Kola Akeukawanyi Së Hnene La Tusi Isaia

1-2. Nemene la hnei Iehova hna kuca koi së la easa hleuhleu?

PANE mekune jë laka, ketre fami a fek kowe la ketre götran, matre hleuhleu catr la nekönatr, ke nyën hë a troa inu memine la itre sinee i nyën. Maine pena, hnene la nekönatr hna huliwa menu, matre nyën a treije hnei xou. Ame e cili, nemene la hna troa kuca hnene la thin ka ihnim? Tro eahlo lai a xepi nyën, me drei nyëne hnyawa, me köle la trenge timidra i nyën. Nge tro mina fe eahlo a qaja la etrune la ihnimi eahlo koi nyën.

² Ame ngöne la Tusi Hmitrötr, Iehova a aceitunë Nyidrë memine la thin ka ihnim nge ka aupune la nekö i eahlo. Öni Nyidrë: “Tune la thin ka aupune la nekö i eahlo, tro pala hi ni a aupunyi epun.” (Isa. 66:13) Tru catre kö la ihnimi Iehova koi së hune la ketre kem maine thin. (Isa. 49:15) Jëne la Tusi Hmitrötr, Iehova a akeukawanyi së me hamë trengecatre së la easa dekurag maine hleuhleu.​—Roma 15:4.

3. Nemene la hne së hna troa ce wang ngöne la tane mekune celë?

³ Hna qatreng hnine la tusi Isaia la itre mekun ka iakeukawany qaathei Iehova. (Isa. 40:1) Hnene la Keme së ka tru ihnimin hna cinyanyine la tusi celë jëne Isaia, matre akeukawane la itre hlue i Nyidrë ka mel ekö e Iudra, nge ka cil kowe la itre jol ka tru. Easë fe enehila a melën la “itre ijin akötr hna thatreine xomihnin,” matre aja i easë troa hane akeukawanyi së. (2 Tim. 3:1) Tro sa ce wange la itre xaa xötr ne la tusi Isaia ka troa aupun me akeukawanyi së (1) la kola aca tro saze la mele së, (2) la kola nyizö së pala hi hnene la hni së, maine (3) la kola mec la ketre sinee së.

KOLA ACA TRO SAZE LA MELE SË

4. Tune kaa së la kola aca tro saze la mele së?

⁴ Ijije hi troa aca tro saze la mele së. (A. Cai. 9:​11; 1 Kor. 7:​31) Maine jë, troa tithi së hnei mec, maine tro sa hetre jol göi mani, maine kolo pena saze la huliwa së ngöne la organizasio i Iehova. Maine jë, kola gomegome la nöje së hnei politik. Eje hi, tro la itre jole cili a axouenyi së. Celë hi matre easa isa hnying ka hape: ‘Tro pë hë ni la a ue la?’ Öni Joseph, ketre trejin ka huliwa ngöne la Bethela, a 17 lao macatre nge hna up e thupen troa pionie ka hape: “Tha ka hmaloi kö koi ni troa saze la aqane meleng, ke tru la itre macatre hnenge hna lapa ngöne la Bethela. Thatre kö ni la nyine troa kuca, memine la itre ewekë ka troa traqa koi ni.” Ame la kola traqa la itre ewekë celë, nemene la aqane akeukawanyi së hnei Iehova jëne Isaia?

5. Thenge la Isaia 42:​16, nemene la ixatua hna hamën hnei Iehova? (Wange ju fe la foto.)

⁵ E jë la Isaia 42:16. Hnei Iehova hna thingehnaean laka, tro kö Nyidrëti a eatrongëne la itre ka timek ngöne la itre hmene gojeny ka trenyiwa hnei angatr hna troa xom, me saze la melöhlem matre lai. Ame la itre hnaewekë hna hape “ka timek,” me “hmene gojeny ka trenyiwa,” me “melöhlem,” me “gojenyi ka xozaxoza” ke kola amamane hnyawa la aliene hni së me aqane goeëne së la itre drai elany, la kola aca tro saze la mele së. Kösë easa tro ngöne la hnaxulu, nge thatre kö së la gojeny nyine troa xom. Ame pe, Iehova a thingehnaean laka, ngacama traqa ju hë la itre jol, ngo tro kö Nyidrëti a eatrongë së, nge tha tro pi kö Nyidrëti a nuetriji së. Tro Nyidrëti a ea la iwanakoime së ngöne la melöhlem, me thinane la gojenyi së, me amekötin ej matre hmaloi koi së troa trongën. Tro Nyidrëti a kuca tune kaa? Nyidrëti a hamë eamo koi së, jëne la Trengewekë i Nyidrë memine la organizasio i Nyidrë. (Sal. 119:105; Isa. 30:21) Nyidrëti fe a nyi jëne la itre trejin, me itre xaa atre ju kö matre xatua së. Ngacama thatre kö së la ka troa traqa elany, ngo loi e tro sa mejiun laka, tro pala hi Iehova a xatua së, ke Nyidrëti a hnimi së, me trotrohni së.​—Isa. 41:10; 1 Pet. 5:​6, 7.

6. Maine kola aca tro saze la mele së, nemene la ka xecie koi së?

⁶ Hnei Joseph me föi angeic, lo lue ka tro qa ngöne la Bethela hne së hna qaja e kula, hna öhne la ime i Iehova. Öni angeic: “Ame lo nyio e kuhu trön, hnei nyio hna öhne la ixatua i Iehova jëne la itre trejin. Hnei Nyidrëti hna hamëne la ka ijij, me itre ithuecatr ngöne la nyipi ijin, nge eje pala hi enehila.” Maine hna hane fe saze la mele i ö, nge ketre ewekë lai ka jole koi ö, the luelue kö laka, tro kö Iehova a hamë eö la trengecatr me eatrongë eö. (Isa. 54:10; 58:11) Öni Joseph: “Pi tro catre ni a dreng lo ketre nyima ne Télédiffusion, kola hape: ‘Thatre kö ni la ewekë ka troa traqa elany, ngo atre hi ni laka, tro pala hi Iehova a ce me eni.’a Ngacama kola traqa la itre ewekë ka asesëkötrë së, ngo tro pala hi Iehova a xatua së.”

KOLA NYIZÖ SË HNENE LA HNI SË

7. Nemene la mekuna i itre xan pine la itre ngazo i angatr ekö?

⁷ Ame la easa kuca la ketre ngazo ka tru, kola xatua së hnene la itre qatre thup, nge easë fe a isine matre tha tro hmaca kö sa kei kowe la ngazo. (It. Ed. 28:13; Iako. 5:​14-16; 1 Ioa. 1:9) Ngacama ase hë Iehova nue la ngazo së, ngo kolo pala hi a nyizö së hnene la hni së. Maine jë easa mekune ka hape, ‘Thatreine kö tro Iehova a nue la ngazong ke tru pala ha!’ (2 Kor. 2:7) Nyipici laka, tro kö a traqa la itre mekune cili, ke ame la itre ngazo hne së hna kuca, ke ka ahleuhleune la hni së, nge ka jole troa thëthëhmin. Öni Dravita: “Pëkö tingeting ngöne la itre juneng pine la ngazong. . . . Kucakuca ha ni nge pë hnyawa trengecatreng.” (Sal. 38:​3, 8) Maine celë fe hi mekuna i ö, tro la tusi Isaia a akeukawanyi ö.

8-9. Thenge la Isaia 1:​18, tune kaa la aqane nue Iehova la ngazo së?

⁸ E jë la Isaia 1:​18. Iehova a xome la ketre ceitun matre amaman ka hape, Nyidrëti a nue hnyawane la ngazo. Öni Nyidrë, ngacama ka “madra palulu” la itre ngazo së, ngo tro “itre ej a wië tune la kiona.” Maine troa ketr la iheetre së hnene la ketre ewekë ka madra palulu, ke tro lai a jole catr troa wasin. Ngo Iehova hi lai a amaman laka, ame la Nyidrëti a nue la ngazo, ke Nyidrëti a köletrij itre ej uti hë la tha mama ha. Celë hi matre tha tro kö sa nue la itre ngazo së ekö troa angazone la mele së enehila.

⁹ Tro sa ce wang la tulu i Dravita joxu. Ngacama hnei angeic hna nyixetë me ihumuth, ngo hnei Iehova hna nue la ngazo i angeic, me qeje angeice ka hape, ketre atr ka hni ka wië me meköt. (2 Sam. 11:​3, 4, 14, 15; 12:13; 1 It. Jo. 9:​4, 5) Tha hnei Iehova kö hna goeëne la itre ngazo hnei Dravita hna kuca, ngo aqane mele nyipici angeic. Ketre tun, ame la easa ietra, Iehova a nue la itre ngazo së, me xatua së troa nyihlue i Nyidrë memine la mekuthetheu ka loi. Nemene la ketre ixatua hna hamën hnene la tusi Isaia e kolo pala hi a nyizö së hnene la hni së?

10. Nemene la hnei Iehova hna qaja ngöne Isaia 38:17?

¹⁰ E jë la Isaia 38:17 me ithuemacany. Ame la hna hape, “hnei nyipëti hna trij asë la nöjei ngazong hutrö i nyipë” ke kolo fe a hape, “hnei nyipëti hna xometrije qëmekei nyipë la itre ngazong.” Pane mekune jë la Iehova a xome la itre ngazo ne la atr ka ietra me trij hutrö i Nyidrë, matre tha tro hmaca kö Nyidrëti a öhn. Nge kolo fe lai a hape, tha tro hmaca kö Nyidrëti a mekun itre ej. Önine la ketre itus ka qejepengöne la Tusi Hmitrötr ka hape, ijije hi troa ujën la trengewekë cili hnei: “Kösë, ame koi Nyipë, pëkö [ngazo] hnenge hna kuca.” Eje hi, ame la Iehova a nue la ngazo së, ke Nyidrëti a nue hnyawan, kösë pëkö ngazo hne së hna kuca. E ase hë Nyidrëti nue la ngazo së, ke tha Nyidrëti hmaca kö a amexej, matre nyizö së maine të pena koi së. Öni Nyidrë: “Tha tro hmaca kö ni a mekune la itre ngazo i ö.” (Isa. 43:25) Ka akeukawanyi së la mekune celë! Maine Iehova, lo Atre Iameköti Ka Sisitria, a thëthëhmine la itre ngazo së, ngaa drei së matre troa amexeje hmaca?

11. Ngacama hne së hna kuca la itre ngazo ekö, ngo nemene la ka nyipiewekë koi Iehova? (Wange ju fe la foto.)

¹¹ Ame la kola nyizö së hnene la hni së, the thëthëhmine kö la itre hnei Iehova hna qaja koi së. Nyidrëti a nu asë la itre ngazo së. Tha Nyidrëti kö a hmahma së pine la itre ngazo hne së hna kuca ekö, nge tha Nyidrëti kö a lapa fë trengehni tune la itre atr. (Isa. 57:16) Tha mekune hmaca kö Iehova la itre hne së hna kuca ekö, ngo Nyidrëti pe a goeën la hne së hna kuca enehila me elany. (Isa. 55:7) Drei la ketre Akötresie ka ihnim me utipin! Matre the nue pi kö la itre ngazo së ekö troa thë la madrine së enehila, me sewe së troa kapa la itre manathith elany.

KOLA MEC LA SINEE SË

12. Ame la kola mec la ketre atr hne së hna hnim, nemene la ka ej e kuhu hni së?

¹² Ame la kola mec la ketre sinee së, tha nyine qaja kö la akötr ka eje the së, nge tha tro kö lai a canga patr. Itre xan a hnyinge ka hape, “Hnauëne la Iehova a nue la itre sinee hun troa mec?” Hna mec la kem me thine i Michael ngöne la kola mel la uma i nyidro. Öni angeic: “Tru catre la akötreng, nge eni a elëhni koi Iehova pine Nyidrë nue nyidro troa mec. Atre ni laka, tha Nyidrëti kö la ka humuthi nyidro, ngo ame pe, pëkö hnei Nyidrëti hna kuca.” Maine jë, hna hane fe traqa koi së la itre mekune cili. Ame la kola traqa koi së la itre akötr ka tru, nemene la aqane akeukawanyi së hnei Iehova? Nge nemene la mejiun hnei Nyidrëti hna hamën?

13. Nemene la hna thingehnaean hnei Iehova ngöne Isaia 25:8?

¹³ E jë la Isaia 25:8. Ase hë Iehova qaja ka hape: “Tro nyidrëti a apatrene la mec epine palua.” Pane mekune jë la emingömingöne la mele së elany e patre hë la mec! Tha tro hmaca kö sa treije pine la sinee së hne së hna hnim ka meköl ngöne la mec. (Isa. 35:10) Tha tro hmaca kö sa akötr la easa goeëne la hua ne la sinee së. Eje hi, tro hë sa ce mel memine la itre sinee së ka egöcatr, uti hë epine palua. Nge tha pune jidri kö lai! Celë hi hna thingehnaean hnei Akötresie, lo Ka atreine eatrëne lai.​—Hna Am. 21:​4, 5.

14. Tune kaa eö la eö a mekune la mele hmaca? (Isaia 26:19) (Wange ju fe la foto.)

¹⁴ E jë la Isaia 26:19 me ithuemacany. Tro Iehova a apatrene la mec, nge tro fe Nyidrëti a amelene hmaca la itre sinee së ka mec. Hnei Nyidrëti hna qeje angatr ka hape: “Tro ha mejë hmaca la itre ka mec.” Önine la ithuemacany: “Ewekënge la itre ngönetrei ka mec.” Kolo hi lai a amaman ka hape, ewekë i Iehova kö la itre ka mec. Nge tha thëthëhmi angatre kö hnei Nyidrë. Matre, tro Nyidrëti a amele angatr ngöne la ijin hnei Nyidrëti hna sa. Tune la xaxapo ka amelene la haö ka fitr, tro Iehova, Qeqe ne mel, a amelene la itre sinee së ka mec. Drei la madrine së elany troa kepe angatre hmaca!​—Wange ju fe la Mareko 5:​42.

15. Kola xatua së tune kaa hnene la mejiun kowe la mele hmaca, la kola mec la ketre sinee së?

¹⁵ Ngacama atre hi së laka, troa amelen elany la itre sinee së, ngo eje pala hi la akötr e kuhu hni së. Ame pe, kola akeukawanyi së la easa trotrohnin ka hape, tha thëthëhmine kö Iehova la itre sinee së ka mec. Celë hi hna melën hnei Michael, lo hne së hna qaja e kula. Öni angeic: “Hnene la tusi Isaia 26:19 hna xatua ni troa trotrohnine laka, tha thëthëhmi kaka kö me nenë hnei Iehova. Nge tro hmaca kö Nyidrëti a amele nyidroti elany. Celë hi ka akeukawanyi ni me thue trengecatreng.” Ketre tu së fe, loi e tro pala hi sa lapa mekune la ijine tro sa iöhnyi hmaca memine la itre sinee së ka mec. Tro lai a xatua së troa xomihnine la akötre së.

16. Nemene la xötr ka akeukawanyi ö?

¹⁶ Hne së hna ce wange la itre xötr qa ngöne la tusi Isaia ka akeukawanyi së, e hna aca tro saze la mele së, maine kola nyizö së hnene la hni së, maine la easa treije pine la ketre sinee së ka mec. Tru la hni ne ole së koi Iehova, ke Nyidrëti a xatua së me akeukawanyi së jëne la Tusi Hmitrötr! (Sal. 94:19) Hapeu, hetre xötre kö ka akeukawanyi ö la eö a cile kowe la ketre jol? Maine eje hi, inin gufane jë, maine makëne jë ngöne la neköi zonal, maine amë jë ngöne la ketre götran ka canga mama koi ö. Epi tro la itre trengewekë i Iehova Keme së a akeukawanyi ö!