“Thauzane Macatre Ka Hnyipixe—Tune Kaa Jë Fe La Mele i Nyipunieti Elany?”
1 Kola isa hnyinge tune lai hnene la itre atr e cailo fene hnengödrai. Ngacama tru catre la itre ewekë hna kuca ha hnene la atr ngöne la macatre ka nyimutre, ngo ka hleuhleu pala hi la mele i angeic, pine laka, thaa paatre kö lo itre jole hna cile kow hnei angeic, a itre thauzane macatre hë enehila. (Iobu 14:1; Sal. 90:10) Matre drei la hne së hna troa mejiune kow?
2 Ame ngöne la itre treu Okotropa me Nofeba, hetrenyi la ketre hnepe ijine ka lolo ka aijijë së troa hamëne la nyine sa la hnyinge celë kowe la itre atr ka lapa ezi së. Jëne nemen? Jëne la Itre Ithuemacanyi Ne La Baselaia Na. 36. Ame la taan ke, “Thauzane Macatre Ka Hnyipixe—Tune Kaa Jë Fe La Mele i Nyipunieti Elany?” Ame ngöne la lue pane wiike ne Okotropa, tro së a tro fë la itre zonal, La Tour de Garde me Réveillez-vous ! Thupene lai, tro hmaca pena ha së a hane catre tro fë la Itre Ithuemacanyi Ne La Baselaia Na. 36, qaane e thupene hmi 16 Okotropa, uti hë e Drai Ka Tru 17 Nofeba. Ngöne la hnepe ijine huliwa cili, tro sa pane tupathe troa tro fë itre eje ngöne la nöjei drai ne la wiik. Ame ngöne la itre mecixeni me sabath, tro sa ce tro fë itre ej, memine la zonale hna xötrei kapa.
3 Tro Kö Së a Hane Nue La Trenge Catre Së Kowe La Huliwa Cili? Loi e troa elemekene la huliwa cili hnene la itre qatre thup, me itre drikona, me itre pionie la huliwa cili, pine laka, angatre la ka weje mekene la trongene la itretre cainöj. Nyimutre la itre trejine ka thele jëne troa hane pionie ka ixatua ngöne la caas, maine ngöne lai lue treu ne huliwa. Itre xane a Tupathe pe troa akökötrene la aqane cainöje i angatre ngöne la hnepe ijine cili.
4 Loi e troa xatuane hnene la itre ka xomiujine la itre Ini Tus, lo itre atrene la gurupe i angatr, troa hane catre tro fë la Itre Ithuemacanyi Ne La Baselaia Na. 36. Maine jë troa hetrenyi la itre trejine ka nanazije matre thaa cainöje hë angatr. Loi e troa wai angatre hnene la itre qatre thup, matre troa hamëne la ixatua ka ijije koi angatr. Maine jë troa sipone kowe la itre xaa trejine ka maca troa cainöj, matre pane ce cainöje me angatre isa ala caas, ngöne lai itre treu cili. Maine jë troa hane amejëne hmaca la ajane troa cainöj, a hnene hi la hna hane tro fë la itre ithuemacanyi cili.
5 Celë mina fe ketre ijine lai ka ijije kowe la itre hnainine troa nyiqaane cainöj, ene lo itre ka easenyi hë troa afenesine la itus Atrehmekune nge mama ha laka, ijije fe hë troa ketre ka cainöje ngacama thaa bapataisone petre kö. Atreine fe troa hane xome la huliwa ka lolo cili, hnene la itre nekönatr.
6 Thaa tro kö a nyi ejolene menune la aqane troa nyiqaane ithahnata. Qaja jë ka hape:
◼ “Eni a pane thele ijine troa hane tro fë la maca celë ka nyipi ewekë catr, nyine ixatua kowe la nöjei hnepe lapa asë e celë e [ëjene la tribu maine nöj]. Hane la ketre ipepa matre tro nyipëti a hane e.” Thaa nyipi ewekë kö troa qatrenge la Itre Ithuemacanyi Ne La Baselaia Na. 36, xome trongëne ju hi.
7 Troa Hnëkëne Hnyawa La Itre Icasikeu Göi Cainöj: Loi e troa wange hnene la itre qatre thup la itre hna amekötine göi cainöj, matre troa hmaloi nge hetre thangane la huliwa kowe la itre trejine asë. Troa xecie hnyawa kowe la atre thupëne la huliwa ne cainöj, laka, hna hnëkëne hnyawa ha la itre teritoare ka nyimutre, me itre setroa hna troa cainöje ngön, matre tro pala hi a hetre nyine huliwane hnene la nöjei ka troa cainöj. Maine ijije hi, loi e troa hnëkë matre troa kuca la itre icasikeu göi cainöj, thatraqane la nöjei drai ne la wiik, göi itre mecixeni me sabath, nge e nöjei heji lapa fe. Troa kuca fe matre troa cainöje ngöne la itre hnaipajö hej, ijine ka ijije troa ithahnata memine la itre ka ini, me itre ka canga fenesi qa hna huliwa, me itre xane ju kö.
8 Maine Pëkö Atrene La Itre Uma: Ame la aja së ke, ene la troa ithahnata kowe la itre atr ka ala nyim. Maine pëkö atrene la itre uma hne së hna cainöje ngön, nyihatrene ju la itre hnalapa cili, nge tupathe jë troa hë ngöne la itre hawa ka isa pengöne ne la drai. Maine paatre pala hi angatr nge wiike tixenuë ne kolo pe hi a huliwa, haawe, amë ju la isa caa Ithuemacanyi Ne La Baselaia Na. 36 ngöne la itre hnalapa cili, nge troa thupëne matre thaa tro kö a öhne hnene la itre atr ka tro ezin. Ame ngöne la itre götrane ka jole e troa ketr, maine pena tru catre pala ha hnei teritoare hna troa kuca ngöne la hnepe ijine ka co hi, maine jë tro la itre qatre thupe ne la ekalesia a amekötine ka hape, troa amë la Itre Ithuemacanyi Ne La Baselaia Na. 36 ngöne lo kola xötrei cainöje ngöne la itre uma ka pë atren.
9 Loi e Troa Wange La Nyine Troa Kuca! Loi e troa catre hnene la itre ekalesia troa kuca asë la itre teritoare hna athipe koi angatr, qëmekene troa afenesine la huliwa e 17 Nofeba. Maine ka tru catre la teritoare i nyipunie, haawe, ma troa cainöje caasi la itre xaa trejin, ngo ngöne la itre götrane ka ijije troa cainöje caas. Ketre, kolo fe lai a aijijëne troa ketr la itre atr ka ala nyim, ka ajane troa atre la nyipici. Loi e tro pala hi së a xome la ithuemacanyi göne la itre atr asë ka hetre hni ne ajan.
10 Troa canga ithahnatane hnene la itre qatre thupe la etrune la itre zonale hna troa kapa hnene la ekalesia, me komaadëne thenge lai. Thaa nyipi ewekë kö troa komaadëne la Itre Ithuemacanyi Ne La Baselaia Na. 36, pine laka, hna isa iupi fë mekötine kö itre eje hnei sasaiatri, kowe la itre ekalesia. Troa isa hamëne kowe la itre pionie hut, me itre pionie lapa, me itre pionie ka ixatua, la 80 lao Itre Ithuemacany, nge ame pëhë kowe la itre xan, ke, isa 30 maine 40. Troa tru catre hnei tarak hna troa kapa hnene la itre xaa ekalesia, qa ngöne laka, tru la itre teritoare i angatr. Haawe, ka hnëkë fe hë nyipunie, me lapa treqene la ijine troa hane ce huliwa trootro me itre ka troa xome la huliwa cili ka ketre pengöne kö? Drei la ketre madrine ka tru, ene la troa aijijëne la nöjei atr asë, troa atre la hnei Akötresieti hna thingehnaeane thatraqane la itre drai elany!