“Thaa Ajange Kö”
1 Celë hi hna majemine qaja hnene la itre xaa atr ngöne la easa tro fë koi angatr la maca. Nemene la ka troa xatua së matre thaa tro kö sa kucakuca, ngöne la kola thaa semesine së hnene la itre atr ngöne la teritoare së? Tune kaa la aqane tro sa atreine ahlëne la aja ne la itre atr troa drenge la maca ka loi?
2 Troa Eje Pala Hi La Madrine The Së: Maine tro sa mekune hmaca la kepine matre nyimutre la itre atr ka thaa semesine së kö, haawe, tro ha eje pala hi la madrin the së. Maine jë thaa nyipiewekëne kö la etrune la Tusi Hmitrötr hnene la itre atr ka inine lo ini hna hape, Evolisio maine hna hetrune pena e nyipine la itre atr ka mejiune ka hape, pëkö Akötresie. Maine jë ame itre xan, tre, pëhë mejiune i angatr hnene la aqane huliwa thoine la itre hmi. Ame koi itre xan, tre, angatr a thaa hane semesine së pine laka pëhë mejiune i angatr, nge kösë ka gufa la mele koi angatr. (Efe. 2:12) Ame itre xan, tre, ‘thaa hnei angatre kö hna dreng,’ pine laka, hna lapa xomi angatr hnene la itre ewekë hnei angatr hna hnehengazon.—Mat. 24:37-39.
3 Ngacama troa xele ma drei së hnene la itre xan, ngo ijije hi tro sa madrine troa cainöj, ke atre hi së laka, ame la itre trenge catr hne së hna kuca tre, nyine troa atrunyi Iehova. (1 Pet. 4:11) Ketre, maine xele ju hë ma drenge hnene la itre atr la easa ithanatane la nyipici, ngo ame pe kolo lai a acatrene la sipu lapaune së. Loi e tro sa catre troa goeëne la itre atr ne la teritoare së thenge la aqane goeë angatre hnei Iehova. Hnei Nyidrëti hna hnime la itre atr ne Nineve, ke, “tha ’te [kö] la ime maca me mi angat.” (Iona 4:11) Nyipi ewekë troa atre hnene la itre atr ka mele ngöne la teritoare së la maca ka loi! Qa ngöne lai, loi e thaa tro pi kö sa hmacahmaca, ngo tro pe sa thele la itre jëne troa ahlëne la aja i angatr kowe la maca ne la Tusi Hmitrötr.
4 Ithanatane Jë La Itre Hna Hnehengazon Hnene La Itre Atr: Maine jë tro sa nyiqaane ithanata me xome la ketre ewekë hna hnehengazone ngöne la nöj, me nue kowe la atr troa hane qaja la hnei angeic hna mekun. Drenge ju la angeic a ithanata, nge thupene lai, thenge la itre ewekë hnei angeic hna hnehengazon, amamane jë koi angeic la maca qa hnine la Tusi Hmitrötr ka troa akeukawane la hni angeic. Thupene la hna amexeje la ketre ewekë ka ngazo ka traqa kowe la nöj, hnene la ketre Temoë hna amamane la utipine i angeic ngöne la hna cainöj ngöne itre hnalapa trootro. Öni angeic ka hape: “Canga hmala hi la itre atr troa porotrik. Ame ngöne la drai cili, lolo catre la porotrike i eni memine la itre atr ka ala nyim, pine laka, hnenge hna amamane laka, eni a wanga atrune fe la mele i angatr.”
5 Atreine hi troa hamë nyin hnene la Baselaia i Akötresie la nöjei jol hna cile kow hnene la itre atr. Tupathe jë troa atrehmekune la caa jol hna lapa fë me hnehengazon hnene la ketre atr. Maine jë tro angeic a nue së troa qeje pengöne la maca ne mel qa hnine la Tusi Hmitrötr. Ngo maine thipëne kö angeic, tre, maine jë tro pena ha drei së “[“ngöne la ketre ijin,” MN].”—Ite hu. 17:32.