, kûtịn̄ n̄kpọ emi owụtde ke oyom nditọtọn̄ọ ukpepn̄kpọ Bible idaha oro, edi yak otu-owo ẹkụt nte afo osụk ekpepde owo n̄kpọ. Ufọn idụhe ndikọm enyene-ufọk m̀mê ndidọhọ enye ke iyom nditọn̄ọ mi m̀mê ke iyom nditre mi mfịn, ibọhọke se ẹsede fi edi oro. Idịghe ibet ke ana okot kpukpru ikpehe, inyụn̄ idiọkke ndikot edieke amade.

10. Nam Mme Owo Ẹdiọn̄ọ Se Enịmde ke Akpanikọ: Edieke edide utịn̄ikọ, eyen ufọkn̄wed emi edide erenowo ekpenyene ndinam ikpehe emi. Ẹkpedi nnamn̄wụt, eyen ufọkn̄wed emi edide erenowo m̀mê n̄wan ekeme ndinam. Ke ini ẹnọde erenowo, andin̄wam ekpenyene ndidi erenowo n̄ko. Ke ini ẹnọde n̄wan, andin̄wam ekpenyene ndidi n̄wan n̄ko. Mîdịghe enye edi owo ubon owo emi ẹkenọde n̄kpọ anam. Eyen ufọkn̄wed emi ekpenyene ndida mbufiọk mbọrọ mbụme emi edide ibuotikọ esie nnyụn̄ nnam enye an̄wan̄a. Enye ekpenyene ndida n̄kpọ nto n̄wed emi ẹsiakde ẹsịn ke ikpehe emi. Eyen ufọkn̄wed edibiere m̀mê iyasiak n̄wed emi ẹdade se ẹnọde enye ẹto ke ini enye anamde se ẹnọde enye anam.

11. Utịn̄ikọ: Ẹdinọ erenowo utịn̄ikọ eyen ufọkn̄wed emi. Enye edinọ nte ẹsinọde utịn̄ikọ ofụri owo. Ke ini se ẹnọde enye anam otode appendix A ke ediye ekpri n̄wed Ma Mme Owo, eyen ufọkn̄wed ekpenyene ndinam an̄wan̄a nte ekpedade se mme ufan̄ikọ Bible oro ẹtịn̄de ẹkwọrọ ikọ. Ke uwụtn̄kpọ, enye ekeme ndinam an̄wan̄a ini ẹkpedade se mme ufan̄ikọ Bible oro ẹtịn̄de ẹkwọrọ ikọ, se mme ufan̄ikọ oro ọwọrọde, ye nte ẹkpedade enye ẹkọk ibuot ye owo. Edieke utịn̄ikọ oro otode kiet ke otu mme ukpepn̄kpọ ke ediye ekpri n̄wed Ma Mme Owo, eyen ufọkn̄wed ekpenyene ndinen̄ede ntịn̄ nte ẹkpedade akpan n̄kpọ oro ẹkwọrọ ikọ. Enye ekeme ndinam uwụtn̄kpọ oro ẹsịnde ke akpa nọmba ke ukpepn̄kpọ oro an̄wan̄a mîdịghe anam itie n̄wed Abasi emi ẹwetde ke ikpehe oro ẹkotde Se N̄ko emi esịnede ke ukpepn̄kpọ oro an̄wan̄a, edieke emi edin̄wamde otu-owo.

12. Nte Ẹdinamde: Se ẹtịn̄de ke ikpehe emi ye enye oro etienede enyene n̄kpọ ndinam ye se ẹsinọde eyen ufọkn̄wed “Nte Ọkpọtọn̄ọde Nneme” ye “Sifiak Ka”. Ibọhọke ẹtịn̄ n̄kpọ en̄wen emi ekemede ndinam, se ẹyomde eyen ufọkn̄wed anam edi ndineme n̄kpọ ke Bible emi mme owo emehede emi edinemde mmọ ndikop, onyụn̄ obụp mbụme mîdịghe anam n̄kpọ emi edin̄wamde enye ekeme ndifiak n̄kenyene nneme ye owo oro. Eyen ufọkn̄wed ekpenyene ndimek ibuotikọ ntiene se itịbede ndondo emi, emi edinyụn̄ ifọnde se ẹkwọrọ ke ebiet emi enye odude. Enye edibiere m̀mê iyọnọ owo n̄wed mîdịghe iwụt vidio emi esịnede ke Mme Akpan N̄kpọ Emi Isidade Ikpep Owo Bible. Utu ke ndinam n̄wụt se enye okomụmde ọdọn̄ ke ibuot, eyen ufọkn̄wed ekpenyene ndinam n̄wụt mme usụn̄ emi ẹkpenemede nneme, utọ nte ndiwụt ke imama mme owo ye ndinam n̄kpọ nte enye esinyụn̄ anamde.

13. Nte Ẹtịmde: Eyen ufọkn̄wed ekpenyene nditịm se ẹnọde enye anam yak ekekem ye nte n̄kpọ etiede ke ebiet emi enye odude. Ke uwụtn̄kpọ:

1. (1) Ke Ufọk ke Ufọk: Nte ẹnamde enye emi esịne ndikwọrọ ikọ ke ufọk ke ufọk—edide iso ye iso, ke fon, m̀mê ndiwet leta—ye ndifiak n̄ka mbịne owo emi ikọkwọrọde ikọ inọ ke ini ikọkwọrọde ikọ ke ufọk ke ufọk.

2. (2) Ke Ini Anamde N̄kpọ Idemfo: Enye emi esịne ndiben̄e-idem ndinam nneme oro inemede ye mme owo akabade edi nneme Ikọ Abasi. Emi ekeme ndisịne ndineme itie n̄wed Abasi ye owo ke itie utom, ufọkn̄wed, ke ebiet emi odụn̄de, ke moto, ye ke itie en̄wen ini anamde n̄kpọ idemfo.

3. (3) Ke Ebiet Emi Mme Owo Ẹwakde: Enye emi esịne ndida ukpatn̄kpọ n̄kwọrọ ikọ, ndikwọrọ ke itie mbubehe, ke efak, ke itie unọ idem inemesịt, ke itie unịm moto ye itie ekededi emi mme owo ẹdude.

14. Ndida Mme Vidio ye N̄wed Nnyịn N̄kwọrọ Ikọ: Edieke eyen ufọkn̄wed okụtde ke ọfọn, enye ekeme ndibiere ndinọ owo n̄wed m̀mê ndiwụt owo vidio. Edieke se ẹnọde eyen ufọkn̄wed anam esịnede ndiwụt owo vidio mîdịghe enye ke idemesie ebiere ndiwụt owo vidio, enye eyetịn̄ n̄kpọ aban̄a vidio oro, edi idibreke.

NTE CHRISTIAN OKPODUDE UWEM

15. Ke ẹma ẹkekwọ ikwọ ẹma, ikpehe enye emi edidi minit 15. Ndusụk ini, ẹdinam n̄kpọ kiet m̀mê iba kpọt. Se ẹdinemede ayan̄wam kpukpru nnyịn ida se ikpepde ke Bible idu uwem. Ibọhọke ẹsiak akpan owo emi ẹdọhọde anam, mbiowo m̀mê mme asan̄a-utom unamutom oro ẹdotde ẹdinam n̄kpọ ke ikpehe enye emi. Edi edieke edide “Se Ẹyomde Ẹneme ke Esop,” ebiowo edinam. Edieke ẹdọhọde ke ikpehe emi edi nneme, eyenete oro ẹnọde ikpehe emi ekeme ndimek ndibụp otu-owo mme mbụme en̄wen adianade ye enye emi odude ke n̄wed. Ntọn̄ọ-ikọ esie ekpedi ibio ibio man enye enyene ini etịn̄ mme akpan n̄kpọ onyụn̄ ọnọ otu-owo ufan̄ nditiene nsịn uyo. Edieke oyomde ẹnam ndụn̄ọde ye asuanetop, ekpenen̄ede ọfọn owo oro ọdọk edi mbot utịn̄ikọ utu ke nditie ke otu-owo mbọrọ se ẹbụpde enye.

16. Ukpepn̄kpọ Bible Esop: Minit 30. Ẹkpenọ ebiowo emi enen̄erede ọdiọn̄ọ ndikpep n̄kpọ. (Ke mme esop oro mbiowo mîwakke, ẹkeme ndinọ mme asan̄a-utom unamutom emi ẹfiọkde ndikpep n̄kpọ.) Otu mbiowo ẹdibiere m̀mê anie odot ndinịm Ukpepn̄kpọ Bible Esop. Akpana ẹmek mbon oro ẹdikemede ndinịm ukpepn̄kpọ emi ọfọn inyụn̄ idiaha ini. Akpana mmọ ẹnen̄ede ẹfiọk ndinam mme akpan itie N̄wed Abasi oro ẹdude ke ukpepn̄kpọ oro an̄wan̄a owo, ẹnyụn̄ ẹkeme ndin̄wam kpukpru owo ẹkụt nte ẹkpedade se ẹkpepde ẹdu uwem. Mbon oro ẹmekde ẹyebọ ufọn ẹto ndidụn̄ọde se esop Abasi ẹtịn̄de ẹban̄a nte ẹkpenịmde ikpehe emi edide mbụme ye ibọrọ. (w23.04 p. 24, ekebe) Ke ẹma ẹkekụre ndikpep se ẹkedọhọde ẹkpep urua oro, ufọn idụhe owo emi edinịmde Ukpepn̄kpọ Bible Esop ndisụk nyịre ndọhọ ke ana imọ ikụre minit 30 emi ẹkenọde imọ. Edieke mbon oro ẹsinịmde ukpepn̄kpọ emi ye mbon oro ẹsikotde ikpehe ẹwakde, ọkpọfọn nsio nsio owo ẹsinịm ukpepn̄kpọ emi, nsio nsio owo ẹnyụn̄ ẹkot ikpehe kpukpru urua. Edieke etie-ibuot okpokoro Mbono Esop Uwem ye Utom Nnyịn ọdọhọde owo emi edinịmde ukpepn̄kpọ oro osụhọ ndusụk ini ọnọ imọ, owo oro edibiere nte enye edinamde oro. Enye ekeme ndidọhọ owo emi edikotde ikpehe okûkot ndusụk ikpehe.

UTỊTIKỌ

17. Minit 3. Etie-ibuot okpokoro Mbono Esop Uwem ye Utom Nnyịn eyetịn̄ akpan n̄kpọ ifan̄ oro ẹkpepde usen oro. Edieke ini osụk odude, enye ekeme ndidọhọ nditọ-ete ẹtịn̄ se mmọ ẹkekpepde m̀mê se mmọ ẹkemade ke mbono esop usen oro, onyụn̄ etịn̄ se ẹdikpepde urua en̄wen. Enye ekeme ndisiak enyịn̄ nditọ ufọkn̄wed oro ẹdinamde n̄kpọ urua en̄wen, edieke ini odude. Etie-ibuot okpokoro ekpenyene ndida ini emi n̄ko nnọ ntọt ekededi emi ẹkụtde ke oyom ẹnọ nnyụn̄ n̄kot leta emi ẹdọhọde ẹkot ẹnọ esop, ibọhọke ẹsiak ini en̄wen emi ẹkpenamde emi. Enye ikpadaha ini emi ikot mme utọ n̄kpọ nte ndutịm ukwọrọ-ikọ m̀mê ndutịm ẹdinịm Ufọkmbono Obio Ubọn̄ asana, edi ẹkpedian mme utọ n̄kpọ oro ke obukpọk ntọt. Edieke ini oro ẹnọde mi mîdikemke se enye adade ọnọ ntọt m̀mê okot leta, akpana enye ọdọhọ nditọ-ete emi ẹnọde n̄kpọ ẹnam ke ikpehe mbono esop emi ẹkotde Nte Christian Okpodude Uwem, ẹsụhọ ini ẹnọ imọ. (Se ikpehe 16 ye 19.) Ẹyekwọ ikwọ ẹnyụn̄ ẹbọn̄ akam ẹberi mbono esop emi.

ITORO YE ITEM

18. Ke ini eyen ufọkn̄wed kiet kiet anamde n̄kpọ ama, etie-ibuot okpokoro Mbono Esop Uwem ye Utom Nnyịn ayada n̄kpọ nte minit kiet otoro eyen ufọkn̄wed onyụn̄ ọnọ enye item nte ekemde ye ibuot ukpepn̄kpọ emi ẹkenọde enye. Ke ini etie-ibuot okpokoro okotde eyen ufọkn̄wed edinam se ẹkenọde enye, enye idisiakke se ẹsede eyen ufọkn̄wed oro. Edi, eyen ufọkn̄wed ama okụre se ẹkenọde enye, etie-ibuot okpokoro oyotoro enye ke se enye anamde ọfọn; enye ekeme nditịn̄ se ẹkesede eyen ufọkn̄wed oro onyụn̄ etịn̄ se inamde enye ọdọhọ ke eyen ufọkn̄wed oro anam ọfọn, mîdịghe etịn̄ nte eyen ufọkn̄wed oro akpanamde se ẹkesede enye afiak ọfọn akan oro. Etie-ibuot okpokoro ekeme nditịn̄ n̄kpọ en̄wen emi enye okụtde ke eyenyene ufọn ọnọ eyen ufọkn̄wed oro m̀mê otu-owo. Ke mbono esop ama akasuana m̀mê ke ini en̄wen, enye ekeme ndida se idude ke ediye ekpri n̄wed Ma Mme Owo, N̄wed Ukpepn̄kpọ m̀mê n̄wed Ufọkn̄wed Utom nnọ eyen ufọkn̄wed item emi edin̄wamde enye, edi ọkpọfọn edi sụk enye ye eyen ufọkn̄wed oro. Item emi ekeme ndiban̄a se ẹkesede eyen ufọkn̄wed m̀mê n̄kpọ en̄wen.—Se ikpehe 19, 24, ye 25, edieke oyomde ndifiọk n̄kpọ efen efen mban̄a utom etie-ibuot okpokoro Mbono Esop Uwem ye Utom Nnyịn ye utom udiana ọnọ-item.

INI

19. Ikpanaha owo ndomokiet adia ini, se etie-ibuot okpokoro Mbono Esop Uwem ye Utom Nnyịn etịn̄de ikponyụn̄ ibehe ini emi ẹnọde enye. Kpa ye emi N̄wed Mbono Esop Uwem ye Utom Nnyịn owụtde ini emi ẹkpedade ẹnam ikpehe kiet kiet, edieke ẹnamde n̄kpọ ẹma, ndien ini osụhọ, ufọn idụhe ndidian mme ikọ efen man ẹda ẹkụre ini oro ọsụhọde do. Edieke owo adiade ini, etie-ibuot okpokoro Mbono Esop Uwem ye Utom Nnyịn m̀mê udiana ọnọ-item ekpenyene ndinọ enye item ke ndịbe. (Se ikpehe 24 ye 25.) Mbono esop emi, esịnede ikwọ ye akam, ikpebehe hour 1 ye minit 45.

URUA EMI ESENYỊN CIRCUIT EDIDE

20. Ke urua emi esenyịn circuit edide esop, ẹkpenịm mbono esop emi nte ẹtịn̄de ke N̄wed Mbono Esop Uwem ye Utom Nnyịn. N̄kukụre se owo mîdinamke edi Ukpepn̄kpọ Bible Esop, sia esenyịn circuit edida minit 30 oro inọ akpa utịn̄ikọ esie. Mbemiso esenyịn circuit ọnọde utịn̄ikọ emi, etie-ibuot okpokoro Mbono Esop Uwem ye Utom Nnyịn eyetịn̄ akpan n̄kpọ ifan̄ oro ẹkpepde usen oro, etịn̄ se ẹdikpepde urua en̄wen, ọnọ ntọt ekededi oro oyomde ẹnọ, onyụn̄ okot leta oro oyomde ẹkot, ndien ekem okot esenyịn circuit edinọ utịn̄ikọ esie. Ke esenyịn circuit ama ọkọnọ utịn̄ikọ ama, enye edimek ikwọ emi ẹdikwọde isuana. Enye ekeme ndikot eyenete en̄wen edibọn̄ akam usuana. Esop emi esenyịn circuit edide edise idinamke n̄kpọ ke udiana ubet ukpepn̄kpọ ke usen emi ẹnịmde Mbono Esop Uwem ye Utom Nnyịn. Edieke esop ẹnyenede otu, otu oro ẹkeme ndisụk nnịm mbono esop mmọ ke udiana ubet ukpepn̄kpọ ke ini esenyịn circuit edide esop emi ẹsede ẹban̄a mmọ. Mmọ ẹkpenyene nditiene esop emi ẹsede ẹban̄a mmọ n̄kop utịn̄ikọ esenyịn circuit.

URUA MBONO CIRCUIT M̀MÊ AKAMBA MBONO

21. Owo idinịmke mbono esop ndomokiet ke urua oro esop ẹnyenede mbono circuit m̀mê akamba mbono. Ẹkpenyene nditi nditọ-ete ke esop yak mmọ ẹtie ke idemmọ m̀mê nte ubon ẹkpep se ẹkpekpepde ke mbono esop urua oro.

URUA EDITI

22. Ke ini Editi odụkde ke ufọturua, oro edi, Monday esịm Friday, owo idinịmke Mbono Esop Uwem ye Utom Nnyịn urua oro.

ESENYỊN MBONO ESOP UWEM YE UTOM NNYỊN

23. Otu mbiowo ẹyemek ebiowo kiet edi esenyịn Mbono Esop Uwem ye Utom Nnyịn. Enye enyene ndikụt ete ke ẹnịm mbono esop emi ọfọn, ke ẹnyụn̄ ẹnam nte ẹdọhọde ẹnam ke n̄wed emi. Enye ye udiana ọnọ-item ẹkpenyene ndidiana kiet nnam utom mmọ. Ke ndondo oro N̄wed Mbono Esop Uwem ye Utom Nnyịn edide edisịm, esenyịn Mbono Esop Uwem ye Utom Nnyịn ekpenyene ndideme kpukpru se ẹdinamde ke mbono esop ke ọfiọn̄ iba oro. Emi esịne ikpehe oro owo mîsinọhọ nditọ ufọkn̄wed ẹnam, mbon oro ẹdidide etie-ibuot okpokoro emi otu mbiowo ẹkemekde onyụn̄ esịne se nditọ ufọkn̄wed ẹdinamde. (Se ikpehe 3-16 ye 24.) Ke ini enye oyomde ndibiere se ọkpọnọde eyen ufọkn̄wed anam, ọfọn enye ekere aban̄a isua emana esie, se mmọ ẹdiọn̄ọde ye se mmọ mîdiọn̄ọke, ye m̀mê enye eyenyene ifụre nditịn̄ se ẹnọde enye anam oro. Enye ekpenyene ndinam ukem emi ke mme ikpehe eken ke mbono esop. Ekpenyene ndibabak nda fọm Se Ẹnọde Fi Anam ke Mbono Esop Uwem ye Utom Nnyịn (S-89) nnọ nditọ ufọkn̄wed se mmọ ẹdinamde. Ekpenyene ndinọ mmọ fọm emi urua ita ke nsụhọde n̄kaha mbemiso usen emi mmọ ẹdinamde n̄kpọ. Esenyịn mbono esop uwem ye utom nnyịn ekpenyene ndikụt ete ke ẹdian kpukpru se ẹdinamde ke obukpọk ntọt. Otu mbiowo ẹkeme ndimek ebiowo m̀mê asan̄a-utom unamutom man an̄wam enye. Edi, mbiowo kpọt ke ẹkpedọhọ ẹdeme ikpehe emi mîdịghe se nditọ ufọkn̄wed ẹdinamde.

ETIE-IBUOT OKPOKORO MBONO ESOP UWEM YE UTOM NNYỊN

24. Kpukpru urua, ebiowo kiet edidi etie-ibuot okpokoro Mbono Esop Uwem ye Utom Nnyịn. (Ke mme esop oro mbiowo mîwakke, ẹkeme ndidọhọ asan̄a-utom unamutom oro odotde edi etie-ibuot okpokoro.) Enye editịm ntọn̄ọ-ikọ ye utịtikọ esie. Enye edikot kpukpru mbon oro ẹnyenede n̄kpọ ke mbono esop usen oro ẹdinam se ẹkenọde mmọ. Enye ekeme nditiene nnam n̄kpọ n̄ko ke mbono esop usen oro edieke mbiowo mîwakke. Enye ikpetịn̄ke ikọ awak akaha ke owo kiet kiet ama okokụre se ẹkenọde enye anam. Otu mbiowo ẹdimek mbiowo emi ẹdotde ndidi mme etie-ibuot okpokoro Mbono Esop Uwem ye Utom Nnyịn. Mbiowo emi ẹdisinịm mbono esop emi ke ini ke ini. Etiene nte n̄kpọ etiede ke esop, ẹkeme ndisinọ esenyịn Mbono Esop Uwem ye Utom Nnyịn etie-ibuot okpokoro mbono esop ndien ndien akan nte ẹnọde mbiowo eken emi otu mbiowo ẹkemekde. Edieke ebiowo odotde ndinịm Ukpepn̄kpọ Bible Esop, ekeme ndidi enye oyodot n̄ko ndidi etie-ibuot okpokoro mbono esop emi. Mbọk ẹti ke edi utom ebiowo emi edide etie-ibuot okpokoro mbono esop ndisitoro mbon oro ẹnyenede utịn̄ikọ eyen ufọkn̄wed nnyụn̄ nnọ mmọ item ke ima ima usụn̄, edieke oyomde. Enye onyụn̄ enyene ndikụt ete ke mbono esop asuana ke ini. (Se ikpehe 17 ye 19.) Edieke enye amade, edieke ufan̄ onyụn̄ okponde ekem ke mbot utịn̄ikọ, ẹkeme ndiwụk n̄kpọ utịn̄ikọ en̄wen nnọ enye man nte enye osụk okotde owo ọdọk edi, owo oro ama asasan̄a edisịm n̄kpọ utịn̄ikọ. Enye onyụn̄ ekeme ndimek nditie ke okpokoro ke mbot utịn̄ikọ n̄kot eyen ufọkn̄wed emi edikotde Bible ye mbon oro ẹnọde n̄kpọ ẹnam ke ikpehe Kpep Ndikwọrọ Ikọ Ọfọn ẹdinamde se ẹkenọde mmọ. Ndinam emi idiyakke ẹbiat ini.

UDIANA ỌNỌ-ITEM

25. Ke ini mbiowo ye mme asan̄a-utom unamutom ẹnamde n̄kpọ ke Mbono Esop Uwem ye Utom Nnyịn, ẹnọde utịn̄ikọ ofụri owo, ẹkotde ikpehe m̀mê ẹnịmde Ukpepn̄kpọ Enyọn̄-Ukpeme m̀mê Ukpepn̄kpọ Bible Esop, udiana ọnọ-item ọyọnọ mmọ item ke ndịbe edieke enye okụtde ke ọfọn inam ntre. Se ikpehe 19.

MME UDIANA UBET UKPEPN̄KPỌ

26. Edieke nditọ ufọkn̄wed ẹwakde, ẹkeme ndibahade ndusụk mmọ ndọn̄ ke udiana ubet ukpepn̄kpọ. Ẹkpenyene ndimek owo emi odotde edi ọnọ-item ke ubet ukpepn̄kpọ emi, ndien ọkpọfọn enye edi ebiowo. Edi edieke mbiowo mîwakke ikem, ẹkeme ndinọ asan̄a-utom unamutom oro odotde utom emi. Otu mbiowo ẹdibiere m̀mê anie odot ndidi ọnọ-item, n̄ko m̀mê ẹkpedi owo kiet ama anam isua emi, owo en̄wen anam isua en̄wen. Ọnọ-item emi ekpenyene ndinam se idude ke ọyọhọ ikpehe 18. Edieke esop ẹnyenede udiana ubet ukpepn̄kpọ, ẹkpenyene ndidọhọ nditọ ufọkn̄wed ẹwọrọ ẹka do ke ẹma ẹkekụre Yom N̄kpọ-Uto ke Ikọ Abasi mbemiso ẹtọn̄ọde Edikot Bible. Mmọ ẹkpenyene ndinyọn̄ ndi ke akpatre eyen ufọkn̄wed anamde se ẹkenọde enye ama.

MME VIDIO

27. Ẹyesibre ndusụk vidio ke mbono esop emi. Mme vidio emi ẹyedu ke JW Library^®. Ẹkeme ndikama nsio nsio fon, tablet, ye laptop nsion̄o mmọ mbre.

© 2025 Watch Tower Bible and Tract Society of Pennsylvania

S-38-EF 9/25