Truelof Lao Kepin

Hnauëne laka easa cainöje trootro, me inine la itre atr? Maine jë hnene laka, easa ajane tro la itre atr a xötrëne la gojenyi ne mel. (Mat. 7:14) Celë hi lai mekune ka pane mama e cahu; ngo tha celë kö lai pane kepine matre easa cainöj. Hane hi cahu 12 lao mekun; ame koi epun, tre nemene la kepine ka tru matre easa cainöj?

1. Jëne mele lai kowe la itre atr.—Ioane 17:3.

2. Jëne tro së lai a hmekëne la itre atr ka ngazo. —Ezek. 3:18, 19.

3. Aqane tro së lai a aeatrëne la hna perofetane hnei Tusi Hmitrötr.—Mat. 24:14.

4. Aqane tro së lai a jele meköti Akötresie. Ame hë elanyi la Iehova a troa apatrene la itre atr ka ngazo, pë pi kö tro ketre a qaja ka hape, tha hane ju kö Nyidrëti nue ijine koi angatr troa hane ietra.—Ite hu. 17:30, 31; 1 Tim. 2:3, 4.

5. Aqane tro hi së lai a xatuane la itre atr hna itöne hnene la madra i Iesu; ke qâ së lai. —Rom. 1:14, 15.

6. Wanga zöi së jë fe la meci ne la itre atr. —Ite hu. 20:26, 27.

7. Jëne mele fe hi lai koi së.—Ezek. 3:19; Rom. 10:9, 10.

8. Celë hi hatrene la ihnimi së kowe la atre lapa ezi së.—Mat. 22:39.

9. Celë hi hatrene lai laka, easa drengethenge Iehova memine la Hupuna i Nyidrë.—Mat. 28:19, 20.

10. Ketre hnëqa së lai ngöne la hmi.—Heb. 13:15.

11. Celë hi hatrene la ihnimi së koi Akötresie. —1 Ioane 5:3.

12. Aqane tro hi së lai a hane ahmitrötrëne la ëje i Iehova.—Is. 43:10-12; Mat. 6:9.

Nyipici laka, hetre itre xa kepine pala kö la easa cainöj. Jëne tro së lai a acatrene la lapaune së, me ce huliwa me Akötresie. (1 Kor. 3:9) Ngo ame la kepine ka tru matre easa cainöj, tre, ene lai kepine 12. Qa ngöne lai, drei së ju hë hnene la itre atr, maine tha idrei pena, ngo tro pala kö sa ahmitrötrëne la ëje i Iehova, me aijijë Nyidrë troa hane sa kowe la atre jelengazo Nyidrë. (Ite edomë 27:11) Itre kepine lai, matre ‘tha mano kö së o drai troa ini, me cainöjëne’ la maca ka loi.—Ite hu. 5:42.