Ikpehe 4

Abasi Asian Nnyịn Mme Uduak Esie

1, 2. Nnyịn isan̄a didie ifiọk ke Abasi ọnọ mbon oro ẹbụpde mbụme ke esịt akpanikọ ibọrọ?

IMA ima Abasi ke akpanikọ amayarade mme uduak esie ọnọ mme owo oro ẹnyenede esịt akpanikọ oro ẹyomde enye. Enye ọmọnọ mme owo oro ẹbụpde mbụme ibọrọ ke mme utọ mbụme nte ntak emi enye ayakde ndutụhọ odu.

² Bible ọdọhọ ete: “Afo ama oyom [Abasi], eyekụt enye.” “Abasi emi ayararede ndịben̄kpọ odu ke enyọn̄.” “Ọbọn̄ Jehovah [idinamke] baba n̄kpọ kiet, ke mîbọhọke ini enye ayarade uduak esie ọnọ ikọt esie mme prọfet.”​—⁠1 Chronicles 28:⁠9; Daniel 2:⁠28; Amos 3:⁠7.

Ibọrọ Ẹdu ke M̀mọ̀n̄?

3. M̀mọ̀n̄ ke nnyịn ikeme ndikụt ntak emi Abasi ayakde ndutụhọ odu?

³ Ẹkụt ibọrọ mme utọ mbụme nte ntak emi Abasi ayakde ndutụhọ odu ye se enye edinamde aban̄a emi ke n̄wetnnịm n̄kpọ oro enye ọkọnọde odudu ẹwet ke ufọn nnyịn. N̄wetnnịm n̄kpọ oro edi Ikọ esie, kpa Edisana Bible. “Kpukpru n̄wed, eke ẹdade odudu spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.”​—⁠2 Timothy 3:​16, 17.

4, 5. Nso inam Bible edi n̄wed oro ananade mbiet?

⁴ Bible ke akpanikọ edi n̄wed oro ananade mbiet. Enye ọdọn̄ọ n̄wetnnịm n̄kpọ oro ẹdide ata nnennen aban̄a mbụk owo onyụn̄ akam aka edem edem ebe ini emi ẹkebotde owo. Enye n̄ko ekem ye idahaemi, koro mme prọfesi esie ẹnyene n̄kpọ ndinam ye mme n̄kpọntịbe eyo nnyịn ye eke n̄kpet n̄kpet ini iso n̄ko.

⁵ Idụhe n̄wed efen oro enyenede mme utọ itoro ntre ke ntak mbụk akpanikọ. Ke uwụtn̄kpọ, sụk ikpan̄wed ifan̄ eke mme n̄wọrọnda ewetn̄wed eset ẹdu. Edi ediwak ikpan̄wed Bible, ndusụk ubak ubak ndien ndusụk ofụri ofụri, ẹdu: n̄kpọ nte 6,000 ke N̄wed Abasi usem Hebrew (kpa n̄wed 39 eke “Akani Testament”) ye n̄kpọ nte 13,000 ke N̄wed Abasi eke Christian usem Greek (kpa n̄wed 27 eke “Obufa Testament”).

6. Ntak emi nnyịn ikemede ndinịm ke akpanikọ nte ke Bible mfịn ke akpan edi ukem nte ke ini Abasi ọkọnọde odudu ẹwet enye?

⁶ Ata Ọkpọsọn̄ Abasi, oro ọkọnọde odudu ẹwet Bible, ama okụt ete ke ẹtịm ikọ akpanikọ Bible ẹnịm ke mme ikpan̄wed oro. Ntre mme Bible nnyịn mfịn ke akpan ẹdi ukem nte mme akpa uwetn̄kpọ eke odudu spirit. N̄kpọ efen oro an̄wamde nnyịn ndifiọk emi edi nte ke ndusụk ikpan̄wed eke Christian usem Greek ẹfiak edem ẹkesịm isua ikie tọn̄ọ ke ini oro ẹkewetde akpa uwetn̄kpọ. Ibat ibat ikpan̄wed eke mme ewetn̄wed ererimbot eset oro ẹsụk ẹdude iwakke ndifiak edem n̄kosịm ediwak isua ikie eke mme akpa andiwet.

Enọ Abasi

7. Ẹsuan Bible atara adan̄a didie?

⁷ Bible edi n̄wed oro ẹsuande atara akan ke mbụk. Ẹmemịn̄ n̄kpọ nte idem biliọn ita. Idụhe n̄wed efen oro ekperede ibat oro. Ndien ẹmekabade Bible m̀mê ubak esie ẹsịn ke n̄kpọ nte usem 2,000. Ntem, ẹkere ẹte ke mbahade 98 eke ikie ke otu mme andidụn̄ ekondo nnyịn ẹkeme ndinyene Bible.

8-10. Nso idi ndusụk ntak emi anamde nnyịn ndidụn̄ọde Bible odot?

⁸ Ke akpanikọ n̄wed oro ọdọhọde ke ito Abasi onyụn̄ enyenede kpukpru uyarade akpanikọ oro otode an̄wa ye esịt esie odot nnyịn ndidụn̄ọde.a Enye anam uduak uwem an̄wan̄a, se mme idaha ererimbot ẹwọrọde, ye se ini iso akamade. Idụhe n̄wed efen emi ekemede ndinam oro.

⁹ Ih, Bible edi nneme oro Abasi enemede ye ekpụk ubonowo. Enye akada anamutom odudu, m̀mê spirit esie ọnọ ndausụn̄ ke ediwet oro ẹkewetde enye, ye n̄kpọ nte owo 40 ẹnamde n̄wetnnịm n̄kpọ oro. Ntem Abasi etịn̄ ikọ ọnọ nnyịn ebe ke Ikọ esie, kpa Edisana Bible. Apostle Paul ekewet ete: “Ke ini mbufo ẹbọde ikọ emi Abasi ọnọde ke ubọk nnyịn ẹsọk mbufo, mbufo idaha enye nte ikọ owo, edi ẹda enye nte ikọ Abasi​—⁠ke akpanikọ edi oro.”​—⁠1 Thessalonica 2:⁠13.

¹⁰ Abraham Lincoln, adaibuot ukara United States ọyọhọ 16, okokot Bible “mfọnn̄kan enọ oro akanam Abasi ọnọde owo . . . Edi ke enye mîdụhe nnyịn ikpekemeke ndidiọn̄ọ eti m̀mê idiọk.” Idahaemi ndien, nso ke mfọnn̄kan enọ emi etịn̄ ọnọ nnyịn aban̄a nte ndutụhọ ọkọtọn̄ọde, ntak emi Abasi akayakde enye odu, ye se enye edinamde aban̄a emi?

[Mme ikọ idakisọn̄]

[Ndise ke page 10]

Bible, emi Abasi ọkọnọde odudu ẹwet, edi nneme oro enye enemede ye ekpụk ubonowo