Ini Mus Me Itre Aja Ngöne La Götrane La Ua
1 Maine tro së a ini hnyawa ngöne la easë a thöth, haawe, ijije hi tro së a hetrenyi la atreine ka nyipi ewekë catre kowe la mele së, ngöne laka, kola aijijë së troa atreine e tus, me cinyanyi hnyawa, me hetrenyi la atrehmekune ngöne la géographie, me Histoire, me Mathématiques, me Science. Qa ngöne lai, ijije hë tro së a inine la aqane troa mekune hnyawa, troa thele ewekë, troa thele nyin la itre jol, me hane hamë mekun. Troa hetre thangane ka loi elanyi kowe la mele së, la itre ini hne së hna kapa. Nemene la eloine la ini ngöne la itre aja së ngöne la götrane la ua, ini ka troa xatua së troa hetrenyi la “inamacane memine la mekun”?—Ite edomë 3:21, 22.
2 Loi e Tro Së a Nyipine La Huliwa i Akötresie: Ame petre kö la easë a ini, nyipi ewekë tro së a drenge la itre ka ini së, me kuca hnyawa la itre qa hna hamëne koi së. Maine tro së a atreine e tusi hnyawa, me hetre ajane troa ini, haawe, tro ha hmaloi koi së troa inine la Wesi Ula i Akötresie, me ketre catre eatrongëne pala hi la mele së ngöne la götrane la ua. (Ite Huliwa 17:11) Loi e troa nyipi ewekëne la ini mus, matre thaa tro kö a jole e tro së a hamëne ngöne la easë a cainöj, lo itre ixatua hmekune la itre aja ka eje thei angatr, me itre ini hnei angatre hna lapaune kow. Ka lolo catre mina fe la ini hne së hna kapa qaathei mus, pine laka, eje a aijijë së troa hane kuca hnyawa la itre hnëqa së hnine la organizasio i Akötresie.—Wange ju la 2 Timoteo 2:21; 4:11.
3 Inine Jë Troa Isa Xomi Hnëqan: Maine tro epuni a isa xome hnyawa la itre hnëqa i epun, atreine fe tro epuni a hetrenyi la atrein, ka nyipi ewekë thatraqane la mele i epuni elany thupene la itre ini i epun. (Wange ju la 1 Timoteo 5:8.) Iëne hnyawa jë la itre götrane ini ka troa aijijë epuni troa öhnyi huliwa. The goeëne hmekuje kö la itre götrane ka pëkö huliwa e pune la hna ini, ngo wange ju fe me inine la ketre métier, epuni a troa öhnyi huliwa qa ngön. (Ite edomë 22:29) Ketre ini la ka troa xatua epuni troa ketre xome la itre hnëqa i epun, maine epuni a ajane troa hane cainöje ngöne la itre götrane gaa aja atre cainöj.—Wange ju la Ite Huliwa 18:1-4.
4 Maine tro së a ini hnyawa ngöne la easë a co, haawe, atreine hi tro së a akökötrene la huliwa ne cainöje së. Catre pi së troa hetrenyi la itre atreine ka aijijë së troa isa kuca la itre hnëqa së, nge easë pala hi a kökötre ngöne la huliwa i Iehova. Qa ngöne lai, nyipi ewekë catre la ini, pine laka, eje a troa nyine ixatua koi së, matre troa eatrëne la itre aja së ngöne la ua.