Itre Trepene Meköt a Inine La Mekuthetheu Së

1-2. (a) Nemene la ahnahna hnei Iehova hna hamëne koi Adramu me Eva? (b) Nemene la aqane tro nyidro a amamane la hni ne ole i nyidro kowe la ahnahna cili?

ITRE öni a kuca la itre xaa ewekë ke, hna xupi angatre tun. Ceitune hi memine la itre masin. Hnene la itre atr hna programmé itre ej, matre tro itre ej a kuca la huliwa. Ngo tha ceitu kö me itre atr. Hnei Iehova hna hamë së la ketre ahnahna. Nge itre keresiano a wangatrun la ahnahna cili. Kola qaja la atreine ië ewekë. Öni Tusi Hmitrötr, hnei Akötresie hna xup la pane atr, ene Adramu, hnaiji Nyidrë. (Gen. 1:​26, 27) Pine laka, hnei Nyidrë hna hamë inamacan koi Adramu me Eva, matre ijiji nyidro troa isa ië ewekë.

² Tha hnei Iehova kö hna hamë Adramu me Eva la ketre ilistë wathebo. Hnei Nyidrëti hi hna upi nyidro troa thupëne la ihnadro, me hnaho, me metrötrëne la musi Nyidrë. (Gen. 1:​28; 2:​16, 17) Maine ju, tro hi Adramu me Eva a drengethenge la itre hna amekötine cili, me olene kowe la nöjei ewekë hnei Nyidrë hna hamën. Aqane tro hi nyidroti lai a amamane la ihnimi nyidro koi Iehova, me amadrinë Nyidrë.​—It. Ed. 23:15.

3. Hapeu, hnei Adramu kö me Eva hna huliwane hnyawane la atreine i nyidro troa ië ewekë?

³ Öni Tusi Hmitrötr, tha hnei Adramu kö me Eva hna huliwane hnyawane la atreine i nyidro troa ië ewekë. Hnei nyidro hna iëne troa tha idrei. Hnei nyidro hna ujë tun ke, lue ka pi tru, nge pëkö ihnimi nyidro koi Iehova. (Gen. 3:​1-7) Nge easë pala hi a xeni pun enehila la huliwa menu i nyidro.​—Roma 5:​12.

4. (a) Thenge la Galatia 6:​5, nemene la nyine tro asë hi së a kuca? (b) Nemene la ketre ahnahna hne së hna troa ce ithanatan?

⁴ Jole catr la mele së enehila, ke ame e nöjei drai, nyimutre la itre mekun nyine tro sa xom. (E jë la Galatia 6:5.) Ame la itre xaa mekun, ka hmaloi hi troa xom, ngo ame itre xan, ka jole catr. Tune kaa la aqane tro sa xom la itre mekun ka troa amadrinë Iehova? Loi e tro sa lapa atre ka hape, nyipiewekë tro sa sipo ixatua thei Nyidrë. (It. Ed. 16:3; Iere. 10:23) Ngacama atr ka pexeje Iesu, ngo hnei nyidrëti pala hi hna sipo ixatua koi Iehova. (Heb. 5:7) Matre the qaja pala ha easë itre atr ka tha pexeje kö. Nyipiewekë catr tro sa sipo ixatua koi Iehova. Tro pena sa ce wang la ketre ahnahna hnei Akötresie hna hamë së matre xomi mekun ka loi, ene la mekuthetheu.

NEMENE LA MEKUTHETHEU?

5. (a) Nemene la mekuthetheu? (b) Troa xatua së tune kaa hnene la mekuthetheu së? (Roma 2:​14, 15)

⁵ Ame la mekuthetheu, ke ketre mekun ka ej e kuhu hni së, nge ka qaja koi së la ka loi me ka ngazo. Hetre mekuthetheu fe thene la itre atr ka thatre Akötresie. (2 Kor. 4:2) Ceitune hi la mekuthetheu memine la atre amekötin ka qaja koi së ka hape, ka loi maine ka ngazo la itre mekuna së maine itre huliwa së. (E jë la Roma 2:​14, 15.) Tro ej a hmekë së göne la itre huliwa ka ngazo. (1 Sam. 26:​8-11) Maine uku së troa kuca la loi. Tha hnene kö laka, atreine hi së ië ewekë, matre tro asë hi la itre mekun hne së hna troa xom a amadrinë Iehova. Tro la mekuthetheu a xatua së troa wang ka hape, ka loi maine ka ngazo la mekun hne së hna troa xom.

6. Pine nemene matre ame itre xaa ijin, kola amenu së hnene la mekuthetheu së?

⁶ Ngazo pe, itre atr ka ngazo së, matre tha ka pexeje kö la mekuthetheu së. Matre ijije hi tro la aqane hetru së, maine qenenöje së, maine itre aja ka ngazo a angazone la mekuthetheu së. Öni Tusi Hmitrötr, ijije hi troa “kucakuca,” maine ‘angazone,’ maine “mec, kösë hna dreuth hnei fao,” maine “ngazo” la mekuthetheu së. (1 Kor. 8:​12; Tito 1:​15; 1 Tim. 4:2; Heb. 10:22) Thatreine kö la mekuthetheu cili xatua së troa axecië mekun ka loi, tune hi la ketre tulu ka tria. Haawe, nyipiewekë tro sa isine matre tro pala hi la mekuthetheu së a huliwa hnyawa. (1 Pet. 3:​16) Troa tune kaa?

AQANE TROA ININE LA MEKUTHETHEU

7-8. (a) Nemene la ka troa xatua së troa inine la mekuthetheu së? (b) Tune kaa la aqane tro la itre trepene meköt a eatrongë së? Qaja jë la ketre ceitun. (Wange ju fe la foto.)

⁷ Tro sa inine tune kaa la mekuthetheu së? Loi e tro sa e lapane la Tusi Hmitrötr matre troa atre la ka loi me ka ngazo koi Iehova. Loi e tro fe sa atre hnyawa la itre wathebo i Nyidrë matre trotrohnine la itre mekuna i Nyidrë. Ngo tune la hne së hna ce wang ngöne la tane mekun hnapan, ka hetre ifego la itre wathebo. Celë hi matre, loi e tro sa thel la itre trepene meköt, ka troa xatua së troa atre la mekuna i Iehova me itre aliene hni Nyidrë göne la ketre jol.​—Isa. 55:9.

⁸ Ceitune hi la mele së memine la easa tro ngöne la hnapapa. Pane mekune jë laka, pëkö gojeny, maine mene gojeny, me itre pano. Ijije hi tro la jö me itre wëtresij a köja gojenyi së. Ngo ka loi kö troa hetre imap ka amamane la itre hatren hne së hna troa öhn e kuhu gojeny, tune la itre wetr me itre rivier. Tro itre ej a xatua së troa atre ka hape, easë kö ngöne la nyipi gojeny, maine easë pena a nyiqane tro menu. Ame la aja i easë ke, troa amadrinë Iehova. Ceitune hi la Tusi Hmitrötr memine la imap ka amamane la gojenyi nyine tro sa xom. Nge ceitune hi la itre trepene meköt memine la itre hatren ngöne la imap. Maine tro sa trongëne hnyawan itre ej, tro së lai a traqa kowe la hna ie.

9. Nemene la ketre ewekë ka troa xatua së troa inine la mekuthetheu së? (Roma 9:1)

⁹ Uati hmitrötre i Iehova la ka xatua së troa inine hnyawane la mekuthetheu së. (E jë la Roma 9:1.) Tro ej a xatua së troa atre la mekuna i Nyidrë, me hamë trengecatre së matre troa kuca la aja i Nyidrë. (Fil. 2:​13) Ngo nemene la nyine tro sa kuca matre kapa la uati hmitrötr?

10. Nemene la nyine tro sa kuca matre tro sa kapa la ixatua ne la uati hmitrötr? (Luka 11:​10, 13)

¹⁰ Sipo Iehova jë la uati hmitrötr. (E jë la Luka 11:​10, 13.) Tha tro kö sa luelue laka, tro Iehova a hamëne atrun la uati hmitrötr. (Ioa. 3:​34) Pine nemen? Pine laka, aja i Nyidrë troa hamëne atrun kowe la itre ka drengethenge la itre hna amekötin hnene la ua. (It. Ed. 1:​23; Iako. 1:5) Ngo nemene la ketre ewekë nyine tro sa kuca matre inine hnyawane la mekuthetheu së?

11. (a) Nemene la aliene la mele së? (b) Pine nemene matre loi e tro sa inine hnyawane la mekuthetheu së?

¹¹ Isine jë tro pala hi a amadrinë Iehova. (It. Ed. 8:​34, 35) Celë hi aliene la mele së. Maine tro sa lapa mekun la ewekë cili e nöjei drai, tro lai a xatua së troa inine la mekuthetheu së. Troa huliwa hnyawa la mekuthetheu së e tro sa atre la mekuna i Iehova memine la aliene hni i Nyidrë. Jole pala ha la mel enehila, matre nyipiewekë troa inine la mekuthetheu së. Ame itre xaa ijin, easa cil kowe la itre jol laka, pëkö hna qaja hnei Tusi Hmitrötr. Tune la troa ië huliwa, maine ini, maine nyine iamadrinë, maine itre sinee së. Matre tro sa atre tune kaa la aja i Iehova?​—2 Kor. 1:​12.

12. Nemene la ka troa xatua së troa atre ka hape, ka huliwa hnyawa kö la mekuthetheu së? (Efeso 5:​10)

¹² Lapa mekune jë la hnei eö hna e ngöne la Tusi Hmitrötr. (Sal. 49:3) Ame la eö a e Tusi Hmitrötr, thele jë la itre trepene meköt ka xatua eö troa atre la mekuna i Iehova. (E jë la Efeso 5:​10.) Ame la easa cil kowe la itre jol, itre trepene meköt la ka xatua së troa wang ka hape, ka huliwa hnyawa kö la mekuthetheu së. (It. Ed. 2:​4-9, 11-13) Tro fe itre ej a inine la mekuthetheu së me xatua së troa kuca la aja i Iehova.​—Heb. 5:​14.

13. Nemene la nyine tha tro kö së a kuca? Hamëne jë la ketre ceitun.

¹³ Tha tro kö sa axecië mekun, me thel e thupene la itre trepene meköt. Tha tro kö sa nyitipune la angetre Isaraela ka lapa e Iudra thupene la kola apatrene la traon e Ierusalema lo macatre 607 M.P.K. Öni angatr koi Ieremia: “Pane hnyingëne jë koi Iehova Akötresi ö la gojeny nyine tro huni a trongën, memine la nyine tro huni a kuca.” (Iere. 42:​3-6) Ngo ase hë angatr axeciën la nyin tro angatr a kuca. Ame la Iehova a sa koi angatr, tha madrine kö angatr, matre hnei angatr hna catre fë mekun. Ame la pun, tru catr la itre jol ka traqa koi angatr. (Iere. 42:​19-22; 43:​1, 2, 4) Celë hi matre, qëmekene troa axecië mekun, thele jë la itre trepene meköt ka amamane la mekuna i Iehova, nge trongëne jë itre ej.

14. Hnauëne la tro sa xötrethenge la itre trepene meköt la easa axecië mekun?

¹⁴ Xötrethenge jë la itre trepene meköt la eö a axecië mekun. (Mat. 7:​24-29; Iako. 1:​23-25) Ame la easa ujë tun ke, easa nue la uati hmitrötr troa eatrongë së. Nge tro pala hi Iehova lai a hamë së la uati hmitrötre i Nyidrë. (It. Hu. 5:​32) Ngo e tha xötrethenge kö së la gojenyi hna amamane hnei uati hmitrötr, easë hi lai a “akötrëne” ej maine icilekeu me ej. (Efe. 4:​30; Isa. 63:10; It. Hu. 7:​51) Nge tro hë Iehova a xom qaathe së la uati hmitrötr. (Sal. 51:11; 1 Thes. 5:​19) Tro së e cili a jol, ke ka nyipiewekë koi së la emenene la uati hmitrötr.​—Efe. 3:​16.

AQANE TRO SA ÖHNE LA ITRE TREPENE MEKÖT

15-16. (a) Tro sa öhn ekaa la itre trepene meköt? (b) Nemene la itre trepene meköt ka troa xatuane la ka ini Tus troa trij la sixa?

¹⁵ Troa huliwane la itre nyine ithel. Qëmekene tro sa trongëne la itre trepene meköt, loi e tro sa thel itre ej. Nemene la nyine tro eö a kuca e tha trotrohnine kö la ka ini Tus la kepin matre ka ngazo troa ufi sixa? Maine jë öni angeic: ‘Pëkö hna qaja hnei Tusi Hmitrötr göi sixa. Matre easa atre tune kaa ka hape, ka ngazo?’ Tune kaa la aqane tro eö a xatua angeic troa öhne la itre trepene meköt? Loi e tro angeic a ithel ngöne la HNË AMI ITUS Watchtower. Maine tro angeic a lep la hnëewekë “Sixa” ngöne la hnë ithel, ke tro angeic a öhn la itre tane mekun ka troa xatua angeic. Ame la ketre tane mekun, ke hna hape, “Aqane Goeëne Akötresie La Ufi Sixa.” (Wange ju la Ita Ne Thup ne 1 Julai 2014.) Nemene la itre xötr me itre trepene meköt hnei angeic hna troa öhn?

¹⁶ Tro sa amexeje la 5 lao trepene meköt ka mama ngöne la tane mekune celë. (1) Tha tro kö a musinë së hnene la ketre huliwa ka xomi së kowe la mec. (Roma 6:​16) (2) Loi e tro sa nuetrij la itre ewekë ka angazone la ngönetrei së. (2 Kor. 7:1) (3) Aja i Iehova tro sa nyihlue i Nyidrë memine la mele së ka pexej. (Mat. 22:37) (4) Tha tro kö a akötrë itre xan hnene la itre huliwa së. (Mat. 22:39; 1 Kor. 10:24) (5) Tro Iehova a xatua së troa kuca la meköt. (Fil. 4:​13) Haawe, ngacama tha Tusi Hmitrötre kö a qeje sixa, ngo tro la itre trepene meköt celë a xatuane la ka ini Tus troa atre la mekuna i Iehova.

17. Tune kaa la aqane tro la lue trejin ka troa faipoipo a öhn la itre trepene meköt ka troa xatua nyidro troa axecië mekun ka loi?

¹⁷ Tune kaa la aqane tro la lue trejin ka troa faipoipo a öhn la itre trepene meköt ka troa xatua nyidro troa axecië mekun ka loi? Hetre ixatua hna hamën ngöne la HNË AMI ITUS Watchtower. Maine tro nyidro a lep la hnëewekë “Faipoipo” ngöne la hnë ithel, tro nyidro a öhn la itre tane mekun ka amamane la itre trepene meköt. Tro sa amexeje la 6 lao trepene meköt nyine tro la lue trefën a ce ithanatan. (1) Loi e tro asë hi la itre hna hnëkën ngöne la ijine faipoipo a atrunyi Iehova. (1 Kor. 10:​31, 32) (2) Loi e troa heetre hnyawa, tha tro kö a pi mama maine akeinyi itre xan. (1 Tim. 2:9; 1 Pet. 3:​3, 4) (3) Tha tro kö a nyitipune la fene i Satana me pi mama fë la itre hne së hna hetreny. (Ioa. 17:14; Iako. 1:​27; 1 Ioa. 2:​15, 16) (4) Loi e troa eköthe hnyawane la ijine faipoipo. (1 Kor. 14:40) (5) Tha tro kö a feet qenahmo, me hmo hnei kahaitr. (Gal. 5:​21) (6) Loi e tro la lue trefën a up la ketre troa tane huliwa.​—Ioa. 2:​8, 9.

18-19. (a) Nemene la ketre itus nyine ithel ka troa xatua së? (b) Tro sa huliwane tune kaa la itusi celë matre öhn la itre trepene meköt göne la itre feet? (Wange ju la hna eköhagen “Thele Jë La Itre Trepene Meköt”)

¹⁸ Ame la ketre itus ka troa xatua së, ke ene lo itus Versets pour la vie chrétienne.a Ame e kuhu hnin, hna amë trongëne la itre xötr thenge la itre mekun. Fene la itre mekun, hetre hnying maine itre hnëewekë, me itre xötr ka troa xatua epun troa öhne la itre trepene meköt. Maine ketre trejin a hnying göne la ketre feet, ijiji angeic troa fe la mekun “Fêtes; cérémonies,” fene la hna hape, “Fêtes que les chrétiens ne célèbrent pas.”

¹⁹ Ame ngöne la götrane cili, hetrenyi la hnying hna hape: “Pourquoi est-ce mal de prendre part à des fêtes qui ont un lien avec la fausse religion ? (1 Cor. 10:21; 2 Cor. 6:​14-18; Éph. 5:​10, 11).” Nge kola qaja la itre feet tha nyine tro kö së a sine ke, ka ce tro memine la hmi ka thoi. Nge fene la hna hape, “Cérémonies nationalistes,” hetre xötr ka amamane la itre trepene meköt ka troa xatuane la keresiano ka hnying ka hape, tro kö angeic a sine la ketre feet ka atrune la nöj, maine itre isi, maine ketre atr. Easa olene kowe la organizasio i Iehova ka hamë së la itre itus nyine ithel ka xatua së troa inine la mekuthetheu së!

LOI E TROA ININE LA MEKUTHETHEU SË

20. Tro sa atre tune kaa ka hape, hne së hna inine hnyawane la mekuthetheu së?

²⁰ Easa wangatrune la ahnahna hnei Iehova hna hamë së, ene la troa atreine ië ewekë. Ngo maine aja së troa huliwane hnyawane la ahnahna cili, ke loi e tro sa inine la mekuthetheu së. Maine hne së hna inine hnyawane la mekuthetheu së, tro së lai a xome la itre mekun ka amadrinë Iehova me kuca la aja i Nyidrë. Nyipici laka, nyipiewekë tro sa sipone la uati hmitrötre i Iehova. Haawe, catre jë së sipo uati hmitrötr me xötrethenge la hnene ej hna amekötin. Itre trepene meköti fe a inine la mekuthetheu së. Maine tro sa huliwane hnyawane la itre ahnahna cili, tro hë sa öhne la emenene la Tusi Hmitrötr ngöne la mele së.​—2 Tim. 3:​16, 17; Heb. 4:​12.