Ẹsikpep Nnyịn ‘Ndinyene Ima Nnyụn̄ Nnam Nti Utom’ ke Ini Isopde Idem

TOTO ke eset, ẹma ẹsinam ndutịm man ikọt Jehovah ẹsop idem ọtọkiet ẹkpono enye. Irenowo ke Israel ẹma ẹsika Jerusalem ikata ẹkedụk ikpọ usọrọ m̀mê mbono. (Deut. 16:16) Ke eyo mme apostle, mme Christian ẹma ẹsisop idem, ndien emi ekesiwak ndidi ke ufọk nditọete. (Philem. 1, 2) Mfịn, nnyịn n̄ko imesidụk mbono esop ye n̄kpri ye ikpọ mbono. Ntak emi ikọt Abasi ẹsisopde idem ọtọkiet? Akpan ntak edi man ẹkpono Abasi.—Ps. 95:6; Col. 3:16.

² Mbon oro ẹdụkde mme mbono emi ẹsibọ ufọn. Ẹkedọhọ nditọ Israel kpukpru ini oro mmọ ẹnịmde Usọrọ Mme Ataya eke ọyọhọ isua itiaba, ẹte: “Bon kpukpru owo ọtọkiet, iren ye iban ye nditọwọn̄ ye esenowo fo emi odude ke obio fo, man mmọ ẹkpan̄ utọn̄, man mmọ ẹnyụn̄ ẹkpep n̄kpọ, ẹnyụn̄ ẹbak Jehovah Abasi mbufo ẹnyụn̄ ẹtịn̄ enyịn ẹnam kpukpru ikọ ibet emi.” (Deut. 31:12) Emi owụt ke akpan ntak en̄wen emi isisopde idem ọtọkiet edi man ‘Jehovah ekpep nnyịn n̄kpọ.’ (Isa. 54:13) Ndisop idem ọtọkiet esinyụn̄ anam nnyịn ifiọk nditọete nnyịn, ọnọ nnyịn ndọn̄esịt, onyụn̄ anam isọn̄ọ kiet eken idem.

MME MBONO ESOP

³ Ke Pentecost eke isua 33 ama ekebe, mbet Jesus ẹma ẹsisop idem ọtọkiet ẹsịn ifịk ẹkpep se mme apostle ẹkesikpepde mme owo, ẹnyụn̄ “ẹsọn̄ọ ẹdu ke temple ye esịt kiet” ke “usen ke usen.” (Utom 2:42, 46) Ke ini mme Christian ẹkesisopde idem ọtọkiet, mmọ ẹma ẹsikot N̄wed Abasi, emi esịnede mme leta oro mme apostle ye mme Christian eken ẹkewetde. (1 Cor. 1:1, 2; Col. 4:16; 1 Thess. 1:1; Jas. 1:1) Mmọ ẹma ẹsibọn̄ akam n̄ko. (Utom 4:24-29; 20:36) Ndusụk ini, mme isụn̄utom oro ẹkenọde ẹkekwọrọ ikọ ke nsio nsio ebiet ẹma ẹsibụk ediwak n̄kpọ emi Abasi akadade mmọ anam. (Utom 11:5-18; 14:27, 28) Ẹma ẹsikpep N̄wed Abasi ẹnyụn̄ ẹneme mme prọfesi oro ẹsude. Ẹma ẹsikpep nte mme Christian ẹkpedude uwem ye nte mmọ ẹkpekponode Abasi. Ẹma ẹsinyụn̄ ẹdọhọ kpukpru owo ẹnen̄ede ẹsịn ifịk ẹkwọrọ eti mbụk.—Rome 10:9, 10; 1 Cor. 11:23-26; 15:58; Eph. 5:1-33.

⁴ Mfịn, isinyụn̄ inịm mme mbono esop nnyịn nte mme Christian eyo mme apostle ẹkesinịmde. Nnyịn inam se Bible ọdọhọde ke Mme Hebrew 10:24, 25. Itie oro ọdọhọ yak ikere iban̄a kiet eken, ikûsịn ndisop idem ọtọkiet nte ido ndusụk owo edide, edi isịn udọn̄ inọ kiet eken, m̀mê isọn̄ọ kiet eken idem, inyụn̄ idọdiọn̄ inam ntem adan̄a nte ikụtde ite ke usen oro ke asan̄a ekpere. Uwem ọsọn̄ etieti ke mme akpatre usen emi, ntre imenen̄ede iyom ndọn̄esịt oro isibọde ke ini isopde idem ọtọkiet kpukpru ini, sia emi ayan̄wam nnyịn ika iso inam n̄kpọ Abasi, inyụn̄ isọn̄ọ ida nte mme Christian. (Rome 1:11, 12) Nnyịn mme Christian idu uwem ke n̄kakwan̄a ye idiọk emana. Nnyịn itiehe nte mbon ererimbot emi mîbakke Abasi, nnyịn inyụn̄ imaha edu ererimbot emi ke baba usụn̄ kiet. (Phil. 2:15, 16; Titus 2:12-14) Idụhe ebiet en̄wen oro nnyịn ikpodude emi ọfọnde akan ndidu ye ikọt Jehovah. (Ps. 84:10) Inyụn̄ idụhe se ifọnde nte ndikpep nnyụn̄ nneme Ikọ Abasi. Ẹyak ineme iban̄a mme mbono esop oro isinịmde.

MBONO ESOP UTỊTURUA

⁵ Akpa n̄kpọ ke mbono esop utịturua nnyịn esidi utịn̄ikọ Bible. Ẹtịm utịn̄ikọ emi akpan akpan ẹnọ mbon oro mîdịghe Mme Ntiense Jehovah, sia ekeme ndidi akpa ndusụk mmọ ẹdụkde mbono esop nnyịn edi oro. Utịn̄ikọ emi esin̄wam mbufa owo ye nditọete ke esop ẹnen̄ede ẹkpere Abasi.—Utom 18:4; 19:9, 10.

⁶ Christ Jesus, mme apostle esie, ye mme Christian eken ẹma ẹsinịm mbono esop ofụri owo. Ikọt Jehovah ẹsinịm ukem mbono esop oro mfịn. Idụhe owo emi ọdiọn̄ọde ndida ke iso ediwak owo ntịn̄ ikọ nte Jesus. Mbon emi ẹkekopde ukwọrọikọ esie ẹma ẹdọhọ ẹte: “Akananam owo ndomokiet itịn̄ke ikọ ntem.” (John 7:46) Jesus ikesitịn̄ke ikọ idemesie, edi ekesitịn̄ se isịnede ke N̄wed Abasi. Emi ama esinam idem akpa mbon emi ẹkekopde ukwọrọikọ esie. (Matt. 7:28, 29) Mbon oro ẹkenamde se enye ekekpepde ẹma ẹnen̄ede ẹbọ ufọn. (Matt. 13:16, 17) Ntre n̄ko ke mme apostle ẹkesikpep mme owo n̄kpọ. Utom 2:14-36 etịn̄ nte apostle Peter ọkọnọde utịn̄ikọ oro mme owo ẹkemade etieti ke Pentecost eke isua 33. Se mme owo ẹkekopde ama anam ata ediwak mmọ ẹkabade esịt. Ediwak owo n̄ko ẹma ẹtọn̄ọ ndikpono Abasi ke ẹma ẹkekop utịn̄ikọ Paul ke Athens.—Utom 17:22-34.

⁷ Kpasụk ntre n̄ko mfịn, ata ediwak owo ẹsidia ufọn utịn̄ikọ ofụri owo ke esop kiet kiet ye ke mme n̄kpri ye ikpọ mbono nnyịn. Emi esinam nnyịn ifiọk se esop Abasi ẹkpepde nnyịn onyụn̄ anam isịn idem inam n̄kpọ Abasi. Ke ini ikotde mbon oro ẹsikopde ukwọrọikọ nnyịn ye kpukpru owo ite ẹdidụk mbono esop emi, oro esinam mme owo ẹdifiọk akpan n̄kpọ emi Bible ekpepde.

⁸ Nsio nsio ibuotikọ ke ẹsineme kpukpru urua. Ẹsineme se Bible ekpepde, ẹnam mme prọfesi Bible an̄wan̄a, ẹtịn̄ se ebe ye n̄wan ẹkpenamde man ndọ mmọ enem, ẹtịn̄ n̄ko mme mfịna oro mme uyen ẹsinyenede ye se ikpan̄wamde mmọ, ye nte Christian okpodude uwem. Ndusụk ini ẹsitịn̄ n̄ko ẹban̄a mme utịbe utịbe n̄kpọ oro Jehovah obotde, ẹtịn̄ ẹban̄a mbon eyo Bible oro ẹkenen̄erede ẹnyene mbuọtidem ke Abasi, ẹnyenede uko, ẹsọn̄ọde ẹda ye Abasi, ẹnyụn̄ ẹtịn̄ nte ikpekpebede mmọ.

⁹ Edieke iyomde ndinen̄ede ndia ufọn utịn̄ikọ ofụri owo emi, ana inen̄ede ikpan̄ utọn̄, ikụbọde itie N̄wed Abasi emi etịn̄ikọ asiakde, inyụn̄ itiene ise ke ini enye okotde onyụn̄ anamde itien̄wed oro an̄wan̄a. (Luke 8:18) Ke ini se ẹtịn̄de enen̄erede an̄wan̄a nnyịn, nnyịn idisọpke ifre, iyonyụn̄ inam se ikpepde.—1 Thess. 5:21.

¹⁰ Edieke mbufo ẹnyenede nditọete emi ẹdotde ndinọ utịn̄ikọ, ọwọrọ ẹyesinọ utịn̄ikọ kpukpru urua ke esop mbufo. Mbiowo mbufo ẹkeme n̄ko ndikot nditọete ke esop en̄wen ẹdinọ utịn̄ikọ ke esop mbufo. Edi edieke mme etịn̄ikọ mîwakke, ọwọrọ ẹdinọ utịn̄ikọ ini ekededi oro ẹkemede.

¹¹ Ọyọhọ n̄kpọ iba ke mbono esop utịturua esidi Ukpepn̄kpọ Enyọn̄-Ukpeme. Ẹsikpep ibuotikọ kiet ke Enyọn̄-Ukpeme eke ukpepn̄kpọ. Esidi owo kiet ama okot ikpehe ama, owo emi enịmde ukpepn̄kpọ oro obụp mbụme, ndien owo ekededi emi amade emenede ubọk ọbọrọ. Jehovah esida Enyọn̄-Ukpeme ekpep ikọt esie n̄kpọ mfịn ke edikem ini.

¹² Ukpepn̄kpọ Enyọn̄-Ukpeme emi esinam nnyịn ifiọk nte ikpadade se Bible ekpepde idu uwem ke usen ke usen. Ẹsikpep nnyịn se ikpanamde mbak nnyịn idinyene “spirit ererimbot” emi, idinyụn̄ itiene idu oburobụt uwem. (1 Cor. 2:12) Ukpepn̄kpọ emi esinam Ikọ Abasi ye mme prọfesi Bible enen̄ede an̄wan̄a nnyịn, ndien emi esinam nnyịn ifiọk akpanikọ inyụn̄ ika iso isan̄a ke usụn̄ edinen ido. (Ps. 97:11; N̄ke 4:18) Ndidụk Ukpepn̄kpọ Enyọn̄-Ukpeme nnyụn̄ ntiene mbọrọ mbụme esinam nnyịn idat esịt ke ntak emi idoride enyịn ke obufa ererimbot oro Jehovah ọn̄wọn̄ọde ọnọ nnyịn. (Rome 12:12; 2 Pet. 3:13) Nditiene nditọete nnyịn ndụk ukpepn̄kpọ emi esinam idu uwem nte mbon emi ẹnyenede spirit Abasi, onyụn̄ anam itetịm ibiere ndisịn idem nnam n̄kpọ Jehovah. (Gal. 5:22, 23) Emi esinam isọn̄ọ ida iyọ idomo inyụn̄ isịn ‘eti itiat idakisọn̄ inọ idem nnyịn man ikpọsọn̄ọ imụm ata uwem ikama’ ke ini iso.—1 Tim. 6:19; 1 Pet. 1:6, 7.

¹³ Nso ke ikpanam man inen̄ede idia ufọn ukpep emi Abasi ọnọde nnyịn mi? Oyom isibem iso itie ke idem nnyịn mîdịghe ye ubon nnyịn itịm idem inọ ukpepn̄kpọ emi, ikot mme itie N̄wed Abasi oro ẹsiakde ẹsịn, inyụn̄ itiene ida ikọ idem nnyịn ibọrọ mbụme ke ini ẹnịmde ukpepn̄kpọ emi. Nditiene mbuana ntem ayanam se ẹnemede osụhọde odụk nnyịn esịt, onyụn̄ anam mbon en̄wen ẹbọ ufọn ke ini mmọ ẹkopde ibọrọ nnyịn. Edieke inen̄erede ikpan̄ utọn̄ ke ini mbon en̄wen ẹbọrọde mbụme, iyenen̄ede idia ufọn ukpepn̄kpọ emi kpukpru urua.

MBONO ESOP UFỌTURUA

¹⁴ Kpukpru urua, nditọete ẹsisop idem ke Ufọkmbono Obio Ubọn̄ man ẹdụk mbono esop emi ẹkotde Mbono Esop Uwem ye Utom Nnyịn. Mbono esop emi enyene ikpehe ita, ndien ẹtịm enye man ẹn̄wam nnyịn “itịm idot” ndidi mme asan̄autom Abasi. (2 Cor. 3:5, 6) Ẹsisịn ndutịm mbono esop emi ye se ẹdinemede ke N̄wed Mbono Esop Uwem ye Utom Nnyịn. N̄wed Mbono Esop oro esịne n̄ko se asuanetop ekemede nditịn̄ ke an̄wautom.

¹⁵ Ẹkot akpa ikpehe mbono esop emi Mme Akpan N̄kpọ ke Ikọ Abasi, ndien enye esin̄wam nnyịn inen̄ede idiọn̄ọ se iketịbede ke ini ẹkewetde mbụk Bible ye se ikanamde ẹwet, onyụn̄ an̄wam nnyịn idiọn̄ọ nte ikemede ndinam se ikpepde. Ẹsinọ utịn̄ikọ, ẹkot Bible, ẹnyụn̄ ẹneme se ẹkotde ke Bible urua oro. Ẹdọn̄ mme ndise ye ebiet emi ẹkemede ndiwet n̄kpọ ndọn̄ ke N̄wed Mbono Esop Uwem ye Utom Nnyịn. Ẹnam emi man se ẹkpepde enen̄ede an̄wan̄a nnyịn. Ndida ini n̄kpep Bible ntem ayan̄wam nnyịn idu uwem ọfọn inyụn̄ ifiọk ndikpep owo n̄kpọ man ‘itịm idot inyụn̄ iben̄e idem ọyọhọ ọyọhọ ndinam eti utom ekededi.’—2 Tim. 3:16, 17.

¹⁶ Ẹkot ọyọhọ ikpehe iba ke mbono esop emi Kpep Ndikwọrọ Ikọ Ọfọn; ikpehe emi esin̄wam nnyịn inen̄ede ikpep ndikwọrọ ikọ nnyụn̄ n̄kpep owo n̄kpọ ọfọn. Ẹsibre vidio emi aban̄ade nte ekpekwọrọde ikọ ọfọn, ofụri owo ẹnyụn̄ ẹneme se ẹsiode ke vidio oro. Ẹsinyụn̄ ẹnọ nditọete nsio nsio n̄kpọ ẹnam. Ikpehe mbono esop enye emi an̄wam nnyịn inyene “edeme mmọ eke ẹbọde ukpep” man ifiọk nnennen ikọ emi ikpetịn̄de ye owo eke akpade mba.—Isa. 50:4.

¹⁷ Ẹkot ọyọhọ ikpehe ita ke mbono esop emi Nte Christian Okpodude Uwem, ndien ẹtịm enye man ẹn̄wam nnyịn ida se ikpepde ke Bible idu uwem ke usen ke usen. (Ps. 119:105) Akpan n̄kpọ kiet oro ẹsinamde ke ikpehe mbono esop enye emi edi Ukpepn̄kpọ Bible Esop. Ẹsinịm ukpepn̄kpọ emi nte ẹsinịmde Ukpepn̄kpọ Enyọn̄-Ukpeme.

¹⁸ Kpukpru ọfiọn̄, ke ini ẹbọde obufa N̄wed Mbono Esop Uwem ye Utom Nnyịn, anam-ndutịm otu mbiowo m̀mê ebiowo oro esin̄wamde enye, eyetịn̄ enyịn ese se idude ke N̄wed Mbono Esop oro onyụn̄ edeme nsio nsio n̄kpọ oro ẹdinamde ọnọ nditọete. Urua kiet kiet, ebiowo kiet, emi edide kiet ke otu nti mme andikpep oro otu mbiowo ẹkemekde, esidi etieibuot okpokoro mbono esop urua oro. Utom esie esịne ndikụt nte ke mbono esop ọtọn̄ọ onyụn̄ etre ke ini. Enye oyonyụn̄ otoro nditọ ufọkn̄wed onyụn̄ ọnọ mmọ item oro odotde.

¹⁹ Nte nnyịn itịmde idem kpukpru ini inọ Mbono Esop Uwem ye Utom Nnyịn, idụkde, inyụn̄ itienede isioro uyo, iyenen̄ede ifiọk Ikọ Abasi, ifiọk nte ikpanamde se ikpepde ke Bible, inyene uko ndikwọrọ eti mbụk, inyụn̄ ifiọk ndinam mme owo ẹdi mbet Jesus. Mbon oro ẹsitienede nnyịn ẹdụk mbono esop, edi emi mînaha baptism kan̄a, ẹsikop inem ndidu ke otu nnyịn nnyụn̄ mbọ ufọn nto se ẹkpepde nnyịn. Imekeme ndida Watchtower Library, JW Library^®, N̄wed Ndụn̄ọde Mme Ntiense Jehovah, Watchtower Library Eke Intanet^™ m̀mê mme n̄wed oro ẹdọn̄de ke itie ubon n̄wed ke Ufọkmbono Obio Ubọn̄, ntịm idem nnọ mbono esop emi ye mbono esop eken. Ẹsidọn̄ mme n̄wed esop Abasi, utọ nte Watch Tower Publications Index m̀mê N̄wed Ndụn̄ọde Mme Ntiense Jehovah, nsio nsio Bible, n̄wed oro ọdọn̄ọde mme ikọ Bible, n̄wed ukabadeikọ, ye mme n̄wed ndụn̄ọde eken, ke itie ubon n̄wed nnyịn. Emekeme ndikot n̄wed ekededi oro odude ke itie ubon n̄wed nnyịn ke Ufọkmbono Obio Ubọn̄ mbemiso mbono esop ọtọn̄ọde m̀mê ke mbono esop ama akasuana.

MBONO AN̄WAUTOM

²⁰ Ke nsio nsio ini ke urua, mme asuanetop ẹsisop idem ọtọkiet ke minit ifan̄ ẹdụk mbono an̄wautom. Ẹsinịm mbono emi ke ufọk nditọete m̀mê ke ebiet en̄wen oro odotde. Ẹkeme ndinịm mbono emi ke Ufọkmbono Obio Ubọn̄ n̄ko. Ndisop idem ke n̄kpri otu ke nsio nsio itie ke efakutom esinam emem utom ọnọ mme asuanetop ndisọp nsịm ebiet oro ẹnịmde mbono an̄wautom ye efakutom mmọ. Emi n̄ko esinam ẹkeme ndisọp ndian mme owo onyụn̄ anam ẹsọp ẹkesịm efakutom; esinyụn̄ anam emem utom ọnọ esenyịn otu an̄wautom ndise mban̄a mbon oro ẹdude ke otu esie. Okposụkedi emi esifọnde, odu ini emi ediyomde mme otu emi ẹsop idem ke itie kiet. Ke uwụtn̄kpọ, edieke mme asuanetop oro ẹwọrọde an̄wautom ke ufọturua mîwakke, ẹkeme ndimen otu ifan̄ m̀mê kpukpru otu ntọ ndian kiet nnyụn̄ nnịm mbono an̄wautom ke Ufọkmbono Obio Ubọn̄ m̀mê ke ebiet en̄wen oro odotde. Emi ayanam mme asuanetop ẹnyene owo emi mmọ ẹdisan̄ade kiet ke an̄wautom. Ofụri esop ẹnyụn̄ ẹkeme ndibiere ndisop idem ke Ufọkmbono Obio Ubọn̄ ke mme usen nduọkodudu. Mîdịghe, ofụri esop ẹkeme ndinịm mbono an̄wautom ọtọkiet ke Ukpepn̄kpọ Enyọn̄-Ukpeme ama akasuana.

²¹ Edieke otu an̄wautom kiet kiet ẹsopde idem ke nsio nsio ebiet, esenyịn otu an̄wautom edinịm mbono an̄wautom. Edi ndusụk ini, enye ekeme ndidọhọ udiana esie, m̀mê eyenete en̄wen oro odotde enịm mbono emi. Ọkpọfọn eyenete emi enịmde mbono an̄wautom eneme n̄kpọ emi edinyenede ufọn inọ nditọete ke an̄wautom. Ekem ẹdian mme owo ẹnyụn̄ ẹnọ mmọ efakutom, ndien owo kiet ke otu oro ọyọbọn̄ akam. Ke ẹma ẹkebọn̄ akam ẹma, kpukpru owo ẹyedaha ukwọrọikọ ye unana ubiatini. Ẹkpenyene ndida n̄kpọ nte minit ition esịm itiaba kpọt nnịm mbono an̄wautom. Edi edieke ẹnịmde enye ke ẹma ẹkekụre mbono esop, ikpanaha ebịghi ntre. Ẹkpenyene ndineme n̄kpọ emi edinamde enem nditọete ndiwọrọ an̄wautom ye n̄kpọ emi mmọ ẹsisobode ke an̄wautom. Ẹkpenyene n̄ko nditeme mmọ se ẹkpenamde ke ini ẹkwọrọde ikọ. Ẹkeme ndinam mbufa mme asuanetop ye mbon oro mîtịmke idiọn̄ọ ukwọrọikọ ẹsan̄a ye mme asuanetop oro ẹdiọn̄ọde ndikwọrọ ikọ man ẹbọ ukpep.

NTE ẸKPENỊMDE MBONO ESOP KE MBUFA M̀MÊ N̄KPRI ESOP

²² Ediwak owo ke ẹdụk esop Abasi, ke ẹnyụn̄ ẹsiak mbufa esop. Esenyịn circuit esinọ n̄kọk itieutom nnyịn n̄wed ete ẹsiak obufa esop. Ndusụk ini, esifọn n̄kpri otu emi ẹsiakde obufa ẹdụk mbono esop ye esop oro odude ekpere.

²³ Edieke nditọete iban kpọt ẹdude ke esop, eyenete an̄wan emi edibọn̄de akam m̀mê enịmde mbono esop ekpenyene ndibọbọ bọkit m̀mê ọfọn̄ibuot nte N̄wed Abasi etemede. (1 Cor. 11:3-16) Enye ekpenyene nditetie nse otuowo ntịn̄ se enye enyenede nditịn̄. Ikpanaha nditọete iban ẹnọ utịn̄ikọ ke esop. Utu ke ndinọ utịn̄ikọ, mmọ ẹkpenyene ndikokot se esop Abasi ẹwetde ẹnyụn̄ ẹtịn̄ n̄kpọ ẹban̄a se ẹkotde oro, mîdịghe mmọ ẹneneme enye m̀mê ẹnanam ẹwụt. Ke mme utọ esop ntre, n̄kọk itieutom ẹsidọhọ eyenete an̄wan kiet ese n̄kpọ aban̄a mme leta esop onyụn̄ enịm mme mbono esop. Ekem, ke ini ẹnyenede nditọete irenowo emi ẹdotde, nditọete oro ẹdisinam mme n̄kpọ emi.

MBONO CIRCUIT

²⁴ Kpukpru isua, ẹsinam ndutịm man mme esop ke ukem circuit ẹnyene mbono circuit usen kiet, ikaba ke isua. Mbono emi esinem etieti, esinyụn̄ anam mme andidụk “ẹtat esịt” ẹma nditọete mmọ. (2 Cor. 6:11-13) Esop Jehovah ẹsikere ẹban̄a se iyomde ke ini ẹdade N̄wed Abasi ẹmek ibuotikọ mbono ye se ẹdinamde ke mbono. Ẹsinọ utịn̄ikọ, ẹnam nnamn̄wụt, ẹnam se iketịbede ẹwụt, ẹtịn̄ ikọ ẹnọ idem, ẹnyụn̄ ẹnam ndụn̄ọde. Se ẹsinemede emi esinam mme andidụk ẹnen̄ede ẹbiere ndisịn idem nnam n̄kpọ Abasi. Ke mme mbono emi, ẹsinọ mbufa mbet Christ ifet ndiwụt mme owo ke ima iyak idem inọ Jehovah, ẹnyụn̄ ẹnịm mmọ baptism.

IKPỌ MBONO

²⁵ Ẹsinịm akamba mbono ini kiet ke isua. Esidi mbono usen ita; ẹsinam mbon oro ẹdude ke nsio nsio circuit ẹdụk mbono emi ọtọkiet. Ke mme idụt emi ẹnyenede n̄kpri n̄kọk itieutom, esifọn kpukpru esop emi n̄kọk itieutom oro ẹsede ẹban̄a ẹsop idem ke itie kiet. Ke ndusụk idụt, ẹkeme ndikpụhọde ndutịm mbono emi ẹtiene nte n̄kpọ etiede, mîdịghe ẹtiene ndausụn̄ emi esop Abasi ẹnọde. Ẹsinịm akamba mbono ofụri ererimbot m̀mê mme san̄asan̄a mbono n̄ko ke ini ke ini, ndien ata ediwak Ntiense oro ẹtode nsio nsio idụt ẹsidụk mme mbono emi. Ke ediwak isua idahaemi, ediwak owo ẹkop eti mbụk ke ntak etop oro ẹkesuande ẹban̄a ikpọ mbono Mme Ntiense Jehovah.

²⁶ Ikọt Jehovah ẹsinen̄ede ẹkop idatesịt ẹnyụn̄ ẹdiana kiet ẹkpono enye ke mme ini mbono. Ẹsinam Bible enen̄ede an̄wan̄a owo ke mme mbono emi. Ke ndusụk mbono, ẹsisio mbufa n̄wed man mme andidụk ẹkpebọ ẹkot ke idemmọ ẹnyụn̄ ẹkpep ke mme esop mîdịghe ẹnọ mme owo ke an̄wautom. Ẹsinịm mme owo baptism ke ikpọ mbono n̄ko. Ikpọ mbono emi ẹsin̄wam mme owo ẹnen̄ede ẹsịn idem ẹnam n̄kpọ Abasi. Mme mbono emi ẹsinen̄ede ẹwụt ke ikọt Jehovah ke ofụri ererimbot ẹdi nditọeka emi ẹyakde idem ẹnọ Abasi ẹnyụn̄ ẹmade kiet eken nte Jesus Christ ọkọdọhọde.—John 13:35.

²⁷ Ndidụk mbono esop nnyụn̄ ndụk n̄kpri ye ikpọ mbono ayanam ika iso inam uduak Jehovah. Emi n̄ko idiyakke nnyịn idu uwem nte mbon ererimbot m̀mê ndinam nnyịn ikpọn̄ Abasi nnyịn. Mme mbono emi ẹsinọ Jehovah ubọn̄ ye itoro. (Ps. 35:18; N̄ke 14:28) Kpukpru nnyịn emi ima ikayak idem inọ Jehovah imọkọm enye ke ndinọ nnyịn mme mbono emi man ikpep n̄kpọ iban̄a enye ke mme akpatre usen emi.

UDIA MBUBREYO ỌBỌN̄

²⁸ Ini kiet kpukpru isua ke ukem usenọfiọn̄ oro Jesus Christ akakpade, Mme Ntiense Jehovah ke ofụri ererimbot ẹsinịm Editi n̄kpa Christ, m̀mê Udia Mbubreyo Ọbọn̄. (1 Cor. 11:20, 23, 24) Ikọt Jehovah ẹda Editi n̄kpa Christ nte akakan edinam ke isua. Jesus Christ ke idemesie okowụk nnyịn ete isiti n̄kpa imọ.—Luke 22:19.

²⁹ Isinịm Editi n̄kpa Christ ke ukem usenọfiọn̄ oro ẹkesinịmde Passover, nte ẹwụtde ke Bible. (Ex. 12:2, 6; Matt. 26:17, 20, 26) Nditọ Israel ẹkesinịm Passover ini kiet ke isua ndida nti usen oro mmọ ẹkekpọn̄de Egypt, ke isua 1513 mbemiso eyo Christ. Jehovah ekemek ọyọhọ usen 14 ke akpa ọfiọn̄ isua nditọ Israel nte usen oro mmọ ẹditade eyenerọn̄ Passover ẹnyụn̄ ẹwọrọ ke ufụn Egypt. (Ex. 12:1-51) Sia akpa ọfiọn̄ Bible esiduọde ke March m̀mê April, nte ẹsinamde ẹdiọn̄ọ usenọfiọn̄ emi edi ndibat usen 13 ọtọn̄ọde ke usen emi ẹdade ke Jerusalem ẹkụt obufa ọfiọn̄ ke utịt March m̀mê ke ntọn̄ọ April. Editi n̄kpa Christ esiwak ndiduọ ke usen emi ọfiọn̄ ọyọhọde idịbi ke utịt utịt March m̀mê ke ntọn̄ọ ntọn̄ọ April.

³⁰ Matthew 26:26-28 owụt nte Jesus ọkọdọhọde ẹsinịm Editi emi. Editi n̄kpa Christ idịghe edinam emi ẹnamde sia ẹnyụn̄ ẹdọhọde ẹnam, inyụn̄ inyeneke n̄kpọ ndomokiet ndinam ye ndedịbe odudu. Ke edinam emi, mbon oro Abasi emekde man ẹtiene Jesus Christ ẹkekara ke heaven ẹsita uyo emi adade aban̄a ikpọkidem Christ, ẹnyụn̄ ẹn̄wọn̄ wine emi adade aban̄a iyịp esie. (Luke 22:28-30) Mme Christian eken oro ẹyakde idem ẹnọ Abasi ye mbon oro mîdịghe Mme Ntiense ẹsitiene ẹdụk Udia Mbubreyo Ọbọn̄, edi itaha uyo inyụn̄ in̄wọn̄ke wine Editi. Mmọ ndidụk edinam emi owụt ke mmọ ẹkọm Jehovah Abasi ke ndikọnọ Jesus Christ Eyen esie edikpa ọnọ ofụri ubonowo. Mbemiso Editi n̄kpa Christ, ẹsinọ akpan utịn̄ikọ ofụri owo man ẹnam mme owo ẹnen̄ede ẹma ndidụk Editi oro ẹnyụn ẹma ndikpep Bible.

³¹ Mme Ntiense Jehovah ẹsinen̄ede ẹma ndisop idem ọtọkiet sia do ke mmọ ẹsikpep “nte ikpedemerede kiet eken inọ ima ye nti utom.” (Heb. 10:24) Ofụn emi anamde akpanikọ onyụn̄ enyenede ọniọn̄ esinam ndutịm man nnyịn isop idem ọtọkiet ikpep Ikọ Abasi. Ọfọn kpukpru ikọt Jehovah ye mbon oro ẹmade ukwọrọikọ nnyịn ẹdụk kpukpru mbono esop. Ndisop idem ọtọkiet ntem n̄kpep kpukpru se esop Abasi ẹnọde nnyịn esinam inen̄ede idiana kiet. Se ikam idide akpan n̄kpọ ikan edi ke mme mbono esop emi ẹsinam itoro Jehovah inyụn̄ inọ enye ubọn̄.—Ps. 111:1.