Fene la musi Akötresie, ka tingeting me cas la nöjei hna xup asë

Hnauëne Laka, Ka Nyipiewekë Koi Së La Baselaia i Akötresie?

Ame ngöne la qan, casi hi la Atre Mus, ene Iehova, Atre Xupi së. Ihnim la ka nyitrepene la musi Nyidrë. Hnei Nyidrëti hna xup kowe la itre atr la ketre göhnë ka mingöming, ene la hlapa e Edrena. Ka mana la xen e cili. Nge, hetre huliwa ka lolo hnei Nyidrëti hna athipi kowe la lue pane atr. (Genese 1:28, 29; 2:8, 15) Maine lapa ju la atr fene la musi Nyidrë, tro angeic a mele tingeting.

Adramu a xolouthe la sinöe hna wathebon, hna hamë angeic hnei Eva. — Hnene la lue pane atr hna cil kowe la musi Akötresie

Öni Tusi Hmitrötr, hnene la ketre angela ka icilekeu, hna hën e thupen ka hape, Satana Diabolo, hna cile kowe la emeköti Akötresie troa mus. Öni angeic, troa madrine la atr, e tha angeice kö a drengethenge Akötresie, me mele fene la musi Nyidrë. Ngo, hnene la pane keme me thine së, ene Adramu me Eva, hna xötrethenge Satana, me icilekeu me Akötresie.—Genese 3:1-6; Hna Amaman 12:9.

Pine laka, hnei Adramu me Eva hna thipetrij la musi Akötresie, tha ijiji nyidro hmaca kö troa mele palua ngöne la paradraiso. (Genese 3:17-19) Tro fe la itre nekö i nyidro a xeni pun la aqane axecië mekune i nyidro. Hnei Adramu hna kei kowe la ngazo, ame “hna haöthe la fen hnene la ngazo . . . nge meci a traqa pine la ngazo.” (Roma 5:12) Hetre ketre ewekë ka xulu qa ngöne la ngazo: “Kete ate a musinëne la kete mate angazo nyëne kö.” (Ate Cainöj 8:9) Haawe, tro palahi a hetre jol, e tro la atr a mus.

MUSI PENA LA ATR

Ka pi tru Nimeroda. Ame e hutrö, itre atr a xup la ketre ibatima. — Hnei Nimeroda hna cil koi Iehova

Tusi Hmitrötr a qaja la pane atr ka mus, ene Nimeroda. Hnei angeic hna cil kowe la musi Iehova. Qane lo ijine cili, itre atr a huliwane menune la musi angatr. Öni Solomona joxu, a 3 000 hë lao macatre enehila, ka hape: “Hana wang, ite tenge timida i ange hna axösisin, nge pëkö ate xatua angat ; nge tene mene la itete axösisi angat, ngo pëkö ate xatua angat.”—Ate Cainöj 4:1.

Casi palahi enehila! Önine la ketre itusi Nations unies (2009), “Kola akötr la itre atr, hnene la aqane mus.”

IJINE HË!

Itre atr a ajan la ketre musi ka lolo, nge hna cilëne hnene la itre atr ka loi. Kolo hi lo hna thingehnaean hnene la Atre Xupi së!

Iatr: Ethane la itre musi atr. 1. Ketre föe sinoa a lapa xome la nekö i angeic ka treij e kuhu hnadro. 2. Ketre qatr ka wezipo e pital. 3. Itre sooc ngöne la hna isi a huji kuqa. 4. Ka elëhni la itre atr, me amamane la itre pancartes. 5. Ketre thin me kuku a bëeke kowe la hnalapa, nge hna akawane la qëhnelö i angatr. 6. Ketre traon ka hajihaji hnene la itre ibatima. — Goi thatre fe la itre musi atr apëne la itre jol ka tru

Hnei Akötresie hna acil la ketre Baselaia. Tro ej a nyihnan la nöjei musi atr, “nge tro ej’ a cile hut’ epine palua.” (Daniela 2:44) Eje hi lo lai Baselaia hna thithi fë hnene la itre milio lao atr. (Mataio 6:9, 10) Ngo, tha Akötresieti kö la ka troa cilëne la Baselaia cili. Hnei Nyidrëti pe hna acili joxun la ketre angela ka hane ce mel memine la itre atr. Drei jë lai?