“Xomejë La Nyine Isilikeunge Hui Nyipunie”
1 Ame ngöne la fene celë ka tiqa hnei jol me ewekë hna hnehengazon, tre, kola akeukawane la itre hni së, hnene la hne së hna kapa la hë i Iesu troa öhnyi loi qa ngöne la isilekeu i nyidrë. (Mat. 11:29, 30) Ame la itre ka kapa la nyine isilikeun göi troa atre drei Iesu, tre, kolo fe a hape, tro angatr a hane kuca la ketre huliwa laka, thaa ka hmaloi hmekuje kö, ngo ketre huliwa pe ka troa akeukawane la itre hni angatr. Troa cainöjëne la maca ka loi ne la Baselaia me xatuane fe la itre xaa atr matre troa akeukawanyi angatre fe hnene la isilekeun ka menyike i Iesu.—Mat. 24:14; 28:19, 20.
2 Kola Keukawa Qa Ngöne La Huliwa Ne Cainöj: Thaa hnei Iesu kö hna upe la itretre drei nyidrë troa xome la ehnefe i angatr me thue fe la ehnefe hnei nyidrëti hna troa hamë angatr. Nyidrëti pe a qaja koi angatr troa isaze la ehnefe i angatr ka hace, me ehnefe i nyidrë ka hmaloi. Haawe, thaa hace hmaca kö së hnene lo itre hne së hna hnehengazon, me pë mejiun ngöne la fene celë ka ngazo; ketre, thaa tro hë sa huliwa gufa kowe la trengamo ka thaa cile huti kö. (Luka 21:34; 1 Tim. 6:17) Ngacama tru la itre jol, nge easa catre huliwa matre hetrenyi la itre nyipi ewekë kowe la mele së, ngo loi e tro pala hi sa amë panë Akotresie ngöne la mele së. (Mat. 6:33) Tro hë la huliwa ne cainöj a ceitune me ketre ewekë ka troa akeukawanyi së. Nge ka hmaloi troa xom, e hne së hna catre eköthe hnyawa la aqane wange së la itre ka nyipi ewekë kowe la mele së.—Fil. 1:10.
3 Pengö së itre atr la troa ithanatane la itre ewekë hne së hna hnin e kuhu hni së. (Luka 6:45) Loi e troa ajane hnene la itre Keresiano asë troa wanga atrunyi Iehova, me mekune la itre manathithi hna troa kapa elany jëne la Baselaia. Drei la kola akeukawane la itre hni së, ngöne la easa tro fë la “evangelia ne la ite ewekë ka loi” me nue la itre ewekë hne së hna hnehengazone ngöne la easa cainöje trootro! (Rom. 10:15) Nyipici, maine tro sa kuca lapaane la ketre ewekë, tro hë sa maca, nge tro ha kökötre la madrine së. Matre ame la easa kuca la hne së hna atrein troa akökötrene la itre hawa ne cainöje së, easë fe a kapa la itre xaa ithuecatr. Nge drei la madrine së ngöne la kola drenge la maca hne së hna tro fë! (Ite Hu. 15:3) Eje hi, ame la easa cainöj nge thaa semesine së kö maine icilekeu pena me easë, tro ha akeukawane la itre hni së, ke, easa atre laka, easa amadrinë Iehova; nge ketre, qaathei Nyidrë la itre manathithi hne së hna kapa.—Ite Hu. 5:41; 1 Kor. 3:9.
4 Haawe, maine tro sa drenge la ihë i Iesu, tro fe hë së a madrin troa ce huliwa me nyidrë ceitune me itretre Anyipicine i Iehova. (Is. 43:10; Hna ama. 1:5) Nge pëkö keukawa ka sisitria hune lai!