Kola Xatua Së Hnene La Itre Angela
1 “Hana wang, ini a ce me nyipunie ngöne la nöjei drai asëjëihë uti hë la pune la fene hnengödrai.” Itre trenge ithanata la ka ithuecatre kowe la nöjei ka drenge thenge la hna amekötine hnei Iesu, hna hape: “Qa ngöne lai, trojë nyipunie a inine la nöjei nöj’ asëjëihë”! (Mat. 28:18-20) Jëne mina fe la itre angela, kola mama hnyawa laka ce Iesu memine la itre nyipi Keresiano. (Mat. 13:36-43) Sheminge me lolo e troa ce qaja “la maca ka loi ka tha ase palua” memine la itre ua celë ka mele nyipici koi Akötresie!—Hna ama. 14:6, 7.
2 Ngöne La Huliwa Ne Cainöje Së: Kola qaja amamane hnene la Tusi Hmitrötre laka hna upe la itre angela “troa nyi hlue koi angate nöjei matrane ka tro ha mel.” (Heb. 1:14) Ame ngöne lo hneijine i Iesu, hna ixatua hnene la itre angela me eatrongëne la itretre drei Iesu kowe la itre atr ka hni ne ajan kowe la nyipici. (Ite hu. 8:26 ) Ame enehila, kolo pala hi a mama kowe la itre hlue i Akötresie la aqane eatrongë angatre hnene la itre angela. Nyimutre la itre ijine kola qaja hnene la itre atr ka hape, ame ngöne la angatr a thithi koi Akötresie troa sipo ixatua, tre, kolo fe hi a fenafena la qëhnelö i angatr hnene la ketre temoë. Drei la madrine the së me thene fe la itre angela, ngöne la kola kapa la maca ne la Baselaia hnene la ite atr cili!—Luka 15:10.
3 Ngöne La Kola Cile Kowe La Icilekeu: Hna öhne hnyawa hnei Daniela, memine lo köni sinetronge i angeic itretre Heberu, me Peteru aposetolo, me itre xane ju kö ngöne la angatre a qëmeke kowe la itre itupathe ka tru, la aqane thupë angatre hnei Iehova jëne la itre angela, “ite ka mene ngöne la cat.” (Sal. 103:20; Dan. 3:28; 6:21, 22; Ite hu. 12:11) Ngacama ame itre xaa ijin, easa mekune ka hape, pëkö ixatua hne së hna kapa ngöne la easa cile kowe la icilekeu, ngo ijije troa ithuecatre koi së hnene la hna melëne hnene la hlue i Elisaia ngöne la angeice a atre laka “ala nyimu shë, nge ala xalaithe pe hi angat.” (2 Ite jo. 6:15-17) Nge maine troa thepe së qaathene la itre trejine me easë itre Keresiano, ngo thaa tro pi kö sa kucakuca. Kola qaja hnyawa koi së hnene la Wesi Ula i Akötresie ka hape: “Kola lapa la angela i Iehova xöteithi angete qoue nyidë.”—Sal. 34:7.
4 Easenyi catre hë matre xulu pi la itre trongene isi i itre angela, matre troa apaatrene la nöjei ka icilekeu memine la mus i Keriso. (Hna ama. 19:11, 14, 15) Pine laka easa treqene la drai cili, epi tro sa catre atrunyi Iehova pala hi me mejiune hnyawa laka tro sa kapa la ixatua memine la trengecatr qaathene la itre trongene isi qaa koho hnengödrai fene la mus i Keriso.—1 Pet. 3:22.