“Hnëkë Jë Kowe La Nöjei Huliwa Ka Loi Asëjëihë”
1 Ame ngöne lo Iesu a nyiqaane eköthe la huliwa ne cainöj, hnei nyidrëti hna xomi ijine troa hnëkëne hnyawa la itretre drei nyidrë. (Mat. 10:5-14) Ngacama, isa hetre jole së asë hi, ngo ame la itre hnepe menetr hne së hna xom troa hnëkë hnyawa qëmekene troa cainöj ngöne itre hnalapa trootro, tre, eje hi lai ka xatua së troa kapa la itre manathithi ka tru.—2 Kor. 9:6.
2 Tune Kaa La Aqane Tro Sa Hnëkë: Ame la pane nyine troa kuca troa hnëkë hnyawa, tre, troa atrepengöne la itus hne së hna troa tro fë. Ketre, loi e tro fe sa mekune la itre atr ne la teritoare së. Nge troa pane hnying, ka hape, nemene la itre jole ka ketri angatr? Nemene la itre ini ka thoi hna qaja koi së ngöne la easa cainöj? Hetrenyi la itre aqane nyiqaane ithanata ka hmaloi nyine xatua së, hnine la Huliwa Ne Baselaia memine lo itus Comment raisonner à partir des Écritures.
3 Tro fe a xatua së hnene la itre iamacany hna kuca ngöne la Icasikeu Ne La Huliwa. Nge pine laka easa huliwane pala hi la itre aqane nyiqaane ithanata, haawe, tro ha hmaloi koi së troa hnëkë. Ngo maine tro pala hi sa thel qëmekene troa cainöj la aqane troa eköthe hnyawa la aqane tro sa nyiqaane ithanata, tro hë së a maca troa cainöj. Ketre, loi e tro fe sa pane goeëne la watrenge së, maine eje asë kö e hnin lo itre jia ne huliwa së ngöne la götrane ua.
4 Nemene la ka troa xatua së matre thaa tro kö sa thëthëhmin la itre aqane nyiqaane ithanata? Ame la ketre aqane troa amë hutine la itre hne së hna ajane troa qaja, tre, ene la troa amexeje catrëne itre ej. Ame itre xan, angatr a madrine troa amexeje itre ej ngöne la ijine angatr a inine la Tusi Hmitrötr e hnine la hnepe lapa. Itre xane fe a wanga atrehmekune laka, ketre jëne ixatua la troa sija la itre mekune ka tru ngöne la ketre sine pepa, matre troa canga goeën qëmekene troa fenafena la qëhnelö.
5 Pine Nemene Matre Ka Hetre Eloin: Pine laka, ame la easa hnëkë hnyawa, celë hi ka troa akökötrene la madrine së me xatua së troa maca troa cainöj. Ej a xatua së matre thaa tro kö sa xou me hnehengazo menu qëmekene la ketre atr. Loi pe, kola aijijë së troa wanga atrune hnyawa lai atr hne së hna cainöje kow, nge thaa tro kö sa nue troa ajolë së hnene la itre nyine troa qaja. Ketre, maine atre hnyawa hë së la aliene la itre itus, tro ha hmaloi troa tro fë.
6 Kola hamë ithuecatr koi së hnene la Itre Hna Cinyihan, ka hape, loi e tro sa “hnëkë kowe la nöjei huliwa ka loi asëjëihë.” (Tito 3:1) Huliwa ka sisitria catr la troa cainöjëne la maca ka loi. Haawe, ame la easa hnëkë hnyawa, easë hi lai a amamane laka easa metrötrëne la atr ka troa drei së, nge easë fe a metrötrë Iehova, lo Akötresie hne së hna anyipicin.—Is. 43:10.