Nemene La Aqane Ujë i Nyipunie Qëmekene La Itre Atr Ka Meije Mekun?
1 Ame la ka meije mekun, ke, ene la atr ka mele menu, pë hë mekun, maine etë la hni; ketre, pëkö nyipi ewekë koi angeic, maine pëkö caa ihnimi kowe la ketre atr. Celë hi ketre aqane ujë lai ka jole catr, hna öhne ngöne la hna cainöje trootro. Tuneka la aqane wange epuni la aqane ujë cili? Hapeu, nanazije hë epuni cainöje trootro, pine laka, ceitune me ketre ehnefe ka hace koi epuni la ewekë cili? Tuneka la aqane tro epuni a elë hune la jole cili, matre troa hane kapa la maca ne Baselaia hnene la itre atr?
2 Ame la ewekë hnapan, loi e troa pane atrepengöne hnyawa la kepine matre, kola meije la mekune ne la itre atrene la nöje i epun. Ma thaa madrine jë kö angatre kowe la aqane huliwa ne la itre hene politik, me itre hene hmi? Maine, angatre pena a mekune ka hape, ame la itre jole hnei angatre hna melën, ke, ka pë nyin? Pë jë pena kö mejiune i angatre kowe la itre hna thingehnaean, göi troa hetrenyi la mele ka loi? Maine jë pena, angatre a pane ajane troa öhne enehila la itre manathithi, nge thupene lai, angatre pë hë a hane jë fe nyipiewekëne la itre mekune ngöne la götrane la ua?
3 Amamane Jë La Enyipiewekëne La Mejiune Ne La Baselaia: Tro la Baselaia a hamë nyin la nöjei jole asë. Qa ngöne lai, maine ijije koi së troa cainöjëne lai, haawe, loi e tro së a qaja la itre hna thingehnaeane göne la Baselaia, me hane qaja lo itre mekene tusi ka amamane hnyawa la mekune cili, ngöne la kola öhne laka, thaa ijije kö troa xome la ketre xötre e hnine la Tusi Hmitrötr. (Heb. 4:12) Ngo, nemene la aqane tro së a eatrongëne la itre atr, matre ithahnatane jë së me angatre la itre hna thingehnaeane göi Baselaia?
4 Nyipi ewekë tro la itre atr a trotrohnine la aliene la tronge së. Loi e tro angatre a öhne hnyawa ka hape, easë a hane amamane fe la ihnimi së kowe la angetre lapa easenyi së, me kowe fe la nöjei atr asë. Qa ngöne lai, atreine hi tro së a hnëkëne hnyawa la ketre hnying, tune la hna hape, “Hapeue fe la mekune i epun, ngöne la epuni a wange la [ketre jole ka akötrëne la itre atr asë], ijije kö troa hetre nyin?” Maine pëkö thangane la aqane nyiqaane ithahnata celë, haawe, tupathe ju pena la ketre.
5 Ame ngöne la ketre götrane gaa tru atren, hna wangatrehmekune hnene la itre trejine ka cainöje trootro, laka, nyimutre catre la itre ka xele ma drenge la maca ne Baselaia, haawe, loi e tro angatre a inine troa xome la ketre aqane nyiqaane ithahnata, ka troa ahlëne la aja ne la itre atr cili. Hna tupathe hnene la lue trefëne la ketre aqane nyiqaane ithahnata, ngöne la nyidroti a tro fë la itus Connaissance, öni nyidroti ka hape: “Nyipi ewekë kö troa inine hnyawa la itre atr matre troa sisitria la aqane mele ngöne la fene enehila, tuneka fe la mekune i epun? Hapeue fe la atrehmekune qa hnine la Tusi Hmitrötr, thaa eje kö lo lai ka troa nyi sinetrongene la ini nyine tro së a kapa?” Köni itusi hnei nyidroti hna hamëne ngöne la hnaipajö, caasi hna kapa hnene lo föe ka qaja ka hape, ase hë eahlo e asë la itus, Connaissance, nge eahlo fe a ajane troa hane inine la Tusi Hmitrötr.
6 Tupathe jë la itre aqane nyiqaane ithahnata ka isapengöne kö ngöne la epuni a iöhnyi memine la itre atr ka meije mekun; ketre, thele jë fe la itre hnyinge nyine enijëne la mekune i angatr, nge the wangacone kö la mene ne la Wesi Ula i Akötresie. Maine hne së hna huliwa tune lai, haawe, atreine hi tro së a xatuane la itre xaa atr troa hane kapa la mejiune ka eje the së, ene la mejiune kowe la ketre Baselaia ka mingöming.