Nte Ekpekpepde Eyen Fo N̄kpọ

Ke ini Jehovah ọkọtọn̄ọde ubon, enye ọkọdọhọ ete ye eka ẹse ẹban̄a nditọ mmọ. (Colossae 3:20) Edi utom fo nte etea ndikpep eyen fo ama Jehovah onyụn̄ akabade akwa owo emi ọdiọn̄ọde idem. (2 Timothy 1:5; 3:15) Ana afo ọfiọk n̄ko se isịnede eyen fo ke esịt. Oyom afo enịm uwụtn̄kpọ ọnọ mmọ. Afo edikeme ndinen̄ede n̄kpep eyen fo Ikọ Jehovah edieke afo ayakde Ikọ esie ebem iso odụk fi esịt.—Psalm 40:8.

1 NAM NDITỌ FO ẸKEME NDINEME NNEME YE AFO

BIBLE ỌDỌHỌ ETE: “Ẹsọp ndikop ikọ, ẹkûsọp nditịn̄.” (James 1:19) Ana afo anam nditọ fo ẹfiọk ke mmọ ẹkeme ndineme n̄kpọ ekededi emi afịnade mmọ ye afo. Mmọ ẹnyene ndifiọk ke afo emeben̄e idem ndikpan̄ utọn̄ nnọ mmimọ ke ini mmọ ẹyomde nditịn̄ ikọ. Tie mbre mbre ye nditọ fo man mmọ ẹkeme nditịn̄ se isịnede mmọ ke esịt. (James 3:18) Edieke mmọ ẹkerede ke afo ayayat esịt ye mmimọ, ekeme ndidi mmọ iditịn̄ke ofụri se isịnede mmọ ke esịt. Nyene ime ye nditọ fo, sinyụn̄ dọhọ ke ubọk ke ubọk ke amama mmọ.—Matthew 3:17; 1 Corinth 8:1.

SE AKPANAMDE:

• Kpan̄ utọn̄ nọ nditọ fo ke ini mmọ ẹyomde ndineme nneme ye afo

• Neme nneme kpukpru ini ye nditọ fo, idịghe ke ini mfịna odude kpọt

2 DOMO NDIFIỌK SE IKỌ MMỌ ỌWỌRỌDE

BIBLE ỌDỌHỌ ETE: “Owo eke enyenede ikike ke n̄kpọ oyokụt se ifọnde.” (Mme N̄ke 16:20) Ndusụk ini, idịghe sụk ikọ nditọ fo edinam fi ọfiọk se isịnede mmọ ke esịt. Nditọwọn̄ ẹsiwak ndisio n̄kpo ke n̄kpọ emi mîdịghe n̄kpọ ndomokiet, ndusụk ini ẹtịn̄ n̄kpọ oro mîtoho mmọ esịt. “Owo ekededi eke ọbọrọde ikọ ke ini enye mîkopke kan̄a, oro edi ndisịme.” (Mme N̄ke 18:13) Kûsọp ndiyat esịt.—Mme N̄ke 19:11.

SE AKPANAMDE:

• Kûbọ nditọ fo ikọ ke inua, kûnyụn̄ usọp uyat esịt ke ini mmọ ẹtịn̄de ikọ, inamke n̄kpọ m̀mê nso ke mmọ ẹtịn̄

• Ti nte ekesitiede fi ke idem ke ini akadade nte mmọ ye se ikedide akpan n̄kpọ inọ fi

3 ẸDIANA KIET ẸNAM N̄KPỌ

BIBLE ỌDỌHỌ ETE: “Eyen mi, bọ ntụnọ usọ, kûnyụn̄ ukpọn̄ ibet uka.” (Mme N̄ke 1:8) Jehovah ọdọhọ ete ye eka ẹse ẹban̄a nditọ mmọ. Ana ẹkpep nditọ mbufo ẹkpono mbufo ẹnyụn̄ ẹkop uyo mbufo. (Ephesus 6:1-3) Nditọ ẹsifiọk ini emi ete ye eka mmọ mînyeneke uyo kiet. (1 Corinth 1:10) Edieke enyenede isio isio ekikere ye n̄wan fo, mbọk ẹkûfan̄a n̄kpọ ke iso nditọ mbufo, sia emi ekeme ndinam mmọ ẹtre ndikpono mbufo.

SE AKPANAMDE:

• Ẹneme ẹnyụn̄ ẹbiere nte ẹdisitụnọde nditọ mbufo

• Edieke afo ye n̄wan fo ẹnyenede nsio nsio ekikere ẹban̄a nte ẹkpekpepde nditọ mbufo n̄kpọ, domo ndikụt se n̄wan fo etịn̄de

4 BIERE SE EDINAMDE

BIBLE ỌDỌHỌ ETE: “Teme eyenọwọn̄ ke usụn̄ emi odotde ye enye.” (Mme N̄ke 22:6) Edieke oyomde nditọ fo ẹwọrọ n̄kpọ, kpep mmọ n̄kpọ nyụn̄ tụnọ mmọ. Ana ebiere nte edisan̄ade inam emi. (Psalm 127:4; Mme N̄ke 29:17) Ntụnọ iwọrọke ndinọ eyenọwọn̄ ufen; nam enye ọfiọk ntak emi ọdọhọde enye anam emi, okûnam oko. (Mme N̄ke 28:7) Kpep nditọ fo ẹma Ikọ Abasi ẹnyụn̄ ẹdiọn̄ọ ndida item N̄wed Abasi ndu uwem. (Psalm 1:2) Emi ayanam mmọ ẹdu eti uwem, esịt idinyụn̄ ibiomke mmọ.—Mme Hebrew 5:14.

SE AKPANAMDE:

• Kụt ete ke nditọ fo ẹda Abasi nte ata ufan emi mmọ ẹkemede ndiberi edem

• Nam mmọ ẹfiọk ke ndiọi n̄kpọ ye ndiọi owo ẹyọyọhọ Intanet mbak n̄kpọ edinam mmọ. Kpep mmọ se ẹkpenamde mbak owo idisabade mmọ