Ini 5
Tro La Itre Sinee i Akötresie a Mele Hnine La Paradraiso
Thaa ceitune kö la paradraiso, memine la fene hne së hna mele ngön enehila. Thaa aja i Akötresieti kö troa tiqa la fen, hnene la itre jole me itre ewekë ka ahleuhleune me akötrëne la mele ne la atr. Tro Nyidrëti elanyi a aparadraisone hmaca la fen. Troa tune kaa la paradraiso elany? Tro sa ce wange la hnei Tusi Hmitrötre hna qaja:
Itre atr ka lolo. Troa lapane la paradraiso hnene la itre sinee i Akötresie. Troa lolo la aqane imelekeu i angatr. Tro hë angatre a mele thenge la itre jë i Akötresie ka meköt.—Ite Edomë 2:21.
Troa munë la xen. Ame ngöne la paradraiso, thaa tro kö a mecijine la itre atr. Tusi Hmitrötre a qaja ka hape: “Loi e eje la qite ka nyimutre ngöne la nöj.”—Salamo 72:16.
Itre uma me huliwa ka lolo. Ame ngöne la paradraiso, tro ha isa hetre uma ne la nöjei hnepe lapa asë. Nge tro fe angatre a kuca, la itre huliwa ka troa hamëne la nyipi madrin.—Isaia 65:21-23.
Tingetinge e cailo fen. Thaa tro hmaca kö a icilekeu la itre atr me meci ngöne la itre isi. Kola qaja hnene la Wesi Ula i Akötresie, ka hape: “Kola nyi pune [hnei Akötresie] la ite ishi uti hë la cane la fene hnengödrai.”—Salamo 46:8, 9.
Troa egöcatr. Kola thingehnaeane hnei Tusi Hmitrötre ka hape: “Tha tro kö a qaja hnene la ate lapan’ej [paradraiso], ka hape, Ini a mec.”(Isaia 33:24) Ketre, pë hmaca kö troa hetre peje ca, maine ti mek, maine simi hnangenyë, maine atr ka hum.—Isaia 35:5, 6.
Pë hë akötr, me hleuhleu, me mec. Kola qaja hnene la Wesi Ula i Akötresie ka hape: “Pa hmaca kö mec, me hace hni, me teij, me aköt; ke patë hë la ite ewekë hnapan.”—Hna Amamane 21:4.
Tro ha paatre la itre atr ka ngazo. Kola thingehnaeane hnei Iehova ka hape: “Troa thupa tije la ite ka ngazo qa ngöne la [“ihnadro,” MN], nge troa feje tije la itete iaö qa ngön’ej.”—Ite Edomë 2:22.
Troa ihnimekeu me imetrötrë la itre atr. Thaa tro hmaca kö a hetrenyi la thiina ka thaa meköti kö, me iakötrë, me pi draië, me imethinë. Tro hë la nöjei atr a caas, me mele thenge la itre jë i Akötresie ka meköt.—Isaia 26:9.