Nemene La Nyine Tro Së a Qaja Kowe La Atr Ka Hmi Bouddhiste?
1 Ame ngöne la itre xaa nöj, ala nyimu catre la itre atr ka xome la bapataiso, itre ka hmi Bouddhiste angatre ekö. Nemene la ka upi angatre troa kapa la nyipici? Tune kaa la aqane tro së a tro fë la maca ka loi kowe la itre Bouddhiste?
2 Loi e Troa Hetre Hni Ne Ajane Së: Nyimutre la itre Bouddhiste ka qaja ka hape, thaa hna ee angatre kö kowe la nyipici, hnene la ejuine la itre mekune hna qaja koi angatr, ngo hnene pe la aqane tro fë itre ej, laka, hetre hni ne ajane me ihnimi nyipici ngöne la aqane cainöj. Hna haine hnene la ketre föe ne Azia ka mele e Etats-Unis, la elolone la thiina ne la ketre trejine föe ka wai eahlo pala hi, ene pe ajane jë eahlo troa inine la Tusi Hmitrötr. Ngacama thatreine kö eahlo troa qene Papale hnyawa, ngo hna xomihni pala hi hnene la trejine föe. Maine kola kucakuca la föe, maine thaa ijije pena kö troa etid, haawe, kola nango tro la trejine föe me acaa jea troa ibozu me sa drai hmaca göi etid hnapin. Hetre thangane pi hë la huliwa ne la trejine föe, ngöne laka, hna xomi bapataiso hnene la lue nekö i eahlo trahmany, memine la thine i eahlo ka qatre föe hë. Hnei eahlo hna bëeke hmaca kowe la nöje hna hnaho eahlo ngön, me xatuane la itre xaa atr ka ala nyimu troa inine la nyipici. Kola huliwa enehila la ketre nekö i eahlo trahmanyi hnine la Bethela. Drei la itre manathithi hna kapa qa ngöne la hna xome la tulu qaathei Iehova, ene la troa hetrenyi la ‘thiina ka loi memine la ihnim i Nyidrëti kowe la atr’!—Tito 3:4.
3 Mekune Ne La Itre Bouddhiste: Kola mama laka, ka hane wangatrune fe la itre Bouddhiste la itre xaa mekune hna traqa fë koi angatr, ngo ame pe ke, thaa nyipi ewekë kö itre eje koi angatr, pine laka hetre mekune hë hnei angatre hna catre fë. Celë hi matre nyimu pengöne aqane trotrohnine angatre la itre ini hnei angatre hna lapaune kow. Ame la ketre taane mekune hna inine ngöne la ketre götrane la hmi Bouddhiste, ke, ene laka, nyimu akötrene la mel, ngo jëne la ketre lai, nyipune ju hi lo lai mele lo hna hape, ame la atr troa anyimua hnahon, ene pe kola lö hnine pena ha la itre xaa mele ka ngazo. Hna qaja fe ka hape, atreine hi troa utretre qa ngöne la aqane mele cili, ene la troa anyimua hnahone hmaca, ngo loi e troa traqa kowe la Nirvana; celë hi ketre mele hna thatreine kö troa qeje pengön, pine laka, thaa ketre göhnë kö, maine ketre ewekë ka traqa, ngo ene la pëkö, a gufa kö la akötr memine la ngazo. (Wange ju la boroshür, Nemene La Pengö Së Ngöne La Easë a Mec?, götrane 9-10.) Kola hapeue la koi së? Ka pëkö thangane ka loi la troa isi ithahnata memine la itre atr ngöne la itre ini ne la itre Bouddhiste. Loi pe troa ithahnatane me angatre la itre jole ka traqa koi së asë enehila.
4 Amamane Jë Laka Caasi Hi La Itre Aja Së: Pine laka, ame koi itre Bouddhiste, ke, ame la mele e celë fen, tre mele ne akötr, haawe, thatreine kö angatre troa kapa laka, hetre mele ka thaa ase palua kö e celë fen. Ngo eje hi laka, aja së asë hi troa hetre madrine ngöne la itre hnepe lapa së, me apaatrene palua la akötr, me troa atre la kepine matre easë a mel. Hanawange la aqane troa amamane la enyipi ewekëne la itre aja ka eje the së asë.
5 Tupathe jë la aqane nyiqaane ithahnata celë:
◼ “Kola akötre menu enehila la itre atr, ngöne la fene celë. Nemene la ewekë hnei epuni hna mejiune kow, ka troa apaatrene elanyi la akötr, memine la pë ewekë? [Nue pi troa sa.] Hetrenyi la ketre ewekë hna thingehnaeane hë ekö, ka akeukawane la hning. [E jë la Hna Amamane 21:4.] Eje hi laka, thaa eatre pala kö la hna thingehnaeane cili, ngo e traqa ha eje elany, troa hetre ajane së troa hane melëne fe lai; tune kaa fe epun?” Thupene lai, hamëne ju la ketre itus ka qeje pengöne la aqane troa paatre elanyi la akötr.
6 Qaja jë kowe la ketre thupëtresij, ka hape:
◼ “Maine jë easë asë hi a hnehengazone la emanane la itre mekune ka ngazo, me itre ethane itre eje thene la itre nekö së. Pine nemene matre kola elë nyimenyime la kuci ngazo enehila, thene la itre thöth? [Nue pi troa sa.] Atre fe kö epuni laka, hna perofetane petre kö lai ekö hnine la ketre itusi hna nyiqaane cihnyihane hë, qëmekene troa mama la hmi Musulman, me hmi Keresiano, me hmi i itre Hindous? [E jë la 2 Timoteo 3:1-3.] Kola mama laka, ngacama kola elë la inamacane ne la atr, ngo kolo pala hi a ngazo catre la itre ewekë hna ahnithe hë hnei Tusi Hmitrötr. [E jë la xötre 7.] Hetre ixatua hnenge hna kapa jëne la itusi celë, matre eni a trotrohnine hnyawa la nyipici, ewekë hna thatre hnene la itre atr ka ala nyim. Hapeu, epuni kö a hane ajane troa e ej?” Hamëne jë la ketre itusi maine boroshüre ka ijij.
7 Kola metrötrëne la Tusi Hmitrötre hnene la itre Bouddhistes, ceitune me itre hna cinyihane ka hmitrötr. Qa ngöne lai, loi e tro së a hane e la Tusi Hmitrötr. (Heb. 4:12) Maine thaa madrine kö la atr la aqane mele ne la itre atr ne la itre götrane ahuë, haawe, amamane ju koi angeice ka hape, ame asë hi la itre ka cinyihane la Tusi Hmitrötre ke, itretre azia angatr, angetre fetra qa ngöne la itre götrane ahië.
8 Nemene La Itre Itusi Ka Hetre Thangane Ka Loi? Hna amamane hmekuje thatraqane la itre Bouddhiste la tarak Will Suffering Ever End? nge hna fejane eje qene Caina, Zapo, Singhalese, me qene Thai. ketre, nyimutre la itretre cainöje ka huliwane hnyawa la itre itusi celë: L’humanité à la recherche de Dieu, me Jëne madrine kowe la fami, me Les jeunes s’interrogent—Réponses pratiques; itre boroshüre, “Voici! Je fais toutes choses nouvelles,” me Quel est le but de la vie—Comment le trouver?; nge maine hetrenyi pala kö the së la Itre ithuemacanyi ne la Baselaia Na. 35, Hapeu tro kö a ej la ihnimikeu thene la nöjei nöje asë? Ala nyimu la itre Bouddhiste ka kapa enehila la nyipici, angatre a pane inine la Tusi Hmitrötr, jëne la boroshüre Thele, nge thupene lai, kola sisedrëne ngöne la itus Atrehmekune.
9 Maine hna qaja hnene la itre mesinare ne la hmi Bouddhiste ka hape, pa i angatre kö traqa hui Paulo e Athenai, 400 hadredre macatre qëmekene tro Paulo a cainöje e cili, ngo thaa nyipi mama kö la enyipicine lai, pine laka, pëkö atr hna iöhnyi memine hnei Paulo, ka qaja la itre mekune ne la hmi Bouddhiste. Ngo atre hi së la aqane thele Paulo troa cainöje kowe la nöjei atr asë. Hnei nyidrëti hna thele troa “nyi hlue i angat’asë” matre “catre troa amele itre xan.” (1 Kor. 9:19-23) Atreine fe tro së a hane kuca tune lai, me amamane kowe la itre xaa atr la aja së troa xatua angatr, nge matre tro fe angatre a hane nyipi ewekëne la mejiune ka eje the së, itre ka anyipicine kowe la nöjei atr asë hne së hna iöhnyi memin.