‘Mmọ Ikọfiọkke’

NDIDA ntọt mfefere mfefere ekeme ndida n̄kosụn̄ọ ke afanikọn̄.

Obio Darwin ke Australia ke eketịm idem ọnọ usọrọ ini nduọkodudu ke 1974 ke ini ndadiari ifiom ọkọnọde ntọt ete ke idio ọmọn̄ ọwọrọ. Edi idio ikabiatke obio Darwin ke n̄kpọ nte isua 30 emi ẹkebede. Ntak akpabiatde idahaemi? Ata ediwak mme andidụn̄ obio oro ikadaha emi nte n̄kpọndịk tutu ke ọkpọsọn̄ oyobio ama ọkọtọn̄ọ ndiyan̄ade mme ọkọmufọk nnyụn̄ n̄wụri mme ibibene ufọk emi mme owo ẹkebohode. Ke ndan̄nsiere, ofụri obio oro akana n̄wụre.

Ke November 1985, obot ama otop obomo osion̄o nsụn̄ikan̄ ke Colombia. Snow ye ice ẹma ẹtara ẹkabade okpụk emi se iwakde ibe owo 20,000 ke obio Armero ẹkebụhọde. Nte owo ikebemke iso itọt iban̄a emi? Obot oro ama enyek ke ediwak ọfiọn̄. Nte ededi, sia edide ama emehe ata ediwak owo ke obio Armero ndidụn̄ n̄kpere obot nsụn̄ikan̄, mmọ ikọnọhọ utọn̄. Ikpọ owo ukara ẹma ẹbọ ntọt nte ke afanikọn̄ ọmọn̄ etịbe, edi mmọ ikọtọtke mbio obio iban̄a emi. Ẹma ẹnọ ntọt ke ekebe utịn̄ikọ ndisọn̄ọ mme owo esịt ke n̄kpọ iditịbeke. Ẹma ẹda ukwak utịn̄ikọ ke ufọkabasi ẹdọhọ mme owo ẹkûkop ndịk. Ke mbubịteyo oro, ẹma ẹkop ọkpọsọn̄ uyom obot oro okotopde obomo ikaba. Nte afo ọkpọkọkpọn̄ inyene fo efehe? Ediwak owo ikodomoke ndifehe tutu ke ini ama ekebe akaha.

Ediwak ini mme ekpepn̄kpọ mban̄a isọn̄ ẹsibem iso ẹtịn̄ ata nnennen ebiet emi unyekisọn̄ editịbede. Edi esisọn̄ mmọ ndibem iso ntịn̄ ata nnennen ini oro emi editịbede. Ke 1999, unyekisọn̄ ke ofụri ererimbot ama ada uwem mme owo ekperede ndisịm 20,000. Ediwak mbon oro ẹkekpan̄ade ẹkekere ke tutu amama emi iditịbeke inọ mmimọ.

Didie ke Afo Esinam N̄kpọ Aban̄a Ntọt Emi Abasi ke Idemesie Ọnọde?

Bible ama enen̄ede etịn̄ anyanini ko aban̄a mme n̄kpọ oro ẹditịbede ke ukperedem ini emi. Ke ebuana ye oro, enye esịn udọn̄ ọnọ nnyịn ndikere mban̄a “mme usen Noah.” “Ke mme usen eke ẹkebemde ukwọ iso,” mme owo ẹma ẹsịn idem ke mme edinam uwem oro ẹmehede, edi nte eyịghe mîdụhe afai oro ọkọyọhọde ama afịna mmọ. Amaedi ntọt oro Abasi akadade asan̄autom esie Noah ọnọ, ‘mmọ ikọfiọkke tutu ukwọ edi edimen mmọ kpukpru efep.’ (Matthew 24:37-39) Nte afo akpakanam n̄kpọ aban̄a ntọt oro? Nte afo amanam n̄kpọ aban̄a ntọt idahaemi?

Nso edieke afo okpokodụn̄de ke Sodom, emi ekekperede Inyan̄ Inụn̄, ke eyo Lot, eyen eyeneka Abraham? Obio-in̄wan̄ oro ekebiet paradise. Obio oro ama enyene uforo. Mme owo do ikenyeneke editịmede esịt. Ke eyo Lot, “mmọ [ke] ẹkedia n̄kpọ, ẹnyụn̄ ẹn̄wọn̄ n̄kpọ; mmọ ẹdep, ẹnyụn̄ ẹnyam; ẹtọ in̄wan̄, ẹnyụn̄ ẹbọp ufọk.” N̄kaowo oro mmọ ẹkedụn̄de ama anam ebeubọk oburobụt ido. Nte afo akpakanam n̄kpọ aban̄a ntọt oro Lot ọkọnọde ete ẹkûnam ndiọi edinam? Nte afo akpakakpan̄ utọn̄ ke ini enye ọkọdọhọde ke Abasi ebiere ndisobo obio Sodom? Mîdịghe nte afo akpakada emi ke abian̄a, nte mme ukot Lot ẹkedade? Nte afo ọkpọkọtọn̄ọ ndifehe edi ekem ọn̄wọn̄ọde ese edem nte n̄wan Lot akanamde? Okposụkedi mbon eken mîkadaha ntọt emi ke akpan n̄kpọ, ke usen oro Lot ọwọrọde ke Sodom, “ikan̄ ye itai ẹto ke enyọn̄ ẹdep ẹdisobo mmọ kpukpru.”—Luke 17:28, 29.

Ata ediwak owo ke eyo nnyịn idaha idem ifiọk. Edi ẹdọn̄ mme uwụtn̄kpọ emi ke Ikọ Abasi nte ntọt ẹnọ nnyịn, man ẹsịn udọn̄ ẹnọ nnyịn NDIDU KE UKPEME!

[Ekebe/Ndise ke page 22]

Ndi Edịm Ukwọ Ofụri Ererimbot Ama Enen̄ede Edep?

Ediwak mme okụt ndudue ẹdọhọ Ihih. Edi Bible ọdọhọ Ih.

Jesus Christ ke idemesie ama etịn̄ aban̄a emi, ndien enye ama odu ke heaven okụt ini oro ukwọ emi ekedepde.

[Ekebe/Ndise ke page 23]

Ndi Ẹma Ẹnen̄ede Ẹsobo Sodom ye Gomorrah?

Ukpepn̄kpọ oro aban̄ade udọkisọn̄ nyom n̄kpọeset ọsọn̄ọ emi.

Mbụk ererimbot etịn̄ aban̄a emi.

Jesus Christ ama ọsọn̄ọ n̄kpọntịbe emi, ndien ẹtịn̄ ẹban̄a se iketịbede ke nsio nsio n̄wed 14 ke Bible.