Troa Hetre Wene Ne La Huliwa, e Hna Ihnim
1 “Trohemi koi ni, . . . nge tro ni a amanonyi nyipunie.” (Mat. 11:28) Kola amamane hnene la itre trenge ewekë celë la etrune la ihnimi Iesu kowe la itre atr. Pine laka easë la itre hlue Keresiano, easa ajane troa xötrethenge la tulu i Iesu, ene la troa amamane la ihnimi së kowe la itre atr ka kucakuca pine laka pë hë ihnimi e celë fen. Nemene la aqane tro sa amamane la ihnimi së ngöne la easa tro fë la maca ka loi?
2 Hnei Trenge Ewekë: Hnene la ihnimi Iesu kowe la itre atr matre nyidrëti a thele ijine troa ce thawa me angatre la maca ka loi. (Ioane 4:7-14) Kola xatua së hnene la ihnimi matre thaa tro kö sa luelue troa cainöj ngöne la nöjei ijin. Hnene la ketre nekönatr jajinyi ka sikisi lao macatren, hna pane cainöje kowe la ketre föe ka lapa itreqe ezi nyën thei droketre. Nemene la ka upi nyëne troa ujë tune lai? Öni nyëne ka hape: “Kösë ame la föe, tre, ka ajane eahlo troa atre Iehova.”
3 Ijije hi tro sa wanga atrune hnyawa la itre atr, e hne së hna hni ka menyik, me hnyima koi angatr, me hetrenyi la hnenyinawa ka lolo. Easa amamane fe la ihnimi së, e hne së hna hane drenge hnyawa fe la itre mekuna i angatr, me atrehmekune hnyawa la itre hnei angatr hna hnehengazon, me mekune hnyawa la sipu aja ka eje thei angatr. (Ite edomë 15:23) Ame la troa nyitipu Iesu, tre, loi e troa qaja atrune la elolone la maca ne Baselaia memine la aqane utipine i Iehova la itre atr.—Mat. 24:14; Luka 4:18.
4 Hnei Huliwa: Hnei Iesu hna eatrëne la itre nyipi aja ne la itre xan. (Mat. 15:32) Ame ngöne la easa cainöj, tre, hetrenyi mina fe la itre ijine ka aijijë së troa kuca la itre ewekë cememine la hni ka ihnim. Hnene la ketre trejine hna öhne la kola hnehengazo la ketre föe, pine laka thaa trotrohnine kö eahlo la hna qaja ngöne la telefon. Hnene la trejine föe hna ketre sipu tro troa xatua eahlo troa ujëne la itre hna qaja. Ene pe kola fe gojenyi eahlo ju troa ithanata Tusi Hmitrötr, celë hi ka xatuane la föe troa hane nyiqaane etid. Ame la ketre, tre, ketre trejine trahmanyi ka iwai hmaca ka traqa öhne la ketre atr e elëhni, hnei nyidrëti hna nue la ketre ita ne lapa ka hace ngöne la qene qëhnelö. Thupene la hna ixatua troa enijëne lai ita, hnene la trejine hna lapa hune ej me nyiqaane troa etid memine lai trahmany.
5 Ame la easa cainöje trootro, easë hi lai a amamane la ihnimi së koi Akötresie me kowe la itre atr asë. (Mat. 22:36-40) Jëne la itre hne së hna qaja memine la itre hne së hna kuca, canga tro hi la itre atr a atrehmekune laka the së la nyipici.