Drei Lae Akötresie?

Alanyimu la itre ka qaja ka hape, angatr a mejiun koi Akötresie. Ngo, e tro sa hnyinge ka hape, “Drei Lae Akötresie?” isa aqane sa i angatre kö. Ame koi itre xan, Akötresie la ketre Atre Iameköti ka iakötrë, nge ka thele troa tranyi së pine la itre tria së. Nge ame koi itre xan, ka ihnim, nge ka nue palahi Nyidrë la itre ngazo së. Nge, itre xan pena a mekun ka hape, ka nanyi Nyidrë, nge ka tha semesine së kö. Hnene laka, ka isazikeu la itre mekun, haawe, ame kowe la ka alanyim, tha ijije kö troa atrepengöi Akötresie.

Hapeu, nyipiewekë kö troa atrepengöi Akötresie? Eje hi. Maine tro sa atrepengöi Akötresie, tro ha hetre aliene la mele së. (Ite Huliwa 17:26-28) Nge, e troa kökötre la imelekeu së me Akötresie, tro hë Nyidrëti lai a hnimi së, me xatua së. (Iakobo 4:8) Ketre, tro hë sa hetrenyi la mele ka tha ase palua kö.—Ioane 17:3.

Tro sa atrepengöi Akötresie tune kaa? Hapeu, hetre sinee i epuni kö hnei epuni hna epe kow? Pine nemene matre ka catr la aqane imelekeu i epon? Hnei epuni hna pane thel troa atre la ëje i angeic, me pengöi angeic, memine la hnei angeic hna ajan me hna xelen. Hnei epuni fe hna thel troa atre la huliwa i angeic, me itre hnei angeic hna mekun troa kuca, me itre xa ewekë ju kö. Ame hë la epuni a atrepengöi angeic, tre, celë hi ka acatrene la aqane imelekeu i epon.

Haawe, tro epuni a atrepengöi Akötresie, e tro epuni a sa la itre hnying e cahu:

• DREI LA ËJE I AKÖTRESIE?

• NEMENE LA ITRE THIINA I NYIDRË KA LOLO?

• NEMENE LA ITRE HNEI NYIDRË HNA KUCA?

• NEMENE LA ITRE HNEI NYIDRË HNA TROA KUCA?

• AME KOI EPUN, NEMENE LA ALIENE LA TROA ATREPENGÖI AKÖTRESIE?

Tro la zonale celë a amamane la aqane sa la itre hnyinge celë hnene la Tusi Hmitrötr. Tro la tane mekune celë a xatua epun troa atrepengöi Akötresie, me trotrohnine la enyipiewekëne troa imelekeu me Nyidrë.