Ibuot Duopekiet
“Ẹbem Iso Ẹyom Obio Ubọn̄”
1. (a) Ntak emi Jesus akakpakde mme andikpan̄ utọn̄ nnọ enye ete ẹbem iso ẹyom Obio Ubọn̄? (b) Nso mbụme ke nnyịn ikpobụp idem nnyịn?
KE SE ikande isua 1,900 emi ẹkebede, Jesus ama akpak mme andikpan̄ utọn̄ nnọ enye ke ini ọkọnọde utịn̄ikọ ke Galilee ete: “Ẹkam ẹbem iso ẹyom Obio Ubọn̄ Esie ye edinen ido [Abasi].” Edi ntak ekedide usọp usọp ntre? Nte ini oro Christ ekenyenede ndibọ odudu Obio Ubọn̄ ikedịghe ediwak isua ikie ke iso? Ih, edi Obio Ubọn̄ Messiah ekenyene ndidi usụn̄ emi Jehovah ediwụtde unen itie edikara esie onyụn̄ ọyọhọ akwa uduak esie kaban̄a isọn̄. Owo ekededi oro ekenen̄erede ọfiọk nte mme n̄kpọ oro ẹdide akpan n̄kpọ eyenịm Obio Ubọn̄ akpa ke uwem esie. Edieke oro ekedide ntre ke akpa isua ikie, n̄wan̄wadise mfịn, emi edide ẹdori Christ nte Edidem ke ebekpo idahaemi! Ntre mbụme edi, Nte usụn̄ uwem mi owụt ke ami ke mbem iso nyom Obio Ubọn̄ Abasi?—Matthew 6:33.
2. Mme n̄kpọ ewe ke mme owo ke ofụri ofụri ẹsịn ifịk ẹbịne?
2 Ke akpanikọ, ediwak miliọn owo mfịn ke ofụri ererimbot ke ẹbem iso ẹyom Obio Ubọn̄. Mmọ ke ẹwụt ibetedem oro mmọ ẹnọde ukara Obio Ubọn̄ ebe ke ndikọn̄ uwem mmọ ke edinam uduak Jehovah, ẹyakde idemmọ ẹnọ enye. Ke n̄kan̄ eken, n̄wakn̄kan ibat ubonowo ẹnyene udọn̄ ke ndiyom mme n̄kpọ ererimbot. Mme owo ẹbịne okụk ye inyene ye inemesịt oro okụk ekemede ndidep. Mîdịghe mmọ ẹsịn ofụri odudu mmọ ke ndika iso ke mme ubọkọkọ mmọ. Usụn̄ uwem mmọ owụt nte ke mmọ ẹkere ẹban̄a idemmọ, mme n̄kpọ obụkidem, ye edinyene inemesịt ẹkaha. Mmọ ẹnịm Abasi ke udiana itie, edieke edide mmọ ẹkam ẹnenịm enye ke akpanikọ.—Matthew 6:31, 32.
3. (a) Nso orụk n̄kpọuto ke Jesus ekesịn udọn̄ ọnọ mme mbet esie ndiyom, ndien ntak-a? (b) Ntak emi ufọn mîdụhe ndikere mban̄a mme n̄kpọ obụkidem n̄kaha?
3 Nte ededi, Jesus ama ọnọ mme mbet esie item emi ete: “Ẹkûbon n̄kpọ-uto ẹnịm ẹnọ idem ke isọn̄,” sia utọ inyene oro ndomokiet mîbịghike ke nsinsi. Enye ọkọdọhọ ete: “Edi ẹbon n̄kpọ-uto ẹnịm ẹnọ idem ke heaven” ebe ke ndinam n̄kpọ Jehovah. Jesus ama akpak mme anditiene enye ete ẹnam enyịn mmọ ‘ẹnen̄ede ẹse’ ebe ke ndiwụk ntịn̄enyịn ye odudu ke ndinam uduak Abasi. Enye ọkọdọhọ mmọ ete: “Mbufo ikemeke ndisan̄a utom Abasi ye eke mammon.” Edi nso kaban̄a mme udọn̄ n̄kpọ obụkidem—udia, edisịnen̄kpọ, ye itie udakibuot? Jesus ọkọnọ item ete: “Ẹkûtịmede esịt.” Enye ama odụri ntịn̄enyịn mmọ owụt mme inuen—Abasi ọbọk mmọ. Jesus ama esịn udọn̄ ọnọ mme anditiene enye ete ẹkpep n̄kpọ ẹto mme flawa—Abasi ọnọ mmọ edisịnen̄kpọ. Nte mme enyene-ifiọk asan̄autom Jehovah ẹdide owo isọn̄ke urua ikan ekededi ke otu mmọ emi? Jesus ọkọdọhọ ete: “Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ emi [ẹyomde] ẹnọ mbufo.” (Matthew 6:19-34) Nte mme edinam fo ẹwụt ke afo emenịm oro ke akpanikọ?
Kûyak N̄kpọ Ababa Akpanikọ Obio Ubọn̄ Owot
4. Nso ikeme ndidi utịp edieke owo odoride nsọn̄uyo akaha ke mme n̄kpọ obụkidem?
4 Enen ndikere mban̄a edinyene n̄kpọ oro ekemde man ẹda ẹse ẹban̄a mme udọn̄ n̄kpọ obụkidem idemowo ye eke ubon. Nte ededi, edieke owo ekerede aban̄a mme n̄kpọ obụkidem akaha, mme utịp ẹkeme ndikama afanikọn̄. Idem okposụkedi enye ekemede ndidọhọ ke imenịm Obio Ubọn̄ ke akpanikọ, edieke enye enịmde mme n̄kpọ efen akpa ke esịt esie, emi ayababa akpanikọ Obio Ubọn̄ owot. (Matthew 13:18-22) Ke uwụtn̄kpọ, ke idaha kiet owo inyene kiet emi edide akparawa ama obụp Jesus ete: “Ndinam nso man nnyene nsinsi uwem?” Enye ama enyene eti ido uwem ama onyụn̄ anam n̄kpọ nte ọfọnde ye mbon efen, edi enye ama ama inyene obụkidem esie akaha. Enye ikekemeke ndisana mmọ nyak man akabade edi anditiene Christ. Ntre enye ama ataba ifet oro akpakadade esịm enye ndidu ye Christ ke Obio Ubọn̄ eke heaven. Jesus ama ọdọhọ ke idaha oro ete: “Ọsọn̄ adan̄a didie ye mbon-inyene ndidụk ke Obio Ubọn̄ Abasi!”—Mark 10:17-23.
5. (a) Paul ekesịn udọn̄ ọnọ Timothy ndiyụhọ ye nso, ndien ntak-a? (b) Didie ke Satan ada “itọn̄ inyene” nte afia emi akamade nsobo anam n̄kpọ?
5 Ediwak isua ke ukperedem, apostle Paul ama ewet n̄wed ọnọ ẹsọk Timothy, emi ke ini oro okodude ke Ephesus, kpa uforo uforo iwụk ebiet unyamurua. Paul ama eti enye ete: “Nnyịn ikadaha baba n̄kpọ kiet idụk ke ererimbot, idinyụn̄ ikemeke ndida baba n̄kpọ kiet n̄wọrọ. Mmọdo edieke nnyịn inyenede se idiade ye se idade ifụk iferi, nnyịn iyokụt ite oro ekem.” Enen owo ndinam utom man enyene ‘se adiade ye se adade ofụk iferi’ esie ye eke ubon esie. Edi Paul ama odụri owo utọn̄ ete: “Mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọk udọn̄, eke ẹdụride owo ẹsụhọde ke nditaha ye nsobo.” Satan enyene n̄kari. Ke ntọn̄ọ ntọn̄ọ enye ekeme nditap owo ke n̄kpri usụn̄. Emi ekeme ndisan̄a ye mfịghe oro okponde akan, eyedi ifet edimenede owo itie m̀mê eti utom oro ẹkpede okụk ọfọn edi emi oyomde ini oro ke akpa ẹkesisiode ẹnịm ẹnọ mme n̄kpọ eke spirit. Ibọhọke nnyịn idu ke ukpeme, “itọn̄ inyene” ekeme ndibaba mme ufọn n̄kpọ Obio Ubọn̄ oro ẹnen̄erede ẹdi akpan n̄kpọ ẹkan, n̄wot. Paul eketịn̄ ke usụn̄ emi ete: “Ke edinyanade mbịne enye, ndusụk owo ẹma ẹyo ẹkpọn̄ mbuọtidem, ẹnyụn̄ ẹda ediwak mfụhọ ẹnọ idem mmọ unan.”—1 Timothy 6:7-10.
6. (a) Man ifep ndidi se uma-inyene atapde, nso ke ana nnyịn inam? (b) Nso mbuọtidem ke nnyịn ikeme ndinyene idem ke ikerede iban̄a idaha ndutịm uforo ererimbot mfịn?
6 Ye ata ima oro enye enyenede ọnọ eyenete Christian esie, Paul ama akpak Timothy ete: “Fehe kpọn̄ mme n̄kpọ emi” nyụn̄ “N̄wana eti en̄wan mbuọtidem.” (1 Timothy 6:11, 12) Oyom ọkpọsọn̄ ukeme edieke anade nnyịn ifep nditiene usụn̄ uwem uma inyene ererimbot oro akande nnyịn okụk. Edi edieke nnyịn isịn̄ede idem nnyịn nte ekemde ye mbuọtidem nnyịn, Jehovah idikpọn̄ke nnyịn tutu amama. Kpa ye mme n̄kpọ ndisọn̄ urua ye ntatara unana utom, enye oyokụt ete ke nnyịn imenyene se nnyịn inen̄erede iyom. Paul ekewet ete: “Ẹkûkọmọ ke ima inyene; ẹnem esịt ye se mbufo ẹnyenede; koro Abasi ọdọhọde ete, Ndikpụhu fi, ndinyụn̄ n̄kpọn̄ke fi. Ntre ke nnyịn imekeme ndisọn̄ọ esịt ndọhọ ete, Jehovah edi Andin̄wam mi, ndifeheke ndịk: Nso ke owo edikeme ndinam mi?” (Mme Hebrew 13:5, 6) Ndien Edidem David ekewet ete: “N̄kedi eyenọwọn̄, ndien ndi ebiowo n̄ko; n̄kanam n̄kwe nte ẹkpọn̄de eti owo, nte ubon esie ẹnyụn̄ ẹsan̄ade inọk.”—Psalm 37:25.
Mme Akpa Mbet Ẹnịm Uwụtn̄kpọ
7. Mme item ewe ẹban̄ade ukwọrọikọ ke Jesus ọkọnọ mme mbet esie, ndien ntak mmọ emi ẹkedotde?
7 Ke Jesus ama ọkọnọ mme apostle esie ukpep oro odotde, enye ama osio mmọ ọdọn̄ ẹka ke Israel ndikwọrọ eti mbụk nnyụn̄ ntan̄a nte: “Ubọn̄ Heaven ke ekpere.” Nso etop nduaidem ke oro ekedi ntem! Jesus Christ, kpa Edidem Messiah, ama odu ke ufọt mmọ. Sia mme apostle ẹkesịnde idemmọ ke utom Abasi, Jesus ama akpak mmọ ete ẹnyene mbuọtidem nte ke Abasi eyese aban̄a mmọ. Ntre enye ọkọdọhọ ete: “Ẹkûkama baba n̄kpọ kiet ke isan̄; ẹkûkama esan̄, m̀mê ekpat-isan̄, m̀mê uyo, m̀mê okụk; ẹkûnyụn̄ ẹkama ọfọn̄ iba-iba. Ndien ufọk ekededi eke mbufo ẹdidụkde ke esịt, ẹtie do, ẹnyụn̄ ẹto do ẹnyọn̄ọ.” (Matthew 10:5-10; Luke 9:1-6) Jehovah ama ada ekemmọ nditọ Israel, emi ukama isen ekedide ido mmọ, oyụhọ mme udọn̄ mmọ.
8. (a) Ntak emi Jesus ọkọnọde obufa item ukwọrọikọ esisịt ini mbemiso n̄kpa esie? (b) Nso ikosụk inyene ndidi akpa ke uwem mme anditiene Jesus?
8 Ke ukperedem, esisịt ini mbemiso n̄kpa esie, Jesus ama anam mme apostle esie ẹdu ke edidemede nte ke mmọ ẹdinam utom ke mme idaha oro ẹkpụhọrede ke ini iso. Ke ukara ndibiọn̄ọ edinam mmọ, ekeme ndidi mme owo idisọpke ikama mmọ isen ke Israel. N̄ko, ibịghike mmọ ẹyeda etop Obio Ubọn̄ ẹdụk mme idụt Gentile. Idahaemi akana mmọ ẹkama “ekpat-okụk” ye “ekpat-udia.” Nte ededi, akana mmọ ẹbem iso ẹyom Obio Ubọn̄ Jehovah ye edinen ido esie, ẹnyenede mbuọtidem nte ke Abasi ọyọdiọn̄ mme ukeme mmimọ ndinyene udia ye edisịnen̄kpọ oro ẹyomde.—Luke 22:35-37.
9. Didie ke Paul ekenịm Obio Ubọn̄ akpa ke uwem esie ke adan̄aemi ekerede aban̄a mme udọn̄ n̄kpọ obụkidem esie, ndien nso item ke enye ọkọnọ ke n̄kpọ emi?
9 Apostle Paul ekedi eti uwụtn̄kpọ ke ndinam item Jesus oro. Paul ama anam utom ukwọrọikọ edi akpan n̄kpọ ke uwem esie. (Utom 20:24, 25) Ke ini enye akakade ikpehe kiet ndikwọrọ ikọ, enye ama ese aban̄a mme udọn̄ n̄kpọ obụkidem esie, idem anamde utom ufọk ọfọn̄. Enye ikodorike enyịn mbon efen ndise mban̄a enye. (Utom 18:1-4; 1 Thessalonica 2:9) Edi, enye ke inemesịt ama enyịme ntatubọk ye mme enọ ke ini mbon efen ẹkewụtde ima mmọ ke usụn̄ emi. (Utom 16:15, 34; Philippi 4:15-17) Paul ama esịn udọn̄ ọnọ mme Christian ete ẹkûfụmi mme mbiomo ubon mmọ man ẹkwọrọ ikọ, edi utu ke oro ẹnam nsio nsio mbiomo mmọ ẹda ukem ukem. Enye ama ọnọ mmọ item ete ẹnam utom, ẹma mme ubon mmọ, ẹnyụn̄ ẹbuana n̄kpọ ye mbon en̄wen. (Ephesus 4:28; 2 Thessalonica 3:7-12) Enye ama akpak mmọ ete ẹkọn̄ mbuọtidem ke Abasi, idịghe ke inyene obụkidem, ẹnyụn̄ ẹda uwem mmọ ẹnam n̄kpọ ke usụn̄ oro owụtde ke mmọ ẹma ẹnen̄ede ẹfiọk mme n̄kpọ oro ẹdide akpan n̄kpọ ẹkan. Ke n̄kemuyo ye mme ukpepn̄kpọ Jesus, oro ọkọwọrọ ndibem iso nyom Obio Ubọn̄ Abasi ye edinen ido esie.—Philippi 1:9-11.
Nịm Obio Ubọn̄ Akpa ke Uwem Fo
10. Nso ke ndibem iso nyom Obio Ubọn̄ ọwọrọ?
10 Ke nso udomo ke nnyịn ibuana eti mbụk Obio Ubọn̄ ye mbon en̄wen? Ke ubak ubak, oro ọkọn̄ọ ke mme idaha nnyịn ye ke udomo esịtekọm oro nnyịn inyenede. Ti nte ke Jesus ikọdọhọke ite, ‘Ẹyom Obio Ubọn̄ ke ini mbufo mînyeneke n̄kpọ ndomokiet efen ndinam.’ Ke ọfiọkde nte Obio Ubọn̄ edide akpan n̄kpọ, enye ama owụt uduak Ete esie, ọdọhọde ete: “Ẹyom Obio Ubọn̄ Abasi.” (Luke 12:31) Okposụkedi oyomde ata ediwak nnyịn inam utom man ise iban̄a mme udọn̄ idem nnyịn ye eke ubon nnyịn, edieke nnyịn inyenede mbuọtidem, uwem nnyịn oyowụhọ ke utom Obio Ubọn̄ oro Abasi ọnọde nnyịn. Ke ukem ini oro, nnyịn iyese iban̄a mme mbiomo ubon nnyịn.—1 Timothy 5:8.
11. (a) Didie ke Jesus akanam an̄wan̄a nte ke idịghe kpukpru owo ẹdikeme ndinam ukem udomo utom ke ndisuan etop Obio Ubọn̄? (b) Mme n̄kpọ ewe ẹbiere udomo oro owo ekemede ndinam?
11 Ndusụk nnyịn imekeme ndisịn ekese ini ke ndikwọrọ eti mbụk Obio Ubọn̄ ikan mbon efen. Edi ke n̄ke esie aban̄ade nsio nsio orụk isọn̄, Jesus ama owụt nte ke kpukpru mbon oro esịt mmọ ebietde eti isọn̄ ẹyen̄wụm mfri. Ke nso udomo? Mme idaha mme owo ẹkpụhọde. Isua emana, idaha nsọn̄idem, ye mme mbiomo ubon ẹdi ndusụk n̄kpọ ndida mbiere. Edi ke ini ẹwụtde ata esịtekọm, ẹkeme ndinam ekese.—Matthew 13:23.
12. Nso eti utịtmbuba eke spirit ke ẹsịn udọn̄ ẹnọ n̄kpri owo akpan akpan ndikere mban̄a?
12 Ọfọn ndinyene mme utịtmbuba oro ẹdin̄wamde nnyịn ndinyene ebuana efen efen ke utom Obio Ubọn̄. N̄kpri owo ẹkpenyene ndinen̄ede n̄kere mban̄a ata eti uwụtn̄kpọ eke enyene-ifịk uyen Christian oro Timothy. (Philippi 2:19-22) Nso ikeme ndifọn ye mmọ n̄kan edidụk utom ukwọrọikọ uyọhọ ini ke ini mmọ ẹkụrede ufọkn̄wed mmọ? N̄kani owo n̄ko ẹyebọ ufọn ke ndinịm nti utịtmbuba eke spirit.
13. (a) Anie ebiere se nnyịn ikemede ndinam ke utom Obio Ubọn̄? (b) Edieke nnyịn inen̄erede ibem iso iyom Obio Ubọn̄, nso ke nnyịn iwụt?
13 Utu ke ndikụt ndudue nnọ mbon oro nnyịn ikerede ke ẹkpekeme ndinam ekese, nnyịn ikpenyene ndiyak mbuọtidem onụk nnyịn ndinam n̄kpọ mban̄a ọkpọkpọ n̄kọri nnyịn man ikeme ndinam n̄kpọ Abasi ke ọyọhọ udomo oro mme idaha nnyịn ẹyakde. (Rome 14:10-12; Galatia 6:4, 5) Nte ẹwụtde ke se iketịbede inọ Job, Satan afan̄a ete ke akpan udọn̄ nnyịn edi inyene obụkidem, inemesịt idem nnyịn, ye mfọnọn̄kpọ idem nnyịn ye nte ke nnyịn inyene ibụk ibụk uduak ndinam n̄kpọ nnọ Abasi. Edi edieke nnyịn inen̄erede ibem iso iyom Obio Ubọn̄, nnyịn imetiene ibuana ke ndiwụt Devil nte akwa osu nsu oro enye edide. Nnyịn inọ uyarade nte ke se idide akpa ke uwem nnyịn edi utom Abasi. Ke ikọ ye ke edinam, nnyịn ke ntem imowụt uyarade ntotụn̄ọ ima oro nnyịn imade Jehovah, ibetedem akpanikọ oro nnyịn inọde itie edikara esie, ye ima oro nnyịn inyenede inọ ekemmọ owo.—Job 1:9-11; 2:4, 5; Mme N̄ke 27:11.
14. (a) Ntak emi edinam ndutịm nnọ an̄wautom enyenede ufọn? (b) Ke nso udomo ke ediwak Ntiense ẹbuana ke an̄wautom?
14 Ndinam ndutịm ekeme ndin̄wam nnyịn ndinam ekese n̄kan nte nnyịn ikpanamde ke ẹsiode enye ẹfep. Jehovah ke idemesie “enịm ini” ndinam uduak esie. (Exodus 9:5; Mark 1:15) Edieke ekemede, ọfọn ndibuana ke an̄wautom ini kiet m̀mê awakde akan oro ke urua kiet kiet. Ediwak tọsịn Mme Ntiense Jehovah ke mme itie ikie ke ofụri ererimbot ẹmesịn enyịn̄ nte mme asiakusụn̄ unọ un̄wam, ẹbiatde n̄kpọ nte hour iba ke usen kiet ndikwọrọ eti mbụk. Ediwak tọsịn efen efen ke mme itie ikie ẹnam utom nte mme asiakusụn̄ ofụri ini, ẹdade n̄kpọ nte hour iba ye ubak ke usen kiet nditan̄a etop Obio Ubọn̄. Mme akpan asiakusụn̄ ye mme isụn̄utom ẹkam ẹbiat ekese ini ke utom Obio Ubọn̄. Nnyịn n̄ko imekeme ndiyom mme ifet ndibuana idotenyịn Obio Ubọn̄ ke ido nneme ye owo ekededi emi edikpan̄de utọn̄. (John 4:7-15) Udọn̄ nnyịn ekpedi ndinyene ọyọhọ ebuana ke utom oro nte mme idaha nnyịn ẹyakde, koro Jesus ekebemde iso etịn̄ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14; Ephesus 5:15-17.
15. Ke ebuana ye utom ukwọrọikọ nnyịn, ntak emi afo ekerede ke item oro ke 1 Corinth 15:58 edi ekemini?
15 Ke kpukpru ikpehe ke isọn̄, inamke n̄kpọ m̀mê ewe idụt ke mmọ ẹdụn̄, Mme Ntiense Jehovah ẹdiana kiet ẹbuana ke ifetutom emi. Mmọ ẹda item Bible eke odudu spirit emi ẹsịn ke edinam: “Ẹsọn̄ọ ẹda, ẹkûyak n̄kpọ esehede mbufo; ẹyọhọ kpukpru ini ke utom Ọbọn̄; sia ẹmefiọk ẹte utom eke mme imọ inamde idiwọrọke idi ikpîkpu ke Ọbọn̄.”—1 Corinth 15:58.
Nneme Ndụn̄ọde
• Ke ini Jesus ọkọdọhọde ete “ẹbem iso ẹyom Obio Ubọn̄,” nso ke enye okowụt ke ẹkpenịm ke udiana itie?
• Nso ikpedi ekikere nnyịn kaban̄a edise mban̄a mme udọn̄ n̄kpọ obụkidem nnyịn ye eke ubon nnyịn? Nso un̄wam ke Abasi edinọ nnyịn?
• Nso ikpehe utom Obio Ubọn̄ ke nnyịn ikeme ndibuana?
[Ndise ke page 107]
Ke kpukpru idụt, Mme Ntiense Jehovah mfịn ke ẹkwọrọ eti mbụk, mbemiso utịt edide