Diọn̄ọ Ke Enyene Se Mbon En̄wen Ẹdade Ẹkan Fi

Ntak Esisọn̄de

Ntan̄idem esinam owo asari asari. Owo ntan̄idem esida ke imọ imedi n̄kpọ ikan mbon en̄wen. Enye esida ke se imọ inamde ọfọn akan, onyụn̄ ada mbon emi mînamke n̄kpọ nte enye nte mme usụhọde owo. Owo ekededi ekeme ndinyene utọ edu emi. Encyclopædia Britannica ọdọhọ ete: “Ediwak owo ẹsikere ke mbon mmimọ ẹfọn ẹkan—ke udia mmimọ, ọfọn̄, ido, se inịmde ke akpanikọ, ye nte mmimọ isinamde n̄kpọ ọfọn akan.” Didie ke ikeme ndisio idiọk ekikere emi mfep ke esịt nnyịn?

Se Bible Etịn̄de

“Ẹda nsụhọdeidem ẹbat ẹte mbon en̄wen ẹfọn ẹkan mbufo.”—PHILIPPI 2:3.

Nso ke emi ekpep nnyịn? Se ikpepde edi ke ndisụhọde idem ayan̄wam nnyịn ikûtan̄ idem. Nsụhọdeidem ayanam idiọn̄ọ ke enyene se mbon en̄wen ẹdade ẹkan nnyịn. Idụhe mbon emi ẹnyenede nti edu ẹkan mbon en̄wen, inyụn̄ idụhe mbon emi ẹkemede ndinam kpukpru n̄kpọ.

Ke uwụtn̄kpọ, Stefan okokpon ke idụt Communist edi enye ama etre ndisari mbon emi mîtoho idụt Communist. Enye ọkọdọhọ ete: “Mmenịm ke owo ndida ke owo en̄wen ọfọn akan imọ ayanam enye etre asari. Ndiọn̄ọke kpukpru n̄kpọ, edi mmekeme ndikpep n̄kpọ nto owo ekededi.”

Se Akpanamde

Kûda idem ke n̄kpọ nyụn̄ diọn̄ọ ke enyene se mûkemeke ndinam. Diọn̄ọ ke enyene se mbon en̄wen ẹkemede ndinam emi afo mûkemeke. Kûkere ke kpukpru mbon emi ẹtode ebiet emi mme owo ẹsitịn̄de idiọk ẹban̄a ẹdiọk.

Utu ke ndikere ke kpukpru mbon oro ẹtode ebiet emi mme owo ẹsitịn̄de idiọk ẹban̄a ẹdiọk, bụp idemfo ete:

• ‘Ndi se ndade nsua mmọ enen̄ede ọdiọk ntre, m̀mê onyụn̄ edi ke mmọ inamke n̄kpọ nte nnyịn?’

• ‘Ndi enyene se owo oro ekemede ndisua ke idemmi?’

• ‘Nso ke owo emi ada ọfọn akan mi?’

Edieke ọbọrọde mbụme emi ke esịt akpanikọ, emekeme nditre asari onyụn̄ okut eti n̄kpọ ke idem owo oro.