Nso ke Abasi Aduak Ndinam Nnọ Nnyịn?
KE INI okotde n̄wedmbụk n̄kpọntịbe, esede tv, m̀mê akpan̄de utọn̄ ke radio, oyokụt onyụn̄ okop ẹtịn̄de nte mme owo ẹbiatde ibet, ẹn̄wanade ekọn̄, ẹnyụn̄ ẹwotde mme owo ibak ibak. Ekeme ndidi afo ke ọbọ ufen udọn̄ọ mîdịghe edi ke n̄kpa ada owo fo.
Bụp idemfo ete:
Ndi nte Abasi oyomde n̄kpọ etie ye ami ye ubon mi edi emi?
Nso idin̄wam mi nyọ mme mfịna mi?
Ndi iyọbọ emem ke ererimbot emi tutu amama?
Bible ọbọrọ mme mbụme emi ke usụn̄ emi afo edimade.
BIBLE ETỊN̄ KE ABASI AYANAM UTỊBEN̄KPỌ KE ISỌN̄ EMI.
Mme owo idikopke ubiak aba, idisọn̄ke, idinyụn̄ ikpaha aba.—Ediyarade 21:4
“Mbụn̄ọ ọyọfrọ nte ayara edop.”—Isaiah 35:6
“Enyịn ẹyen̄wan̄a mme nnan.” —Isaiah 35:5
Ẹyenam mme akpan̄kpa ẹset. —John 5:28, 29
Owo ndomokiet ididọn̄ọke aba. —Isaiah 33:24
Udia eyekem kpukpru owo ubọk. —Psalm 72:16
TIENE KPEP BIBLE MAN ỌBỌ UFỌN
Emekeme ndikere ke se ẹtịn̄de ke page 4 ye 5 ke n̄wed emi ikemeke-keme nditịbe. Edi Abasi ọn̄wọn̄ọ ke ibịghike imọ imọn̄ inam kpukpru se ẹtịn̄de oro ke isọn̄ emi, ndien Bible etịn̄ nte enye edinamde emi.
Edi ikụreke ke oro. Bible etịn̄ n̄ko se ikpanamde man ikop inem uwem ye ata inemesịt idahaemi. Edi, bet kan̄a ise, nso ye nso idi mfịna fo? Okụk, udọn̄ọ, mfịna ufọk, m̀mê n̄kpa owo fo ekeme ndisịne ke otu n̄kpọ emi mîyakke fi ọbọ emem. Bible ekeme ndin̄wam fi ọyọ mme mfịna emi, onyụn̄ ekeme ndinam esịt ana fi sụn̄ sia enye ọbọrọ utọ mbụme nte:
Ntak emi ibọde ufen ntem?
Nso idin̄wam nnyịn iyọ mfịna nnyịn?
Nso idinam ufọk nnyịn enem?
M̀mọ̀n̄ ke mme owo ẹsika mmọ ẹma ẹkpa?
Ndi iyafiak ikụt mbon nnyịn emi ẹkekpan̄ade?
Ntak emi ikpenịmde ke Abasi ayanam kpukpru se enye ọkọn̄wọn̄ọde?
Afo ndikot n̄wed emi owụt ke omoyom ndidiọn̄ọ se Bible ekpepde. N̄wed emi ayan̄wam fi. Ikpehe kiet kiet ke n̄wed emi enyene mbụme mmọ, ndien emi ayanam Bible enen̄ede an̄wan̄a fi. Ediwak miliọn owo ke ererimbot ẹsitie ye Mme Ntiense Jehovah ẹkpep Bible. Imenịm ke afo n̄ko ayama ndinam oro. Yak Abasi ọdiọn̄ fi nte osụk odomode ndidiọn̄ọ se Bible ekpepde!