Mekene 3
Drei La Nyipi Akötresie?
1. Pine nemene matre kapa jë hnene la ka alanyimu lo pane trenge ewekë ne la Tusi Hmitrötre?
MAINE ngöne la ketre heji epuni a gala draië me goëne la hnengödrai, maine jë hnei epuni hna haine la emanane la itre wëtresij? Haawe, atreine kö epuni troa qejepengöne la aqane nyinyapene itr’ej? Nge hapeu mina fe la itre xaa ka melëne la fenehnengödrai—tune mina fe la aqane nyihane la itre engene, memine la nöjei nine nyima ne la itre waco, tune mina fe lo trenge catre ne la wela, la kola lepe gejë? Ketre thatreine ju hë së troa e asë. Nge, thaa ka traqa xan asë kö la nöjei ewekë cili. The ange sesëkötre kö, ke, alanyimu catre la angetre kapa lo pane trenge ewekëne la Tusi Hmitrötr, lo hna hape: “hnei akötresieti hna xupe la hnengödrai memine la fenehnengödrai ngöne la qan”!—Genese 1:1.
2. Tuneka la aqane qeje pengöi Akötresie hnene la Tusi Hmitrötr, nge nemene hë la hna upi së lai troa kuca?
2 Isazikeu la aqane qejepengöne hnene la itre atr la Akötresie. Alanyimu la itre ka mekune ka hape ame la Akötresie, ke, ketre mene ka catre. Nge hnene la itre milio lao atr hna hmi kowe la itre xötrapane i angatre pine la hna mekune ka hape ka nanyi Akötresie e troa nyihlue kow. Ngo Tusi Hmitrötre pe a amamane ka hape, ka mele la Akötresie, nge aja i Nyidrë troa atrepengönyi së isa alacas. Drei la sipu kepine ka upi së troa “thele Akötresie,” nge kolo fe a qaja ka hape: “loi pe ke thaa iananyi kö nyidrë me eëshë asëjëihë.”—Itre Huliwa 17:27.
3. Nemene la kepine matre nyipi thaa ijije kö tro la atr a xupi tulune la ixajawa i Akötresie?
3 Hapeu, ka tuneka la Akötresie? Ala xalaithe hi la itre hluei nyidrë ka öhne jëne la itre iamamanyikeu la etrune la lolo i Nyidrë. Hnei Nyidrë hna qeje Nyidrë tune la atre lapane la theron, nge kola hudrume ketrepengöne hnei Nyidrë. Eje hi, thaa hna qejepengöne kö la iqëmeke i Nyidrë hnene la itre ka goëne la itre iamamanyikeu. (Daniela 7:9, 10; Hna Amamane 4:2, 3) Ame la kepine, ke, “Ua la Akötresie”; nge thaa ngönetrei kö Nyidrë tune la atr. (Ioane 4:24) Celë hi matre, thatreine jë kö troa xupiatrëne la qëmekene la Atre xupi së, pine laka, “pë palua kö ate goë Akötresie.” (Ioane 1:18; Esodo 33:20) Nyipici, Tusi Hmitrötre hmekuje hi la ka atreine ini së hnyawa la pengöi Akötresie.
HETRE ËJE I AKÖTRESIE
4. Nemene lo isa pengöne aqane hën atrunyi Akötresie hnene la Tusi Hmitrötr?
4 Ame ngöne la Tusi Hmitrötr, hna qejepengönyi Akötresie hnene la isa pengöne aqane hë Nyidrë, tune la “Akötesie ka’tein’ asë,” “Kasisitria,” “Ate xupe,” “Itete Ini,” “Joxue,” “Joxu ka eje palua kö.” (Genese 17:1; Salamo 50:14; Ate Cainöje 12:1; Isaia 30:20; Ite huliwa 4:24; 1 Timoteo 1:17) Nge troa kökötre the së la atrepengönyi Akötresie, e tro së a atre hnyawa la aliene la itre aqane hë Nyidrëti celë.
5. Drei la ëje i Akötresie, nge aija cinyihan eje ngöne la itre tusi qene heberu?
5 Ame ngöne la itre mekene tusi hna cinyihane qene Heberu, ke, kola troa traqa kowe la 7 000 la etrune la hna cinyihane la ëje i Akötresie—nge ka mana catre kö eje hune lo itre xaa aqane hëne atrunyi Nyidrë. Ase hë enehila sasaithe la 1 900 lao macatre nge thaa hna hë Akötresieti hmaca kö memine la sipu ëje i Nyidrë, pine la xoue hnëjine i angetre Iuda. Ame la ketre kepine, pëkö mata itusi föe ngöne lo itre ijine kola cinyihane la tusi qene Heberu. Celë hi matre thaa mama kö koi së la aqane hënei Mose me Davita ceitu me itre xane ekö lo foa lao mata itusi trahmany (יהוה), itre mata itus ne la atresiwai Akötresie. Hnene la itre ka inamacane hna mekune troa hëne la ëje i Akötresie “Yahweh,” ngo thaa mama hnyawa kö koi angatre la sipu aqane qaja. Ame thei angetre papale, itre hadredre hë lao macatre ne hëne angatre enehila la atresiwa i “Jehovah,” nge hna tune fe lai ngöne la itre xaa qene hlapa, kola hëne fe la atresiwa i Nyidrë thenge la sipu aqane ithanata i angatr—Ange wange ju la Esodo 6:3 me Isaia 26:4 ngöne la Tusi Hmitrötre qene Drehu.
PINE NEMENE MATRE LOI E TROA HËNE LA ËJE I AKOTRESIE
6. Nemene la aqane qeje Iehova ngöne la tusi Salamo 83:18, nge pine nemene matre nyipi ewekë tro së a hëne lapaane la ëje i Nyidrë?
6 Iehova hi la sipu ëje i Akötresie, nge nyine tro lai a atrehmekunyi matre thaa tro kö a imenune memine la itre xaa haze. Celë hi la kepine matre mana catre la ëje i Nyidrë ngöne la Tusi Hmitrötr, nge ketre pengöne catre kö eje ngöne la itre mekene hna cinyihane qene Heberu. Hnene la itre ka ujë qene hlapa hna thaa anyipiewekëne troa cinyihane la ëje i Akötresie, ngo Salamo 83:18 a qaja hnyawane ka hape: “Nge tro la nöjei ate a ate laka cilieti la kasisitia hmekuje hune la fene hnengödrai asëjëihë, nge Iehova la atesiwa i cilie.” Celë hi matre ka loi kö tro easë a qaja la sipu ëje i Akötresie ngöne la easë a ithahnata koi Nyidrë.
7. Nemene la aliene la ëje i Iehova thenge la aqane inine së la Akötresie?
7 Ame la kola qaja ka hape Iehova, ke, hna ithanata la ka cia qa ngöne la qene Heberu, kola hape “ka aejën.” Celë hi la aliene la ëje i Akötresie, ke, “Ka Aejëne Nyidrë.” Iehova Akötresieti a sipu qeje Nyidrë, ceitune me qaane Ka Tru ne la nöjei hna Thingehnaean. Nge hnei Nyidrëti pala hi hna aeatrëne la itre mekuana i Nyidrë. Ka meköti hnyawa kö la troa hëne la Akötresie ka nyipici memine la ëje celë, ke, ame la atr, thatre kö angeice la pengöne la drai elanyi me itre hna mekune kow. (Iakobo 4:13, 14) Ngo Iehova caasi hi la ka ijije troa qaja ka hape: “Tro ha tune lai la tenge ewekënge kola tro pi qa ngöne la qeng. . . . Me eate ngöne la ewekë hnenge hna upe eje kow.”—Isaia 55:11.
8. Nemene lo hna thingehnaeane hnei Iehova jëne Mose?
8 Hnene la itre xötrapane i angetre Heberu ene Aberahama, Isaka, me Iakobo hna “hëne la atresiwai Iehova,” ngo thatre kö angatre la aliene la ëje cili. (Genese 21:33; 26:25; 32:9; Esodo 6:3) Sihngödri petre kö la aliene la ëje i Nyidrë, thatre petre kö angatre lo hnei nyidrëti hna troa thingehnaean, ene la troa sei angetre Isaraela qa Aigupito me hamë nyiudrene “la nöje ka di hnei zane thi me hani.” (Esodo 3:17) Ngo ame pe, thupene jë hi hnei Akötresie hna qaja amamane koi Mose la aliene la ëje i Nyidrë, önii Nyidrë ka hape: “Tro eö a qaja tune la kowe la nöjei neköi Isaraela ka hape, ‘Hnei Iehova Akötesieti ne la ite keme i nyipunie, Akötesi Aberahama, me Akötesi Isaaka, me Akötesi Iakobo, la ate upi ni koi nyipunie.’ Celë hi ëjenge epine palua, nge celë hi nyine meku ni ngöne la nöjei xöt.”—Esodo 3:15.
9. Drei lae Iehova koi Farao?
9 Hnei Mose hna sipone koi Farao, joxu ne Aigupito, troa upe la angetre Isaraela kowe la hnapapa matre hmi koi Iehova. Ngo hnei Farao, atr hna xouene ceitu me itre xaa haze, ngo ka hane thili pe kowe la itre xaa haze ne Aigupito hna sa ka hape: “Ke dei Iehova ma tro ni a denge la aqane ewekëi nyëne, troa nue angete Isaraela? Tha’te Iehova kö ni, nge thaa tro kö ni a nue angete Isaraela.”—Esodo 5:1, 2.
10. Ngöne la ijine i angetre Aigupito ekö, Nemene lo hnei Iehova hna kuca matre aeatrëne la hnei Nyidrë hna thingehnaeane kowe la angetre isaraela?
10 Ame hnei Iehova hna kuca la itre ewekë ka troa aejëne trongëne la itre aja i Nyidrë nge ka ihmeku memine la aliene la ëje i Nyidrë. Hnei Nyidrëti hna atë hune la nöje Aigupito ekö la trene lao mec. Hna nyipune hnene la hna humuthe la itre neköne haetra i angatr, uti fe hë la nekö i Farao. Celë hi matre xeci jë e kuhu hni angetre Aigupito la troa upetrije la itre nekö i Isaraela. Ngo ame pe, hna ketr la itre xane e angetre Aigupito hnene la mene i Iehova ame hnei angatre hna hane mejë thenge la angetre Isaraela.—Esodo 12:35-38.
11. Nemene la ewekë ka tru nyine haine hnei Iehova hna kuca kowe la Hnagejë ka Palulu, nge nemene hë la pune nyine tro la angetre icilekeu me Nyidrë a wangatrehmekun?
11 Catre hë la pi tru thei Farao, haawe, ame hnei nyidrëti hna icasikeune la itre atr ne isi, me itre hadredre lao ikariota troa weje abëekëne hmaca la itre hlue i nyidrë. Nge calemi hë la angetre Aigupito, ame hnei Akötresie hna amamane la mene i Nyidrë ene la kola thupa luëne pi la Hnagejë ka Palulu matre thuejëne la angetre Isaraela kowe la ketre götrane la ihnadro. Ene pe, hane ju hi Farao me itre sinexöle i nyidrë lö nyipine la hnagejë, ame hnei Iehova hna “feje la ite otrue ne la itre ikariota i angat, ame hna hace troa hul.” Nge hna sue hnene la itre atr ne isi i angetre Aigupito ka hape: “Eëshë a köte e angete Isaraela, ke, Iehova a nyi xöle i angate me thupëjia shë angete Aigupito.” Ngo thaa ijine hmaca kö. Ke, kolo hmaca ha uligötre la lue hagene la hnagejë me “hetine la nöjei ikariota me itete ti hos, me ite ishi Farao asë.” (Esodo 14:22-25, 28) Haawe, hanawange la aqane atrune Iehova la ëje i Nyidrë, ke, uti hë enehila, thaa thëthëhmine palakö lo lai akötre ka traqa ekö.—Iosua 2:9-11.
12, 13. (a) Nemene la aliene la ëje i Akötresie koi së enehila? (b) Nemene la nyine tro la itre atr a canga inine enehila, nge pine nemen?
12 Sisitria ha koi së enehila la aliene la ëje i Akötresie tune la aqane sipu atrune Nyidrë. Ame la ëje i Nyidrë, Iehova, ke, enyipicine hi lai laka, ame asë hi lo nöjei ewekë hnei Nyidrëti hna ajan, ke, tro kö Nyidrëti a aeatrën. Ceitune memine lo pane aja i Nyidrë, ene la troa paradraiso la fen asë. (Genese 1:28; 2:8) Qa ngöne lai, tro kö Akötresie a apaatrene la itre ka icilekeu memine la mus i Nyidrë ngöne la hnedrai së, drei lai kepine matre Nyidrëti a qaja ka hape: “Nge tro angat’a ate laka ini Iehova.” (Ezekiela 38:23) Celë hi matre tro kö Akötresie a aeatrëne la itre isisinyikeu i Nyidrë ene la troa hamëne kowe la itre hlue i Nyidrë la fene ka hnyipixe nge ka meköt.—2 Peteru 3:13.
13 Loi e tro la nöjei atr asë ka thele Akötresie, a inine troa hëne la atresiwa i Nyidrë cememine la lapaun. Tusi Hmitrötr a thingehnaeane ka hape: “Tro ha mele angate asë angete hëne la atresiwa i Iehova.” (Roma 10:13) Nyipici, tru la aliene la ëje i Iehova. Haawe, ange hëne jë la atresiwai Iehova tune lo Akötresi epuni fe nge Atre iamele ka ijije troa nyi jë i nyipunie kowe la manathithi ka epine palua.
ITRE THIINA KA LOI I AKÖTRESIE
14. Nemene la itre thiina ka sisitria i Akötresie hna qaja draiëne hnene la Tusi Hmitrötr?
14 Ketre ini ka nyipiewekë catre koi së la aqane thapa qa aigupito la angetre Isaraela, kola amamane la foa lao thiina ka meköti, ka eje pala hi thei Akötresie. Hnei Nyidrëti hna amamane laka atraqatre la mene i Nyidrë, hnene la ewekë hnei Nyidrë hna kuca koi farao. (Esodo 9:16) Hna amamane la ejuine la inamacane i Akötresie qa ngöne la aqane maca i nyidrë troa senge la nöjei ejolene la mel. (Roma 11:33) Nyidrëti mina fe a amamane la meköt i Nyidrë ngöne la Nyidrëti a tuluthe la thupene kowe la itre ka pi tru me cile troa akötrëne la itre atre i Nyidrë. (Deuteronomi 32:4) Ihnimi la thiina ka sisitria i Akötresie. Hnei Iehova hna amamane la ihnimi ka sisitria i Nyidrë ngöne la Nyidrëti a aeatrëne la itre isisinyikeu hna kuca kowe la itre xötre neköi Aberahama. (Deuteronomi 7:8) Nyidrëti mina fe a amamane la ihnim i Nyidrë ngöne la Nyidrëti a nue kowe la angetre Aigupito troa thipetrije lo itre haze ka thoi matre ujë pe troa thili kowe la nyipi Akötresie Atre troa hamë angatre la nyipi manathith.
15, 16. Ngöne itre götrane ka u, la kola mama la ihnim i Akötresie?
15 Ngöne la epuni a e la Tusi Hmitrötr, tro hë epuni a öhne laka ame la ihnim, ke, celë hi thiina i Akötresie ka sisitria, nge ka mama ngöne la nöjei götran. Hanawange la nyine anyipicin, pine la ihnime ka eje thei nyidrë, hetre aja i nyidrë troa ce thawa la mele e hnengödrai memine la itre pane xupuana i nyidrë ene la itre ua. Itre hadredre milio la etrune la itre angela ka hni pala hi koi Akötresie me atrunyi Nyidrë. (Iobu 38:4, 7; Daniela 7:10) Nyidrëti mina fe a amamane la ihnim i Nyidrë ngöne la Nyidrëti a xupe la fene me hnëkën eje matre mele madrine la atr.—Genese 1:1, 26-28; Salamo 115:16.
16 Nyimutre catre la itre manathithi hne së hna kapa jëne la ihnim i Akötresie, matre thatreine kö së troa e la etrune itre ej. Jëne la ihnim i Akötresie hnei Nyidrë hna xupe la ngönetrei ka ketre pengön, nge nyine haine matre aijijë së troa öhnyi loi ne la mel. (Salamo 139:14) Ketre tune mina fe, ihnim i Nyidrëti a mama jëne la itre ahnahna hna hnëkëne tune “la manie qa hnengödrai, me ite ijine ka meledrai, me amejine la ite hni [nyisë] hnene la xeni me madin.” (Itre huliwa 14:17) Ngöne la nöjei ijin, ke, Akötresieti “a axulune la jö i anganyidë hune la nöjei ka ngazo me ka loi, me upe la manie kowe la nöjei ka meköti me ka thaa meköti kö.” (Mataio 5:45) Ketre, jëne la ihnim ne la Atre xupi së, Nyidrëti a xatua së troa hetrenyi la atrehmekune matre xatua së troa nyihluei Nyidrë thenge la madrine ka eje thene la nöjei hlue i Nyidrë. Nyipici, “Akötresie la ihnim.” (1 Ioane 4:8) Ngo nyimutre palakö la itre xaa thiina i Nyidrë.
“AKÖTRESIE ATRE UTIPIINE ME KA IHNIM”
17. Nemene la aqane qejepengö i Akötresie koi së jëne la tusi Esodo 34:6, 7?
17 Thupene la hnei angetre Isaraela hna tro nyipine la Hnagejë ka Palulu, nyipiewekë tro pala kö angatre a thele troa atre Akötresieti hnyawa. Hna eje thei Mose la aja cili, celë hi matre angeic a thithi ju me hape: “Qa ngöne lai maine e hnimi ni hnei enëtilai, ma amamai ni la kala i enëtilai, mate ate enëti kö lai hneng, mate hnimi ni hnei enëtilai.” (Esodo 33:13) Nge Mose a atrehmekunyi Akötresie hnyawa thupene la hna drenge la Akötresie a ulatine ka hape: “Iehova, Iehova Akötresie, ate utipine me ka ihnim, ate xomi hni ahoean, nge ka tru loi me nyipici, ate thupëne la ihnimi thatraqane la nöjei thausan, me nue tije la menu, me hna shashaith, me ngazo; nge thaa trojë kö a jele pë ngazone la ite ka ngazo.” (Esodo 34:6, 7) Hna nyi ifegone la ihnim i Akötresie hnene la meköt i Nyidrë, ke, thaa hnei Nyidrëti kö hna thupëne la itre atr matre trianyi angatre qa ngöne la ngazo hna majemine kuca, ngo hnei Nyidrëti pe hna nue angatre troa xeni pune la itre menu i angatr.
18. Hnei Iehova hna amamane tuneka, ka hape Atre utipiine Nyidrë?
18 Tune la aqane inine i Mose, hetrenyi thei Iehova la utipiin. Ame la ka hetre utipiin, ke, angeic a ce akötre me itre hna qanangazon, me sikusikune troa xatua angatre ngöne la itre akötre i angatr. Celë hi matre Akötresie a amamane la utipiine i Nyidrë kowe la itre atr, ene laka Nyidrëti a hamëne la xeni thatraqane la nöjei ijine me xatuane pala hi la itre ka akötre, me itre ka wezipo, me itre ka kucakuca. (Hna Amamane 21:3-5) Akötre la melene la itre ka nyihluei Akötresie, pine laka angatr a mele ngöne la fene zine la ngazo, maine angatre pena a kepe thupene lo itre menu i angatre ekö. Ngo e tro angatr a ipië me thele ixatua thei Iehova, haawe tro hë Nyidrëti a akeukawanyi angatre me xatua angatr. Pine nemene? Pine laka hetrenyi thei Nyidrëti la utipiine matre Nyidrëti a amamane kowe la itre hlue i Nyidrë.—Salamo 86:15; 1 Peteru 5:6, 7.
19. Pine nemene matre ijiji së troa qaja ka hape ka ihnimi lae Akötresie?
19 Hnene la itre ka cile fë la musi hna waja huje la itre xaa atr. Drei la aqane iananyine la thiina i angatre me Iehova lo atre hnime la nöjei hlue i Nyidrë ka hetrenyi la thiina ka ipië! Ngacama Nyidrëti la musi ka sisitria hune la fene hnengödrai asë, ngo ka mama pala hi la ihnim i Nyidrë jëne la itre huliwa i Nyidrë kowe la atr. (Salamo 8:3,4; Luka 6:35) Iehova mina fe a hnime la isa alacas, ke, Nyidrëti a kapa la itre sipo i angatre troa thupë aloinyi angatre. (Esodo 22:26, 27; Luka 18:13, 14) Nyipici, ame la lolo me ihnime hne së isa alacasi hna kapa qa thei Akötresie, ke, ihnimi ka sisitria, ihnimi gufa. (Esodo 33:19) Celë hi matre nyipiewekë catre tro së a atreine wangatrune la Akötresie ka utipiine me ka ihnimi.—Salamo 145:1, 8.
KA HMITRE ELËHNI, KA THAA IWANGATREHMEKUNYI ATR KÖ, NGE KA MEKÖT
20. Nemene la ka amamane ka hape ka thaa canga elëhni kö Iehova me ka thaa iwangatrehmekunyi atr kö Nyidrë?
20 Ame Iehova, ka hmitre elëhni. Thaa kolo kö a qaja ka hape pëkö ewekë tro Nyidrë a kuca kowe la atr ngazo thiina, ke, hnei Nyidrëti lo hna apaatrene lo Farao ka pi tru memine la itre atr ne isi i angeice ngöne la Hnagejë ka Palulu. Tha ka iwangatrehmekunyi atr kö Iehova. Nyipici, hnei Nyidrëti hna thupë aloinyi angetre isaraela, ngo thupene lai, ke, hna nyi ifegone la ihnim i Nyidrë koi angatre, pine hi la ngazo hnei angatre hna catre fë. Hnei Akötresie hna kapa la itre ka nyihlue koi Nyidrë qa ngöne la nöjei nöj asë, ene hmekuje hi lo itre ka xötrethenge la meköt i Nyidrë.—Itre huliwa 10:34, 35.
21. (a) Nemene la ini hnene la tusi Hna Amamane 15:2-4 hna hamëne koi së göi Akötresie? (b) Nemene la ka troa xatua së matre atreine së kuca lo itre ewekë ka loi hnei Akötresie hna amekötin?
21 Hnene la tusi Hna Amamane hna qaja atrune la enyipiewekëne la itre “hna amekötine” hnei Akötresie. Tune la aqane qaja koi së hnene la nyima ne la itre ua e hnengödrai: “hmapati me nyine haine la ite huliwai cilie, joxu Akötresieti kapucatinasë; meköti me nyipici la ite kalai cilie, cilieti joxu ne la nöjei nöj. Joxu fe, deti la ate ka thaa tro ha qou me atrune la atesiwai cilie? Ke cilieti casi hi la ka hmitröt; ke tro ha tropi la nöjei nöj asejëihë troa thili xajawai cilie, ke mama ha la ite hna ameköti cilie.” (Hna Amamane 15:2-4) Tro së a amamane la xoue me metrötrë i Iehova, hnene la ka easë a melëne la itre hnei Nyidrë hna amekötin. Ixatua lai koi së matre tro pala hi së a mekune kowe la Akötresie ka inamacane me ihnim. Nge nyine loi koi së la itre hna amekötine hnei Anga nyidrë.—Isaia 48:17, 18.
“IEHOVA LA AKÖTRESI SË KA CAS”
22. Pine nemene matre loi e tro la itre ka kapa la Tusi Hmitrötr a thipetrije la lapaune kowe la Tirinite?
22 Hnene la nöje Aigupito ekö hna nyihluene la nöjei haze ka nyimutre, ngo ame Iehova, ke, “Akötresie ka isaxolo.” (Esodo 20:5) Mose a ahnithe kowe la angetre isaraela ka hape ame “Iehova ka cas.” (Deuteronomi 6:4) Iesu mina fe a qaja hmaca la ithanata cili. (Mareko 12:28, 29) Celë hi matre thaa tro kö la angetre kapa la Tusi Hmitrötre ceitu me Wesiula i Akötresie a hmi kowe la Tirinite ene lo haze hna hape ala köni ngo caasi hi. Ketre thaa hna hane fe kö cinyihane la “Tirinite” hnine la Tusi Hmitrötr. Ketre kö la nyipi Akötresie, nge ketre kö Iesu Keriso. (Ioane 14:28; 1 Korinito 15:28) Nge ame la uati hmitrötre i Akötresie, ke, thaa atr kö. Ngo ame pe, trenge catre i Iehova, kolo hnei Nyidrë hna hamëne matre eatre pi la itre aja i Nyidrë.—Genese 1:2; Ite Huliwa 2:1-4, 32, 33; 2 Peteru 1:20, 21.
23. (a) Nemene la ka troa aciane thei nyipunie la ihnim i Akötresie? (b) Nemene la aqane qejepengöne Iesu la ihnim i Akötresie, nge nemene la ewekë nyine tro së a atre göi Iesu?
23 Maine jë wangatrehmekune hë epuni la lolo i Iehova, hapeu, xeci hnyawa kö koi epuni laka, Nyidrëti hmekuje hi la nyine tro epuni a hmi kow? Haawe maine tro epuni a inine la Wesiula i Nyidrë, ene la Tusi Hmitrötr, ke, tro fe hë epuni a atre Nyidrëti hnyawa me öhne hnyawa la itre hna amekötine ka troa tro xomi epuni kowe la tingetinge me manathithe uti hë epine palua. (Mataio 5:3, 6) Nge troa kökötre fe thei epuni la ihnim i Akötresie. Celë hi la kepine matre Iesu a qaja ka hape: “Nge tro eö a aja Iehova Akötresi eö hnene la hni eö ka pexeje, me U i eö ka pexeje, me mekune i ö ka pexej, me trengecatre i eö ka pexeje.” (Mareko 12:30) Nyipici, drei la aqane hnimi Akötresie hnei Iesu. Ngo tuneka la aqane qejepengönyi Iesu hnene la Tusi Hmitrötre koi së? Nge nemene la aqane tro nyidrë a aeatrëne la trepene mekune i Iehova?
HAPEUE LA HNEI EPUNI HNA ININ
Drei la ëje i Akötresie, nge hna aija cinyihan eje ngöne la tusi qene Heberu?
Pine nemene matre nyipi ewekë koi epuni troa hëne la nyipi ëje i Nyidrë?
Nemene la itre thiina i Akötresie ka mama cile hnyawa koi epun?
[Iatr ne la götran 29]
Tro nyipunie a atre hnyawa tuneka la Atre xupe la fene hnengödrai asëjëihë?