Isọn̄

Australia

Ntaifiọk ẹdọhọ ke edieke ẹdọkde isọn̄ inyan̄ibom ke ẹyekụt eti mmọn̄. Vincent Post emi anamde utom ke Ufọkn̄wed Ntaifiọk Flinders ke Adelaide ọdọhọ ke enyene ini emi mmọn̄ inyan̄ibom mîkokponke nte okponde idahaemi; ke ndusụk itie emi ẹdide inyan̄ idahaemi ẹkedi mbenesụk. Ndien ke edịm ama esidep odụk mme isọn̄ itie oro mmọn̄ mîkesịmke do. Mmọn̄ edịm emi edi eti mmọn̄ emi odude ke idak isọn̄ inyan̄ibom mfịn. Ntaifiọk ẹkere ke mmọn̄ idak isọn̄ emi ekeme ndin̄wam ndusụk ke otu owo miliọn 700 emi mînyeneke eti mmọn̄.

Desat Sahara

Edieke ẹbaharede ikpọ unam emi ẹkesidude ke Desat Sahara ke itie iba, ẹdọhọ ke owo ikwe aba itie kiet mîdịghe ke mmọ ẹdidu idahaemi ke ata ekpri itie ke desat emi. Mme mfịna emi ẹdude ke desat emi ye nte ẹwotde unam ntịme ntịme ẹtiene ẹsịn se inade emi. Okposụkedi emi nsio nsio unam ẹdude do nte ẹnyụn̄ ẹdude ke mme akai, mme anam-ndụn̄ọde ẹdọhọ ke ntaifiọk inen̄ekede idọn̄ enyịn ke mme unam emi ẹdude ke desat emi sia owo mînọhọ mmọ okụk oro ekemde. Emi anam ọsọn̄ ndifiọk nte n̄kpọ etiede ye mme unam ke Desat Sahara.

Ererimbot

Ẹdọhọ ke idiọk ofụm okowot owo kiet ke otu kpukpru owo itiaita oro ẹkekpade ke 2012. Esop Emi Esede Aban̄a Nsọn̄idem Ererimbot ẹdọhọ ke “n̄kpọ kiet emi anamde ata ediwak owo ẹdọn̄ọ idahaemi edi nte mme owo ẹbiatde ofụm.”