Kola Sa La Itre Hnyinge i Nyipunie

◼ Ijije kö tro la ketre Anyipici Iehova a nyi nyine la meci angeic hnine la ketre pital maine ngöne la ketre uma thatraqane la itre qatr, hna cilëne hnene la ketre hmi ka thoi?

Nyimutre la itre hmi ka thoi, ka cilëne la itre pital maine uma thatraqane la itre qatr ka hamë drösinöe maine aqane inyië ka loi göne lo itre meci ka pë nyin. Eje hi laka, ame la itre iuma cili, tre, thaa hna xupe kö troa sajuëne la itre aja i Babulona Atraqatr. (Hna ama. 18:2, 4) Ame la itre iuma cili, tre, hna pane xupi angatre hnene la itre hmi ka thoi kösë ketre jëne ne hetre mani. Ame enehila hetrenyi la itre xaa pital ka xome pala kö la ketre ëjene hmi, pine laka hna acile hë ekö hnei hmi, ame itre xan, tre, hetrenyi pala kö la itre hnëqa hna cilëne hnene la itre hene ne hmi.

Maine tro la ketre Atre Anyipicine i Iehova a thele la ketre pital maine uma thatraqane la itre qatr, matre troa nyi nyine la meci angeic, eje hi laka, nyipi ewekë tro angeic a ketre sipu axecië mekun, göne troa tro kowe la itre iuma cili, ngacama hna acile hnei hmi ka thoi. Ijije tro la mekuthethewe ne la ketre a upi angeic troa tro kowe la itre iuma cili, ngo ijije fe tro la mekuthethewe ne la ketre a sewe angeic troa tro kowe lai. (1 Tim. 1:5) Troa hetre thangane la itre xaa ewekë ngöne la itre mekune hne së hna axeciën, celë hi matre ka loi troa wange hnyawa itre ej.

Drei la ketre ceitun, maine jë thaa ka nanyi kö qa ngöne la hnei epuni hna lapa la ketre pital maine uma thatraqane la itre qatr, hna ati ëjene hnei hmi. Maine, troa hetrenyi pena la itre iuma ka easeny nge ka ce huliwa me hmi ngöne laka, maine jë troa sisitria catre kö la aqane nyinyine itre ej la itre mec. Maine pena, kolo hmekuje hi lo pital hna ati ëjene hnei hmi la ka trene jia ne huliwa göne la troa hamëne la ketre drösinöe ka ihmeku hnyawa memine la meci ne la atr nge maine jë, e cili hmekuje hi la hna huliwa ngön hnene la droketre i epun maine ka troa xöji epuni pena. Kola mama mina fe ngöne la itre xaa ijin, laka hetrenyi la itre pital hna acile hnei hmi, ka metrötrëne la aqane waiewekë së itre keresiano göne la kola huliwaane la madra. Ngo hetrenyi fe la itre xaa pital hna acile hnei ketre trene mani maine hnei musi pena, ngo ka thaa metrötrëne kö la wathebo hne së hna xötrethenge göne la madra. Qa ngöne lai, qëmekene tro nyipunieti a axecië mekune göne la pital hnei epuni hna troa tro kow, loi e tro nyipunie a pane wanga atrune la itre ewekë cili.

Maine hnei nyipunie hna axecië mekune, ka hape, epuni a tro kowe la ketre pital maine uma thatraqane la itre qatr hna acile hnei hmi, tre, maine jë tro nyipunie a xome lai, ceitune memine la epuni a nyi thupene la ketre atr ka troa huliwa koi epun. Maine jë, epuni a goeëne lai kösë ketre huliwa hna acile hnene la ketre hmi, nge ame la epuni a nyi thupene la hna inyië, tre, thaa epuni kö lai a hamëne mekötine la ketre ahnahna nyine sajuëne la hmi ka thoi. Ngo epuni hi lai a nyi thupene la ketre ewekë hna salemëne maine pena ketre ewekë ka loi hna kuca koi epun.

Nyipici, ame koi së itre keresiano, nyipi ewekë troa xeci hnyawa koi së laka thaa easë kö a hane sine la itre huliwa ne la hmi ka thoi. Ketre mina fe, thaa tro pi kö sa hëne la itre atr ka huliwa hnine la itre iuma cili, maine itre ka iwai pena, ka hape “Penëdi” maine “Sörëdi.” (Mat. 23:9) Loi e tro hi a goeëne lai tune la ketre hnë huliwa i itre ka troa thele nyin kowe la meci epun, nge eje hë lai.

Ame la easa lö koi pital, loi e tro sa canga qaja amamane, ka hape, ketre atre Anyipicine i Iehova së, nge ame la aja së, tre, troa hane wai së hnene la itre qatre thup ne la ekalesia. Ketre, ame ngöne la easa lapa pital, loi e troa xecie hnyawa koi së laka tro hë sa kepe ixatua ngöne la götrane la ua qa thene la itre qatre thup.—1 Thes. 5:14.

Loi e tro la itre atrene la hnepe lapa ka hmi, me itre qatre thup, memine la itre xaa trejine ne la ekalesia, a atrehmekune laka, hnëqa i angatr troa wange hnyawa la itre aja ne la itre trejin, trahmanyi me föe ka qatre hë, ene lo itre ka lapa ngöne la itre uma thatraqane la itre qatr hna acile hnei hmi ka thoi. E tro sa catre pala hi ngöne la götrane cili, eje hi laka, tro ha thue trenge catre kowe la itre trejine së ka qatre hë, nge ketre, tro ha hmekë angatr, ngöne la troa lö hnine menune la itre huliwa ne la itre hmi ka thoi, itre feet, maine itre xaa huliwa pena hna kuca ngöne la itre iuma cili.

Maine tro sa lapa fë hnyawa la itre mekune cili, tro hë së isa ala caas a wanga atrune la itre aqane melene la itre atr, nge thupene lai, tro hë sa isa axecië mekune ngöne la aqane tro sa xatuane la itre qatr trahmanyi me föe, ka lapa pital maine hnine ketre uma thatraqane la itre qatr.—Gal. 6:5.