Xomi Ini Jë Qaathene La Angetre Gibeona

1-2. Pine nemene matre loi e tro sa atre la hna qaja hnei Tusi Hmitrötr göne la angetre Gibeona?

FOOTRE lao macatre thupene la angetre Isaraela a tro qa Aigupito, angatr ha lö kowe la Nöj Hna Thingehnaean. Hnei angatr hna lep la traon e Ieriko me Ai. Ngo e thupen, hna traqa la itre trenyiwa. Öni angatr, angatr a traqa qa gaa nanyi matre thele tingeting memine la nöje i Akötresie.

² Drei lae angatr? Angetre Gibeona. Kolo petre hi a qeje angatr ngöne la Tusi Hmitrötr. Ngo tro hmaca a qeje angatr, ke hnei angatr hna xatuane la angetre Isaraela ngöne la itre macatre thupen. Loi e tro sa atrepengöne la angetre Gibeona, ke hetre ini nyine tro sa xom qaathei angatr, nge tro fe sa öhn la itre xaa thiina i Iehova Akötresie.

TROA LAPAUN ME IPIË

3. (a) Drei la angetre Gibeona? (b) Hnauëne la angatre a thele tingeting me angetre Isaraela?

³ Ame lo angetre Isaraela a nyiqane thapa la nöje Kanana, angetre Gibeona a mel ngöne la traon e Gibeona, ketre traon hna ekögölithe hnyawan. Angetre Hivi angatr, kolo “7 lao nöj ka tru” hnei Iehova hna mekun troa lep apatren, “nge ka catre kö” angatr hui angetre Isaraela. (Dreut. 7:1) Matre ketre nöj ka tru, nge ka catre isi la itre trahmany i angatr. (Ios. 10:2) Ngo tha ceitui angatre kö memine la itre xaa angetre Kanana, ke atre hi angatr laka, tha ijiji angatre kö troa cil kowe la angetre Isaraela. Nge öhne hnyawa hi angatr laka, Iehova a isigöline la nöje i Nyidrë, nge tro kö Nyidrëti a helën la angetre Kanana qa ngöne la nöj. (Eso. 34:11; Ios. 9:​24) Matre, ame la angetre Isaraela a lep la traon e Ieriko me Ai, hnene la angetre Gibeona hna up la ketre gurupa troa wai Iosua e Gilegala, me thele tingeting.

4. (a) Thenge la Iosua 9:​8-13, tune kaa la aqane iaöne la angetre Isaraela hnene la angetre Gibeona? (Wange ju fe la foto.) (b) Nemene la ka traqa lo angetre Isaraela a öhn laka, ase hë iaö angatr?

⁴ E jë la Iosua 9:​8-13. Önine la angetre Gibeona ka hape, angatr a traqa qa ngöne la ketre nöj e gaa nany. Atre hi angatr laka, hnei Iehova hna xatuane la trongene isi Isaraela troa lep la nöj e Aigupito memine la lue joxu ne Amora, ene Sihona me Oga. Ngo tha hnei angatre kö hna qaja lo ewekë ka traqa koi Ieriko me Ai. Pine nemen? Ke ame lo itre “nöje gaa nany,” thatre pala kö angatr la itre nuvel cili. Hnene la itre trahmanyi ne Isaraela hna kapa la hna qaja hnene la angetre Gibeona, me kuca la isisinyikeu ne tingeting me angatr, ngo tha hna pane hnyingëne pe la mekuna i Iehova. (Ios. 9:​14, 15) E thupen, mama ha ka hape, hnene la angetre Gibeona hna iaöne la angetre Isaraela. Ame pe, hnene la angetre Isaraela hna metrötrën la hnei angatr hna sisiny, ke hna “sisinyi ngöne la ëje i Iehova.” (Ios. 9:​16-19) Matre hna upe pë hë la angetre Gibeona “troa nyi sinöe, me tha tim kowe la nöj me kowe la ita ne huuje i Iehova” utihë epin.​—Ios. 9:​27.

5. Tune kaa la aqane amamane la angetre Gibeona laka, ka lapaune angatr koi Iehova?

⁵ Ame la kola dreng hnene la angetre Kanana laka, hnei Gibeona hna thele tingeting me Isaraela, hnene la 5 lao joxu ne Amora hna cas matre lep la traon e Gibeona. Hnene la angetre Gibeona hna canga sipo ixatua koi Iosua. (Ios. 10:​3-7) Ame hnei Iosua hna ce tro memine la trongene isi Isaraela troa xatuane la angetre Gibeona, nge hna amanathithi angatr. Tune kaa? Hnei Iehova hna amalane la itre wene mani ka catr me ka tru hune la itre trongene isi Amora, me acilëne la jö matre tro la angetre Isaraela a ngaan la itre ithupëjia. (Ios. 10:​9-14) Ame la angetre Gibeona a thele tingeting me Isaraela, me sipo ixatua koi Iosua la kola thele isi me angatr, ke angatre hi lai a amamane la lapaune i angatr koi Iehova. Ketre, xecie koi angatr ka hape, tro kö Iehova a eatrën la hnei Nyidrëti hna qaja me amele angatr.

6. Nemene la ini hne së hna xom qa ngöne la aqane xatuane Iehova la angetre Gibeona, lo kola thapa la Nöj Hna Thingehnaean hnei Isaraela?

⁶ Nemene la ini hne së hna xom göi Iehova? Ka ipië me utipine Iehova. Öni Nyidrëti lo kowe la angetre Isaraela, “troa helëne la itre atrene la nöj,” ene mina fe la angetre Gibeona. (Num. 33:​51, 52) Ngo hnei Nyidrë hna nue la angetre Gibeona troa mel, ke hnene la angetre Isaraela hna kuca la isisinyikeu ne tingeting me angatr. Hnei Nyidrë hna metrötrën la hna sisiny, ngacama tha ase kö la angetre Isaraela pane hnyingëne la mekuna i Nyidrë. E thupen, hnei Nyidrë hna xatuane la angetre Isaraela troa metrötrën la hnei angatr hna sisiny, me amelene la angetre Gibeona.​—Ios. 9:​26; 11:19.

7. Tune kaa la aqane tro sa nyitipune la ipië me lapaun ne la angetre Gibeona? (Wange ju fe la foto.)

⁷ Tune kaa la aqane tro sa nyitipune la angetre Gibeona? Loi e tro sa acatrene la lapaune së koi Iehova. Tru catre kö la hne së hna atre göi Iehova enehila, hune la angetre Gibeona ekö. Matre nyipiewekë catr tro sa mejiun koi Nyidrë. (Sal. 40:​4, 5) Easë fe a nyitipune la angetre Gibeona, la easa kuca la itre hnëqa hna wangacon hnei itre xan ngöne la huliwa i Iehova. (Ios. 9:​23, 27) Tha thëthëhmine kö Luke, ketre trejin nekötrahmany, la hna kuca hnene la ketre trejin ka qatr ka lapa Bethela. Ame ngöne la ijine cili, kola xup la Uma Ne Baselaia. Ngacama nyidrë a xom la itre hnëqa ka tru ngöne la Bethela, ngo hnei nyidrë hna saen troa thupën e jidr la Uma Ne Baselaia memine la itre jia ne huliwa. Öni Luke: “Eni a öhne laka, tha tro hi sa mekun ka hape, atr ka ipië së. Loi e tro fe a mama ngöne la itre huliwa së.” Nyipiewekë tro sa amamane la lapaune së koi Iehova, me mejiune koi Nyidrë la easa cil kowe la itre jol, me kuca la itre hnëqa hna wangacon hnei itre xan ngöne la huliwa i Nyidrë.

TREQENE JU KÖ LA IAMEKÖTI I IEHOVA

8. Nemene la ngazo ka tru hnei Saulo hna kuca kowe la angetre Gibeona?

⁸ Hna qaja hmaca la angetre Gibeona ngöne la itre macatre thupen. Hnei Saulo joxu hna thel troa humuth la angetre Gibeona ka mel e Isaraela. Pine laka, “sasaithi tulu pala ha la aqane isigölin angeic la angetre Isaraela, me Iudra,” hnei angeic hna thel troa apatren asë la angetre Gibeona.b Matre ala nyim la hna humuth. (2 Sam. 21:​2, 5, 6) Ketre ngazo ka tru! Hnei Saulo hna thë lo isisinyikeu hna kuca ekö hnei Isaraela me Gibeona.

9. Eu la kola të la ngazo hna kuca kowe la angetre Gibeona?

⁹ Tha hna canga të kö la ngazo hna kuca kowe la angetre Gibeona. E thupene pë hë, fene la mus i Dravita joxu, hnei Iehova hna amamane la ngazo i Saulo me axulune la jiin atraqatr koi köni macatre. Ame la Dravita a hnyingën la kepin matre axulune pi Nyidrë la jiin, öni Nyidrë, zöi Saulo me lapa i angeic, ke hnei angatr hna anenine la madra ne la angetre Gibeona ngöne lo itre macatre qëmeken.​—2 Sam. 21:1.

10. Thenge la 2 Samuela 21:​3-6, nemene la aqane amamane la angetre Gibeona laka, angatr a metrötrën la Wathebo i Akötresie?

¹⁰ E jë la 2 Samuela 21:​3-6. Hnei Dravita hna hnyingën kowe la angetre Gibeona la nyine tro angeic a kuca, matre troa të la ngazo i Saulo. Tha hnei angatre kö hna sipo mani. Öni angatr, “Tha eahuni kö a sipo sileva me gool,” ke thenge la Wathebo, thatreine kö troa itön hnei mani la mele ne la atr ka ihumuth. (Num. 35:​30, 31) Ketre öni angatr, tha ijiji angatre kö troa humuth la ketre atr, e tha hna amekötine kö hnei joxu. Matre, hnei Dravita hna up troa humuth la 7 lao matra i Saulo ka hane sine la huliwa menu i angeic. E thupen, manie hmaca pi hi, nge arete pi hi la jiin. Kolo hi lai a amamane laka, ase hë të la ngazo hna kuca kowe la angetre Gibeona, nge ka madrine Iehova.​—2 Sam. 21:​9, 10, 14.

11. Nemene la ini hne së hna xom göi Iehova?

¹¹ Nemene la ini hne së hna xom göi Iehova? Mama catr ka hape, Iehova la Akötresie ka meköt. (Sal. 37:28) Ame enehila, ala nyim la itre atr hna xele ma wang, tune la itre trenyiwa me itre atr ka isapengöne kö me easë. Ngo aja i Nyidrë tro sa loi thiina koi nöjei atr. Ketre, tro kö Nyidrëti a të la ngazo hna kuca kowe la itre hlue i Nyidrë ngöne la nyipi ijin. Hne së hna ce wang laka, aja i Iehova tro la angetre Isaraela a nyipiewekën la isisinyikeu ne tingeting hnei angatr hna kuca ekö memine la angetre Gibeona. Haawe, aja i Nyidrë tro fe së enehila a nyipiewekën la hne së hna sisiny.​—Wange ju fe la Amosa 1:9.

12. Tune kaa la aqane tro sa nyitipune la angetre Gibeona la kola kuca la itre ewekë ka tha meköti kö koi së?

¹² Tune kaa la aqane tro sa nyitipune la angetre Gibeona? Ngacama kola qanangazo së hnene la itre trejin me easë, loi e tro sa treqe Iehova. Easë hi lai a amamane la mejiune së laka, tro kö Iehova a të la ngazo hna kuca koi së ngöne la nyipi ijin. Tro sa ce wang la tulu i Trejin Laura French. Hnei angeic hna nyiqane huliwa ngöne la Bethela e Canada lo 1926. Thupene la 10 lao macatre, hna upezö angeic ka hape, ketre ka iamenumenu, nge hna upi angeic qa ngöne la Bethela. Nemene la hnei angeic hna kuca? Ngacama hna akötrë angeic, ngo tha hnei angeice kö hna eetr. Hnei angeice pe hna xom la huliwa ne pionie ngöne la 4 lao macatre. Nge madrine catre angeic la kola hë angeice hmaca troa huliwa ngöne la Bethela lo 1940. Hnei angeic hna catre huliwa koi 50 lao macatre utihë la angeic a mec me elë a tro hnengödrai. Tro sa atreine elë hun la itre ewekë ka tha meköti kö hna kuca koi së, tui Trejin French, e tro sa catre kuca la loi me treqen tro Iehova a amekötin ngöne la nyipi ijin.​—Isa. 26:​3, 4.

TROA SAJUËN LA HMI KA WIË

13. Drei lo angetre “Netinim,” nge nemene la hnei angatr hna kuca la kola nue angatr qa Babulona?

¹³ Traqa koi 500 lao macatre thupei Dravita joxu, kolo hmaca a qaja la angetre Gibeona. Thupene la 70 lao macatre ne lapa la angetre Iudra e Babulona, angatr hmaca a bëek a tro Ierusalema. Ame lo 537 M.P.K., hnene la pane gurup i angetre Iudra hna ce bëek me Gavena Zerubabela. (Eze. 2:​1, 2, 58) Ame lo 468 M.P.K., kolo pena a ce bëek hnene la ketre gurup me Ezera atre cinyany. (Eze. 7:​1-7) Ame ngöne la lue neköi gurup cili, hetrenyi fe la lapa i angetre “Netinim.” (Wange ju la ithuemacanyi ngöne Ezera 2:​43.) Drei lae angatr? Kolo “itre hlu ne la uma ne hmi,” nge tha atre Isaraela kö, maine jë, itre matra ne la angetre Gibeona.

14. Tune kaa la aqane amamane la angetre Gibeona laka, itre ka mele nyipici koi Iehova? (1 Aqane Lapa Itre Joxu 9:2 me ithuemacany)

¹⁴ E jë la 1 Aqane Lapa Itre Joxu 9:2 me ithuemacany. Ame lo “itre ka huliwa hnine la uma ne hmi,” ke kolo itre ka pane bëek a tro Ierusalema. Nyine hain, ke tha bëeke kö la itre xaa atre Iudra. Pine nemen? Pine laka, ala nyim la angetre Iudra ka hetre uma me mani e Babulona, matre xele kö angatr ma bëek me xup hmaca la traone i angatr. Ngo ame kö lo itre matra i angetre Gibeona me itre xan ka bëek, ke tru la aja i angatr troa acile hmaca la nyipi hmi. Matre hnei angatr hna isine troa xup hmaca la uma ne hmi e Ierusalema. Ame la itre nekö i Gibeona, ke pë fe kö götrane i angatr e Isaraela, tune la angetre Iudra. Ngo hnei angatr hna bëek troa eatrëne hmaca la hnëqa i angatr ngöne la uma ne hmi, me ixatua matre xup hmaca la traon.​—Neh. 3:​26.

15. Nemene la ini hne së hna xom göi Iehova qa ngöne la hna melën hnene la angetre Gibeona?

¹⁵ Nemene la ini hne së hna xom göi Iehova? Easa öhn laka, madrine catre Iehova kowe la itre hlue i Nyidrë ka mele nyipici, nge Nyidrëti a thupë angatr. Qane lo Iehova a amelene la angetre Gibeona ekö, utihë la kola lö qa Babulona, ke traqa koi 1 000 lao macatre. Ngo hnei Iehova pala hi hna amanathithi angatr. Eje hi, mele pe kö la itre matra i angetre Gibeona lo kola apatrenyi Iudra me Ierusalema lo 607 M.P.K. Nge ame hë la angatr a bëek qa Babulona, angatre pala hi a ce huliwa memine la angetre Levi ngöne la uma ne hmi. Ame la itre xan, tha nanyi kö la hnalapa i angatr qa ngöne la uma ne hmi. (Eze. 2:​70; Neh. 11:21) Nge pine laka, angatr a huliwa ngöne la uma ne hmi, matre tha angatre kö a hane nyithupei impôt, me hootr, me pases.​—Eze. 7:​24.

16. Tune kaa la aqane tro sa nyitipune la angetre Gibeona ngöne la huliwa i Iehova?

¹⁶ Tune kaa la aqane tro sa nyitipune la angetre Gibeona? Aja i easë fe troa sajuëne la hmi ka wië. Ketre, aja i easë troa nue trengecatr troa nyihlue i Iehova, ke tru la ihnimi së koi Nyidrë, nge easa pi amadrinë Nyidrë. Celë hi hna kuca hnei Alwin, ketre trejin trahmany qa Philippines. Ka lolo catr la huliwa i angeic ngöne la compagnie pétrolière, ke hna nyithupene hnyawa. Ngo aja i angeic troa huliwa catr koi Iehova. Ame la atre sirkoskripsio a wang la ekalesia i angeic, ke angeic a xomi congés matre cainöj atrun. Nge tru la madrine i angeic. Matre ame hë e thupen, hnei angeic hna catre thith me mekun troa nue la huliwa i angeic me xom la ketre huliwa ka aijijë angeic troa pionie lapa. Ngacama tha tru hë hnei manie i angeic, ngo hnei angeic hna eatrën la objectif i angeic. Hnene la föi angeic hna hane xom la huliwa ne pionie, nge hnei nyidro hna xatuane la 21 lao atr troa atre Iehova. Drei jë kö la madrine i Iehova, la Nyidrëti a goeën la trengecatr hna nu hnene la lue trefëne cili! Eje hi, madrine catre Iehova la easa nue trengecatr troa huliwa i Nyidrë, nge tro kö Nyidrëti lai a thupë së.​—Mat. 6:​33.

17. Nemene la ini hne së hna xom qaathene la angetre Gibeona?

¹⁷ Kola amaman jëne la hna melën hnene la angetre Gibeona la pengöi Iehova. Ka ipië Nyidrë, me utipin, me meköt, me mele nyipici. Nyidrëti pala hi a amanathithin la itre hlue i Nyidrë ka mele nyipici. Hetre ini mina fe nyine tro sa xom qaathene la angetre Gibeona. Tui angatr, aja i easë troa acatrene la lapaune së koi Iehova, me mejiun koi Nyidrë la easa cil kowe la itre jol. Tro la lapaun a uku së troa eatrëne la itre hnëqa së ngöne la huliwa i Iehova, cememine la ipië. Aja së troa treqe Iehova me mejiun laka, tro kö Nyidrëti a të la itre huliwa ka tha meköti kö hna kuca koi së. Nge easa catre sajuën la hmi ka wië me mele nyipici. E cili, easa amaman laka, easa xomi ini qa ngöne la tulu ne la angetre Gibeona.