IBUOT 6
Mbon Oro Ẹkwọrọde Ikọ—Mme Asan̄autom Ẹnọ Idemmọ Unyịme Unyịme
1, 2. Ewe akwa utom ke Jesus eketịn̄ enịm ke ẹyenam, ndien ewe akpan mbụme ke emi anam ẹbụp?
MME andikara ẹsiwak ndin̄wọn̄ọ ke iyanam n̄kpọ, edi inamke. Idem mbon oro ẹnyenede eti esịt ẹkeme ndin̄wọn̄ọ ke iyanam n̄kpọ, edi ikemeke ndinam se mmọ ẹken̄wọn̄ọde. Edi emi edi ata isio ye Jesus Christ, Edidem emi edide Messiah, sia enye esinam se enye ọn̄wọn̄ọde.
2 Ke Jesus ama akakabade edi Edidem ke isua 1914, enye ama eben̄e idem ndisu ntịn̄nnịm ikọ emi enye eketịn̄de ke n̄kpọ nte isua 1,900 emi ẹkebede. Esisịt ini mbemiso enye akakpade, enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄.” (Matt. 24:14) Ntịn̄nnịm ikọ emi ndisu ama etiene owụt ke enye ama ọtọn̄ọ ndikara ke heaven. Edi akpan mbụme edi: Edidem emi edisan̄a didie itịm akwa udịm mme ọkwọrọ ikọ ke mme akpatre usen, emi mme owo ẹdimade idemmọ, ẹnana ima, mînyụn̄ imaha n̄kpọ Abasi? (Matt. 24:12; 2 Tim. 3:1-5) Oyom ifiọk ibọrọ mbụme emi, sia enye ebehe kpukpru ata mme Christian.
3. Jesus okowụt ke imenyene mbuọtidem ke ẹyenam nso, ndien nso ikanam enye enyene utọ mbuọtidem oro?
3 Fiak se ntịn̄nnịm ikọ Jesus. Ndi ikọ emi “ẹyenyụn̄ ẹkwọrọ” owụt ke Jesus ama enyene mbuọtidem ke ẹyenam utom emi? Ke akpanikọ owụt! Jesus ama ọfiọk ke iyenyene mbon oro ẹdinyịmede ndinam utom emi ke mme akpatre usen emi. Nso ikanam enye enyene utọ mbuọtidem oro? Enye ekekpebe ete esie. (John 12:45; 14:9) Mbemiso Jesus ekedide isọn̄, enye ama okụt ke Jehovah enyene mbuọtidem ke mme andituak ibuot nnọ Abasi ẹyenọ idemmọ unyịme unyịme ndinam n̄kpọ Abasi. Ẹyak ise nte Jehovah okowụtde ke imenyene orụk mbuọtidem oro.
“Ikọt Fo Ẹyenọ Idemmọ Unyịme Unyịme”
4. Ewe utom ke Jehovah ọkọdọhọ nditọ Israel ẹtịp n̄kpọ man ẹda ẹnam, ndien didie ke mmọ ẹkenam n̄kpọ?
4 Ti se iketịbede ke ini Jehovah ọkọdọhọde Moses ọbọp ataya, m̀mê tent, oro ẹkedade nte iwụk ebiet utuakibuot ke idụt Israel. Jehovah ama ọdọhọ Moses ọdọhọ mme owo ẹtịp n̄kpọ man ẹda ẹnam utom oro. Moses ama ọdọhọ nditọ Israel ete: “Yak owo ekededi eke esịt esie enyịmede ada enye edi nte etịbe Jehovah.” Nso ikedi utịp? Mme owo ẹma “ẹda enọ unyịmesịt ẹdi kpukpru usenubọk.” Mmọ ẹma ẹtịp n̄kpọ tutu “ẹnam mme owo ẹtre ndida n̄kpọ ndi.” (Ex. 35:5; 36:3, 6) Nditọ Israel ẹma ẹwụt ke Jehovah ama enen ndikenyene mbuọtidem ke idem mmimọ.
5, 6. Nte ẹtịn̄de ke Psalm 110:1-3, nso edu ke Jehovah ye Jesus ẹdori enyịn ke mme andituak ibuot nnọ Abasi ẹyenyene ke utịt ini emi?
5 Ndi Jehovah ama odori enyịn ke mme andituak ibuot nnọ imọ ke mme akpatre usen emi ẹyenyene utọ edu oro? Ih! Se ibede isua 1,000 mbemiso Jesus ekedide isọn̄, Jehovah ama ọnọ David odudu spirit ewet aban̄a ini oro Messiah editọn̄ọde ndikara. (Kot Psalm 110:1-3.) Jesus, Edidem emi ọtọn̄ọde ukara obufa mi, eyenyene mme asua emi ẹdibiọn̄ọde enye. Edi, enye eyenyene akwa udịm mbon oro ẹdidade ye enye. Owo idinyịkke-nyịk mmọ ẹnam n̄kpọ ẹnọ Edidem. Idem nditọwọn̄ ke otu mmọ ẹyenọ idemmọ unyịme unyịme, ẹnyụn̄ ẹnen̄ede ẹwak tutu ẹda mmọ ẹdomo ye mbara emi ebịtde isọn̄ ke usenubọk.a
Mbon oro ẹnyịmede ndida ye Obio Ubọn̄ ẹwak nte mbara (Se ikpehe ekikere 5)
6 Jesus ama ọfiọk ke ntịn̄nnịm ikọ oro ẹwetde ke Psalm 110 aban̄a imọ. (Matt. 22:42-45) Ke ntem, odot enye enyene mbuọtidem ke iyenyene mme anam-akpanikọ oro ẹsọn̄ọde ẹda ye imọ, emi ẹnọde idemmọ unyịme unyịme ndikwọrọ eti mbụk ke ofụri isọn̄. Didie ke se isitịbede ẹwụt ke emi edi akpanikọ? Ndi Edidem enen̄ede etịm akwa udịm mme ọkwọrọikọ oro ẹnọde idemmọ unyịme unyịme ke mme akpatre usen emi?
“Edi Akwa Ifet ye Utom Mi Nditan̄a Etop Oro”
7. Ke Jesus ama ọkọtọn̄ọ ndikara nte Edidem, didie ke enye ọkọtọn̄ọ nditịm mbon oro ẹdade ye enye idem nnọ utom oro akanade mmọ ẹnam?
7 Esisịt ini ke Jesus ama ọkọtọn̄ọ ndikara nte Edidem, enye ama ọtọn̄ọ nditịm mme mbet esie idem nnọ akwa utom oro akanade mmọ ẹnam. Nte ikokụtde ke Ibuot 2, enye ama edi edise ikọt esie onyụn̄ anam mmọ ẹsana ọtọn̄ọde ke isua 1914 esịm ntọn̄ọ ntọn̄ọ isua 1919. (Mal. 3:1-4) Ke isua 1919 oro, enye ama emek ofụn oro anamde akpanikọ man ada ikọt esie usụn̄. (Matt. 24:45) Ọtọn̄ọde ke ini oro akpan akpan, ofụn oro esida utịn̄ikọ ke ikpọ mbono ye mme n̄wed ọnọ udia eke spirit, emi esiwụtde ndien ndien ke akpana Christian kiet kiet etiene anam utom ukwọrọikọ.
8-10. Didie ke ikpọ mbono ẹkesịn udọn̄ ẹnọ ikọt Abasi ẹkwọrọ ikọ? Nọ uwụtn̄kpọ. (Se n̄ko ekebe oro “Mme Mbono Eyo Eset Oro Ẹkesịnde Udọn̄ Ẹnọ Ikọt Abasi Ẹkwọrọ Ikọ.”)
8 Mme utịn̄ikọ ke ikpọ mbono. Sia Nditọ Ukpepn̄kpọ Bible ẹkenen̄erede ẹyom ndausụn̄, mmọ ẹma ẹsop idem ke Cedar Point ke Ohio, U.S.A., ọtọn̄ọde ke September 1 esịm 8, 1919, man ẹdụk akpa akamba mbono ke akpa ekọn̄ ererimbot ama okokụre. Ke udiana usen mbono oro, Brọda Rutherford ama ọnọ utịn̄ikọ emi enye ọkọdọhọde mme andidụk mbono oro in̄wan̄-in̄wan̄ ete: “Utom Christian ke isọn̄ . . . edi nditan̄a etop Obio Ubọn̄ Ọbọn̄ nnyịn.”
9 Usen ita ke oro ebede, ẹma ẹneme se ikedide ata akpan n̄kpọ ke mbono oro ke ini Brọda Rutherford ọkọnọde utịn̄ikọ oro ibuotikọ ekedide: “Se Ẹtịn̄de Ẹnọ Mme Nsan̄autom.” Ẹma ẹmịn̄ utịn̄ikọ emi ke Enyọn̄-Ukpeme, ndien ibuotikọ esie ekedi “Nditan̄a Obio Ubọn̄.” Brọda Rutherford ọkọdọhọ ete: “Ke ini Christian odude ikpọn̄, ọkpọfọn enye obụp idemesie ete: Ntak emi ndude ke isọn̄? Ndien ibọrọ esie ekpedi, Ọbọn̄ ada mfọn esie anam mi ndi isụn̄utom esie man n̄kwọrọ etop emi anamde mme owo ẹfiak ẹditie ke emem ye Abasi nnọ ererimbot, ndien edi akwa ifet ye utom mi nditan̄a etop emi.”
10 Ke enịm-mbụk utịn̄ikọ oro, Brọda Rutherford ama ọtọt ke ẹyesimịn̄ obufa magazine oro The Golden Age (emi ẹkotde Ẹdemede! idahaemi) man ẹkpeda ẹnam mme owo ẹfiọk ke Obio Ubọn̄ edi n̄kukụre idotenyịn ubonowo. Ekem enye ama obụp m̀mê owo ifan̄ ke otuowo ẹdima nditiene nsuan obufa magazine emi. N̄kpọ kiet emi ẹkewetde ẹban̄a mbono oro ọkọdọhọ ete: “Se iketịbede ama enyene ndyọ. Tọsịn owo itiokiet ẹma ẹdaha ẹda nte owo kiet ndiwụt ke imenyịme nditiene nsuan.”b Ana in̄wan̄-in̄wan̄ ke Edidem ama enyene mbon oro ẹkedade ye enye ẹnyụn̄ ẹnọde idemmọ unyịme unyịme nditan̄a Obio Ubọn̄ esie ifịk ifịk!
11, 12. Ke isua 1920, Enyọn̄-Ukpeme ọkọdọhọ ke ini ewe ke ẹdinam utom oro Jesus eketịn̄de ke ẹyenam?
11 Mme n̄wed. Enyọn̄-Ukpeme ama anam ẹnen̄ede ẹfiọk nte utom oro Jesus ọkọdọhọde ke ẹyenam edide ata akpan n̄kpọ—oro edi, utom edikwọrọ eti mbụk Obio Ubọn̄. Ẹyak ineme ndusụk uwụtn̄kpọ ke ntọn̄ọ ntọn̄ọ iduọk isua 1920.
12 Ewe etop ke ẹdikwọrọ man ẹsu se ẹketịn̄de ke Matthew 24:14? Ini ewe ke ẹdinam utom oro? Enyọn̄-Ukpeme (Ikọmbakara) eke July 1, 1920, ekewet ke ibuotikọ emi ọdọhọde “Gospel Obio Ubọn̄” ete: “Eti mbụk emi aban̄a utịt akani ererimbot emi ye editọn̄ọ Obio Ubọn̄ Messiah.” Ibuotikọ oro ama enen̄ede owụt ini emi ẹdikwọrọde, ete: “Ẹdikwọrọ etop emi ke ini akpa ekọn̄ ererimbot tutu esịm ini ‘akwa ukụt.’” Ntre, ibuotikọ oro ama ọdọhọ ete: “Ini edi emi . . . ndikwọrọ eti mbụk emi ke kpukpru ebiet ke mme idụt Christendom.”
13. Ke 1921, didie ke Enyọn̄-Ukpeme ekesịn udọn̄ ọnọ mme Christian oro ẹyetde aran ẹnyịme ndinọ idemmọ ndinam utom ukwọrọikọ?
13 Ndi ẹdinyenyịk ikọt Abasi ẹnam utom oro Jesus ọkọdọhọde ke ẹyenam mi? Baba-o. Ibuotikọ oro ‘Ẹnen̄ede Ẹnyene Uko,’ ke Enyọn̄-Ukpeme (Ikọmbakara) eke March 15, 1921, ama esịn udọn̄ ọnọ mme Christian oro ẹyetde aran. Ẹma ẹdọhọ owo kiet kiet obụp idemesie ete: “Ndi idịghe akakan ifet inyụn̄ ibiomoke mi nditiene nnam utom emi?” Ibuotikọ oro ama aka iso ọdọhọ ete: “Nnyịn imenen̄ede inịm ke edieke afo ọfiọkde ke edi akwa ifet nditiene nnam utom emi, ke afo editie nte Jeremiah, emi ikọ Ọbọn̄ ‘eketiede nte ikan̄ eke esịnede enye ke ọkpọ asak,’ tutu enye ikemeke nditre nditịn̄.” (Jer. 20:9) Inem inem nsịnudọn̄ oro okowụt mbuọtidem emi Jehovah ye Jesus ẹnyenede ke idem mme anam-akpanikọ mbon oro ẹdade ẹnọ Obio Ubọn̄.
14, 15. Ke isua 1922, Enyọn̄-Ukpeme ekesịn udọn̄ ọnọ mme Christian oro ẹyetde aran ete ẹnam utom ukwọrọikọ didie?
14 Didie ke ata mme Christian ẹkpenam etop Obio Ubọn̄ esịm mbon en̄wen? Ekpri okopodudu ibuotikọ oro “Utom Oro Anade Ẹnam” ke Enyọn̄-Ukpeme (Ikọmbakara) eke August 15, 1922, ama esịn udọn̄ ọnọ mme Christian oro ẹyetde aran ete “ẹsịn ifịk ẹda mme n̄wed nnyịn ẹsọk mme owo ẹnyụn̄ ẹnyene nneme ye mme owo ke ufọk mmọ, ẹnọ ikọ ntiense nte ke Obio Ubọn̄ heaven ekpere.”
15 Ana in̄wan̄-in̄wan̄ nte ke ọtọn̄ọde ke isua 1919, Christ ada ofụn emi anamde akpanikọ onyụn̄ enyenede ọniọn̄ etịn̄ ndien ndien ke edi akwa ifet ye utom Christian emi odude ke isọn̄ nditan̄a etop Obio Ubọn̄. Edi, Nditọ Ukpepn̄kpọ Bible ẹkenam n̄kpọ didie ẹban̄a nsịnudọn̄ oro ẹkenọde mmọ ẹte ẹtan̄a etop Obio Ubọn̄?
“Mbon Oro Ẹnamde Akpanikọ Ẹyenọ Idemmọ Unyịme Unyịme”
16. Didie ke ndusụk mbiowo oro ẹkemenerede ubọk ẹmek ẹkenam n̄kpọ ke ini ẹkedọhọde ke ana kpukpru Christian oro ẹyetde aran ẹnam utom ukwọrọikọ?
16 Ke mme iduọk isua 1920 ye 1930, ndusụk owo ikamaha ke ini ẹkedọhọde ke ana kpukpru mme Christian oro ẹyetde aran ẹnam utom ukwọrọikọ. Enyọn̄-Ukpeme (Ikọmbakara) eke November 1, 1927, ama etịn̄ se iketịbede ete: “Odu ndusụk owo mfịn ke esop emi ẹdide mbiowo . . . oro mîmaha ndisịn udọn̄ nnọ nditọete mmọ ẹtiene ẹkwọrọ ikọ, emi ke idemmọ mînyụn̄ imaha ndikwọrọ ikọ. . . . Mmọ ẹda item emi ẹnọde ẹte ẹsan̄a ke enyịnusụn̄ ke enyịn̄usụn̄ ẹkwọrọ etop Abasi, eke Edidem esie, ye eke Obio Ubọn̄ ẹnọ mme owo, ẹnam n̄kpọ nsahi.” Ibuotikọ oro ama etịn̄ in̄wan̄-in̄wan̄ ete: “Ini ekem mme anam-akpanikọ ndinịm mme utọ owo oro idiọn̄ọ nnyụn̄ ntre ndụk ye mmọ, nnyụn̄ ndọhọ mmọ ke nnyịn idinọhọ mme utọ owo oro ifetutom aba nte mbiowo.”c
17, 18. Ata ediwak owo ke esop ẹkenam n̄kpọ didie ẹban̄a item oro ofụn emi anamde akpanikọ ọkọnọde, ndien ediwak miliọn owo ẹnam n̄kpọ didie ẹban̄a emi ke isua 100 emi ẹbede?
17 Enem nditịn̄ ke ata ediwak owo ke esop ẹma ẹnam item oro ofụn emi anamde akpanikọ ọkọnọde mi. Mmọ ẹkeda ke edi akwa ifet nditiene n̄kwọrọ etop Obio Ubọn̄. Enyọn̄-Ukpeme (Ikọmbakara) eke March 15, 1926, ọkọdọhọ ntem: “Mbon oro ẹnamde akpanikọ ẹyenọ idemmọ unyịme unyịme . . . nditan̄a etop emi nnọ mme owo.” Utọ mbon oro ẹnamde akpanikọ mi ẹsu ntịn̄nnịm ikọ oro ke Psalm 110:3 ẹnyụn̄ ẹwụt ke mmimọ ida ye Edidem emi edide Messiah.
18 Ke se ikande isua 100 idahaemi, ediwak miliọn owo ẹnọ idemmọ unyịme unyịme nditan̄a etop Obio Ubọn̄. Ke ibuot ifan̄ oro ẹditienede, iyeneme nte mmọ ẹkwọrọde ikọ—oro edi, usụn̄ ye se mmọ ẹdade ẹkwọrọ ikọ—ye se idide utịp utom mmọ. Akpa kan̄a, ẹyak ineme ntak emi ediwak miliọn owo ẹnọde idemmọ unyịme unyịme ndikwọrọ etop Obio Ubọn̄, okposụkedi emi mmọ ẹdude ke ererimbot uma-idem emi. Nte inemede n̄kpọ emi, ọfọn ibụp idem nnyịn ite, ‘Ntak emi nsikwọrọde eti mbụk nnọ mme owo?’
“Ẹka Iso . . . Ndibem Iso Nyom Obio Ubọn̄”
19. Ntak emi nnyịn inamde item emi Jesus ọkọnọde ete ‘ika iso ibem iso iyom obio ubọn̄’?
19 Jesus ama eteme mme anditiene enye ete “ẹka iso . . . ndibem iso nyom obio ubọn̄.” (Matt. 6:33) Ntak emi ọfọnde inam item emi? Akpan ntak edi koro nnyịn imọfiọk nte Obio Ubọn̄ edide akpan n̄kpọ, ke enye edi ata akpan uduak Abasi. Nte ikokụtde ke Ibuot 5, edisana spirit ayarade mme inem inem akpanikọ oro ẹban̄ade Obio Ubọn̄ ọnọ nnyịn nsịtnsịt. Ke ini mme ọsọn̄urua akpanikọ emi ẹn̄wan̄ade nnyịn, ọyọdọn̄ nnyịn ndibem iso nyom Obio Ubọn̄.
Kpa nte owo emi ekenen̄erede okop idatesịt ke ini enye okokụtde n̄kpọuto eke edịbede, ntre ke mme Christian ẹdat esịt ke ini mmọ ẹfiọkde akpanikọ Obio Ubọn̄ (Se ikpehe ekikere 20)
20. Didie ke uwụtn̄kpọ Jesus oro aban̄ade n̄kpọuto eke edịbede owụt nte mme anditiene enye ẹdinamde item oro enye ọnọde ete ẹka iso ẹbem iso ẹyom Obio Ubọn̄?
20 Jesus ama ọfiọk nte mme anditiene enye ẹdinamde n̄kpọ iban̄a item oro enye ọnọde ete ẹka iso ẹbem iso ẹyom Obio Ubọn̄. Kere ban̄a uwụtn̄kpọ oro enye ọkọnọde aban̄a n̄kpọuto oro edịbede. (Kot Matthew 13:44.) Ke ini owo oro anamde utom ke in̄wan̄ okụtde n̄kpọuto oro edịbede, enye ọsọsọp ọfiọk ufọn esie. Nso ke enye anam? Bible ọdọhọ ete: “Ke ntak idatesịt emi enye enyenede enye aka akanyam se ededi eke enye enyenede onyụn̄ aka ekedep in̄wan̄ oro.” Nso ke emi ekpep nnyịn? Ima ikụt akpanikọ Obio Ubọn̄ inyụn̄ ifiọk ufọn esie, idatesịt oro inyenede ayanam nnyịn iyak n̄kpọ ekededi atak nnyịn man inịm n̄kpọ Obio Ubọn̄ ke nnennen itie esie—oro edi, akpa itie ke uwem nnyịn.d
21, 22. Didie ke mbon oro ẹsọn̄ọde ẹda ẹnọ Obio Ubọn̄ ẹwụt ke mmimọ ibem iso iyom Obio Ubọn̄? Nọ uwụtn̄kpọ.
21 Mbon oro ẹsọn̄ọde ẹda ẹnọ Obio Ubọn̄ ẹsiwụt ke edinam, idịghe ke ikọ kpọt, ke mmimọ ibem iso iyom Obio Ubọn̄. Mmọ ẹsida uwem mmọ, ukeme mmọ, ye inyene mmọ ẹnam utom edikwọrọ Obio Ubọn̄. Ediwak owo ẹyak ediwak n̄kpọ ẹtak mmọ man ẹnam utom uyọhọ ini. Kpukpru utọ mme ọkwọrọikọ oro ẹnọde idemmọ unyịme unyịme mi ẹkụt ke idemmọ ke Jehovah esidiọn̄ mbon oro ẹnịmde Obio Ubọn̄ akpa. Kere ban̄a uwụtn̄kpọ kiet ke eset.
22 Avery ye Lovenia Bristow ẹkenam utom ọtọkiet nte mme colporteur (oro edi, mme asiakusụn̄) ke usụk usụk United States toto ke utịt utịt iduọk isua 1920. Ke ediwak isua ẹma ẹkebe, Lovenia ọkọdọhọ ete: “Ami ye Avery imokop inemesịt ndinam utom usiakusụn̄ ọtọkiet ke ediwak isua toto ke ini oro. Ama odu ediwak ini oro nnyịn mîkọfiọkke nte idisan̄ade inyene okụk aranuwat ye n̄kpọudia. Edi ke usụn̄ kiet m̀mê eken, Jehovah ama esinọ. Nnyịn iketreke ndinam utom usiakusụn̄. Ima isinyene mme akpan n̄kpọ oro ikenen̄erede iyom.” Lovenia eti isan̄ kiet ke ini mmọ ẹkenamde utom usiakusụn̄ ke Pensacola ke Florida, emi mmọ mîkonyụn̄ inyeneke okụk ye n̄kpọudia. Mmọ ẹma ẹnyọn̄ ẹdikụt ikpọ ekpat n̄kpọudia iba ke ubomisọn̄ mmọ emi okonyụn̄ edide ufọkidụn̄, ye ekpri leta emi ọkọdọhọde ete, “Esop Pensacola ọnọ mbufo n̄kpọ emi.” Ke ini Lovenia etiede ekere ediwak isua oro enye anamde utom uyọhọ ini, enye ọdọhọ ete: “Akananam Jehovah ikpọn̄ke nnyịn. Akananam enye ikpụhu nnyịn.”
23. Etie fi didie ke idem ndikụt akpanikọ Obio Ubọn̄, ndien nso ke afo ebiere ndinam?
23 Kpukpru nnyịn ikemeke ndinam ukem utom ukwọrọikọ. Idaha nnyịn ẹdi nsio nsio. Edi, kpukpru nnyịn imekeme ndibat ke edi akwa ifet nditan̄a eti mbụk ke ofụri ukpọn̄. (Col. 3:23) Sia inen̄erede ima mme ọsọn̄urua akpanikọ Obio Ubọn̄ oro ikụtde, imenyịme—ke nditịm ntịn̄, imenen̄ede iyom—ndiyak n̄kpọ ekededi atak man inen̄ede isịn idem ọyọhọ ọyọhọ nte ikekeme ke utom emi. Ndi idịghe se afo ebierede ndinam edi oro?
24. Nso idi kiet ke otu akakan n̄kpọ oro Obio Ubọn̄ anamde ke mme akpatre usen emi?
24 Ke isua ikie emi ẹbede, Edidem ke osu ntịn̄nnịm ikọ oro ẹwetde ke Matthew 24:14. Ndien enye inyịkke-nyịk owo ndomokiet anam utom emi. Ke mme mbet esie ẹma ẹkekpọn̄ ererimbot uma-idem emi, mmọ ẹnọ idemmọ unyịme unyịme ndinam utom ukwọrọikọ. Utom ukwọrọikọ oro mmọ ẹnamde ke ofụri isọn̄ edi ubak idiọn̄ọ oro owụtde ke Jesus ke akara ye kiet ke otu n̄kponn̄kan n̄kpọ oro Obio Ubọn̄ anamde ke mme akpatre usen emi.
a Ke Bible, mbara ada aban̄a n̄kpọ oro awakde.—Gen. 27:28; Mic. 5:7.
b Ekpri n̄wed oro To Whom the Work Is Entrusted ọkọdọhọ ete: “Ẹdinam utom edisuan The Golden Age ke ini ẹkwọrọde etop Obio Ubọn̄ ke ufọk ke ufọk . . . Ke ẹma ẹkekwọrọ etop Obio Ubọn̄, ẹyenọ The Golden Age ke ufọk kiet kiet edide enyeneufọk otobo m̀mê itoboke.” Ke ediwak isua ẹma ẹkebe, ẹma ẹsịn udọn̄ ẹnọ nditọete ẹte ẹdọhọ mme owo ẹtobo The Golden Age ye Enyọn̄-Ukpeme. Ọtọn̄ọde ke February 1, 1940, ẹma ẹsịn udọn̄ ẹnọ ikọt Jehovah ẹte ẹsinọ mme owo magazine mbiba emi ẹnyụn̄ ẹtọt ibat oro ẹnịmde.
c Ini oro, esop ẹkesimenede ubọk ẹmek mbiowo. Ntre, esop ẹma ẹkeme nditre ndimek mbon oro mîkamaha utom ukwọrọikọ. Iyeneme ukpụhọde oro ẹkenamde man ẹmek mbiowo ke ido ukara Abasi ke Ibuot 12.
d Jesus ama etịn̄ ukem n̄kpọ emi ke uwụtn̄kpọ oro enye ọkọnọde aban̄a owo urua oro okoyomde pearl emi ekọmurua esie okponde. Ke ini owo urua oro okụtde, enye anyam kpukpru n̄kpọ emi enye enyenede edep enye. (Matt. 13:45, 46) Uwụtn̄kpọ iba emi ẹwụt nnyịn ke imekeme ndikpep akpanikọ Obio Ubọn̄ ke nsio nsio usụn̄. Ndusụk owo ẹsikụt enye ke unana idotenyịn, mbon eken ẹyoyom mbemiso ẹkụtde. Edi inamke n̄kpọ m̀mê ikasan̄a didie ikụt akpanikọ, imeben̄e idem ndiyak n̄kpọ ẹtak nnyịn man inịm Obio Ubọn̄ akpa ke uwem nnyịn.