Loi e Tro Sa Hmekëne La Itre Huliwa i Akötresie Ka Seming
1 Ase hë së lo ce kapa lo köni drai ne icasikeu ka mingöminge ngöne lo ijine kovasio ne distrik hna nyi taane ka hape “Kuca Thenge Jë La Wesi Ula.” Hne së hna pane amë la itre xaa huliwa së, matre troa hane xemine la itre huliwa i Akötresie ka mingöming. Hna hnëkëne la porogarame matre troa akökötrene la lapaune së koi Akötresie me kowe la Wesi Ula i Nyidrë, me acatrene la aqane imelekeu së me Nyidrë, me hane xatua së troa catre cainöj. Nemene hë la aqane kepe thangane së la itre ini hna hamëne koi së?—Ioane 13:17.
2 Kola Trongëne La Wesi Ula i Akötresie Hnene La Itre Fami: Hetre ixatua hna hamë së hnene la ketre cainöje hna thewe xötreqan, lo hna hape, “Trongëne jë la Wesi Ula i Akötresie” matre troa wange hnyawa la pengöne la itre fami ngöne la götrane la ua. Hetre ajane la itre nekönatre troa kapa la ini. Haawe, kola ithuecatre kowe la itre keme me thine ka hmi troa eköthe hnyawa la hnepe lapa i angatre ngöne la ua, jëne la ini Tusi Hmitrötre hnine la fami. Nyimutre la itre hene lapa ka ce ithahnatane me itre nekö i angatre ka co, la boroshüre ka hnyipixe hna hape, Ijije Fe Tro Nyipunie a Ce Sinee Me Akötresie! Tro lai a xatuane la itre nekönatre troa ahmadradrane la aqane imelekeu i angatre me Iehova me hane xomi Nyidrë nyine hnapo i angatr. Keme me thine fe, inine jë la itre nekö i nyipunie troa nyipiine la itre thiina i Akötresie. Fe amamane jë la sipu ihnimi nyipunie koi Nyidrë, me kowe la itre huliwa i Nyidrë. (Sal. 103:2) Ce huliwa jë matre troa ce eköthe me eatrëne la itre mekune ka tru ngöne la ua, me troa hane catre nyihlue Iehova.
3 Wesi Ula i Akötresie a Thinane La Itre Jë Së: Atraqatre la madrine së troa kapa la itus ka hnyipixe hna hape, La prophétie d’Isaïe, lumière pour tous les humains I. Hapeu, ase hë së nyiqaane e la pane itusi cili? Kola perofetane hnene la itusi Isaia la itre hulö hna amekötine hnei Iehova thatraqane la itre nöje wanaithihlë, nge kolo fe a troa kapa la itre manathithi hnene la nöje i Iehova, jëne la Baselaia. (Is. 34:2; 35:10) Eje mina fe a eköthe la lapaune së me mejiune së koi Iehova, me kowe la aqane huliwa i Nyidrë.—Is. 12:2-5.
4 Ngöne la easë a e la itus La prophétie d’Isaïe, lumière pour tous les humains I, ke easë a öhne la ecatrene me ehutine la lapaune i Isaia koi Iehova, ngacama angeice e hnine la iangazo. Ame la Iehova a ihë troa tro fë maca i Nyidrë, ke, Isaia a canga sa ka hape: “Inieti la, upengënieti jë.” (Is. 6:8) Maine tro sa lapa mekune la ajane ka eje thei angeice me aqane waimekune i angeic, ke, tro lai a xatua së troa catre cainöjëne la maca ka loi, matre “nyine anyipicine kowe la nöjei nöj.”—Mat. 24:14.
5 Maine tro sa wangatrune hnyawa la itre huliwa i Iehova, aqane tro fe së lai a atrunyi Nyidrë. Haawe, loi e ka tru ngöne la hni së la hnëqa së, ene la tro së a itretre trongëne la Wesi Ula i Akötresie!