Ikpehe 10
Utịbe Utịbe Obufa Ererimbot Oro Abasi Anamde
1, 2. Nso iditịbe ke ekọn̄ Armageddon oro anamde n̄kpọ asana okụrede?
KE EKỌN̄ Armageddon Abasi oro anamde n̄kpọ asana okụrede, nso ndien? Adan̄aoro ubọn̄ ubọn̄ obufa eyo eyetọn̄ọ. Ẹyeda mme andibọhọ Armageddon, sia ẹma ẹkewowụt edinam akpanikọ mmọ ẹnọ ukara Abasi, ẹsịn ke obufa ererimbot. Nso inem inem obufa ini ke mbụk ke oro edidi ntem nte mme utịbe utịbe edidiọn̄ ẹtode Abasi ẹsụhọde ẹsịm ekpụk ubonowo!
2 Ke idak ndausụn̄ Obio Ubọn̄ Abasi, mme andibọhọ ẹyetọn̄ọ ndidiọn̄ paradise. Mmọ ẹdiyak ukeme mmọ ẹsịn ke mme ubọkutom unana ibụk oro ẹdidade ufọn ẹsọk kpukpru owo ẹmi ẹdude uwem adan̄aoro. Ẹyetọn̄ọ ndinam isọn̄ akabade edi ediye, emem emem, ebietidụn̄ emi ọnọde ubonowo uyụhọ.
Edinen Ido Ada Itie Ukwan̄ido
3. Nso usọp usọp ubọhọ ke ẹdinyene ke ndondo oro Armageddon okụrede?
3 Ẹdinam kpukpru ẹmi ebe ke ndisobo ererimbot Satan mfep. Mme ubahade ubahade nsunsu ido ukpono, ndutịm n̄kaowo, m̀mê ukara ididụhe aba. Abian̄a abian̄a ekikere Satan ididụhe aba ndibian̄a mme owo; kpukpru mme asan̄autom oro ẹsion̄ode enye ẹdi ẹyebe ẹfep ye editịm n̄kpọ Satan. Kam kere: ẹmen ofụri ofụm n̄kpa ererimbot Satan ẹfep! Nso ubọhọ ke oro edidi ntem!
4. Nam ukpụhọde oro edidade itie ke ukpepn̄kpọ an̄wan̄a.
4 Adan̄aoro ukpepn̄kpọ oro ọbọpde-bọp emi otode Abasi eyeda itie mme ekikere nsobo eke ukara owo. “Jehovah eyenyụn̄ eteme kpukpru nditọ fo.” (Isaiah 54:13) Ye eti item emi ke ediwak isua, “ifiọk Jehovah eyeyọhọ ke ererimbot, kpa nte mmọn̄ ofụkde inyan̄.” (Isaiah 11:9) Mme owo idikpepke se idiọkde aba, edi “mme andidụn̄ ererimbot [ẹdikpep] se inende.” (Isaiah 26:9) Mme ekikere ye edinam ẹmi ẹbọpde-bọp ẹdidi uwem ofụri usen.—Utom 17:31; Philippi 4:8.
5. Nso iditịbe inọ kpukpru ukwan̄ido ye mme idiọkowo?
5 Ntem, uwotowo, afai, idan̄ n̄kanubọk, n̄wo, m̀mê ubiatibet efen ekededi ididụhe aba. Baba owo kiet idibọhọ ufen ke ntak ndiọi edinam mbon efen. Mme N̄ke 10:30 ọdọhọ ete: “Nti owo idisehekede ke nsinsi: edi mme idiọkowo ididụn̄ke isọn̄.”
Ẹfiak Ẹwụk Mfọnmma Nsọn̄idem
6, 7. (a) Ewe ọkpọsọn̄ ata idem n̄kpọ ke ukara Obio Ubọn̄ edida osịm utịt? (b) Didie ke Jesus akanam emi owụt ke adan̄aemi okodude ke isọn̄?
6 Ke obufa ererimbot, ẹyemen kpukpru idiọk odudu akpa nsọn̄ibuot oro ẹfep. Ke uwụtn̄kpọ, ukara Obio Ubọn̄ eyesio udọn̄ọ ye usọn̄ efep. Mfịn, idem ekpedi afo emenyene ndusụk udomo eti nsọn̄idem, ọkpọsọn̄ ata idem n̄kpọ edi ke nte afo ọkọride ọsọn̄, enyịn fo okịm, edet fo abiara, ukeme ukop n̄kpọ fo odobi, ikpaidem fo on̄wụne, mme ndido esịtidem fo ẹbiara, tutu ke akpatre afo akpa.
7 Nte ededi, mme mfụhọ mfụhọ utịp oro nnyịn ikadade imana ito akpa ete ye eka nnyịn ibịghike ẹdidi n̄kpọ eset. Nte afo emeti se Jesus akanamde owụt kaban̄a nsọn̄idem ke adan̄aemi enye okodude ke isọn̄? Bible obụk ete: “Ata ediwak otuowo ẹtiene Enye, eke ẹdade mbụn̄ọ, ye nnan, ye imụm, ye mmọemi ẹdade unan, ye ediwak owo efen, ẹdinịm Enye ke ukot; ndien Enye anam udọn̄ọ okụre mmọ; esịn idem akpa otuowo, ke adan̄aemi mmọ ẹkụtde nte imụm ẹtịn̄de ikọ, nte mmọemi ẹdade unan ẹnyụn̄ ẹkabarede ẹdi ofụri, mbụn̄ọ ẹnyụn̄ ẹsan̄ade, nnan ẹnyụn̄ ẹkụtde usụn̄.”—Matthew 15:30, 31.
8, 9. Nam inemesịt oro edidide ke obufa ererimbot ke ini ẹdifiakde ẹwụk mfọnmma nsọn̄idem an̄wan̄a.
8 Nso akwa inemesịt edidi ntem ke obufa ererimbot nte ẹmende kpukpru udọn̄ọ nnyịn ẹfep! Ndutụhọ oro otode unana nsọn̄idem ididehede itụhọde nnyịn aba. “Andidụn̄ ididọhọke ite, Ndọdọn̄ọ.” “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop, edeme imụm eyenyụn̄ ọkwọ.”—Isaiah 33:24; 35:5, 6.
9 Nte enye ididịghe n̄kpọ inemesịt ndidemede ke usenubọk kiet kiet nnyụn̄ mfiọk nte ke imọ idahaemi imenyene okopodudu nsọn̄idem? Nte enye ididịghe n̄kpọ inemesịt inọ mbonusọn̄ ndifiọk nte ke ẹma ẹfiak ẹnọ mmimọ ọyọhọ odudu uyen ndien ke iyenyene mfọnmma oro Adam ye Eve ke akpa ẹkenyenede? Un̄wọn̄ọ Bible edi: “Obụkidem esie akabade nsek akan eke eyenọwọn̄: enye eyefiak ke mme usen uyen esie.” (Job 33:25) Nso n̄kpọ idatesịt ke edidi ntem nditop mme akrasi enyịn, mme n̄kpọ un̄wam ukop ikọ, mme eto isan̄, mme n̄kpọitie mbon n̄kpọnnam, ye ibọk oro, nduọn̄ọ! Owo idiyomke ufọkibọk, mme dọkta, ye mme dọkta edet aba tutu amama.
10. Nso iditịbe inọ n̄kpa?
10 Mme owo oro ẹnyenede utọ okopodudu nsọn̄idem oro idiyomke ndikpa. Ndien mmọ idinyeneke ndikpa, koro ubonowo ididụhe aba ke idak unana mfọnmma ye n̄kpa oro ẹkedade ẹmana. Christ “enyene ndida ubọn̄ tutu Enye onụk kpukpru mme asua Esie ke idak ikpat. Akpatre usua emi Enye edisobode edi n̄kpa.” “Enọ Abasi edi nsinsi uwem.”—1 Corinth 15:25, 26; Rome 6:23; se n̄ko Isaiah 25:8.
11. Didie ke Ediyarade etịn̄ ibio ibio aban̄a mme ufọn obufa ererimbot?
11 Ke etịn̄de ibio ibio aban̄a mme edidiọn̄ oro ẹditode Abasi oro ekerede aban̄a ẹsụhọde ẹsịm ekpụk ubonowo ke Paradise, akpatre n̄wed Bible ọdọhọ ete: “[Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:3, 4.
Mme Akpan̄kpa Ẹfiak Ẹdi
12. Didie ke Jesus akananam odudu edinam owo eset ke n̄kpa oro Abasi ọnọde enye owụt?
12 Jesus ama anam se ikande edikọk mbon udọn̄ọ nnyụn̄ nnam mbụn̄ọ ẹsan̄a. Enye n̄ko ama afiak osion̄o mme owo ke udi edi. Enye ke ntem ama ananam owụt utịbe utịbe odudu edinam owo eset ke n̄kpa oro Abasi ọkọnọde enye. Nte afo emeti ini emi Jesus akakade ufọk eren kiet emi eyenan̄wan esie akakpade? Jesus ọkọdọhọ eyenan̄wan oro akakpade do ete: “Eyenan̄wan, ndọhọ fi nte, daha ke enyọn̄.” Ye nso utịp? “Idahaoro eyenan̄wan adaha ke enyọn̄, onyụn̄ asan̄a.” Ke ẹkụtde oro, “akamba n̄kpaidem” ama omụm mme owo oro. Mmọ ikekemeke ndimụm inemesịt mmọ n̄kama!—Mark 5:41, 42; se n̄ko Luke 7:11-16; John 11:1-45.
13. Mme orụk owo ewe ke ẹdinam ẹset ke n̄kpa?
13 Ke obufa ererimbot, “nti owo ye mme idiọk owo ẹyeset ke n̄kpa.” (Utom 24:15) Ke ini oro Jesus eyeda odudu oro Abasi ọnọde enye anam mme akpan̄kpa ẹset koro, nte enye ọkọdọhọde, “Ami ndi ediset ye uwem: owo eke ọbuọtde idem ye Ami, okposụkedi nte enye ama akpa, enye eyedu uwem.” (John 11:25) Enye ọkọdọhọ n̄ko ete: “Kpukpru mme andidu ke udi [ke ibuot uti n̄kpọ Abasi] [ẹyekop] Enye [Jesus] uyo ẹwọn̄ọ ẹdi.”—John 5:28, 29.
14. Sia n̄kpa mîdidụhe aba, mme n̄kpọ ewe ẹdibe ẹfep?
14 Idatesịt eyekpon ke ofụri isọn̄ ke ini ediwak otu mme akpan̄kpa ẹdifiakde ẹdidu uwem man ẹdiana ye mbonima mmọ! Mme ikpehe ntọt n̄kpa ididụhe aba ke n̄wedmbụk n̄kpọntịbe ndida mfụhọ nsọk mme andibọhọ. Utu ke oro, se ikam idide ata isio n̄kpọ edida itie: kpa mme ntọt ẹban̄ade mbufa mbon oro ẹsetde ndida idatesịt nsọk mbon oro ẹkemade mmọ. Ntre mme edinam ubụkokpo, mme ifia ufọpokpo, mme itie ufọpokpo, m̀mê mme itie ubụkokpo ididụhe aba!
Ata Emem Emem Ererimbot
15. Didie ke prọfesi Micah edisu ke ọyọhọ ọyọhọ usụn̄ifiọk?
15 Ẹyenyene ata emem ke kpukpru ikpehe uwem. Mme ekọn̄, mme anditoro ekọn̄, ye edibot n̄kpọekọn̄ ẹdidi n̄kpọ eset. Ntak-a? Koro mme ubahade ubahade udọn̄ idụt, ekpụk, ye orụk ẹyebe ẹfep. Adan̄aoro, ke ata ọyọhọ ọyọhọ usụn̄ifiọk, “idụt idimenke ofụt itiene idụt, idinyụn̄ ikpepke aba ekọn̄.”—Micah 4:3.
16. Didie ke Abasi edikụt ete ke ekọn̄ idụhe aba?
16 Emi ekeme nditie nte n̄kpọ n̄kpaidem ke ẹkerede ẹban̄a mbụk uduọkiyịp owo ke ekọn̄ ofụri ini. Edi oro otịbe koro ubonowo odude ke idak ukara owo ye eke demon. Ke obufa ererimbot, ke idak ukara Obio Ubọn̄, emi edi se iditịbede: “Mbufo ẹdi ẹdise se Jehovah anamde . . . Enye anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat: eyenyụn̄ ọfọp mme chariot [ekọn̄] ke ikan̄.”—Psalm 46:8, 9.
17, 18. Ke obufa ererimbot, nso utọ itie ebuana edidu ke ufọt owo ye mme unam?
17 Owo ye unam ẹyedu ke emem n̄ko, nte mmọ ẹkedude ke Eden. (Genesis 1:28; 2:19) Abasi ọdọhọ ete: “Ke usen oro ke ndidiomi ediomi ye unamikọt, ye inuen enyọn̄, ye ọnyọni isọn̄, nnọ mmọ; nyenyụn̄ . . . nyak mmọ ẹna ke isọn̄ ke ifụre.”—Hosea 2:18.
18 Emem oro editara adan̄a didie? “Wolf eyedụn̄ ye eyenerọn̄, nawụriekpe eyenyụn̄ osụhọde ana ye eyenebot: eyenenan̄, ye abak lion, ye enan̄ ubom, ẹyenyụn̄ ẹna ọtọkiet: ekpri eyenọwọn̄ eyenyụn̄ akama mmọ.” Mme unam ididehede idi n̄kpọndịk inọ owo m̀mê idemmọ aba. Idem “lion eyenyụn̄ ata nnyanyan̄a nte enan̄”!—Isaiah 11:6-9; 65:25.
Ẹnam Isọn̄ Akabade Paradise
19. Ẹdinam isọn̄ akabade edi nso?
19 Ẹyenam ofụri isọn̄ akabade paradise ebietidụn̄ ọnọ ubonowo. Oro edi ntak Jesus ekekemede ndin̄wọn̄ọ nnọ eren oro okonịmde enye ke akpanikọ ete: “Afo eyedu ye Ami ke Paradise.” Bible ọdọhọ ete: “Wilderness ye nsatisọn̄ ẹyedara; desert eyenyụn̄ ebre, onyụn̄ asiaha ikọn̄ nte rose. . . . Koro mmọn̄ asiahade ke wilderness, idịm n̄ko ke desert.”—Luke 23:43; Isaiah 35:1, 6.
20. Ntak emi biọn̄ mîdidehede inọmọ ubonowo aba-a?
20 Ke idak Obio Ubọn̄ Abasi, biọn̄ ididehede aba inọmọ ediwak miliọn owo. “Uwak ibokpot ẹyedu ke isọn̄ ke nsom ikpọ obot.” “Eto ikọt eyenọ mfri esie, isọn̄ eyenyụn̄ on̄wụm n̄kpọ esie, ndien mmọ ẹyedu ke isọn̄ mmọ ke ifụre.”—Psalm 72:16; Ezekiel 34:27.
21. Nso iditịbe inọ unana ufọkidụn̄, mme ndedehe ebiet, ye idiọk n̄kann̄kụk?
21 Unana, mme owo oro mînyeneke ufọkidụn̄, mme ndedehe ebiet, m̀mê n̄kann̄kụk oro ubiatibet akande ubọk ididụhe aba. “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄ vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia.” “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.”—Isaiah 65:21, 22; Micah 4:4.
22. Didie ke Bible anam mme edidiọn̄ ukara Abasi an̄wan̄a?
22 Ẹyediọn̄ mme owo ye kpukpru n̄kpọ ẹmi, ye ediwak efen, ke Paradise. Psalm 145:16 ọdọhọ ete: “Afo [Abasi] atat ubọk fo, onyụn̄ ọnọ kpukpru mme andidu uwem se mmọ ẹmade, ẹyụhọ.” Eyịghe idụhe prọfesi Bible ọdọhọde ete: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt. . . . Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:11, 29.
Ẹmen Ini Edem Ẹfep
23. Didie ke Obio Ubọn̄ Abasi edimen kpukpru ndutụhọ oro nnyịn isobode efep?
23 Ukara Obio Ubọn̄ Abasi eyemen kpukpru unan oro ẹnọde ekpụk ubonowo ke isua tosịn itiokiet ẹmi ẹkebede efep. Idatesịt ẹmi ẹdidude ke ini oro eyetịm okpon akan ndutụhọ ekededi oro mme owo ẹkesobode. Ndiọi ifiọk n̄kpọntịbe eke ndutụhọ emi ekebemde iso iditịmekede uwem. Mme ekikere ye mme edinam ẹmi ẹbọpde-bọp ẹmi ẹdidide uwem ofụri usen mme owo ẹyesọhi mme ubiak ubiak ifiọk n̄kpọntịbe ẹfep sụn̄sụn̄.
24, 25. (a) Nso ke Isaiah ekebemiso etịn̄ aban̄a nte editịbede? (b) Ntak emi nnyịn ikemede ndinịm ke akpanikọ nte ke mme ndutụhọ ini edem ẹyesop ke ibuot uti n̄kpọ?
24 Abasi emi ekerede aban̄a ọdọhọ ete: “Mmọn̄ mbot mbufa enyọn̄ [obufa ukara eke heaven ndikara ubonowo] ye obufa isọn̄ [edinen n̄kaowo], ndien owo iditịghi aba akpa oro, idinyụn̄ idụkke owo ke esịt. Edi mbufo ẹdat esịt, ẹnyụn̄ ẹbre nsinsi ke se ami mbotde.” “Ofụri ekondo ke ana sụn̄, ọduọk odudu; mmọ ẹsio n̄kpo idara.”—Isaiah 14:7; 65:17, 18.
25 Ntre ebede ke Obio Ubọn̄ esie, Abasi eyekpụhọde idiọk idaha oro ekebịghide ke adan̄a anyanini ntre. Enye eyewụt akwa edikere oro enye ekerede aban̄a nnyịn ke nsinsi nsinsi ke ndin̄wan̄a mme edidiọn̄ oro ẹditịmde ẹkponi ẹkan unan ekededi oro nnyịn ikọbọde ke ini edem nnyịn. Mme mfịna oro nnyịn ikosobode ke mbemiso eyesop ke ibuot uti n̄kpọ adan̄aoro, edieke edide nnyịn iyekam iteti mmọ.
26. Ntak emi Abasi edinọde nnyịn usiene ke ndutụhọ ini edem ekededi?
26 Oro edi usụn̄ nte Abasi edinọde nnyịn usiene ke ndutụhọ oro ekemede ndidi nnyịn ima isobo ke ererimbot emi. Enye ọmọfiọk ete ke ikedịghe ndudue nnyịn akanam nnyịn imana ye unana mfọnmma, koro nnyịn ikadade-da unana mfọnmma imana ito akpa ete ye eka nnyịn. Ikedịghe ndudue nnyịn akanam nnyịn imana idụk ererimbot Satan, koro edieke Adam ye Eve ẹkpekenamde akpanikọ, utu ke oro ẹkpekeman nnyịn ẹsịn ke paradise. Ntre ye akwa mbọm Abasi eyenọ usiene oro otịmde okpon akan idiọk ini edem oro ọkọnọmọde nnyịn.
27. Mme prọfesi ewe ẹdinyene utịbe utịbe edisu ke obufa ererimbot?
27 Ke obufa ererimbot, ubonowo eyenyene ifụre oro ẹkebemde iso ẹtịn̄ ẹban̄a ke N̄wed Mbon Rome 8:21, 22 ẹte: “Ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi. Koro nnyịn imọfiọk ite ofụri ekondo ke omụm mmụm, onyụn̄ odu ke ubiak uman tutu osịm emi.” Adan̄aoro mme owo ẹyekụt ọyọhọ ọyọhọ edisu eke akam emi: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Mme utịbe utịbe idaha ẹmi ẹdidude ke Paradise isọn̄ ẹyewụt mme idaha ẹmi ẹdude ke heaven.
[Ndise ke page 23]
Ke obufa ererimbot, mbonusọn̄ ẹyefiak ẹnyene nsọn̄idem ini uyen
[Ndise ke page 24]
Ẹyesio kpukpru udọn̄ọ ye unana ukeme ẹfep ke obufa ererimbot
[Ndise ke page 25]
Ke obufa ererimbot, ẹyenam mme akpan̄kpa ẹset ẹdụk uwem
[Ndise ke page 26]
‘Mmọ idikpepke aba ekọn̄’
[Ndise ke page 27]
Owo ye mme unam ẹyedu ke ọyọhọ ọyọhọ emem ke Paradise
[Ndise ke page 27]
‘Abasi eyetat ubọk esie onyụn̄ ọnọ kpukpru mme oduuwem n̄kpọ se mmọ ẹmade, ẹyụhọ’
[Ndise ke page 28]
Obio Ubọn̄ Abasi eyenọ se itịmde ikpon ikan kpukpru ndutụhọ oro nnyịn isobode