Reteret—Ketre Jëne Troa Akökötren La Huliwa Ne Cainöj?
1 Nyimutre la itre atr ka huliwa catr ekö koi maseta, ka reterete hë angatr enehila matre tru catre hë hnei traeme i angatr, ke thaa hna hnöthe hmaca kö la mel hnene la huliwa i maseta. Ngo e ka hape pë hmaca pena ha hna kuca, eje hi lai laka troa canga uti ipië la mel, kucakuca nge canga genyi hi, ke thaa hna enijëne hmaca kö la ngönetrei. Maine thaa hna kuca kö la ketre huliwa ka lolo, eje hi lai laka canga tro hi a lapan la mekun hnene la itre ejolen la sipu mele i nyidrëti kö. Hna qaja hnene la ketre zonal ne Berezil ka hape, nyimutre la itre ka reteret ka eetr qa ngöne la itre jole ka traqa koi angatr, ene laka ‘pëkö madrin, canga elëhni, hetre xou, nge pë hmaca kö hna mejiune kow nge kösë ame koi angatr tre, thaa nyipi ewekë hmaca kö troa mel ke pëhë trepen la mele i angatr.’
2 Ame pena ha kowe la itre Keresiano ka alanyim, angatr a goeën la reteret ceitun me götran la mele i angatr, kösë kola fe gojenyi angatr matre tro angatr a hane akökötren la huliwa i angatr ngöne la götrane la ua. Hetrenyi la ketre trejine ka nyiqaane troa pionie, lue wiik thupene la nyidrëti a 65 lao macatre, hnei nyidrëti hna qaja ka hape: “Thaa hnenge kö hna hane öhne la ewekë ka lolo celë ngöne la meleng, ene la itre manathithi hnenge hna kapa ngöne la treen lao macatre ne xome ni la huliwa ne pionie.” Hna cinyihane hnene la ketre trefën ka hape: “Ame la itre macatre ka sisitria catr ngöne la mele i nyiho, tre ene hi lo nyiho a nyiqaane pionie.” Eje hi laka, kola aijijën hnene la reteret kowe la itre trejin la ketre madrin ka atraqatre catr, ene la troa hane akökötren la huliwa ne cainöje i angatr, me kapa la itre manathithi qaathei Iehova.
3 Loi e Troa Hetre Itre Hna Kuca Me Hetre Thangane Itre Ej: Nyimutre la itre atr ka reteret enehila, thaa hnei angatre kö hna hane tru hnine la itre ewekë ka ahmaloeën la mel enehila, nge hna ini angatr qaane lo angatr a co troa catre huliwa. Ngacama thaa ceitune hmaca kö la trengecatre i angatr enehila me ekö lo angatr a thöth, ngo ame pe tre, ka catre huliwa pala hi angatr, nge hetre thangan qa ngön. Ame ngöne la ketre filiale, hna e la 22 koi 100 lao pionier—ngöne lai 20 000 lao trejin trahmanyi me föe, hetrenyi la itre xan ka 60 lao macatre. Ketre ixatua ka tru la hna hamën hnene la itre qatre cili ngöne la huliwa ne cainöje trootro. Hetre thangane ka loi la huliwa i angatr kowe la ekalesia i angatr, ngöne laka, angatr a ce thawa la itre hnei angatr hna melën, nge lolo catre mina fe la itre thiina hnei angatr hna eën kowe la itre trejin.—Ia. 3:17, 18.
4 Maine tro sa catre xome la huliwa ne cainöj ne la Keresiano, eje hi lai laka, troa ketre ixatua ka tu kowe la mele së laka troa egöcatr me alolon la aqane mele së. Hna nyiqaane pionie la ketre trejine föe ngöne la eahlo a reteret nge 84 lao macatre, öni eahlo ka hape: “Ka lolo catr la troa etid memine la itre atr ka hni ka ajan, ngöne laka kola xatua ni troa huliwane pala hi la mekuneng. Pine laka pëkö loto i eni, haawe tru catre la hnenge hna tro. Celë hi matre egöcatre la meleng.” Hna qaja hnene la ketre trefën ka qatre hë ka pionie ka hape: “Eje hi laka kola thupë nyiho hnene la huliwa ne cainöj troa egöcatr la ite mekun me ngönetrei i nyiho. Ce nyiho pala hi. Madrine catre nyiho, nge lolo la mele i nyio.”
5 Loi e Troa Tro Kowe La Itre Gaa Aja Ka Cainöj: Ngöne laka ijij tro angatr a saze götran, haawe kola tro hnene la itre xaa Keresiano ka reteret matre troa hane cainöje ngöne la itre götrane gaa aja ka cainöj. Ame itre xan, tre hnei angatr hna thele troa akökötren la huliwa ne cainöje i angatr, matre angatr a cainöj ngöne la ketre teritoar ka ithanatan la ketre qene hlapa kö. Ceitune la itre ka catre cainöje cili me Paulo aposetolo, ngöne laka, hnei angatr hna “kuca la ewekë celë pine la maca ka loi, matre [troa] ce hetrenyin.”—1 Kor. 9:23.
6 Hnene la lue trefën hna nyiqaane xome la huliwa ne pionie, thupene la hnei nyidroti hna hetrun la lue nekö i nyidro. Thupene la itre macatre ka nyimutre ne pionie, hnei nyidroti hna nyiqaane troa hane inine la qenehlapa qene Caina. Enehila kola troa isa 70 nge hetre munën la itre macatre i nyidro, atraqatr la madrine i nyidro troa öhne lo gurup ka ithanatan la qene hlapa lo hnei nyidroti hna ce huliwa memin, a ekalesia ha enehila. Drei la elolon la troa hetrenyi la itre trefën ka tune lai!
7 Pëkö Reteret Ngöne La Kola Cainöj: Maine nyipici laka alanyimu la itre atr ka reteret qa ngöne hna huliwa i maseta, ngo ame ngöne la kola huliwa koi Akötresie, tre, pëkö reteret kowe la itre Keresiano. Tro asë hi së a catre mele nyipici koi Iehova “uti hë la pun.” (Mat. 24:13, 14) Eje hi lai laka, kola tro la itre macatre nge ame itre xan tre, thatreine hmaca kö troa kuca la huliwa i Akötresie tune ekö lo, ngöne laka kola uti ipië trootro la mel. Ngo ketre ithuecatre ka tru la easë a öhnyi angatr e kuca asë la hnei angatr hna atrein, troa nyihlue i Akötresie! Kola amamane hnyawa koi angatr hnene la Wesi Ula i Akötresie laka, thaa tro jë kö Iehova a thëthëhmine la huliwa i angatr me aqane hnime angatr la ëje i Nyidrë.—Luka 21:1-4; Heb. 6:10.
8 Maine kolo ha easenyi trootro la itre macatre ne reteret, tune kaa matre pane hane sipo ixatua fe ngöne la thith me kepe thangane ka loi la aqane saze elanyi la itre ewekë ngöne la mele së? Jëne la ixatua qaathei Akötresie, atreine hi tro la reteret a fe gojenyi së matre tro sa hane akökötren la aqane tro sa hane xome la huliwa ka atrunyi Iehova nge ka troa hamë manathithi ka nyimutre kowe la mele së.—Sal. 148:12, 13.