Ibuot 19

Didie ke N̄keme Ndibiat Okụk Mi ke Eti Usụn̄?

Ndi emesiwak ndikere ke unyeneke okụk oro awakde ekem se abiatde?

□ Akanam n̄kereke

□ Mmesikere ndusụk ini

□ Mmesiwak ndikere

Ikafan̄ ke esibuọt owo okụk adian edep n̄kpọ?

□ Akanam mbuọtke

□ Mmesibuọt ndusụk ini

□ Mmesiwak ndibuọt

Ikafan̄ ke esidep n̄kpọ emi mûnen̄ekede uyom, edi edep ke ntak emi ememde urua?

□ Akanam ndepke

□ Mmesidep ndusụk ini

□ Mmesiwak ndidep

NDI emekere ke akanam unyeneke okụk awak ekem se abiatde? Ubaha-e nte ekpenyenede okụk oro awakde ekem, ekpedep se ededi oro oyomde. Ubaha-e nte okụkutom fo akpamanade awak, ekpedep ikpaukot oro ekerede ke omoyom do. Mîdịghe, ekeme ndidi se ikọwọrọde Joan ọwọrọ fi. Enye ọdọhọ ete: “Mme ufan mi ẹsidọhọ mi ndusụk ini ntiene mmimọ nnam n̄kpọ emi edikpade ata ediwak okụk. Esidọn̄ mi ndidu ye mmọ n̄kop inemesịt. Ndien ẹsisọsọn̄ ndidọhọ ‘Mbọk ndikemeke sia nnyeneke okụk.’”

Utu ke nditịmede esịt ke ntak emi mûnyeneke okụk, ntak mûkam ukpepke nte akpabiatde ekpri okụk emi odụkde fi ubọk ke eti usụn̄? Emekeme ndikere ke akpana ebet tutu ama ọkpọn̄ ufọk mbemiso ekpepde nte akpabiatde okụk. Edi kere ise, Ndi ọkpọfrọ ke ubom odụk inyan̄ ke ini mûfiọkke ndiwọk ewọk? Edi akpanikọ ke ẹkeme ndinyan̄a owo oro mmọn̄ oyomde ndimen. Edi ndi ikpakam ifọnke owo ọfiọk ewọk mbemisọ ọfrọde odụk mmọn̄?

Kpasụk ntre, mfọnn̄kan ini oro ekpekpepde nte ẹbiatde okụk ke eti usụn̄ edi ini emi osụk odude mi ye ete ye eka fo, mbemiso ọtọn̄ọde ndise mban̄a idemfo. Edidem Solomon ọkọdọhọ ke ‘okụk esikpeme owo.’ (Ecclesiastes 7:12) Edi okụk edikpeme fi n̄kukụre edieke ekpepde ndibiat enye ke ufat. Emi ayanam fi enịm ke emekeme ndibiat okụk ke eti usụn̄ oyonyụn̄ anam ete ye eka fo ẹnen̄ede ẹma fi.

Kpep Nte Ẹkpekamade Ufọk

Ndi akanam ọmọdọhọ ete ye eka fo ẹsian fi ibatokụk oro mmọ ẹsibiatde ẹda ẹkama ufọk? Ke uwụtn̄kpọ, ndi ọmọfiọk se mmọ ẹsibiatde ẹda ẹkpe okụk ikan̄ ye okụk mmọn̄ kpukpru ọfiọn̄, m̀mê se ẹsibiatde ke ubomisọn̄, se ẹsidade ẹdep udia ẹnyụn̄ ẹkpe okụk ufọk? Ti ke afo etiene anam ẹbiat okụk emi—ndien edieke ọkpọn̄de ufọk, afo edise aban̄a ofụri ubiatokụk emi. Do ọyọfiọk nte okụk emi edidade ise iban̄a idemfo ediwakde iketre. Dọhọ ete ye eka fo ẹwụt fi ibatokụk emi mmọ ẹsibiatde, nyụn̄ nen̄ede kpan̄ utọn̄ ke ini mmọ ẹtịn̄de nte mmọ ẹsiwetde usụn̄ oro mmọ ẹdiomide ndibiat okụk.

N̄ke Bible kiet ọdọhọ ete: “Owo ọniọn̄ ayakpan̄ utọn̄ onyụn̄ aka iso ọbọ item, enyene-ibuot owo oyonyụn̄ ọbọ eti ndausụn̄.” (Mme N̄ke 1:5) Anna ama ọdọhọ ete ye eka esie ẹnọ imọ eti ndausụn̄. Enye ọdọhọ ete, “Ete mi ama ekpep mi ndiwewet nte ndibiatde okụk, onyụn̄ owụt mi ntak emi ọfọnde ẹsiwewet mme n̄kpọ oro ẹdade okụk ubon ẹnam.”

Eka Anna n̄ko ama ekpep enye mme akpan n̄kpọ en̄wen. Anna ọdọhọ ete: “Eka mi ama ekpep mi ke ọfọn ndibụp nte ẹnyamde n̄kpọ ke nsio nsio itie mbemiso ndepde.” Anna adian do ete, “Idem ekeme ndikpa owo ndikụt se Mama ekemede ndida ekpri okụk nnam.” Didie ke emi an̄wam Anna? Enye ọdọhọ ete: “Mmọfiọk ndibiat okụk mi ke eti usụn̄. Mbiatke okụk mi ntịme ntịme, ndien emi anam n̄kop inemesịt, ekikere onyụn̄ ana mi sụn̄ sia mmen̄kamake owo isọn.”

Fiọk Mme Mfịna Oro Afo Ekemede Ndinyene

Edi akpanikọ ke idịghe mmemmem n̄kpọ ndifam okụk, akpan akpan edieke osụk odụn̄de ye ete ye eka fo, mmọ ẹsinyụn̄ ẹnọde fi okụk ekpatọfọn̄ mîdịghe edieke edide ẹsikpe fi n̄kpri okụk ke utom oro anamde. Ntak emi idọhọde ntre? Sia anaedi ete ye eka fo ẹsise ẹban̄a okụk oro ubon mbufo ẹbiatde. Ntre, ekeme ndidi unyeneke se adade okụk fo anam akan ndibiat enye nte amama. Idụhe se inemde nte owo ndinyene okụk emi enye ekemede ndibiat.

Edi emekeme ndinyene mfịna edieke ayakde mme uke fo ẹnam fi abiat okụk akan nte akpabiatde. Ellena emi edide isua 21 ọdọhọ ete: “Mme uke mi ẹda edika n̄kedep n̄kpọ nte unọ idem inemesịt. Ini ekededi oro ntienede mmọ n̄ka, mmesikụt ke etie nte kpukpru mmọ ẹnịm ke ana owo abiat okụk ntịme ntịme man okop inemesịt.”

Idiọkke edieke edide esidọn̄ fi nditiene ndụk otu. Edi bụp idemfo, ‘Ndi ntiene mme ufan mi mbiat okụk sia mmenyene m̀mê ke ntak emi mmenyomke mmọ ẹsak mi?’ Ediwak owo ẹsibiat okụk man edi eti owo ke iso mme ufan mmọ. Mmọ ẹsidomo ndinam mbon en̄wen ẹfiọk se mmimọ inyenede utu ke ndinam ẹfiọk orụk owo emi mmọ ẹdide. Utọ edu emi ekeme ndinam enyene mfịna okụk, akpan akpan edieke anade ọbọbuọt okụk edep n̄kpọ. Nso ke akpanam mbak udunyene utọ edu emi?

Kpeme Nte Abiatde Okụk

Utu ke ndibuọt ediwak okụk m̀mê ndibiat ofụri okụk fo ke usen kiet emi ẹkade ndidep n̄kpọ, ntak emi mûnamke se Ellena akanamde? Enye ọdọhọ ete: “Ke ini nsan̄ade ye mme ufan mi n̄wọrọ, mmesibem iso mbiere ibatokụk oro ndibiatde. Nsisịn ofụri okụk ọfiọn̄ mi ke ban̄k, nsinyụn̄ nsio sụk se nyomde ke ini n̄wọrọde an̄wa. Mmokụt n̄ko ke ọfọn mi ndisisan̄a sụk ye mme ufan mi oro ẹsikpemede nte ẹbiatde okụk mmọ, emi ẹdinyụn̄ ẹsịnde udọn̄ ẹnọ mi ndibụp nte ẹnyamde n̄kpọ ke nsio nsio itie mbemiso ndepde utu ke ndibụmede ndep akpa n̄kpọ oro n̄kụtde.”

Kop mme n̄kpọ en̄wen oro akpanamde mi edieke anade ọbọ ebuọt:

● Wet ebuọt okụk ekededi oro ọbọde sịn ke n̄wed nyụn̄ kụt ete ke se ewetde edi ukem ye se owo emi ọnọde fi ebuọt ewetde.

● Kpe isọn oro akamade owo ke ndondo oro enyenede okụk. Edieke ekemede, kpe kpukpru ini kiet.

● Nen̄ede kpeme nte ọbọde mme owo okụk ke ebuọt. Kûbọ owo eke okokụt ebuọt okụk.

● Kûbọ okụk emi edikpede udori. Ndibọ utọ ebuọt oro ekeme ndisịn fi ke fehesan̄.

● Kûdedei uyak owo ada enyịn̄ fo ọkọbọ ebuọt okụk, ekpededi ufan fo.

Edi ndi ndinyene ediwak okụk ikpakam ikọkke kpukpru mfịna okụk oro afo enyenede? Etie nte idikọkke! Ke uwụtn̄kpọ: Edieke awatde ubomisọn̄, edi ukemeke ndiwat ọfọn, mîdịghe edieke esimade ndibọbọ n̄kpọ ke enyịn n̄wat, ndi emekere ke ndisin aranuwat awak ke ubomisọn̄ fo ayanam esịm ebiet emi akade eyen eyen? Kpasụk ntre, edieke mûkpemeke nte abiatde okụk fo, ndinyene ediwak okụk idikpanke fi ndibiat okụk ntịme ntịme.

Ekeme ndidi ekere ke usûbiatke okụk ntịme ntịme. Edi bụp idemfo ete: ‘Okụk ifan̄ ke n̄kabiat ọfiọn̄ oko? N̄kada nnam nso?’ Utịghi? Kop se akpanamde mi mbak udûtahade okụk fo:

1. Wewet nịm. Ke ufan̄ ọfiọn̄ kiet, wet ibatokụk oro ọbọde ye usenọfiọn̄ emi ọbọde. Wet n̄kpọ kiet kiet oro edepde ye ibatokụk oro adade edep. Ke utịt ọfiọn̄ oro, dian ibatokụk oro ọkọbọde ye enye oro akabiatde.

2. Wet nte odiomide ndibiat okụk. Se ekebe oro odude ke page 163. Ke akpa ikpehe esie, wet kpukpru okụk oro odoride enyịn ndibọ ke ọfiọn̄ kiet. Ke ọyọhọ ikpehe iba, wet nte aduakde ndibiat okụk fo; da se ekewetde ke akpa ikpehe oro nte uwụtn̄kpọ. Nte ini akade ke ọfiọn̄ oro, wet nnennen ibatokụk oro abiatde ke n̄kpọ kiet kiet oro akaduakde ndinam ke ọyọhọ ikpehe ita ke ekebe oro. Wet n̄ko kpukpru n̄kpọ emi abiatde okụk anam, emi mûkuduakke ke ntọn̄ọ ọfiọn̄ oro.

3. Kpụhọde nte abiatde okụk. Edieke abiatde okụk ke ndusụk n̄kpọ awak akan se akaduakde, onyụn̄ ọtọn̄ọde ndikama akamba isọn, kpụhọde edu emi. Kpe isọn oro akamade. Kûbiat okụk ukan se akaduakde.

Okụk enyene ufọn esiemmọ edieke ẹbiatde enye ke eti usụn̄. Ke nditịm ntịn̄, ndin̄wana okụk nnyụn̄ mbiat enye ke eti usụn̄ edi akpan n̄kpọ ke uwem ediwak owo. Edi kûfam okụk ukaha, kûnyụn̄ utatahade okụk fo. Uyen kiet emi ekerede Matthew ọdọhọ ete: “Okụk enyene ufọn esiemmọ, edi idịghe enye edi akpan n̄kpọ akan. Kûdedei uda enye ke akpan n̄kpọ ukan ubon fo m̀mê Jehovah.”

AKPAN ITIE N̄WED ABASI

“Okụk [ekpeme owo]; edi ufọn ifiọk edi nte ke ọniọn̄ enịm mbon oro ẹnyenede enye uwem.”​—Ecclesiastes 7:12.

ITEM

Wewet se oyomde ndidep mbemiso akade urua. Kama sụk okụk oro oyomde ndida ndep n̄kpọ, kûnyụn̄ udep n̄kpọ awak akan se ekewetde.

NDI AMA ỌFIỌK . . . ?

Edieke ọbọde owo ₦2,000 ke ebuọt onyụn̄ enyịmede ke iyesikpe enye ₦200 ke udori kpukpru ọfiọn̄, fiọk ete edikama owo oro ₦4,400 edieke mûkemeke ndikpe okụk emi ke ufan̄ isua kiet.

SE NDINAMDE

Mmekeme ndibiat okụk ke eti usụn̄ edieke ․․․․․

Mbemiso mbọde owo okụk ke ebuọt, se ndinamde edi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Ntak emi ekpekpepde nte ẹbiatde okụk ke eti usụn̄ ke ini osụk odude ye ete ye eka fo?

● Ntak emi ekemede ndisọn̄ fi ndida okụk nnam n̄kpọ ke eti usụn̄?

● Didie ke ekeme ndida okụk fo n̄n̄wam mbon en̄wen?

[Se ẹwetde ke ikpọ abisi ke page 162]

“Ke ini ndiomide ibatokụk oro ndibiatde, mmesinen̄ede mfam okụk. Nsidepke se mmenyomke.”—Leah

[Ekebe ke page 158]

Okụk Etịn̄ Ikọ

Esida okụk fo anam nso? Edieke esimade ndibiat okụk fo nnọ mbon en̄wen, ọwọrọ okụk fo​—idịghe se afo etịn̄de kpọt—​owụt ke emenen̄ede ekere aban̄a mbon en̄wen. (James 2:14-17) Ndisitịp okụk n̄n̄wam ke utuakibuot akpanikọ owụt ke amada ‘ọsọn̄urua inyene fo okpono Jehovah.’ (Mme N̄ke 3:9) Edi edieke amade ndida okụk fo nse mban̄a idemfo kpukpru ini, nso ke okụk fo etịn̄ aban̄a fi?

[Ekebe/Mme ndise ke page 163]

Utomufọk

Nte Ndibiatde Okụk Sion̄o page emi wet! ke Ọfiọn̄ ke Ọfiọn̄

se ndibiatde se mbiatde

UDIA

․․․․․ ․․․․․

ỌFỌN̄

․․․․․ ․․․․․

FON

․․․․․ ․․․․․

Okụk Emi Nsinyenede UNỌ IDEM INEMESỊT

․․․․․ ․․․․․

OKỤK EKPATỌFỌN̄ ETỊBE IMAESỊT

․․․․․ ․․․․․ ․․․․․

UTOM IBIO INI NNỊM-NNỌ-IDEM

․․․․․ ․․․․․ ․․․․․

MME OKỤK EKEN UBIATOKỤK EKEN

․․․․․ ․․․․․ ․․․․․

↓ ↓ ↓

Ofụri Ibat Ofụri Ibat Ofụri Ibat

₦․․․․․ ₦․․․․․ ₦․․․․․

[Ndise ke page 160]

Ndibiat okụk ntịme ntịme etie nte ndibọbọ n̄kpọ ke enyịn n̄wat ubomisọn̄