SE ITỊBEDE KE ERERIMBOT

Israel

Mbụk n̄kpọntịbe Haaretz.com ọdọhọ ke mbon emi ẹkemanade ye ndo ke Israel ikemeke aba ndikot mbiausọbọ ikpe ke ndikayak mmimọ imana. Edi ke ete ye eka mmọ ẹkeme ndikot mbiausọbọ emi ikpe man ẹbọ okụk oro ẹdidade ise iban̄a eyen emi ke ofụri eyouwem esie.

Australia

Ke otu mme ọdọ ndọ 10 oro ẹdude ke Australia, 8 ẹma ẹdodụn̄ ntre mbemiso ẹdọde ndọ.

Greece

Itieutom Emi Esede Aban̄a Nsọn̄idem Mbon Greece ẹdọhọ ke ibat nditọ Greece oro ẹkewotde idem ke ufan̄ ọfiọn̄ ition kpọt ke 2011, oro edi, ọtọn̄ọde ke January esịm May, enen̄ede awak akan mbon oro ẹkewotde idem ukem ini emi ke 2010. Emi eketịbe ini oro okụk akananade etieti ke ofụri ererimbot.

United States

Itieutom kiet ke United States ọdọhọ ke ẹsibabaha n̄kpọ nte mbahade iba ke otu kpukpru udia oro ẹnyenede ke United States. Ke uwụtn̄kpọ, ẹdọhọ ke ndusụk ini owo isidọkke m̀mê nditet ndusụk n̄kpọ oro ẹtọde, ke owo isidiaha udia oro ẹdepde ke itie unyamudia ima, ye nte ke ndusụk ufọk, ẹsiduọk ndusụk udia oro mmọ ẹdepde.

Madagascar

Ẹkụt okube emi ekpride akan ke ofụri ererimbot ke Madagascar. Okube emi ekpri tutu ndusụk mmọ ẹkeme ndisọrọ owo ke mbara. Etie nte okube emi ẹmọn̄ ẹkpan̄a ẹma sia mînyeneke eti ebietidụn̄.