Göi Itre Icasikeu Ne La Huliwa

Koi 12 Mei Me Wiike Cili

Nyima 1

10 men: Itre ithuemacanyi koi së. Iëne jë la Itre Hna Amekötiin qa hnine la Huliwa Ne Baselaia. Xome jë la itre mekune nyine ixatua ngöne la götrane 8, nge troa kuca la lue iamacany ngöne la aqane troa tro fë la zonal La Tour de Garde ne 1 Mei me Réveillez-vous ! ne 8 Mei. Loi e troa ce hamën la lue zonal ngöne la kola isa kuca la lue iamacany, ngacama caasi hi la zonal hna amaman. Amexeje jë lo hna amekötin göi ahnahna.

20 men: Itre Keme Me Thin, Xatuane Jë La Itre Nekö i Epuni Troa KöKötr Ngöne La Ua. Cainöj hna nyitrepen hnene la itre mekun hna xome qa hnine la itus, École du ministère, götrane 9-12 me 21-38. Xatuane jë la itre keme me thine troa xome la itre xaa mekune matre troa nyitrepen la ini tusi angatr memine la hnepe lapa; nge loi e eje thei angatr la ajan troa inin la itre nekö i angatr troa kökötr ngöne la huliwa ne cainöj. Loi e troa wange hnyawa la itre mekune ka tru nyine troa xom, matre troa xatuan la itre ka co troa hane akökötren la atreine i angatr.

15 men: “Hna Ahnithe Koi Së La Maca Ka Loi.”a Canga wange ju matre tro la caas maine lue trejin a nango qejepengöne la isa aqane saze angatr la aqane mele i angatr, matre troa akökötren la isa aqane cainöjëne angatr la maca ka loi.

Nyima 46 me thithi ne nyipun.

Koi 19 Mei Me Wiike Cili

Nyima 62

15 men: Itre ithuemacanyi koi së. Troa cile fë la hna ithingë. Ithanatane jë la “Xupi Uma Ne Baselaia e Cailo Fen Ngöne La Itre Xaa Nöj Ne La Götrane Ahië Ne Erop.” Qaja jë ka hape ame lo itre ahnahna hna kuën hnine la Kees Göi Xupi Uma Ne Baselaia, tre hna xome itre eje matre troa sajuën la Xupi Uma Ne Baselaia ngöne la itre nöje ka tru gaa jole göi manie me thatraqane fe la itre teritoar hna elemeken hnene la filiale së. Qaja jë la ketre hna amekötin göi cainöj e 29 Mei.

15 men: Itre ihaji koi së.

15 men: “Atrunyi Iehova Jë Hnene La Troa Cainöj Ngöne La Nöjei Ijin.” Cainöj nge troa ce ithanatan. Ame ngöne la kola ce ithanatan la paragaraf 3, hnyingëne jë kowe la itre atren la icasikeu la nyine troa qaja matre troa nyiqaane ithanatan la Tusi Hmitrötr ngöne la itre ijine celë: (1) ngöne la kola itö ngöne hna maketr, (2) ngöne la kola ti kar, (3) kowe la atre lapa ezi së ka nyihnyawa hnalapa, (4) kowe la sine ce huliwa së ngöne la hna huliwa, (5) kowe la sine ce ini së ngöne la hna ini. Canga hnëkëne jë matre troa qaja hnene la ketre trejin la aqane cainöje i angeic ngöne la nöjei ijin, memine la thangane ka lolo hnei angeice hna kapa.

Nyima 135 me thithi ne nyipun.

Koi 26 Mei Me Wiike Cili

Nyima 174

10 men: Itre ithuemacanyi koi së. Amekunëne jë la itre trejine troa hamën la rapor ne hna cainöj ngöne la treu Mei. Ithuemacanyine jë la hna amekötine göi cainöj e 29 Mei. Xome jë la itre mekune nyine ixatua ngöne la götrane 8, nge troa kuca la lue iamacany ngöne la aqane troa tro fë la zonal La Tour de Garde ne 15 Mei me Réveillez-vous ! ne 22 Mei; maine caasi hi la hna amaman, ngo loi e troa ce hamëne lue ej. Ame ngöne la kola isa nyipune lue ej, hamëne ju kowe la atr ka thaa kapa kö la itre zonal la tarak hna hape, Ajane Kö Nyipunie Troa Atre Hnyawa La Tusi Hmitrötr?

10 men: Kola Sa La Itre Hnyinge i Nyipunie. Cainöj. Wange hmaca ju la itre xaa mekune nyine ixatua ngöne la aqane cainöj jëne telefon hna hamën ngöne la Huliwa Ne Baselaia ne Febuare 2001, götrane 6, paragaraf 12-15, maine itre xaa mekune pena ka hetre thangane ka loi ngöne la nöje i epun. Maine thaa nyipi eweke kö ngöne la nöjei epuni la mekune celë, saze pi troa ithanatane pena ha la ketre mekun.

25 men: “Nyipici La Wesi Ula i Akötresie.”b Xome jë la itre hnying hna hamëne hë. Sipone jë kowe la itre atren la icasikeu troa qeje mekune ngöne la aqane xatua angatr troa atre la nyipici, ngöne la kola xome hnene la itre trejin la Tusi Hmitrötr troa sa la itre hnyinge i angatr. Ame ngöne la kola ce ithanatan la paragaraf 4, tro la ketre trejin ka maca troa cainöj a iamacanyin la aqane troa xome la Tusi Hmitrötr ngöne la kola xötrei ithanata memine la ketre atr; troa xome la itre mekune nyine ixatua hna hamën ngöne la hna cinyihan hna hape, “Loi e Troa Atreine Thawa Hnyawa La Wesi Ula i Akötresie.”​—km 12/01 g. 1 par. 3-4.

Nyima 188 me thithi ne nyipun.

Koi 2 Juun Me Wiike Cili

Nyima 210

10 men: Itre ithuemacanyi koi së. Ithuemacanyine jë la hna amekötine thatraqane e 9 Juun. Wange hmaca ju la caa maine lue mekune nyine ixatua qa hnine la sine cetrone la Huliwa Ne Baselaia ne Januare 2002, göi troa tro fë la boroshüre Thele me itus Atrehmekune. Qaja jë la ketre hna amekötin göi cainöj e 9 Juun.

20 men: Nyipine Jë La Ikötresae​—Hna Amekötine Lai Hnei Akötresie. Cainöj nge troa ce ithanatan. Ngöne la itre nöje ka nyimutre, hna majemine troa ce lapa la itre trahmanyi memine la itre föe nge thaa cile kö ngöne mus. Ame itre xan, tre, öni angatr ka hape hetrenyi la itre thangane ka lolo qa ngöne la aqane ujë cili. Amamane hnyawa jë la mekune i Tusi Hmitrötr, nge qaja hnyawa jë laka ame la faipoipo, tre ewekë i Akötresie. (rs g. 224-5) Maine troa ce mele la trahmanyi memine la föe nge thaa ka ikötresae kö nyidro, tre kolo lai a kuci ngazo. ( fy g. 17) Maine nyimutre la ka mekune ka hape thaa ngazo kö e troa ce lapa trefën qëmekene troa faipoipo, ngo kola mama hnyawa ngöne la itre ka ce lapa trefëne ka nyimutre laka canga jole hi la faipoipo i angatr, nge thaa ka cile huti kö ej. (g02 8/3 g. 29; g92 8/9 g. 28; g91 8/5 g. 28) Kola atrunyi Iehova hnene la itre Keresiano, ngöne la angatr a trongën la itre hnei Nyidrëti hna amekötin. Ame la angatr a tro thenge la mekune i Akötresie, tre eje hi lai laka angatre fe a hane ketre sipu kepe manathithi qa ngön.​—Is. 48:17, 18.

15 men: Tro Sa Kepe Thangane Tune Kaa? Troa kuca hnene la atre thupëne la ini, nge troa ce ithanatan. Hne së hë hna nyiqaan ngöne lo treu Januare la itre hna amekötin ka hnyipixe göi Ini Ne Cainöje Trootro Qaathei Akötresie. Nango wange hmaca ju la itre xaa götrane ne lai ini. Amamane hnyawa jë la manathithi hna kapa qaane lo kola xejë lai ini. Hapeu tru catre kö ka thele troa hane saen kowe la ini? Hapeu atraqatre kö la aja ne la itre hnainin troa kuca la itre hnëqa? Tune kaa la aqane troa kepe thangane ka loi hnene la hnainin, qa ngöne la itre hna amekötin ka hnyipixe göi troa hamë eamo? Sipone jë kowe la itre atren la icasikeu troa qaja la itre thangane ka lolo hnei angatr hna isa kapa ha, memine la aqane troa xatua angatr elany hnene la porogarame ka hnyipixe cili.

Nyima 225 me thithi ne nyipun.

[Ithueamacany]