Ini 3

Nyipi Ewekë Troa Atre Hnyawa La Pengöi Akötresie

Nyipi ewekë troa atrepengöi Akötresie, maine nyipunie a ajane troa nyi sinee i Nyidrë. Atre fe kö hnene la itre sinee i nyipunie la ëje i nyipunie, nge hane kö angatre hë nyipunie hnene ej? Eje hi. Ame la aja i Akötresie, ke, ene la tro nyipunie a atre me hane hëne fe la ëje i Nyidrë. Iehova la ëje i Nyidrë. (Salamo 83:18; Mataio 6:9) Loi e tro fe nyipunie a atre la itre ewekë ka amadrinë Nyidrë, memine fe la itre hnei Nyidrëti hna xele ma wang. Nyipi ewekë tro nyipunie a atrehmekune la itre sinee i Nyidrë, memine fe la itre ithupëjia me Nyidrë. Thatreine kö tro sa canga atrepengöne ju hi la ketre atr. Celë hi matre, Tusi Hmitrötre a qaja ka hape, loi e troa hetre ijine hne së hna isa amë, matre atreine së troa atre Iehova hnyawa.​—Efeso 5:15, 16.

Kola kuca hnene la itre sinee i Akötresie la itre ewekë nyine amadri Nyidrë. Pane mekune jë la itre sinee i nyipunie. Maine tro nyipunie a qanangazo angatr, me kuca la itre ewekë hnei angatre hna methinën, hapeu, tro pala kö angatre a itre sinee i nyipunie? Ohe! Ceitune hi lai me Akötresie, laka, maine nyipunieti a ajane troa sinee i nyipunieti Nyidrë, nyipi ewekë troa kuca hnei nyipunie la itre ewekë ka amadrinë Nyidrë.​—Ioane 4:24.

Thaa nöjei hmi asë kö la ka aijijë së troa itre sinee i Akötresie. Iesu la ketre sinee i Akötresie, hnei nyidrë hna edromëne la lue gojeny. Caasi ka isaisa, nge ka tiqa hnei atr ka xötrëne ej. Celë hi gojenyi ne tro kowe la hnëjin. Ame la ketre, ke, ka ilitr, nge xalaithe hi la angetre trongëne ej. Celë hi gojenyi ne tro kowe la mele ka thaa ase palua kö. Qa ngöne lai, maine nyipunieti fe a ajane troa hane nyi sinee i Akötresie, haawe, loi e tro nyipunie a inine la nyipi aqane troa hmi koi Nyidrë.​—Mataio 7:13, 14.