Tune Kaa La Aqane Ujë La Itre Temoë Iehova Kowe La Itre Ka Tha Ce Hmi Hmaca Kö Me Angatr?

Eahuni a isine troa hnim, me metrötrëne la nöjei atr. Maine tha cainöje hë la ketre Temoë Iehova maine tha angeice hmaca kö a sine la itre icasikeu hun, eahun a thel troa xatua angeic, me hnimi angeic matre tro hmaca a mel la lapaune i angeic.—Luka 15:4-7.

Ame itre xaa ijin, hnene la aqane ujë ne la ketre trejin, matre kola upi angeic qa ngöne la ekalesia. (1 Korinito 5:13) Ngo pine laka, tru la ihnimi hun kowe la itre sine hmi hun, matre eahuni a isin matre tha tro kö a up la ketre qa ngöne la ekalesia. Ngacama upi angeice ju hë, ngo eahuni pala hi a hnimi angeic me metrötrë angeic, thenge la hna qaja hnei Tusi Hmitrötr.—Mareko 12:31; 1 Peteru 2:17.

Hnauëne la kola up la ketre atr qa ngöne la ekalesia?

Öni Tusi Hmitrötr, maine hetre ka kuca la ketre ngazo ka tru, nge xele kö angeic ma ietra, loi e troa upi angeic qa ngöne la ekalesia.a (1 Korinito 5:11-13) Hna qaja e hnine la Tusi Hmitrötr la itre ngazo ka tru. Maine jë, hnei angeic hna nyixetë, maine iji gorok, maine ihumuth, maine ilep, maine atrekënö.—1 Korinito 6:9, 10; Galatia 5:19-21; 1 Timoteo 1:9, 10.

Ngo tha kolo kö a canga up la atr ka kuca la ketre ngazo ka tru. Tro la itre qatre thupb ne la ekalesia a pane thel troa xatua angeic matre tro angeic a saze. (Roma 2:4) Angatr a isine troa menyik, me loi thiina matre ketr la hni angeic. (Galatia 6:1) Maine jë tro angeic a trotrohnin la ngazo hnei angeic hna kuca, me ietra. (2 Timoteo 2:24-26) Maine anyimua xatua angeic, ngo tha saze kö angeic, angeic pala hi a kuca la ngazo me tha ietra, troa upi angeic qa ngöne la ekalesia. Tro la itre qatre thup a thuemacanyine la ekalesia laka, tha Temoë Iehova hmaca kö angeic.

Nemene la thangane la kola up la atr ka kuca la ngazo qa ngöne la ekalesia? Kola metrötrëne la itre trepene meköti Akötresie göne la loi me ngazo hnene la ekalesia, nge kolo fe a thupëne ej qa ngöne la aqane ujë i angeic. (1 Korinito 5:6; 15:33; 1 Peteru 1:16) Ketre, tro lai a ukune la atr ka kuca la ngazo troa saze me ietra.—Heberu 12:11.

Tune kaa la aqane ujë la itre Temoë Iehova la angatr a iöhnyi memine la atr hna up?

Öni Tusi Hmitrötr, “tha tro hmaca kö nyipunie a nyi sineene la itre” hna up qa ngöne la ekalesia, “goi tha tro fe nyipunieti a hane ce xeni me itre ka ujë tun.” (1 Korinito 5:11) Matre tha eahuni hmaca kö a ce tro me angeic. Ngo tha eahuni kö a ithatre me angeic. Eahuni a metrötrë angeic. Maine angeic a pi sine la itre icasikeu, ke madrine eahuni troa ibozu me angeic.c Nge ijiji angeic troa sipo ixatua kowe la itre qatre thup.

Tune kaa e kola up la trahmanyi qa ngöne la ekalesia, ngo ka Temoë Iehova pala hi la föi angeic me itre nekö i nyidro? Saze hë la aqane hmi i angatr, ngo eje pala hi la fami angatr. Pine laka, angatr a ce lapa ngöne la uma, lue ka faipoipo pala hi nyidro, nge ketre fami pala hi angatr, matre loi e tro angatr a ihnim.

Ijije hi tro la atr hna up a sipone kowe la itre qatre thup troa wai angeic. Tro angatre lai a hamën la itre eamo qa hnine la Tusi Hmitrötr cememine la ihnim, me ithuecatr koi angeic troa ietra me bëek koi Akötresie. (Zakaria 1:3) Maine tro angeic a saze me hetre aja troa mel thenge la itre trepene meköti Akötresie, tro hmaca a kepe angeic ngöne la ekalesia. Tro la ekalesia a ‘nue hnyawane la ngazo i angeic, me akeukawanyi angeic,’ tune la aqane kuca la ekalesia ne Korinito kowe la atr ka kuca la ngazo ekö.—2 Korinito 2:6-8.

Nemene la mekuna ne la itre xan hna up ekö qa ngöne la ekalesia?

Hane hi la hna qaja hnene la itre xaa Temoë Iehova hna up ekö, nge ka bëek hmaca koi Akötresie.

“Ame la eni a mekun troa bëek, mekuna i eni ka hape, tro la itre qatre thup a pi atre la hnenge hna kuca ngöne la 10 lao macatre ne lapa ni e kuhu trön. Ngo hnei angatr pe hna qaja ka hape, ‘Aja i eahun tro eö a goeën la hnei eö hna troa kuca enehila.’ Celë hi ka akeukawanyi ni.”—Maria, Etazini.

“Itre trejin ne la ekalesia a ajan tro ni a bëek. Drenge hi ni la ihnimi angatr. Hnei angatr hna xatua ni troa trotrohnine laka, ase hë Iehova memine la ekalesia nue la ngazong, celë hi ka xatua ni troa avas. Hnene pala hi la itre qatre thup hna xatua ni troa acatrene la imelekeung me Iehova. Hnei angatr hna akeukawanyi ni me qaja ka hape, ka nyipiewekë eni koi Iehova.”—Malcom, Sierra Leone.

“Eni a madrin laka, tru la ihnimi Iehova kowe la nöje i Nyidrë, matre Nyidrëti a isine matre tro pala hi ej a wië. Ngacama itre xan a mekun ka hape, ka catre pala ha la ihaji, ngo ame koi ni, ka nyipiewekë, nge hatrene ihnimi lai. Eni a olene koi Nyidrë, ke Akötresie ka ihnim nge ka nue la ngazo.”—Sandi, Etazini.