Owo Emi Ekpekpebede​—Hezekiah

Uwem Hezekiah ọmọn̄ okpụhọde. Enye edi isua 25 kpọt ke ini akabarede edi edidem Judah. Nso utọ edidem ke enye edidi? Ndi enye eyekpebe idiọk uwụtn̄kpọ Edidem Ahaz, ete esie? Tutu Ahaz akpa, enye ekedi owo mfiakedem oro mîkakabakede esịt. Enye ama anam mme owo ẹkpono ndem onyụn̄ ọfọp ke nsụhọde n̄kaha eyeneka Hezekiah kiet ke itieuwa ndem. (2 Chronicle 28:1-4) Edi Hezekiah iyakke mbubịk ido ete esie akpan enye ndituak ibuot nnọ Jehovah, inyụn̄ ikereke ke imọ iditreke-tre ndinam ukem ndudue oro ete imọ akanamde. Utu ke oro, Hezekiah aka iso “ọsọn̄ọ eyịre ye Jehovah.”​—2 Ndidem 18:6.

Ndi ete m̀mê eka fo ese utuakibuot Jehovah ke ndek? Ndi enye esifiomo owo, mîdịghe odụk ufụn ọnọ idiọk edinam? Edieke edide ntre, kûnam ukem ndudue ete m̀mê eka fo! Hezekiah ikayakke idiọk ufọk oro enye okotode abiat uwem esie. Ke nditịm ntịn̄, enye ekedi ata eti edidem, ndien “baba owo kiet ikebietke enye ke otu kpukpru ndidem Judah, idem kpa ye mbon oro ẹkebemde enye iso ẹdu.” (2 Ndidem 18:5) Ukem nte Hezekiah, afo emekeme ndikụt unen kpa ye mfịna ufọk mbufo. Didie ke ekeme ndinam emi? Ka iso ‘sọn̄ọ yịre ye Jehovah.’