Nditịm Mme Utịn̄ikọ Edinọde ke Esop
ẸNAM ndutịm Ufọkn̄wed Utom Ukara Abasi man ọnọ ofụri esop ufọn. Ẹnọ n̄ko nti ntọt ke mme mbono esop eken ọkọrọ ye n̄kpri ye ikpọ mbono. Edieke ẹnọde fi n̄kpọ ndinam ke kiet ke otu ndutịm emi, ẹnọ fi akwa ifetutom. Apostle Paul akakpak esenyịn Christian oro Timothy ete etịm ekpeme se enye ekpepde owo. (1 Tim. 4:16) Mbon oro ẹdụkde mme mboho Christian ẹsio ọsọn̄urua ini ẹnịm—ndien ndusụk owo ẹsịn akamba ukeme—man ẹdụk ẹnyụn̄ ẹbọ item ke mme n̄kpọ ẹban̄ade itie ebuana mmọ ye Abasi. Ndinọ utọ item oro enen̄ede edi akwa ifetutom! Didie ke afo ekeme ndise mban̄a enye nte ọfọnde?
Mme Akpan N̄kpọ Ẹtode Edikot Bible
Ikpehe enye emi ke ufọkn̄wed ọkọn̄ọ ke edikot Bible oro ẹnọde ke urua oro. Ekpenyene ndisọn̄ọ ntịn̄ nte enye otụkde nnyịn mfịn. Nte ẹtịn̄de ke Nehemiah 8:8, Ezra ye mme nsan̄a esie ẹma ẹkot Ikọ Abasi an̄wan̄wa, ẹnamde an̄wan̄a, ‘ẹsiakde enye,’ ẹnyụn̄ ẹsịnde ifiọk. Afo ndise mban̄a mme akpan n̄kpọ ẹtode Bible ọnọ fi ifet ndinam oro n̄ko.
Didie ke afo ekpetịm utọ utịn̄ikọ oro? Edieke ekemede, kot itie Bible oro ẹnọde ẹkot urua kiet ke mbemiso m̀mê abakde akan oro. Ekem kere ban̄a esop mbufo ye mme udọn̄ esop. Bọn̄ akam ban̄a enye. Item ewe, mme uwụtn̄kpọ ewe, mme edumbet ewe ẹdude ke ikpehe Ikọ Abasi emi ekem ye mme udọn̄ oro?
Ndụn̄ọde edi akpan n̄kpọ. Nte Watchtower Library ke usan umụm-ntọt kọmputa m̀mê Watch Tower Publications Index? Edieke ẹdude, da mmọ nam n̄kpọ ke eti usụn̄. Ebede ke ndidụn̄ọde se ẹkewetde ẹban̄a mme ufan̄ikọ oro afo emekde ndiwụk ntịn̄enyịn, afo emekeme ndikụt ntọt oro etịmde esịn un̄wana, nte ẹnamde mme ntịn̄nnịm ikọ oro ẹsude ẹn̄wan̄a, ndụn̄ọde ke se ndusụk itie N̄wed Abasi ẹyararede ẹban̄a Jehovah, m̀mê mme nneme ẹban̄ade mme edumbet. Kûdomo ndineme ata ediwak akpan n̄kpọ. Wụk ntịn̄enyịn sụk ke ibat ibat ufan̄ikọ oro ẹsatde-sat. Ọfọn ndineme ibat ibat ufan̄ikọ nnyụn̄ nnam enye ọfọn.
Utịn̄ikọ fo ekeme n̄ko ndiyom ọdọhọ otuowo etịn̄ nte mmọ ẹbọde ufọn ẹto edikot Bible eke urua oro. Nso ke mmọ ẹkekụt oro edinọde mmọ ufọn ke ọkpọkpọ ukpepn̄kpọ ye eke ubon m̀mê ke utom ukwọrọikọ m̀mê usụn̄ uwem mmọ? Mme edu Jehovah ewe ke ẹkewụt ke edinam esie ye mme owo ye mme idụt? Nso ke otuowo ẹkekpep oro ọsọn̄ọde mbuọtidem mmọ onyụn̄ anamde esịtekọm oro mmọ ẹnyenede ẹnọ Jehovah ọkọri? Kûyịre mme ntọt oro ẹwakde n̄kûkọhọ. Sọn̄ọ tịn̄ se mme akpan n̄kpọ oro emekde ẹwọrọde ye ufọn oro mmọ ẹnyenede.
Utịn̄ikọ Item
Emi ọkọn̄ọ ke n̄kpọ ẹkemịn̄de, utọ nte ibuotikọ ke Enyọn̄-Ukpeme m̀mê Awake!, mîdịghe ekeme ndito ikpehe kiet ke n̄wed. Ke ata ediwak idaha ẹsinyene ntọt awak akan se ẹkemede ndikụre ke ini oro ẹnọde. Didie ke afo ọkpọnọ utịn̄ikọ emi? Nte ọnọ ukpep, ukpọnọhọ enye n̄kukụre nte owo emi etịn̄de se ẹnọde ẹnam. Ana esenyịn “[odot, NW] ndikpep owo n̄kpọ.”—1 Tim. 3:2.
Tọn̄ọ ntịmidem fo ebe ke ndidụn̄ọde se ẹnọde ẹnam. Se mme itie N̄wed Abasi. Tie kere. Domo ndinam oro anyan ini mbemiso usen utịn̄ikọ fo. Ti nte ke ẹma ẹsịn udọn̄ ẹnọ nditọete ndibem iso n̄kot n̄wed emi utịn̄ikọ oro ọkọn̄ọde. Utịn̄ikọ fo idịghe sụk ndidụn̄ọde enye m̀mê nditịn̄ enye ibio ibio, edi ndiwụt nte ẹkemede ndida enye nsịn ke edinam. Da mme ikpehe oro ẹdotde ke n̄wed oro nam n̄kpọ ke usụn̄ oro edinen̄erede enyene ufọn ọnọ esop.
Kpa nte eyen kiet kiet enyenede san̄asan̄a edu esie, esop kiet kiet enyene n̄wọrọnda edu esie. Ete m̀mê eka oro ọnọde ukpep uforo uforo itịn̄ke sụk mme item ido uwem inọ eyen esie. Enye ọkọk ibuot ye eyen oro. Ekere aban̄a edu eyen oro ye mme mfịna emi eyen oro enyenede. Ke ukem usụn̄ oro, mme ọnọ ukpep ke esop ẹdomo ndidiọn̄ọ nnyụn̄ nnam n̄kpọ mban̄a mme udọn̄ otuowo oro mmọ ẹtịn̄de ikọ ẹnọ. Nte ededi, ọnọ ukpep oro enyenede mbufiọk eyefep ndida mme uwụtn̄kpọ oro ẹkemede ndisuene owo ekededi ke otuowo nnam n̄kpọ. Enye oyosio mme ufọn oro ẹma ẹkenyenyene nte utịp edisan̄a ke usụn̄ Jehovah owụt oyonyụn̄ ọsọn̄ọ etịn̄ item N̄wed Abasi oro edin̄wamde esop ndise mban̄a mme mfịna oro mmọ ẹsobode uforo uforo.
Eti ukpepn̄kpọ esisịm esịt mbon oro ẹdude ke otuowo. Emi iyomke ẹtịn̄ sụk se idide akpanikọ, edi n̄ko ndikọri esịtekọm nnọ se mmọ emi ẹdade ẹban̄a. Enye oyom ẹnyene ata udọn̄ ke idem mbon oro ẹbọde item. Mme ekpemerọn̄ eke spirit ẹkpenyene ndidiọn̄ọ otuerọn̄. Edieke mmọ ke ima ẹkerede ẹban̄a mme mfịna oro nsio nsio owo ẹsobode, mmọ ẹyekeme nditịn̄ ikọ ke usụn̄ oro ọnọde nsịnudọn̄, owụtde mbufiọk, mbọm, ye edinịm idem ke itie owo en̄wen.
Nte mme andikpep oro ẹnyenede uforo ẹfiọkde, ana utịn̄ikọ enyene in̄wan̄-in̄wan̄ uduak. Ekpenyene ndinọ utịn̄ikọ ke utọ usụn̄ oro edinamde mme akpan n̄kpọ ẹwọrọ ẹda ẹnyụn̄ ẹti mmọ. Otuowo ekpenyene ndikeme nditi nti ekikere oro ẹditụkde uwem mmọ.
Esoputom
Ke ini afo ọnọde utịn̄ikọ oro ọkọn̄ọde ke ibuotikọ emi odude ke Utom Obio Ubọn̄ Nnyịn, n̄kpọ-ata odude ekeme ndidi isio isio. Mi afo oyokụt ete ke esiwak ndiyom afo emen ofụri se idude ọnọ otuowo, idịghe ndisasat n̄kpọ oro etịmde odot. N̄wam otuowo ndikọk ibuot ke mme itie N̄wed Abasi oro item ekededi oro ẹnọde otode. (Titus 1:9) Ini iniọn̄ke, ke ata ediwak idaha ini isidụhe ndidian n̄kpọ efen efen.
Ke n̄kan̄ eken, ẹkeme ndidọhọ fi ọnọ utịn̄ikọ oro ibuotikọ mîdụhe ke Utom Obio Ubọn̄ Nnyịn. Ẹkeme ndidọhọ ẹse ibuotikọ ke Enyọn̄-Ukpeme, mîdịghe utịn̄ikọ oro ekeme ndisịne mbio mbio akpan n̄kpọ. Edi utom fo nte ọnọ ukpep ndikere mban̄a mme udọn̄ esop ke ebuana ye utịn̄ikọ oro ẹdọhọde ọnọ. Eyedi oyoyom afo ada ibio ibio uwụtn̄kpọ, oro osiode akpan n̄kpọ owụt m̀mê ndibụk ifiọkutom oro odotde. Ti ete ke utịn̄ikọ fo idịghe sụk nditịn̄ ikọ ke ibuot nneme oro, edi ndinam enye ke utọ usụn̄ oro an̄wamde esop ndikụre utom oro Ikọ Abasi owụtde nnyụn̄ nnyene idatesịt ke ndinam ntre.—Utom 20:20, 21.
Nte afo etịmde utịn̄ikọ fo, kere ban̄a idaha mbon oro ẹdude ke esop. Toro mmọ ke se mmọ ẹnamde. Didie ke mmọ ndinam mme ekikere oro ẹnọde ke ibuotikọ oro ekeme ndinam uforo ye idatesịt mmọ ke utom ukwọrọikọ ọkọri?
Nte utịn̄ikọ fo oyom nnamn̄wụt m̀mê obụp owo mme mbụme? Edieke edide ntre, ekpenyene ndibabak ntịm enye. Owo akam ekeme ndidọhọ yak owo efen etịm enye, edi oro isiwakke ndinyene nti utịp. Edieke ekemede, nam ndomonse ke nnamn̄wụt m̀mê mme mbụme oro mbemiso usen mbono esop oro. Kụt ete emese aban̄a ikpehe enye emi ke utịn̄ikọ fo ke usụn̄ oro enen̄erede etịp n̄kpọ esịn ke item oro ẹnọde.
N̄kpri ye Ikpọ Mbono
Ẹkeme ndidọhọ nditọete oro ẹkọride nti edu eke spirit ẹnyụn̄ ẹkabarede ẹdi mme etịn̄ikọ an̄wa ye mme andikpep oro ẹnyenede uforo ẹbuana ke ndutịm ke ekpri m̀mê akamba mbono. Mmọ emi ẹnen̄ede ẹdi akpan ikpehe ke ukpepn̄kpọ ukara Abasi. Utọ utịn̄ikọ oro ekeme ndidi ke uduot utịn̄ikọ oro ẹkotde-kot, eke n̄wed utịn̄ikọ, item ke drama Bible oro enyenede ebuana ye eyomfịn, m̀mê ikpehe ekikere oro esịnede mme item. Edieke afo enyenede ifet ndinam n̄kpọ ke utọ ndutịm oro, tịn̄ enyịn kpep n̄wed utịn̄ikọ oro ẹnọde fi. Kpep enye tutu afo etịm ọfiọk ufọn esie.
Mbon oro ẹnọde utịn̄ikọ oro ẹkotde-kot ẹkpenyene ndikot kpukpru ikọ ke n̄wed utịn̄ikọ. Mmọ isikpụhọkede ikọ m̀mê ndifiak ntịm n̄wed utịn̄ikọ oro. Mmọ ẹsikpep enye man ẹfiọk in̄wan̄-in̄wan̄ se idide mme akpan n̄kpọ ye nte ẹtatde mmọ. Mmọ ẹsikpep ndikot n̄wed uyo ọwọrọ tutu mmọ nte odotde ẹkeme ndinọ utịn̄ikọ oro ẹsọn̄ọde ẹtịn̄ ikike ikọ, ẹnyenede ufiopesịt, ẹsịnde ufiop, ẹwụtde ntụk, ẹtịn̄de ikọ ẹto esịt, ẹnyụn̄ ẹtịn̄de ikọ ye uko, ọkọrọ ye uyo oro ọsọn̄de ekem ye akamba otuowo.
Edi mbiomo nditọete oro ẹnọde utịn̄ikọ emi ọkọn̄ọde ke n̄wed utịn̄ikọ nditat se ẹnọde mmọ ẹnam ke usụn̄ oro asan̄ade ekekem ye n̄wed utịn̄ikọ oro. Utu ke ndikokot enye nto n̄wed utịn̄ikọ ke ini ọnọde utịn̄ikọ oro m̀mê nditịm enye nte n̄wed utịn̄ikọ oro ẹkotde-kot, etịn̄ikọ ekpenyene ndinọ utịn̄ikọ oro nto esịt, nte utịn̄ikọ oro owo mîkotke-kot ke n̄wed. Edi akpan n̄kpọ ndikpeme mme ini oro ẹnọde ke n̄wed utịn̄ikọ man etịn̄ akpan n̄kpọ kiet kiet oro esịnede an̄wan̄a. Etịn̄ikọ ekpenyene ndida mme ekikere ye mme itie N̄wed Abasi oro ẹwetde ke idak mme akpan n̄kpọ oro nnam n̄kpọ ke eti usụn̄. Enye ikpenyeneke ndisio se idude ke n̄wed utịn̄ikọ mfep man ada mme ọkpọkpọ n̄kpọ efen efen oro enye amade edisịn. Ke akpanikọ, itiat idakisọn̄ item emi edi Ikọ Abasi. Mbiomo mbiowo Christian edi ‘ndikwọrọ ikọ Abasi.’ (2 Tim. 4:1, 2) Ntre etịn̄ikọ ekpenyene ndinọ akpan ntịn̄enyịn ke mme itie N̄wed Abasi oro ẹdude ke n̄wed utịn̄ikọ—adade mmọ ọkọk ibuot onyụn̄ owụtde ebuana oro mmọ ẹnyenede.
Kûsịk Unịm
Nte afo anam utom ke esop oro ediwak ifet ndinọ utịn̄ikọ ẹdude? Didie ke afo ekeme ndinọ kpukpru mmọ ntịn̄enyịn oro odotde? Fep nditịm utịn̄ikọ fo ke idiọk ini.
Mme utịn̄ikọ oro ẹnen̄erede ẹnyene ufọn ẹnọ esop ẹyom ẹbem iso ẹtie ẹkere nte odotde. Ke ntre, nam edi ido fo ndikot n̄wed utịn̄ikọ ke ndondo oro ọbọde utịn̄ikọ kiet kiet. Emi ayan̄wam fi ndikere mban̄a enye nte afo anamde mme edinam eken. Ke mme usen m̀mê mme urua oro ẹdibede mbemiso ọnọde utịn̄ikọ fo, afo emekeme ndikop mme ikọ oro ẹdin̄wamde fi ndikụt mfọnn̄kan usụn̄ ndibuan ntọt oro. Mme idaha ẹkeme ndidemede oro ẹwụtde nte ntọt oro edide ekemini. Ndikot nnyụn̄ n̄kere mban̄a utịn̄ikọ fo ke ndondo oro ọbọde enye esida ini, edi emi edi ini oro adade anam n̄kpọ ke eti usụn̄. Ke ini afo osụhọrede etie ke akpatre nditịm utịn̄ikọ fo, afo ọyọbọ mme ufọn oto edibem iso n̄kere mban̄a enye. Ndise mban̄a mme utịn̄ikọ ke usụn̄ emi oyosụhọde mfịghe akamba akamba oyonyụn̄ an̄wam fi ndinọ utịn̄ikọ ke usụn̄ oro enyenede ufọn onyụn̄ esịmde esịt mbon oro ẹdude ke esop.
Adan̄a nte afo owụtde esịtekọm aban̄a enọ fo ke ndutịm Jehovah ndinọ ikọt esie ukpep, afo oyokpono enye oyonyụn̄ edi edidiọn̄ ọnọ mbon oro ẹmade enye.—Isa. 54:13; Rome 12:6-8.