Ẹtịm Nnyịn Idem Man Inam Uduak Jehovah

NSIO NSIO esop ye n̄ka ẹdu ke ererimbot—n̄ka ukaraidem, n̄ka mme anyamurua, mme esop ido ukpono, esop obio, ye mme esop eken. Enyene se isinamde ẹsiak mme esop ye mme n̄ka emi, onyụn̄ enyene se ẹsidade ẹdiọn̄ọ mmọ. Edi enyene esop emi enen̄erede okpụhọde ye kpukpru mmọ. Ikọ Abasi owụt ke esop emi edi esop Mme Ntiense Jehovah.

² Imọkọm Abasi ke afo edidi owo esop esie! Idahaemi afo ọmọdiọn̄ọ uduak Abasi, ke onyụn̄ anam mmọ. (Ps. 143:10; Rome 12:2) Afo edi ata asan̄autom Abasi, onyụn̄ adiana kiet ye ndima nditọete fo ke ofụri ererimbot anam utom Abasi. (2 Cor. 6:4; 1 Pet. 2:17; 5:9) Imọfiọk ke amadia ediwak ufọn, ke emi onyụn̄ anam fi enen̄ede okop inemesịt nte Bible ọkọdọhọde. (N̄ke 10:22; Mark 10:30) Edieke akade iso anam uduak Jehovah, enye iditreke ndinọ fi nsinsi uwem.—1 Tim. 6:18, 19; 1 John 2:17.

³ Idụhe esop emi etiede nte esop Jehovah ke ofụri ererimbot. Jehovah akara esop emi sia enye edi Ibuot ọnọ kpukpru owo. Nnyịn imenen̄ede ibuọt idem ke enye. Enye edi Ebiereikpe nnyịn, Owụk-ewụhọ nnyịn, ye Edidem nnyịn. (Isa. 33:22) Sia Jehovah edide Abasi emi esinamde n̄kpọ ke nde ke nde, enye enen̄ede etịm nnyịn idem man ikeme ndidiana kiet ye enye nnam uduak esie.—2 Cor. 6:1, 2.

⁴ Nte ererimbot emi enen̄erede ekpere utịt esie, nnyịn ke itiene Jesus Christ, Edidem emi Abasi emekde ete ada nnyịn usụn̄. (Isa. 55:4; Edi. 6:2; 11:15) Jesus ọkọdọhọ ke mme anditiene imọ ẹyenam utom emi okponde akan se imọ ikanamde ke isọn̄. (John 14:12) Ikọ esie ọkọwọrọ ke sia edide mme anditiene imọ ẹyenen̄ede ẹwak, ke mmọ ẹyekwọrọ ikọ ẹsịm ebiet emi imọ mîkesịmke, ẹnyụn̄ ẹkwọrọ ẹbịghi ẹkan imọ. Mmọ ẹyekwọrọ eti mbụk Obio Ubọn̄ Abasi ẹsịm utịt isọn̄.—Matt. 24:14; 28:19, 20; Utom 1:8.

⁵ Ẹkwọrọ eti mbụk Obio Ubọn̄ Abasi mfịn nte Jesus ọkọdọhọde. Jesus ọkọdọhọ ke utom edikwọrọ eti mbụk editre ke edikem ini Jehovah. Kpukpru prọfesi Bible ẹwụt ke akwa usen Jehovah emi enyenede ndịk etieti enen̄ede ekpere.—Joel 2:31; Zeph. 1:14-18; 2:2, 3; 1 Pet. 4:7.

⁶ Sia edide imọfiọk se Jehovah oyomde ẹnam ke utịt ini emi, akpana inen̄ede isịn idem inam se enye oyomde. Man ikeme ndinam emi, ana inen̄ede ifiọk nte ẹnamde n̄kpọ ke esop Abasi, inyụn̄ itiene inam se ededi oro ẹdọhọde. Se ededi emi ẹnamde ke esop Abasi oto Bible. Kpukpru se ẹkpepde nnyịn, ibet ye ewụhọ oro inịmde, ye ndausụn̄ oro itienede oto Bible, kpa n̄wed emi ẹkedade spirit Abasi ẹwet.—Ps. 19:7-9.

⁷ Ke ini kpukpru ikọt Jehovah ẹnamde se Bible ọdọhọde, mmọ ẹsidu ke emem ye nditọete mmọ ẹnyụn̄ ẹdiana kiet. (Ps. 133:1; Isa. 60:17; Rome 14:19) Nso inen̄ede inam nditọete nnyịn ke kpukpru ebiet ẹdiana kiet ntre? Ima anam. Ima emi idịghe edịbe, sia Bible ọdọhọ yak imemen enye isịne nte ọfọn̄. (John 13:34, 35; Col. 3:14) Utọ ima emi Abasi oyomde nnyịn inyene mi anam ikeme ndisan̄a ikpat kiet ye ikpehe esop esie eke heaven.

IKPEHE ESOP JEHOVAH EKE HEAVEN

⁸ Prọfet Isaiah, Ezekiel, ye Daniel ẹma ẹkụt ke n̄kukụt nte ikpehe esop Jehovah eke heaven etiede. (Isa., ib. 6; Ezek., ib. 1; Dan. 7:9, 10) Apostle John ama etiene okụt ikpehe esop Jehovah emi odude ke heaven ke n̄kukụt onyụn̄ ewet ekpri ọnọ nnyịn ke n̄wed Ediyarade. Enye ama okụt nte Jehovah etiede ke ubọn̄ ubọn̄ ebekpo esie, onyụn̄ okop nte mme angel esie ẹkwọde ẹte: “Edisana, edisana, edisana Jehovah Abasi, kpa Ata Ọkpọsọn̄, emi okodude, emi onyụn̄ odude, emi edinyụn̄ edide.” (Edi. 4:8) John ama okụt n̄ko Eyenerọn̄ Abasi, oro edi, Jesus Christ, “nte adade ke ufọt ebekpo.”—Edi. 5:6, 13, 14; John 1:29.

⁹ John okokụt nte Jehovah etiede ke ebekpo, emi ọwọrọde ke Jehovah edi Ibuot ikpehe esop Esie emi odude ke heaven. Akpa Chronicle 29:11, 12 anam nnyịn ifiọk nte Jehovah okon̄de. Itien̄wed oro ọdọhọ ete: “O Jehovah, ubom ye odudu ye uyai ye ubọn̄ ye uku ẹdi okwo; koro kpukpru n̄kpọ ke enyọn̄ ye ke isọn̄ ẹdide okwommọ. O Jehovah, Enye emi edide andikon̄ n̄kan kpukpru, obio ubọn̄ onyụn̄ edi okwo. Inyene ye ubọn̄ ẹto fi, afo onyụn̄ akara kpukpru n̄kpọ; ndien odudu ye ukeme ẹdu fi ke ubọk, afo omonyụn̄ enyene ukeme ndinam owo okpon nnyụn̄ nnọ kpukpru owo odudu.”

¹⁰ Sia Jesus Christ esinamde utom ye Jehovah, enye n̄ko enyene akwa itie ke heaven. Abasi ọkọnọ enye akwa itie emi, “ada kpukpru n̄kpọ esịn enye ke idak ikpat, onyụn̄ anam enye edi ibuot kpukpru n̄kpọ ọnọ esop.” (Eph. 1:22) Apostle Paul ọkọdọhọ ke “Abasi ekemenede [Jesus] enịm ke itie emi okon̄de onyụn̄ ọnọ enye enyịn̄ oro okon̄de akan kpukpru enyịn̄ efen, man ke enyịn̄ Jesus kpukpru edọn̄ ẹkpetọn̄ọ, eke mme andidu ke heaven ye mme andidu ke isọn̄ ye mme andidu ke idak isọn̄, kpukpru edeme ẹkpenyụn̄ ẹnyịme an̄wan̄wa ẹte ke Jesus Christ edi Ọbọn̄, ẹnọ Abasi Ete ubọn̄.” (Phil. 2:9-11) Kpukpru emi anam inen̄ede inịm ke Jesus Christ ayakara nnyịn ọfọn.

¹¹ Prọfet Daniel ama okụt ke n̄kukụt nte Jehovah emi edide Andisọn̄ọ Usen etiede ke ebekpo ke heaven, ndien mme angel “tọsịn ke itie tọsịn ẹnam n̄kpọ ẹnọ enye, tọsịn duop ke itie tọsịn duop ẹnyụn̄ ẹda enye ke iso.” (Dan. 7:10) Bible ọdọhọ ke Abasi osio akwa udịm mme angel emi ọdọn̄ ete ẹsan̄a utom “ẹnọ mmọ eke ẹdidade edinyan̄a ẹnyene.” (Heb. 1:14) Abasi abahade kpukpru mme angel emi ọdọn̄ ke otu ke otu, onyụn̄ ọnọ mmọ ‘ebekpo, itie ubọn̄, ukara, ye odudu.’—Col. 1:16.

¹² Ke ini itiede ikere nte ikpehe esop Jehovah eke heaven emi etiede, iyokụt ntak emi Isaiah eketịn̄de se enye eketịn̄de ke ini enye okokụtde esop emi ke n̄kukụt. Nso ke enye eketịn̄? Ke Isaiah ama okokụt nte “Jehovah etiede ke ebekpo oro okon̄de ẹnyụn̄ ẹmenerede ke enyọn̄,” ye nte ‘mme seraph ẹdade enye ke enyọn̄,’ Isaiah ama ọdọhọ ete: “Mbọm mi! Koro mmọn̄ n̄kpa, koro ami ndi owo emi edehede n̄kpọkinua, nnyụn̄ ndụn̄ ke otu mme owo emi ẹdehede n̄kpọkinua; koro enyịn mi omokụt Edidem, kpa Jehovah mme udịm!” Uten̄e ama omụm Isaiah ke ini enye okokụtde nte esop Jehovah okponde; eketie nte enye idịghe n̄kpọ ndomokiet. Se enye okokụtde ama enen̄ede otụk enye. Ntre, ke ini Jehovah eketiede ke heaven obụp m̀mê anie ke imọ ididọn̄ ọkọkwọrọ etop ubiereikpe imọ, Isaiah ama ọbọrọ ete: “Se mi mi! Dọn̄ mi utom.”—Isa. 6:1-5, 8.

¹³ Ikọt Jehovah emi ẹfiọkde nte esop Jehovah etiede, emi ẹnyụn̄ ẹmade esop emi ẹsinam n̄kpọ nte Isaiah akanamde. Esop Abasi ke asan̄a aka iso, nnyịn n̄ko ikpọn̄ke enye ikpat kiet. Nnyịn ke inam se ikekeme ndiwụt ke imenen̄ede ibuọt idem ye esop Jehovah.

ESOP JEHOVAH KE ASAN̄A AKA ISO

¹⁴ Ezekiel ibuot kiet owụt nte Jehovah awatde ata akamba chariot emi enyenede uten̄e. Chariot emi ada aban̄a ikpehe esop Jehovah emi odude ke heaven. Sia edide Jehovah awat chariot emi ke idemesie, oro ọwọrọ ke Jehovah ada esop esie usụn̄, esop emi ke enye onyụn̄ ada anam uduak esie.—Ps. 103:20.

¹⁵ Kpukpru wheel chariot emi ẹnyene wheel en̄wen emi ẹsịnede ibiọn̄ ibiọn̄ ke esịt. Kpukpru mmọ ẹda ukem ukem. Emi anam mme wheel emi ẹkeme ndisan̄a ‘ke n̄kan̄ mbinan̄.’ (Ezek. 1:17) Oro ọwọrọ ke mme wheel emi ẹkeme ndiwọn̄ọde inikiet inikiet n̄ka ebiet ekededi. Ndi emi ọwọrọ ke chariot emi esiwọn̄ọde ntre ke idemesie? Ihih, Jehovah isiyakke esop esie odụk ebiet ekededi ke idemesie. Ezekiel 1:20 ọdọhọ ke chariot emi esika “ebiet ekededi eke spirit oyomde ndika.” Omokụt do ke Jehovah esida spirit esie ada esop esie usụn̄. Se nnyịn ikpobụpde idem nnyịn edi, ‘Ndi ke nsan̄a ikpat kiet ye esop emi?’

¹⁶ Idịghe ndidụk mbono esop nnyụn̄ n̄ka ukwọrọikọ kpọt owụt ke owo asan̄a ikpat kiet ye esop Abasi. Ata akpan n̄kpọ emi owụtde ke isan̄a ikpat kiet ye esop Abasi edi ndika iso nnam n̄kpọ Abasi nnyụn̄ ndọdiọn̄ nda Ikọ Abasi ndu uwem. Ana itịm ‘idiọn̄ọ se idide akpan n̄kpọ,’ inyụn̄ idiọn̄ọ kpukpru se esop Abasi ẹkpepde idahaemi. (Phil. 1:10; 4:8, 9; John 17:3) Ana iti n̄ko ke Abasi oyom itiene ndutịm ekededi oro ẹnamde ke esop esie inyụn̄ idiana kiet inam se ẹdọhọde inam. Ntre, ana ida kpukpru se Jehovah ọnọde nnyịn ye se enye ekpepde nnyịn isịn idem inam utom emi enye ọdọn̄de nnyịn. Edieke isan̄ade ikpat kiet ye chariot Jehovah ke heaven, iyananam se ikwọrọde.

¹⁷ Esop Jehovah ke an̄wam nnyịn inam uduak Abasi. Ti ke Jehovah awat chariot eke enyọn̄ emi. Ntre, edieke isan̄ade ikpat kiet ye chariot emi, oro owụt ke imokpono Jehovah inyụn̄ ibuọt idem ye enye, kpa Akwa Itiat nnyịn. (Ps. 18:31) Bible ọdọhọ ete: “Jehovah ọyọnọ ikọt esie odudu. Jehovah ayada emem ọdiọn̄ ikọt esie.” (Ps. 29:11) Jehovah ọnọ nnyịn odudu ye emem sia idude ke esop esie. Imenen̄ede inịm ke enye ayaka iso ọdiọn̄ nnyịn nte inamde uduak esie ke emi ye ke nsinsi nsinsi.